Kan naupan laia kan infiamna thenkhat

January 19th, 2012 2:00 pm by ahooma_

Kan naupan laia kan infiamna leh kan intihhlim ve na thenkhat kha thluaithlum kual vak loin ziakchhuak dawn teh ang:-

In-bihruksiak: In bihruksiak ah hian tihdan chi hnih kan nei a, in dapa awih leh awih loh a ni. In dapa awih ah kha chuan a changtu(a zawngtu) khan min hmuh kim hmaa kan dapa hman chuan a chang nawn leh thin. A pangngai zawkah chuan min hmuhkim vek hunah a hmuh hmasak ber kha a chang ve leh mai thin. In dapa kan tih hian achang chuan a ngai an chang nawn tlut tlut thin a, a phakar deuh chuan an chhungte’n an koh miah loh pawh hian, ‘eih ka lo haw nghal’, an tia, an haw daih thin.
In theng kah: Pawl pahnih ah kan inthen a, kan indo lem a ni deuh ber. Lehlam pawl kan hmuh chuan ‘theng mawia’ kan tia, anni’n, ‘ka pil hman’ an lo ti deuh ngei bawk a, kan inhnial luai luai thin a, a hming pakhatah pawh ‘inhnialbuai’ kan tih phah nghe nghe. A hun lai mipa naupang infiamna ah kha chuan a nuam ber pawl a ni ve.
In burchhe vawm: In bihruksiak nen a in ang tep. Sangha tin bur ruak chhungah lung kan thun a, a tlang kan chhu chip leh a, thin zawngin a ri raih raih thei a ni. Chu burchhia chu hla tawkah kan vawm vak a, a changtu tur khan ava zawng a, a zawn chhungin midang kan lo biru a, a hmuh hnuah a dahna tura kan siam, a langsar laiah a dah a, midang biru ho chu a zawng ta thin a ni. A hmuh kim hmaa bur chu tuin emaw thinrik emaw, a pet per emaw hman chuan a chang nawn leh thin. A tira a changtu tur hi ‘hik sek sawk(?)’ in kan zawng thin.
In um: In um a ni deuh tawp. Pawl pahnih ah kan inthen a, a changtu tur lam kan ruat fel hnu ah a chang lo lam tur an tlanchhia a, ‘tiiiaam’ an tih hnu ah a changtu pawl hoin kan um vak a, kan man kim vek hnuah lehlam pawlin min um ve leh thin. Pelhchin pel a tlanchhiat a awl hle.
In vanram leh hremhmun: Heihi hmeichhe ho nen kan tiho thin a, hmeichhia leh mipa inelna ang deuhah pawh kan hmang thin. Pawl pahnihah in siamin, inhlat tawk takah line pahnih kan siam thin. Kan pawl leader khan hming lem min vuah vek a, chumi hmang chuan game kan khel ta thin a ni.Inhlat taka kan line siamah khan pawl lehlam ve ve chu a inepin kan thutung thap mai a, kan pawl leader khan lehlam pawl zing ami a duh ber mit kha a hup a, chutah a hming min phuahchawp hmang khan kan pawl zing ami a duh ber kha a rawn ko a, chu chuan mithupsakpa chu a va pen ta thin a ni.
A pen zawha a awmna ngaia a let leh hnuah a mithup chu a thlah a, a pentu chu tu’nge tih a ring ta thin. A rindik hlauh chuan amah chu hmalam zawngin a zuang vak a, step khatin hma a sawn tih na. Chutiang chiah chuan a rindik loh hlauh chuan a pentu kha a zuang ve thung thin. Lehlam pawl line va zuangthleng hmasa apiang kha chak a ni ta maiin ka hria. Chuan, trick kan nei bawk thin tak e, kan leader khan kawng a dawm chuan min pentu chu chumi chu a ni tihna tih ang vel trick kha kan nei thin a, kan khelh hmain trick neih awih loh, kan ti ziah a, kan nei ziah tho.
In ngunhnam vai: Rua emaw, mau chang tha deuh emaw kan la a, ngunhnam lem kan siam thin. Pawl leh pawl ka insiam a, kawng a chin hnuai lam thi tiin kan invai chiam thin; Intihpalh erawh a hlauhawm deuh.
In Kungfu: Mipa naupang keini ang rual kha chuan kan atchilh deuh vek awm e. Tun hnua ka ngaihtuah let leh hian veng tinah khan kungfu master an lo awm vek a ni awm e, ka ti ta. Kan master te lah kha an han tualchher ve thei mai mai khawp lehnghal. Aia lian leh insualah pawh kan ngam loh turte nen min han in kungfu tir a, min han fly thum dawp mai kha chu na ve duh tak a ni.
