mi(sual).com

(A sei ngawt ang, a part a dah leh a buaithlak in tia, part 2 dah a part 1 link dah leh net a muangg en let a peihawmloh in tia. Part 1,2,3 ka combine a, ka thliar hrang a, a duhin a part bil en ula, a duh tan a vaia chhiar nghal a remchang bawk. Mahse inla phun dawn chiang sa, in phunchiar hlawm si,.. hehehe.. )

PART 1

College chawlhlai ani bawk nen tihtur em em ka neihloh avang chuan kan kawmthlanga dawrah chuan ka thu mai mai a, ka kuhva leina dawra meizial zuk paha ka thut lai chuan ka thutna dawr kawta awm Zira carpentry tih chu ka enin, a kawta a dawr neitupa Pa.Zira kan tih mai ina a thuthleng siam uluk taka a hru chu ka en in amah Pu.Zira chanchin a hma a min hrilh te ka ngaihtuah chho a. Pa.Zira kan ti ngawt a, kum lamah chuan ka Pa aia upa, Putar tia chhiar theih tawh, nupui pawh neilo, a Nau fate 2 awmpui leh eizawn nana Carpentry dawr siam a ni a. Amah lah chu a bula awm a nuam in, tawng duah chi nilo mahse rualkawm a thiam bakah a thil siam a uluk nen kan veng leh a chhehvel ah chuan a thilsiam te chuan ngaihhlut an hlawhin mi 3 a chhawr chung chuan an buai theiin, a hlawk bawk aniang a nau fate 2 a chawm bakah In tha tak a sa in, 207 motor pakhat nei bawk a, Kohhran leh vengchhung thawhlawm ah pawh a thawhhlawk thei hle thin.

Nupui nei lova hetia a awm ngawt hi mitin mak tih aniin, amah lah hmelchhe uchuak anilo nen, sawi dan hrang hrang tam mahse tumkhat chu a dawra ka len lain ka zawt tawh a, a chhanna leh a chanchin min hrilh te chu ka theihnghilh theilo. Mitam takin zawt thlawn thin mahse hmana a dawr signboard ka design sak hnu khan kan innelin mi duhsak ta phian a, chuvang te pawh chu a niange a chanchin mi hrilh ni. Ka la hrereng MNF returnee tih takah a sam sei chhap mai chu huih kiang pahin a meizial a tan a, amah a palian in a sa a tha bawk nen a pawisawi hlauhawm chi tak ani. Muangchanga a thuthleng siam ngei nghet charh mai a thutpah chuan, “ Puia, Nupui nei rawh hi min tithlazen hlawm a, kan sawi ange aw” ti a a chanchin min hrilh te kha.

A TIR:

Kum 50 dawn ani ta, Kum 1966 a MNF ina independent suala India sawrkar an beih na kha. Khami hunlai khan tlangval kum 18 mi Zirsangliana chu Shillong ah pawl 8 zirin a awm a, khatia ram a han buai ta kha a rilru a buaiin an khua chhingchhip lam a rilru ah awmn a chhungte a ngaihtuah hle a, Sum leh pai a harsa nen, a Zirna chawlhsan a, an khaw lama haw a rilrukin a Pa hnenah lehkha a thawn nghe nghe a. Mahse a Pa Sipai bang Subedar Vanruma ngaihdan ani hauhlo. Pu.Vanruma hi Pachuau niin, mi rilru lian tak leh luhlul tak, mi pawi erawh sawi em em lo leh rilru tha tak ani a. Kum 1943 khan sipai ah lutin, Roman Father te kaihhruana hnuaia pass emlo mahse matric lo zir thleng anih bakah pa taima leh huaisen ani bawk nen an hotu te duhsak a hlawhin, kum 1957 a pumpui thatloh a neih avanga a rawn pension kha chuan Subedar lai a kai tawhin, Mualpui tuna Chhingchhip kan tih mai ah awmin dawr a kai a, an khaw Pa rawn, zahkai leh neinung pawl tak ani.

