mi(sual).com

…Thu hmatheh…
Matthaia 21:1-22 chhung thu ațang hian Expository Sermon ngaihthlak kan tum ang. A thui deuh dawn avangin Sermon 4-ah kan țhen ang. Mat.21:1-22 chhungah hian Thupui lian tak tak 4 a awm a:- (1). Sabengtung leh a note, (2). Hnehtu Jerusalem-ah a lut, (3). Jerusalem Temple thenfai thu, (4). Theipui kung hau-hlum thu, te hi thupui pawimawh zual an ni. Hengte hi Expository Sermon-in kan zir-ho ang a. A hun thu-ah hian, tlai lutuk a awm thei lo turah ngai ila, a țha ang e.

Lal Isua Hnehtu nihna famkim nen-a Jerusalem-a a luh chungchang hi kum tin biak in-ah leh lenkhawmna-ah kan ngaithla țhin a. Kan ngaithla zing viau naa, Pathian thu a nih tlat avangin tuma’n kan ning lo hi thil ropui leh mak tak a ni. Vawiinah hian Matthaia 21:1-3 chhung thu hi kan zir dawn a ni.

…Bethphage… {Matt. 21:1},
Bethphage hi Heb. beth-phag-e, “house of un-ripe figs” tihna a ni a, Bethany hi Heb. beth-anya, “house of dates” tihna a ni. “House of poor,’ ‘house of misery” tihna pawh a ni thei bawk. Bethphage hi Bethany leh Jerusalem inkara awm a ni a. Jerusalem ațangin Bethany hi Mel 1.5 vel (kms 2.4) a ni a, Jerusalem ațanga Bethphage hi Mel 1 a tling lo deuh. Bethphage hi Lal Isua hunlai hian Jerusalem kulh hungna bul (pawn)-ah a awm niin an sawi. Lal Isua hi Bethany-ah (Lazara-te in-ah, John 12:1,12) a riak a, Bethany ațang hian Jerusalem-ah rawngbawl-in a kal țhin a ni.

Lal Isua hi Bethany-ah riakin, Jerusalem-ah alangin rawngbawlin a kal țhin a. A rawngbawlna ber Jerusalem-a a riak miah lo hi thil mak a ni. Hetiang tho hian, Keini, Van khua leh tui nihna neitute pawh hi kan riahna hmun (rilru leh thlarau chawlhna) chu Van a ni a. He leiah hian alangin (mikhual-in, khualpang zin-in) rawng kan bawl a ni. Lal Isua riahna khua, Bethany hi Tum (dates) thing awmna a ni a, a hming put-chhan pawh a ni. Tum thing hian ringtu nun nghet leh entawn tlak a entir. Tum thing hi tuamtu sak tak a nei a, a ngil a, a zik a khawng a, leihnuai ft.150 ah te zung a kai țhin a, hling a nei lova, hausakna a entir (1Lal.4:25, Mik.4:4).

Tum (Bethany) thing ang ringtu hi Thlarau Thianghlim-in Ip-te-pui bah nan a hmang țhin. Hetiang Lalpa ringtu hi thlarau lama fa tam tak hring țhin, rah-chhuak țhin, a hun te-a rah țhin, tui kianga thing phun, lui kama zungkai, khawlum lo thleng pawh hlau lo, a hnah te hring reng, khaw khen kum pawisa lo, rah-chhuah țhulh chuang lo, a tih kha a ni (Jer.17:8).

…Sabengtung leh a No Thlun…Phelh Ula… {Matt.21:2},
Bethany ațang hian, a tuk zingah Jerusalem panin an chhuak a, Jerusalem thlen dawn, Oliv tlang pang-a awm, Bethphage kawt-chhuah an thlen chuan, Sabengtung leh a no chu la turin a zirtir 2 a tir a. “Sabengtung chu phelh ula, ka hnenah han kai rawh u” tiin a lak tir a ni. Sabengtung chungchang hi Chanchin tha bu 4 ten an ziak vek a. Mahse, Matthaia chiah hian Sabengtung hi a pui leh a note a nih thu a ziak kher. Helai hi rinhlelh tur a awm lo. Marka, Luke leh Johana te hian, Lal Isua chuanna “Sabengtung no” chauh hi an “focus” avangin Sabengtung hi 1 chauh an ziak lang a. Matthaia erawhchuan, Lal Isua chuanna Sabengtung no bula a pui kal tel ve thlengin a ngaihven a, a ziak lang kher zawk a ni.

Lal Isua’n Sabengtung No la tura a tirh lai hian, hmu miah lo mahse, a in-thlung tlat a, phelh a ngai tih a hre nghal hi thil mak a ni. Hei hian a entir chu, Pathian hma-ah hian saruak leh inhawng sa vek kan ni, kan dinhmun dik tak hi Pathian hma-ah zep theih leh thup theih engmah kan nei lo tih a ti-langchiang hle. Kan saltanna hrang hrang ațang hian Pathianin min phelh a, min zalen-tir a duh a, kan inphal em? Sabengtung chu phelh a nih veleh, Lal Isua hnenah ngei rawn kai tura thupek a ni. Hei hian, khawvela saltanna engemaw ațanga kan talchhuah (fihlim) hian Lal Isua hnenah ngei kan kal hi a him a, a tlo a, a thlamuan thlak tih a entir.