In perh luh chhiar: Marble hmanga kan infiamna chi khat kha a ni a, a nuamin neuh neuh a lo tam reuh ngawt mai. Bikhur kan lai a, kan luh apiangin panga, midang marble kan perh fuhin panga bawk. Duh leh perh ai kan dur thei a, mi durna hmun atangin kan change chhuak thei bawk a, khatianga change kan duh loh chuan kan dur hmain ‘engtiama tih loh’ kan ti vel thin.Kan perh fuh te marble leh kan marble inkar kha khap khat aia a tlem chuan ‘khap’ an tia an dur daih thei bawk. Chipte mar at, tih vel pawh a awm. Point za kan tlin khan ‘ral’ kan nia, midang kha kan perh fuh vaih chuan an thi a ni tawh mai, chuvang chuan tlanchhiat theihna chance an nei ve bawk. Marble lam sawi laiin in perhchhuah sawi nghal ang- panga bet kan tia, bikhur kan han pawk nalh mai te kha chu hlimawm ve tak a ni. In N pen leh In H pen te kha chu hmeichhe lam chanah kan dah deuh thin.
In kahthlak: Rubber hmanga infiamna a ni. Ban kan phun a, kan rubber boat khawm chu banah chuan kan tar a, ral atangin kan inperhchhawk a, a kapthla hmasa apiangin an nei thin. Drawk tha deuh neih kha chuan huphurh kan nei ngai lo. Inkahthlak ah hian khaibawr leh khaibawr loh tih te, ban si lak awih loh tih te dan tesep kan nei nual bawk. Ral hla tawk atanga han phin nalh mai kha chuan kan hawi champ thei teh e.
In vawmchhuah: Sikret bawmruak hmanga infiamna a ni. Rinbial chhungah sikret bawmruak kan dah a, silipar hmangin kan invawmchhuahsiak thin. Beeter siliper hmanga vawm kha a chhuah duh bike m avangin hman awih loh kan ti thin. Khatih lai khan Charminar kha cheng nga kan ti ta in ka hria. Sikret bawm ruak zawngin veng hla tak tak thlengin kan vak vel thin.
Kahpuk: Raw chang tha deuh, kutzungpui tiat vel kan la a, a kuaah khan lehkha thial sawm a tawt thei ang berin kan hnawh a, a hawlhna in kan hawlh a, kan kahpuk hmawra lawr lo deuh chiahin kan dah a, lehkha dang thial sawm kan hnawh leh a, a chanve velah kan dah a, chutah a hawlhna hmangin kan han hawlh pawp mai a, a puak ve thak thei a ni. Nuam ve phian.
Hamphuh: Mau kutzungte tiat vel kan hmang a, shillong mu hmangin kan phuh zeih zeih thin. Hetiang hmang hian kan indo a, nuam kan va ti thei reuh tak.
Lehkhachaih: Kum tawp sikul chawlh hnuah khan lehkhachaih chaih hi kan uar zual thin. Kan naupan zual lai kha chuan that e tein kan chaih mai a, kan lo lian deuh a, inbah leh in-ah tih vel kha kan ching chho a, sagu leh tube light chhutdip hmang khan khawl la kan zut hriam sauh sauh a, kan in at chiam chiam thin. Hlimawm ve deuh a sin.
Ball bearing: Tawlailir tak kha ka khalh hman lo, kan u te ho khalh chu ka hmu hman a, min phur thin bawk. Keini hunah kha chuan tawlailir aia te deuh kha ball bearing hmangin kan siam a, kan khalh ve nasa thei hle.
Kawngpui tawlh: Kan veng kawngpui a chhuk tha bawk a, nuam tak a ni. Phelhsep emaw, plastic bur chhia emaw kha kan thut a, kawngpuiah kan tleng chiam chiam thin. Kekawr mawng a hek duh hle. Gallon bur chhia nei an awm kha chuan kan awt thei kawp mai, kan inphurhtir vel thin. Kawngpui tawlh kha an khap ta daih a; Mahse kan tawlh ru thin tho.
Motor beh: Motor tlan mai mai kha kan hmu thei hlawl lo! Motor tlan kan hmuh tawh chuan kan bet ngei ngei ringawt. Thiante nen motor kan han um a kan han bet a, a bet ve hman loin ring tawkin ‘an bet a nia’, a’n tia, driver sual deuh kha chu an tlanchak phut thin a, hlauhawm duh tak a ni- kan sim chuang lo!
Train: ‘Train ang u’ kan tih khan kan hrethiam ve mai. Khawilai kopang awih deuh emaw, thingkung lian deuh ah emaw khan training kan nei thin. Film kan ena an nungchang vel kha kan zir thin a ni deuh ber.
Gari khalh: Thil kual kha mau hmangin kan tilir teng teng a, kan tlan kawi piat piat a, lungngaihnain min umpha meuh lo. Motor gear, tlangkir kual kha kan thianpa pakhatin a nei thin a, kan va awt thin tehlul em. Gari khalh hian veng pawn thleng thlenginkan tlankual peih nia.
Nawrlirh: Silipar chhia zaibialin motor ke ang hian kan siam a, a nawrna tur mau kan vuah a, kan nawr kual chiam chiam a, nuam kan ti ve em em tho. Thlasikah chuan kan nawrlirh ah hian sangha tin bur ruak hmanga siam sikri kan khai thin- mombati pawh!