Khatia ram a rawn buai a, Zirsangliana’n a a zirna chawlsan mai a rilruk thu lehkhathawn hmanga a han hrilh kha Subedar vanruma, kum 14 anih atanga Sap father te hnuaia inzir leh Father te pawh ina an kaihhruai leh zirna ngaisang tak ngaihdan ani hauhlo, a rang lamin a phalloh thu zu hrilh nghalin Zirsangzela haw chu a phallo a “ I zirna khawp chu ka nei” tiin a tang khawh tlat bawk a. Tin khatih laia Canadian Father awm khan an school principal a hrilhsakin, an Principal chuan sum leh paia harsatna a neih chuan a puih hrehloh tur thlengin a tiamsak nen a haw talo. India ram ropui khan a ramchung mi ni a a ngaih ten an han do kha a ngaitheilo in siruk lain a thawk ta reng a. Sapui chhaih kawlh an sawi ang maiin a tha thawh chu a hlauhawmin ram mipui pawhin an tuar hle ani. Sipai an rawn chhuak a, an nun a rawngin a hunlaia piang velo thangtharte tan chuan hriatthiam pawh a har awm e , rorel awlsam nan tiin khua an han khawm a, mahni inlum leh khua, an kutzia ang maia an hriatchian ram leilung te chu kalsana khaw danga kai angaiin a pui a nawi pawh an bang silo, ram mipui te tan khan a hunlai rapthlak turzia kha suangtuah thiam pawh a tawng velo tan chuan a har awm e.

India sawrkarin thapui a rawn thawh ta kha a nain mitam takin Burma, Assam, Manipur leh Shillong lamah te pemin an hmangaih an ram, Mizoram chu sahim na zawngin an chhuahsan bawk a. Tu tan mah a ralmuang loin, zin dawn pawhin Convoy zuiloh chuan zin ngam chi pawh anilo. Shillong, Guwahati lama zirlai tamtak awmte tan pawh khan haw ngaihna a awmlon a zurlai awmte pawh an haw mai mai lo. Zira pawh chuan kum 3 dawn lai a hawloh hnuaah boruak tlemin a zia ta deuh nen matric a exam zawh hnu chuan Shillong lama Aizawl sumdawng chhungkua rawn tlan te rualin an khaw lamah haw a tum ve ta a. Kum tam a haw tawhlo nen a phurin a ke pen pawh a zangkhai hle , chutih rualin a rilru ah erawh thil tamtak awmin a Nu leh Pa te a ngaihtuah a. Mikhual thu lengvel atangin Sipai ho sual zia leh nunrawn ziate a lo hria in, tun thlenga chanchin chhia ala hrelo erawh a lawm hle a, chutih rualin an khua a, a thiante leh thenrualte hmel erawh a rawn chhuksan ang kha anni dawnlo tih hriain, tute nge him anga tute nge himlo ang tih ngaihtuahin a thianpa Muana te a ngaihtuah chuak a, ani kha MNA a zawm nite khan an sawi si, tin an khaw nula hmeltha Roliani te kha a him angem tihte ngaihtuahin a han haw dawn meuh chuan a ngaihtuah ngailoh dawnin Aizawl a thlena an khaw lama a chhuah dawn zan phei chuan mutmu a hmu meuhlo.

A tuk zingkara Convoy bawk zuia an khaw lam a han thlen chuan, ‘Kan Khua’ alo tih ve thin chu alo danglam nasa tawhin a lung te pawh ati chhia a. Tin, Chhingchhip chu khawkhawmna hmun atana ruat alo ni bawk nen mitin mitang an tamin an buai nuai hi ani ber, Zira te chhung pawh a Pate ate Hualtu ami ten an rawn fin nen an ri laih laih reng a. Tin, an kawmthlang a an Sertawk kung awmna bul zawl, an infiamna thin ah khan In thar alo awm a, a Pa in a thianpa leh a Sipai tanpui Havildar chawngkhuma khawbel khua te, hmana a pa nena an zin pawh a an thlenna kha In alo saktir ani awm e. Amah Pu.Chawnga phei hi chu an ina pawh a rawn thleng foin, Zira pawhin a nel hle a. A thlen zana a zu lengthla chu Pu.Chawnga chuan alo be liam a, hindi leh Saptawng te alo biain annui nasa hle a. Shillong Boruak te, politics te sawipuiin a ngaihdan te chu Zira pawh chuan fing atiin Pu.Chawnga chu ami ngainat zawng tak niin a hria a. An titi lai chuan a lenna te fanu Puitei an tih chuan thingpui rawn siamsakin, Zira pawh chuan a hmain hmu fo tawh mahse alo nulat ve tawh vang nge Puitei chu hmeltha ati ru hle a. Pu.Chawnga leng tura a chhuah hnu pawh chuan a tum ni hauh loin chu tleirawl kawm chuan a thu ta reng a.

