Tun hnaiah leh tun hnai lovah pawh hna lâk chungchangah thil felhlel a tam khawp mai. He’ng thil felhlel awmte hi thil dang vang ni pawhin a lang lo, kan Mizo society vang a ni ber mai. Kan la tlem em a, kan inkawmngeih si a, chhungkhat laina leh ṭhian kan nei fer fur a, an hmaizah kan tina bawk si a. An hnena duhsakna kan lantir theih dan chu, hna pek leh sawipui angah kan ngai tlat mai a ni.
Kan tikhawm tel tel a, kan ti ṭhêm ṭhêm a, thilsual pawh kan ngaihtuah tawh ṭhin lo. Kan rilru ṭhatna hian kan thil ṭha tih tur a hliahkhuh ta a nih ber hi. Hna lak leh dil chungchangah sawi duh pathum ka nei ve a, ka’n tar lang ang e.
1. Petu
Ṭum khat chu sawrkar hna lian ve deuhva thawk, an hotu lu berte inah ka leng a. Kan titi kan titi a, nakinah chuan an nu (a nupui) hian, “Ani pawh hi in office lamah OA anga lak dan ngaihtuah a ngai a nih hi..” tiin an pa hnenah mi ti ta hlawl mai a! An pa lah chu a lo bu nghat nghat roh va! Ka dil ni hauh si lovin hna ka hmu chu a ni deuh der mai. Ka facebook profile-a work saw in hmuh chuan thil kal zel dan chu in hrethiam maiin ka ring.
Hna petu hi a pawimawh ber mai. An hna pek theih ang chi-ah reng reng chung qualification pawh ngaihtuah map lovin an hmelhriat leh ṭhian ṭha, laina hnai leh chi leh kuangte an duhsak hmak hmak zel mai a; a pawi. Thil ṭha tih duhna thinlung an put loh chuan tuna kan buaina hi a reh ngai lovang. Ka han tarlan tâk ang khian, tunah chuan khitiang khi kan la ni rih e.
A pe theitu hi a diltu leh tihpuitute aiin an tlem fé a, chuvangin he’ng mi tlemte-te hi zirtir an ngai a; awareness hian kawngro a sut tak tak loh avangin dân anga an chunga action lak hmak hmak hi a reh dan tur ṭha ber a ni ta e. Action la hmak hmak ngam sawrkar kan neih hunah kan nghah ram a thleng chauh vang.
2. Diltu
Ṭum khat chu kan hnathawhna hmunah hian home guard (tlang taka sawi chuan) dil tum mi pahnih hi an lo lut a. Pen-a an thil ziah chu computer-a type chhuaka print-tir an lo tum niin. Kan han enchian nâk chuan Home Minister lehkha tur leh, an block hruaitu hriatpuina lehkha — lehkha pahnih hi a lo ni a. Anni lah chuan zah tâk aruangin Minister hmuh hmasak an tum dan an la sawi ang suam suam a! Ka type-sak lo chiang khawp mai.
A diltute hian rilru thianghlim tak kan neih a ngai a, tling ngei chunga tlin kan tum tur a ni. Tunah chuan, hna dil dawna thiltithei deuhte hmuh kher hi thil tih mâkmawhah kan ngai tawh a ni. Kan rilru hi nasa takin a piangsual tawh a, mipui mimir rilru sukthlek hi kan her danglam a ngai. A tu-a pawh mai hian sawipuitu hi kan melh ruai a, a theih dan kawng kawngin kan dap a, ṭhianzahova awmkhawmnaah lah sawipuitu neih chu insawitheih nan tak kan hmang ta dah a!
Kan rilru ngaihtuahna danglam thei tur chuan sawi leh fuihna a tam tur a ni. Hetia kan ziaka kan sawite hi insawisel mai lovin, a tam hneh ve hrim hrim hian awmzia thui tak a nei tih hriat a pawimawh khawp mai. Tin, hna dil tumte hian awlsam taka tlin kan tum tur a ni lo va, thawhrim zet hnua hlawhtlin kan tum tur a ni; chu chu a hlu ber. Awlsam taka tlingte bawk hi a ni, eiru ṭhin te chu.
3. Sawipuitu
Kan tawnhriat ka sawi leh ang. Ṭum khat chu kan lênna inah bawk hian hetiang lampang hi ka tawng leh a. Mi pakhat hi a lo lêng ve a; sipai leh hna dang danga thawk tura a mi sawi luhpuite leh a sawi luh dan te chu nuam ti deuhvin a sawi vei suam suam a. Amah lah chuan uan nan taka hmang ang hrimin, a lênnate nau pawh a duh phawt chuan a sawipui theih tur thu a la sawi ta deuh deuh va. Sual leh sual lo lampang a ngaihtuah tawh lo reng reng.
Hetiang hi kan ni. Mi thiltithei deuh nih kan châk a, hnaa mi kan sawipuia an tlin hian kan intithei em em a, thil zahthlakah ngai lovin mi zingah sawi nuam kan ti em em a ni. Chu lo lehah chuan, kan sawi tlin avanga hlawkna têl kan tum a, kan duham em a ni. Sum hi nunna emaw kan tih chhung chuan kan duhamna hi a reh lovang.
Nia, kan duham em a ni! Kan khawsa sang tawh si a, kan nupui pasal leh fanaute an inchei sang bawk si; a ṭhen phei chuan ram pawnah kan dah a, a enkawlna leh zirna senso a lo sang si. Anni lahin nu leh pate sum hmuhna an ngaihtuah mang bawk si lo. Nu leh pate tan chuan sum hi a hlu a ni. Chuvangin, a theihna kawng kawngah a theih dan ang anga sum hmuh kan tum a, thil ṭha ti turin kan mit del phui ta tlat a ni.
Ka ziak thui ta mah mah, duhtawk dawn teh ang. He’ng mi pathumte hi Mizoram-a hna lak dan dik lova a mawhphurtute an ni e. An inkamki ṭhap. Anni hi an dam chuan he buaina hi a reh ngei ngei ang. A tawpna atan Bible chang pahnih ka’n tarlang hram ang e, a thlarau mi ber ang ziazangin.
Thuhriltu 5:10 — Tangka sum ngainatu chuan tangka sumah duhtawk a hmu lovang a, hausak ngainatu chuan duhtawk a hlêp hek lovang.
I Timothea 6:10 — Tangka sum ngainat hi sual tinreng bul a ni si a.
Similar Posts:
- Ram tan a nunna thap, zahthiam dangdai!
- Kumtling lo Pawngsualtute hremna dan hi na taka siam theih nise.
- TawiNawi-III
- Chhanlet loh hmangaihna
- Ka lo tawngtaipui che asin..
January 25th, 2012 at 10:52 am
@M_Pautu: An inpuan phawng phawng ngai lo!
@Snoop33 & MaraHisbicus & Pakak: Ka lawm e.
@vlhauhnar: Ka thiam bik hauh lo. Mahse, kan thiam loh ang angin kan uluk thung a, hma kan sawn phah ve zel a nia.
Report this comment
January 25th, 2012 at 12:01 pm
BBC a Obama thusawi te saw va ngaithla teh un! OT
Report this comment
January 25th, 2012 at 12:46 pm
Post ka like e. Sawipui lo a tling tur chuan thiam fal bik nih a ngai.
Report this comment
January 25th, 2012 at 1:01 pm
Minister nih hi a nuam ngawt in ka ring. An lal si, an hlawh a tha si, a langa ei tur (ei ruk ni lo in
)a tam bawk si. Hmun tin deuh thaw ah an tlawn rawn sup sup mai a nih hi maw.. 
Report this comment