A dang pawh a la tam………

83 Responses to “Kan naupan laia kan infiamna thenkhat”

Pages: « 1 [2] Show All

51
Phivawk Says:
January 19th, 2012 at 5:21 pm
Phek thar kai 1aw 1aw ang aw…
Report this comment
52
Dr kawlhawk Says:
January 19th, 2012 at 6:25 pm
ngaihnawm lutuk… lung a leng! ★★★★☆
Report this comment
53
H.Vangchhia Says:
January 19th, 2012 at 6:56 pm
I sawi ngaihnawm, a lunglen thlak hle bawk.
Report this comment
54
funny™ Says:
January 19th, 2012 at 7:04 pm
In vanram leh hremhmun hi kalo hre ve ngailo reng reng. Kan vengah an uar velo aniang. post tha e.
Report this comment
55
Chhuaklinga Says:
January 19th, 2012 at 7:28 pm
Thawh ve teng-
Inkutzungpui buan. Inke sual. Inarpa sual. Inban deh. Bingte sairawkah le. Mual lai zawla a kem naute kan chhawk bikah. Pang aw inzial. Tui pet puah. Ruahsur laia tawlhpanal tawlh. Vaivut a indo. Sairawkherhte a indo. Kaihbu kaih. Vuk vuk vai. Thlawhna lem siam. Hnah chi hrang lak siak. Inbawng sik. Inarpa kal siak. Intlan siak. Lung invawm thui siak. Chempui in eh. Inthlar. Hnung a hmawlte dah (tunah chuan inartui an ti). Inchai. Inbuan. Insaihrui pawh. Veng leh veng inrun. Mi inchung vawm. tawk phawt teh se.

tren tren.
Report this comment
56
mamboihi Says:
January 19th, 2012 at 7:32 pm
Ka hriat ve ngai loh a va tam ve!! Naupan lai hun kha koh kir theih ka chak thin mange.. I post chuan lung a ti leng alawm le.
Report this comment
57
H.Vangchhia Says:
January 19th, 2012 at 7:33 pm
Inbihruksiak hian Aizawl lamah chuan, “I tiam em,” kan ti lauh lauh thin a. Lunglengah ka zuk tel ve chu, “I kuk (kook) em” an ti ta daih mai a, ka insum zolo ka nui chhuak, min hmu rang ngei mai. hairehai

Kahpuk hian kan indo nasa thin. Kam sir pan tep tepin lehkhapuan kan thial ….
Gari khalh: hi thirsakawr wheelrim hi kan khalh nasa thin mai. Anih loh chuan jeep part,a gear hnung a wheel kha(?) a hming ka theihnghilh daih.