Tleirawl kan han ti ngawt a Puite ti a an koh Roluahpui hi Havilder Chawngkunga leh Sialsuk nula hmeltha Tlangkungi fa 5 zinga a 3 na leh an fanu Upa zawk niin kum 17 na a hmang mek a. Hmeltha ti a han sawi hluai tur chi nilo mahse hmaibial lampang , meng bial kak mai leh duhawm leh hmeltha tak aniin, Thau ti a sawitur nilo mahse Nula ria leh cher antih ang chu ani hauh silo. A vun rawng erawh a unau te dang anglo takin a pa a chhun vang nge tlemin a hang deuh a. A hang deuh e tih avang hian, vun thim, Furpui ruah keng chhum anga thim nguih erawh ani hauh silo. A Nu Sailo Lal tunu Tlangkungi vun rawng chhun a unau te anga vun bahra no ianga var hlai mai anilo tih mai chauh ani. A ngaihnobei tawkin a hang ti ila, kan uar mah mah awm e. A taksa peng hrang hrang te chu la hrang ta ila darbel an man angem tihtur nimahse ain remkhawm erawh a fuh a, a sakhmel leh pianzia chu rangkachak belpui 7 pawh a leizo hian ka ring silo. A pianzia lah sanzawng vantlang tak, hmaifang tha tak, ria chum bat mai aniin a mitmeng lah chu Keipui huai pawh a nem ang tih tur khawpa nalh leh favang arsi an sawi ang maia fiah kak leh mawi ani. Chu aimaha Zira thinlung titui nghal tuchu a mize nunnem takmai, zaktheilo ni hauhlo tawngduh tak, Hnapkhawn pachang hmu an sawi anga khi vur ni hauh silo, a hmel hlim reng leh chumi ti mawizual tura a nui mawi te chuan a thatna leh Ziran a duhna chu ati zual si.

Nitam a awm hmanlo Zira chu Puitei lakah a luangliam nghal derin a huat pawh anin hawlo dun hle a, an khua rambuai in a tih danglam, a chhunga chengte tawrhna leh rumna ina a bawm na hmunah hian a tan chuan havilder Chawngkunga fanu Roluahpuii hi hlimna bupui anisi. Ani taka, an khua hian rambuai a tuar in khawkhawmna hmun ani bawk nen, mitam tak an rawn luh belh a. Sipai lah an nun a rawngin an sual em em a, mitam takin sipai kut an tuar a, nula pawh an khawih thin ani awm e. Sipai bang annih vang leh belkai anlo ni bawk nen Subedar Vanruma te leh Havildar Chawngkunga te chhung erawh chuan sipai kut an tuar an lova, chu achhapah an khua a sipai lal awm chu an pension hmain Havildar Vanruma te nen an inhrawn hman avangin an chhung hnih chu an vanneiin an him a, chutih ni suhse nula duhawm leh hmeltha Roluahpuii chu a him bik hauhlo ang le..

PART 2

Nula leh tlangval inngaizawng tan zawng kar hla a inawmsan baka thil hreawm a tam awm love. An inkara hmangaihna rawn parchhuak kha la tuaitir viau mahse Zira leh puite-I tan zawng an nun tinuamtu aniin, Zoram boruak pik tak, tahna leh rumna ah pawh an inhmangaihna chuan hlimna a thlentirin, an nun a hlima, engkim mai chu nun ti nuamtu anisi. Khatia a matric exam zo a han haw ta kha, a tichhe lemlo nen Zirsangzela rilru tak chuan buai zualpui lai chu Shillong a awm tawhloh a, a chhungte uap paha St.Peter vela thawh lawp lawp a rilruk a. A tumdan chu a Pa chuan pawmpui lemlo mahse Rambuai nen, Sum alo harsa bawk nen, a hnial lemlo . Kum hnihkhat awl pawh chu Subedar Vanruma chuan a pawiti vaklo in a zirna erawh chhunzawm ngei se a duh thung a. Matric result alo chhuak a, Zira pawh a rin aiin a tithain 1st ah pass in an School atang phei chuan amah aia percentage hmutha chu khasi nula 1 chauh ani awm e.