Matthaian Sabengtung hi a pui leh a note an nih thu a record kher hian awmzia a nei. Ringtu dik tak chuan Pathian pa anga neiin, kohhran chu nu ang-in a nei ngei ngei tur a ni. Chhandamna pawh chhungkaw member zinga 1 tan mai ni lovin, “Lal Isua ring la, tichuan chhandam-in i awm ang, nang leh i chhungte nen” (Tirh.16:31) a tih ang khan, chhungkuaa chhandamna la chang ve lo te hi kan ngaihsak tur a ni. Bible-in, “Tupawh, mahni chhungkhat lainate ngaihsak lova, mahni chenpui chhungte ngei pawh ngaihsak lo chuan rinna an phatsan a, ringlo mi aiin an sual zawk” (1Tim.5:8) tia a sawi hi a pawimawh hle.

Tin, Hebrai mite hian, ran hi vulh-in, chaw ber-ah nei mah sela, ran chungah an nunrawng ngai lo. Sabengtung no hi Lal Isua’n chuanna atana a hman dawn avangin, a pui tello chuan a hruai duh dawn lo tih a chiang. Hei hian, Judate hi Eco-Theology-ah an lo san zia leh an entawntlak zia a tarlang nghal. Zawlnei Isaia phei chuan, Lalpa tlang thianghlim, Vanram nawm tur zia a sawina-ah ramsa te, ran-te (bawng no & sakeibaknei) tak ngial pawh inngeih taka an awm-ho tur thu a sawi tel țalh bawk a nih kha (Isai.11:1-9 ). Ran leh ramsa (leh thilsiam dangte) mawina leh duhawmna pawh hmu thiam lo ringtu, ei atana an tangkaina chauh hmu thiam leh an chunga nunrawng tak phei chu… Bible zirtirna kalh a ni a, ringtu ngaihtuahawm tak a ni ngei ang.

…Lalpa’n A Duh A Ni… {Matt.21:3},
Lal Isua’n Sabengtung a lak tir hian, a neitu-in a lo sawibuai huna an chhan dan tur a hrilh thlap a. Tupawhin engpawh an lo sawi chuan, “Lalpa-in a duh a ni” an ti ang a, “ani chuan a rawn tir nghal mai ang” tiin. Lal Isua sawi anga an sawi avangin ‘a neituten lak (kal) an phal thu’ hi  Marka 11:6-ah record a ni. Helaia “Lalpa” tih hi Greek. Kurios a ni a. A awmzia chu, “Supreme power, Authority, Lord, Owner, Ruler” tihna a ni. Classical Greek-ah chuan pathian (gods) sawi nan an hmang. Tichuan, “Lalpa-in a duh a ni” tih awmzia chu, “A siamtu, thuneitu, a neitu dik tak khan a mamawh a ni” tihna a ni.

Sabengtung hi Pathian siam a ni. Mahse, Lal Isua hian a thilsiam zinga, țangkai ber ni lem lo, hmelchhe ber pawl, Sabengtung hi a mamawh ve tlat mai! Unau duhtak, han indap teh? Hringfa zinga Pathian siam fuh ber chu i ni hauh lovang! Mahse, Lalpa-in a duh che a, a hmang duh tlat che a ni. Ava lawmawm em! Lalpa hmanrua atan i inphal em? Sabengtungin a siamtu leh a neitu dik tak Lal Isua hman theih tura zalenna pek a nih theih nan, an thlunna hrui kha phelh a ngai angin, keini pawhin,  Pathian duhzawng kan tihna tur min dal a, min thlung bet tlattu sual hrui hi kan phelh a ngai. Kan bul vela, sualin a phuar mek (zu, drugs, eiruk, nulat-tlangvalna sual, etc.) te hi ‘phelh sak a, Lal Isua hnena hruai turin’ Thlarau Thianghlimin min sawm a ni.

Lal Isua’n ‘Kurious’ a nih thu a sawi hian awmze thuk tak a nei. Bethphage-a Sabengtung neitu (mihring) kha Sabengtung neitu tak a lo ni reng reng lova, a kawl hawhtu mai a lo ni! Nang leh kei pawh hi, kan nunna leh thlarau chunga thuneitu leh min neitu dik tak chu Pathian a lo ni tih a chiang hle mai. Hei hi Tirhkoh Petera chuan, hetiang hian a sawifiah a, “Beramno hmelhem lo leh bawlhlawh kai lo thisen anga Krista thisen hlu chuan tlan in ni zawk” (1Pet.1:18,19) a ti a. Tirhkoh Paula phei chuan, “Mahni ta pawh in ni lova, mana lei in ni tawh…chuvangin, in taksaah chuan Pathian chawimawi rawh u” (1Cor.6:19-20, 7:23-24).

Tumahin Lal 2 rawng kan bawl kawp thei lo. Lal Isua hi kan chunga Lal a, kan chunga chuang tura kan sawm duh lo a nih chuan, kan duhloh zawk Setana hi kan lal atan kan sawm tihna a ni dawn. Chuvangin, min tithlawn ngai lova, amah kan phatsan lai pawh-a min ensan ve ngai lova, kan chhiat-laia min tlansan ngai lova, kan țhatna tura kawng tin renga min thawhsak a, chatuan nunna ka neih theih nana ranthleng leh Kros rawn thlang ngam a, lei-a lawmna thuruk min neih tir mai baka,  Vanramah pawh awmna min siam sak tu Lal Isua hi kan nun-a Lal atan, kan chunga chuang turin kan thlang dawn lawm ni?

Similar Posts:

• Sabengtung Kher Han Thlan Chu!
• Pentecost pualin
• Kristian Chi 2 Te {Sunday Pual}
• Ringtu Nun-a Thlarau Thianghlim Hnathawh {Pentecost Sunday Pual}
• Isua hi Pathian a ni

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Thursday, April 5th, 2012 at 6:00 am and is filed under Religion. You can follow any responses to this entry through the RSS 2.0 feed. You can leave a response, or trackback from your own site.