Sairawkherh a indo kan hrat, thal a indo te. veng leh veng insual te kha kan infiamna ani thei bawk awm e a
Inchai/inbuan kan hrat thin hle bawk.
Report this comment
58
Chhuaklinga Says:
January 19th, 2012 at 7:42 pm
Insanghar ar lak.

tren tren.
Report this comment
59
van damme Says:
January 19th, 2012 at 7:54 pm
@Asteric,a hmel en nen chuan inhmehlo tak a ni,mahse alround deuh hi a tha ve lom
Report this comment
60
tepuia Says:
January 19th, 2012 at 7:59 pm
Tha hlawm in lunglen thlak hle Mai!
In perh luh chhiar hi kan fate chuan in panga-sawm an ti daih!
#32 in in vawm chhuah hunlai 1997 vel a tih hi kha tih lai khan an la ching a maw ni le? Keini chaun early eighties vel khan kan ching. Kahpuk bakah hian kahchik pawh kan ching, mahse water pistol kha arawn chhuak ve leh nghal deuh mai. Lunglei lamah chuan in bihruksiak a ‘chang ‘ tu hi ‘tuk’ tu an ti tlat in ka hria. Tawlailir bak ah hian chartin bung hi a thutna kan kilh bet a, a hma lam hi kan suihpir(?) a tlawh chhan tur kan kilh bet leh a, awih deuhah kan tawlh vak thin. Kekawr mawng a tet duh rap thlak!
Report this comment
61
Rumtea Says:
January 19th, 2012 at 8:37 pm
Lung i va ti leng e, keimah chauhin ka chhiara ka nui vur vur mai, kan naupan lai ka hre chhuak uai uai mai.

Gari kher kher hi chu ka khalh thiam chiang lutuk, thin hoah pawh a daisir thei pawl ka ni ve ngat. insawitheihna pawh nilovin.
Report this comment
62
Chhuaklinga Says:
January 19th, 2012 at 8:48 pm
Kan thianpa pakhat pawh kha a tawlailir a chak lo/lir duh lo lutuk a, kawng chhukah kan khalh ho a, a handy man hnenah a rukin ‘pawt ang deuhin awm la, nawr ang che’ a ti mawle. A mah pawh a la dam. Lung ti leng post a ni e.

tren tren.
Report this comment
63
Thara Chhangte Says:
January 19th, 2012 at 9:02 pm
Tlangsam bawhbet pawh
Report this comment
64
ahooma_ Says:
January 19th, 2012 at 9:20 pm
@lamea #9 janata biri leh dan hill tih emawni, rs 2.50 man kha kan zu thin.

@Dr.Mahminga#2o inkawibah i sawi khi inhnawk a ni mial lo maw?

@Vandamme#31 invawmbah khi a hming chiah ka hria a, kan tihdan ka theihnghilh daih tawh.

Inbihruksiak dawna a changtu tur kan zawn dan pakhat chu ‘Ui ek pherh ui ek pherh, hnam tawm, zinga ui ek pherh’tih hi vawi thum kan sawi rual a, a vawi thumna ah chuan a tawpa pherh tih tel loin ‘hnam tawm zing a ui ek!’ tia tawp chat tur a nia, ‘pherh’ lo ti zauh an awm chuan an chang thin. Pakhat aia tam an awm chuan an ti tha leh a, vawi nga te vawi khat chauh te an sawi a, ‘pherh’ ti hnuhnung fal ber kha a chang a ni mai!
Report this comment
65
Maya Says:
January 19th, 2012 at 9:24 pm
lung i ti leng chiang , kan sawi belh ve loks ,tengtere mu pen . ram kal haw kawng a daithut siam ( a khur ah kan e ngei a ) leh phaitualhnim sei chi inchhuih awh (awk) na a tan a suih . inhmawlhte pir , sephung insik tir te kha a va nuam ve thin mai mai . . ramhnuai ah ramhrui kan chhawk a kan uai thin . a zam ngheh loh chuan a then thui lai in an duk zuk thin te kha aw . .
Report this comment
66
ahooma_ Says:
January 19th, 2012 at 9:30 pm
Daithut tih khi ‘tlak-hawlh’ kan ti thin. A chhunga thil tuihnai vak lo dah phei chuan puitling ho an sa thei rapz.
Report this comment
67
Rumtea Says:
January 19th, 2012 at 10:24 pm
Rubber khelh dan hrang hrang ka hriatte – chhem luh & chhem chhuah, chhem delh & pen / pir delh, kahthlak, theh luh, pawh chhuah.
Report this comment
68
phawkars Says:
January 19th, 2012 at 10:24 pm
In thut det, in chet loh siak..thuthleng in chuh..MI THEI RUK..
Report this comment
69
Rumtea Says:
January 19th, 2012 at 10:27 pm
Thak thing zuk.
Report this comment
70
aduhi Says:
January 19th, 2012 at 10:31 pm
hmeichhe version ka la rawn ziak ve ang.
Report this comment
71
renard_curieux Says:
January 19th, 2012 at 10:33 pm
lunglenthlak hle mai a, a vai khian ka hrat vel vek thin, abikin In theng kah (in-threng-kah), In kahthlak leh inhawngbi kha nuam ka la ti deuh ber mai