Chutia, a rin aia alo tihthat avang leh Scholarship hmu pha hial khawpa a pass that avang chuan a zirna chunzawm nghal chu Subedar Vanruma duhdan ani tain, amah Zirsangzela pawhin a hnialloh bakah, a hma atanga alo tum leh tun Zoram boruak ipik tak tan alo tangkai takin ti a Sipai Officer nih alo tum tih hlawhtlin nana kawng pawimawh anih avang chuan a rang lama chhuk chu an chhungkaw rorel ani ta a. Zira pawh chuan a hmangaih tleirawl hmeltha Roluahpuii chu kalsan hreh engang mahse hmatiang thlir chung leh an nakin alo nawm zawk theih nan a tul tih a hria a, a suangtuahna leh thil tum tih hlawhtlinnan chuan a hmangaih i chu a kawng daltu a hman a tumlo .

Inngaizawng dang ang bawkin pakhat a han kalbo tur chu, chu Nula leh tlangval, hmangaihna lama la tuaitir tak chuan an huphurh in an hreh hle a, mahse a tul si. A kal dawn ni te kha aw!!, ram a ralmuanloh avanga an siam feh kal phalna permit keng chung chuan an huan lamah an feh dun a. Sertawk kung bul zawla thu dunin hmanngaih biahthu an tiam nawn an tiam nawn a. Van zawla Kawlhawk thlawk ri hlap hlap te, thereng hram kiu vang vang te leh, an serthlum rah, an lawh ban te tak te te a kung chhipa lo bet vuai fap te chuan lunglen ati zualin chu hun hlutna erawh a belhchhah si. Ram dinhmun han thlirin Zira tan zawng a haw mai mai theih dawnlo tih an hre sain, Puite-i tan pawh tawhsual a tawk lo ang tih an sawi thei bik silo. Hetiang anih avang hian chu dinhmun khirh leh harsa tak kara hmangaihna lo piang chu hemi te 2 tan zawng a hlu a, a ropui a, a derthawng a, a rapthlak bawk si. Zira chuan an thut dunna bul maia awm, fu huan hlun an neih avanga tha taka an sak an thlam te chu a han thlir a. He thlam chhung ngeiah hian a hmangaih Roluahpuii chu a biahthu hmasa a hrilh ani si a, tunah zawng chu thlam a theihnghilh tawhloh tur chu damin a hmu leh angem, a hmu leh anih pawhin Puite- hi nungdamin ala awm angem tih leh a ta ala ni dawn em tih reng a hre silo.

A tuk zingkar ah chuan a rawn chhoh lam ang bawkin Convoy rualin Zira chu a kal ta a, an tlan liam dawn a Puitein, Jerusalem atanga Canadian Fatherin a rawn hawnsak a pek Rosary hum chunga a mittui a hru te chu a hmuhhmaih silo. A tan zawng ka khua alo tih leh a ram leilung leh awmphung pawh alo intih hriatchian ve Chhingchhip chu alo chhuansan leh ta a, a haw hmasaka a danglam alo tih ai khan a haw leh hunah chuan alo danglam dawn tih a hai lova, a khaw hmelhmang leh ramhmul te chu lo danglam mahse thil pakhat danglamlo tura a duh a awm a, chu chu a hmangaih I thinlung chu ani. Tichuan Aizawl atang chuan Convoy rual bawk a kalin an khua an chhuahsan atanga ni 9 naah Shillong chu a thleng ta a. Lunglen pawh sawi hmanlo in Admision vel buaipui nghalin College hostel pawh a changin B.T hostel ah awmin Nagaland atanga rawn kal Keviseto nen an in roommate a. Tin sawrkar stipen a dawng dawn nen, a thla a muang deuhin, I.A zir tur chuan ain admit fel ta a, a subject lakchak thin leh a tuina Political Science te a han zir chu a nuam ati theiin a phur thei hle thin.