10-na khi sikret bawm ruak kan va zawng nasa thin tak.. marble perh kha chu ka thiam thei thlawt lo

Buk sak te mawlh kha..

7-na boss leh kid te an han awm ngei a, insual lah kan insual nasa

55Chhuaklinga sawi ang khian skul bana mi inchung vawm kan ching thin hle bawk

a tam mai, tunlai gen chuan amika mak pawh an hre tawh lo ang

lunglenthlak zawk..
Report this comment
72
sisen Says:
January 19th, 2012 at 10:47 pm
lunglenthlak…

Report this comment
73
ahooma_ Says:
January 19th, 2012 at 11:04 pm
Phantom-a sikret kan zuk khan kan intithei vel thin khawp bawk tak mai.
Report this comment
74
Maya Says:
January 19th, 2012 at 11:18 pm
in zun thui siak
Report this comment
75
Chhuaklinga Says:
January 19th, 2012 at 11:35 pm
In ngalkar.

tren tren.
Report this comment
76
ahooma_ Says:
January 19th, 2012 at 11:44 pm
Tawlailir-ah khan kan u te’n min phur thin a, pakhat(a hming ka sawi ngam lo :)) kha chuan kawng kawi leh chhuk lai ber maiah khan min han zuanthlaksan thin mai a nih kha, DEN THEI REM REM!
Report this comment
77
Tete-i Says:
January 20th, 2012 at 12:03 am
eehe..Lung a van tileng tak,naupan lai min ti hrechhuak alawm le..:-D
ka naupan lai chuan n rubber zuan ah leh inkawibah ah min tranpui an hreh thei lutuk..,ka thiamlo thei bik lutuk a… haha.. ka out hmasa ber ziah zel..chuan kawng sir ah Ka uite te ho nen thu chungin kan lo en thin..nuam ka ti ve thei lutuk..:-D
Report this comment
78
lamea25 Says:
January 20th, 2012 at 2:25 am
In nupui pasal a, intih lem lem, ha hai..
Pastor pakhat pawh a bial fanna ah a nupui a hruai a, a kalna khua a pa pakhat nen khan annu chu an inbe chiam a, a hnu ah “kan nu nen inlo inhria elo”
” kan inti lem lem thin a”
Report this comment
79
ahooma_ Says:
January 20th, 2012 at 2:34 am
#78 ka sawi ngam loh tha tha i lo sawi. Naupang mut huna sawi atan i khek emawni zawk?
Report this comment
80
lrpa Says:
January 20th, 2012 at 2:37 am
ahooma_
In nupui pasal a khi chu ka ReMpy in a sawi daih tawh..a tui zawng ania
Report this comment
81
ahooma_ Says:
January 20th, 2012 at 2:40 am
‘kan inti lem lem thin a’ a hit bawk sia, ka type zawng hian engtin emawni ka awm bawk sia..
Report this comment
82
Kan naupan laia infiamna (Hmeichhe Version) | mi(sual).com Says:
January 22nd, 2012 at 1:30 pm
[...] balu a chen, inhawngbi, inhruizuan, drama chan, inzirtir lem, daktawr leh damlo, laphiar, post hmasa lama sawi tam tak te nen. Pawnto kha chu khan ching em em lo a, mahse “Tin dialah” kha [...]
Report this comment
83
Hriatpuia pa Says:
February 17th, 2012 at 12:34 pm
A lunglenthlak hle mai!
Report this comment