Dam chuan hun hi simeikhu an sawi ang maiin reilo teah a liam vat thin si, kar lovah kum alo veiin a zirlaiah a tui bawk nen Zira chu a titha theiin an hotute duhsak pawh a hlawh hle thin. A roommate Naga pa nen chuan India Politics te sawiin an tui thei hle a, India sawrkarin Hmarchhak min hnuaichhiah dan te, Assammese ho politics tenawm zia te leh Greater Nagalim, Greater Mizoram chungchang te duhthusam sawiin an phur hle thin. A roommate Kevi a hi Kohima a Sumdawng hlun fapa aniin, a Pa pawh Nagaland Undergound politics a, a ruka inhnamhnawih thuk tak leh active tak nilo mahse funding lama a thawhhlawk avangin Hel pawlho zahkai tak aniin a pa hnung zuiin Kevi a pawh politics lamah a tui hle thin.

Hetiang chhungkua atanga seilian anih avang hian Kevi a hi underground politics ah hian a tuiin MNF chungchang pawh a bengkhawnin a tan hle thin. Vawi khat phei chu Kevi an a sawmluih avang in Shillong a rawn zin zawk Naga Hel pawla an hruaitu pakhat an Commander an va hmu a. Hemi tum hian Zira nen hian an inkawm tuiin, anva hmuh pa chu alo fingin alo tawngduh nen, an tum aia rei an awm a, an haw dawna “Zira, Use your Education for the betterment of your peope, not for your ownself. If sacrifice were not made, Jesus would not even died, You and I would still be Sinners” atih chuan a rilru a hneh hle a, a hma a a ngaihtuah ngailoh MNA chungchang te ngaihtuah zuiin chumi zan phei chu a muhil thei ta lo a, hemi ni atang hian ani ahma a theory a anlo sawi thin a rilru a a awm a, a hmalam hun a ngaihtuah tak ni.

Hemi hnu thlakhat, I.A final an exam hma karah chakkhai lama a Police Bazar lama a kal chu “Zira, Zir hmelchhia” tia rawn kotu lam hawiin a chhak dawr bul atanga chuan an khaw tlangval leh a thianpa Muana, Lalmuanthanga chu a rawn chhuak hlawl mai a. An han inhmu chu mak an inti dunin an ri hluai a, Muana chu thil pawimawh avanga Shillong lama rawn chho zuai ani awm e. Lalmuanthanga, Muana tia an koh hi a pu Pasaltha Hranghleia Savawm kahtheih em avanga an phuah Savawmthanga fapa aniin an chhung hi mi huaisen chhung an ni a. Khatia ram buai tur ain mun lai khan Muana pawh hi hnam sipai ah inpe vein, amah Palian, huaisen leh Matric thelng zir alo ni bawk nen, MNA ah lieutenant nihna an pein East Pakistan, tuna Bangladesh kan tiha MNF zu training hmasa pawlah khan telin hotu te fak pawh a hlawh hle a, tunah phei chuan Captain rank a kai tawhin thil pawimawh ah pawh an rinngam mi huaisen leh Hnam Sipai thatak ani.Hemi tum an inhmu hi an inkawm nasa in, Muana hian Zira chu MNF zawm ve turin a sawm nasa hle a. A thiante dangte leh an Pu te leh mi pawimawh dang te hmuh tirin anni pawh chuan an sawm nasa hle a. Zira chuan Aw pawhlo mahse a hnial fithla duh bik lova, Mahse a rilru ah Naga pa thusawi kha rawn ri nawnin a inngaihtuah buai nasa hle.

I.A final exam an zawh chuan remchan lohna dang a awmlo nen Zira pawh chu an khawlam pan chuan a haw ve ta a. Kum 2 hnu a haw tur ani bawk nen a rilru a hlimin a zangkhai hle a, a rilru ah a hmangaih Rouluahpuii bak a lang heklo. Kum 2 chuang an inhmuhloh chhung khan ni khat pawh amah ngaihtuah lova hun hman liam a nei lova, zan khat pawh a thlalak en lova a mut a awm heklo. A tan zawng ani aia hmeltha an awm silo, engkim mai hian amah a hriatchhuahtir a, Bazara kawrthar mawi an zawrh a hmuh leh a suangtuahna in alo hakchhintir hmanhmawh a, Serthlum a hmuh leh a hrechhuakin a room banga a tar Audrey Heburn I thlalak a en chang thlengin a rilru ah Puitei alo lang a, an sawi Khawvel Nula hmeltha ngei pawh hi Puitei hian alo ang niloin amah Audrey Heburn ngei khan Puitei hi alo ang zawk nite hian a hre thin.

MNF lamin tan an tharthawh leh avang a Mizoram boruak dai deuh tawh alo alh thar leh lai a nih avang chuan Zira te zin pawh chu an kal chak theilo a, ni 12 hnuah an khua a thleng chauh a. A chhungte a hmu chu midangte ngaihtuah chuan an dinhmun tha mahse an hmel atang chuan an hreawm tawrh leh an rilru hah turzia te a ngaihtuah thiamin a chhungte chu a khawngaih hle a. An khua chu a haw tawp ai khan alo la ralmuang chuanglo emaw tih turin Sipai anla sualin anla hrang hle a. Zan lamah lah curfew aniin, an inhnaih em avang chuan chuan Zira pawh Puitei te inah a leng thei hram ani mai a, chuti nih suh se tlangval tan pawh zan lama nula rima pawn chhuah a himlo.

Chutia, kum 2 inhmulo annih avang chuan Zira leh Puitei lawm chu a kim a, an nui tawp theiloin an in enkham thei heklo .An chhungten an hrethiam a an mutsan hma nen, rei tak an inkawm a. Sipai an hlauh avangin mei an tuah eng ngamlo avang chuan thla eng bak eng a awm lova, an inchhung thim riai mai ah chuan thla eng no riai rawn lut chauh lo chu thim riai in a awm a. Mahse chu inchhung thim taka an chhungte hriatpuina hnuaia nula leh tlangval thianghlim taka inkawmte thinung erawh a eng a, an hlimzia leh rilru nawmzia te chu eng tawngka mahin a hrilhfiah zoin tuman an hriatthiampui zo awm love. An phun sep sep a, an nui hek hek a, a khat tawkin “Ka hmangaih che,ka phatsan lo ang che, rinawmin min nghak hram hram rawh aw” anti awl heklo.

PART 3

Mahse, hun hi zawngin tumah a nghak silo. Kar lovah hun a liam a, hlim viau mahse Zira kal pawh kal hun alo thlen. A hunlai boruak ralmuanglo avang chuan tu tan te pawh mahni khua, chhungte kal bosan a har dawn nen Zira tan phei chuan a hmangaih Roluahpuii chu kalsan a har mai bakah an khaw boruak chhia, nutling thleng pawha sipai laka an himlohna hmunah hian a di Puitei kalsan chu thil har aniin thil tamtak, a chhe ber thlengin a ngaihtuahlo thei silo. Zoram boruak lah chuan that lam pan lovin buaina ain thuah zel si, mahse a tum tawh a, a tana thil tha ani a, chungte avang chuan kalloh phah a tum eih lovin Zira pawh chuan a zirna chhunzawm turin Shillong lam pan chuan a kal ta a.

A kal dawnni a Puitei hreh hmel, a hlimlo hmel leh hmuh hlau tak chunga a mittui far fep fep te kha midangin hmulo mahse hmangaihtu tan zawng a hai theih siloh. A khaw hmuh a avai ruai a, thil tamtak a ngaihtuah a, a hmalam hunin enge a rawn hrin chhuah dawn a hre silo. Zoram boruak en chuan hunlo la awmtur chu thlir thiam a har si. Tichuan ni 10 chuang zet an thang hnuah Zira pawh chuan shillong a thleng ve tain, a zirna ngaihtuahin a buai nghal hle a, a thlen thlak hlim phei chuan lunglen pawh a sawi hman heklo. College an tan a, a subject tui pol.Sc leh history te chu an proffesor a thiam nen nuam ati theiin, european leh American revolution te phei chu a hunlai zoram boruak nen ngaihbelin a rilru pawh a vak tam thei a, kan ramin zalenna a sual mek hi kan tan a thain ram tan pawh a tha ani tiin a rilru pawh a kawm nasa ve hle thin.

Tum khat a college bang chu a luhna St.Edmunds thlang gate ah chuan a thianpa Muantea lo nghakin zawhna pawh zawh hman loin a bula car lo dingah chuan hruai lutin hmun pakhatah an hruai a. Hemi tum hian a thianpa Muantea mizia chu Zira chuan mak atiin a biak leh a chhang mumal lova, thil pawimawh tak chungchang ani tih baklo chu a sawi duh heklo. Tichuan shillong khawpawn lampang, Guwahati road lamah tlan puiin farm house pakhatah an hruai thleng ta a. Muantea sawi dan chuan MNF a mi pawimawh leh Mizoram sawrkar cabinet minister pawimawh deuh pakhatin a hmu duh ani awm e. Chu thu a hriat chuan a mak atiin ani zirlai satliah sawrkar hruaitu meuhin hmuh a duh chu mak a tiin a ngaih pawh a thalo hial zawk a.

Farm house room pakhatah chuan Zira chu lutin mizoram sawrkar home minister nen chuan inkawmna an nei ta a, he huna hian mi pawimawh dang 2 bak an awm lovin a thianpa Muantea pawh a awm heklo in a zam lek lek zawk a.

Zira maw I hming?
Aw ni e ka Pu.
Kei hi home minister ka niin, ka bula mi hi Army chief leh kan President adviser te anni a, thil kan sawipui duh che ani.
Enge nita ka Pu?
Hei Zira, kan ram chu zalenna tana zalenna sualin kan rammu ani a, kan sawrkara mi pawimawh tak mai, diplomatic inteligence pakhat chu India sawrkarin min mansak a, Foreign dawrtur pawimawhlai ani bawk nen, mi lehkhathiam leh fing kan mahmawhin nang hi min zawm tur leh kan ram tana hna pawi mawh thawk turin kan sawm che ani
Ka Pu, a lawmawm viau nangin ka la naupang nen, kei aia thiam an tam awm si a.
Nang aia thiam chu an tam, mahse kan ram hmangaihtu kan mahmawh a, bakah Naga hel lama kan thawhpui pakhatin I chanchin hi min hrilhin ram I vei zia te min hrilh hlauh mai a, I thiamna leh finna hi kan ram tan hmang turin ka han ngen che che ani.

Darkar tam anin kawm a an titi zawh chuan Zira pawh chu an hostel thleng an thlah leh a, a rilru a kal thuiin thil tamtak a ngaihtuah a, a chhungte leh a hmangaih Puitei ngei pawh chu a rilru ah langin a rilru a siam thei mai rihlo. Mahse, ani tehlul ramin a koh a han chhanloh chu a ram hmangaihloh thlak tiin a rilru a buai si. A zirlai, a thiamna Mizoramin a mahmawh a han hnungchhawn san chu thalai ram hmangaih inti tan chuan thil theihloh niin a hresi. Bakah ani phei chu foregin affairs atan an sawm aniin a thalaipui chaw kaw puar leh mutmu hmu thalo a rammu sang tamtak te ai chuan a dinhmun a tha dawn a, han hnungchhawnsan chu a tlawmthlakin thil tihmi ah ah a ngai lova, a rilru asiam fel ta a.

A thuthlukna a siam hnu chuan MNA hruaitu te chu a thianpa Muantea nen hmuin anni pawh anlo lawm hle a. A hna tur te hrilhin hruaitu lu tak zuiin East Pakistan lamah an sipai hotu hmu turin an loti ani awm e. Mahse a chhungte chanchin hrilh lova awm chu a ngaingam lova, rei lote haw dilin phalsak aniin East pakistan atanga lehluh a, chuta tanga MNA sipai te venna hnuai a an khaw lama chho turin rem ruatsak ani a. chutia a chhungte leh Puitei hmu tura a han haw tur chu a lawm rualin a huphurh a, an remti dawnlo tih a hriain hnungchhawn zai a reltheih tawh dawn siloh.

A hma a haw ang ani tawh lova, a han thleng chu an inah a riah a rem lova, zan tam a cham thei hek silo. A Pa lungnilo hmel te, a Nu tapri te, Puitei mangang hmel sawitur hrelo hmelte khan a thinlung ati chau a, mahse a mahmawhtu Mizoram chu a hnungchhawn thei tawh silo.

“U Zir, kan ram I hmangaih vang anih chuan ka chhuang a che, ka hmangaih che a, I tan kalo rinawm zel nang e. Zoramtharah hlimten kan leng dun dawn nia”

ti a Puitei thlahna te kha ngaihthlak a nawm rualin a hreawm si. Mahse, a thianpa Muantea chu Chhingchhip lampang area, Lungpho division army command tura an ruat avangin an khaw lamah, khawchhungah nilo mahse a awm tawh dawn avangin a chhungte lo veng ru thei turah a ngai a, tlem chuan a rilru a muangin a bikin a hmangaih Roluahpuii sipai sual lak ata lo veng turin a chah uluk hle bawkin ni reilo te hnuah chuan civil mi ni tawhlo leh ram sipai ni tur chuan a hna hmasa ti turin East Pakistan lam pan chuan a kal ta a.

A TLIP NA

Thawk ala halh a, bottle a tui chu in bawrh bawrh in mi han en a,
Puia, ram leh hnam tan tiin ka pen chhuak a, ka chan hi a chau asin. Engkim huamin ka chhuak a, ka Pa a boral phah a, ka hmangaih Roluahpuii, angel ianga nunnem leh pawisawilo chu ka chan phah bawk si
Pa.Zir enga ti nge?
Puia, sawi pawh hi a nuamlo asin. Ram sipai dang ai chuan nuamsa mah ila, a ruk a rala sawrkar dawrin ka hmanhlel a, ka buai a, chutih laiin ka chanchin chu sipai beng alo thleng a, ka chhungten an tawrh phah a, bakah…
A thaw halh a, a melh ngai a melh vang vang a
Puia, ka thianpa, MNA a ka tanchhan pakhat, kan khaw bul hnaia a awm tak avanga ka thlamuanna Muantea khan Puii chu alo ngaizawng a, anin a duh silo. Tichuan mi tenawm chuan Puii te chhung chu, ram tana ka thawhpui MNA dang lakah kawktu tia hekin chhun pachangah kan khaw daiah ngei an chhungkuain an kaphlum a, sipai lam lahin kei mah vangin ka pa kut an thlak a, ani tar chaklo chuan a boral phah bawk asin. Ka tan zawng, hmangaihna hi engmahlo mai ani tawh a, ram hmangaih inti te phei chu ka tan ek pawh an tluklo asin. Phatsantu Muana, dawt hmanga ka nun ti hreawmtu pawh ram hmangaih intiin a pawlte sawrkar zar zovin a inchhek milen saw. Phuba lak ka ckal thin. Mahse Puia, phuba chu kei mihring lak tur ani silo, a thiltih rah zawng ala tuar dawn si.

Patling meuh a sawi pah chuan a biangah mittui a luang a, a mitmengah thinrimna a lang chu ka dem miahlo. Pa.Zira, a nupui neihloh avanga mi fiam rawn ina hmangaihna, ram leh nula pakhat a hmangahna avanga a nuna hreawmna a tawrh dan chu mak ka ti a, a ni ang ni ila a tun dinhmun chanve pawh ka pha dawnlo tih ka hai silo. Mahse, ka bula thu sam sei chhap, pa lian tak chuan kum tam ral tawh mahse a di Roluahpuii chu ala hmangaih tih ka hria a, ka dem heklo.

Hmangaihna hi zawng a ropuia, hlimna kumkhua leh tawrhna kumkhua thlen theitu anisi.

Similar Posts:

• Roluahpuii Part-2
• Roluahpuii
• Untitled
• I cham reng thin asin Part-II
• Khawvela mi a ber pahnih

Recent Posts:

• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release
• Ka lawm e, Mi(sual)-nu!

This entry was posted on Monday, April 9th, 2012 at 7:00 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.