mi(sual).com

…King Edward-an Nuthlawi a Ngaizawng Elo?
Kum 1936 khan England Lal Edward VIII, King of England chuan American nuthlawi, Mrs. Wallis Warfield Simpson a ngaizawng a, nupuia a neih avangin a Lalthuthleng a kalsan (abdicated) a. Edward VIII hian a nau George VI hnenah Lallukhum a hlan a ni. January 1936-a a pa King George V a thih khan, King Edward VIII hian Lalthutthleng a luah a. Mahse, rei vak lohva American nuthlawi, Mrs. Wallis Warfield Simpson nen an inngaihzawn thu hriat-chhuah a ni a. British Prime Minister Stanley Baldwin-an October 20, 1936 khan, King Edward chu England Lal leh Church of England Hotu a nihna hre reng a, nuthlawi chu nupuia nei lo turin nasa takin a thlêm a.

…A Nuthlawi Ngaihzawng Nen An Innei Ta!
Mahse, King Edward VIII hian a Lalthutthleng kalsan a, Mrs. Simpson chu neih ngei a thlan thu Prime Minister Baldwin hi a hrilh chiang ta a ni.  December 11, 1936 khan Edward VIII chuan, a Lalthutthleng kalsanin, a nau Duke of York, King George VI hnenah Lalthutthleng chu a pe a. King Edward VIII hian Duke of Windsor nihna a chang zui a, Mrs. Simpson pawh June 1937 khan nupui-ah a nei ta a ni. Hei hi Mizoram-a kan pi leh pute pawh khan an lo tuar ve hle a, King Edward VIII hi hming thar “Lalbânga” tiin an vuah sak nghe nghe a nih kha.

…A Tupa Pawhin Nuthlawi Bawk…
Prince Charles pawh nupui hmelțha tak Lady Diana (1961-1997) a nei reng chungin, nuthlawi bawk, Mrs. Cammila Parker Bowls (July 17, 1947-) a ngaizawng leh tlat nia! Kum 1972 daih ațang tawhin a rukin an lo inngai zawng tih a sawi nghe nghe! Lady Diana nen pawh kum 1996 khan an ințhen phah ta hial a, vanduaithlak takin Diana pawh accident-ah a thih-phah ta nghe nghe. Diana chhungte hi keini ang rilru tê leh chhe tak chu ni sela, Ukil thiam leh dawthei tak ruaiin, Charles hi an khing ang a, “Kan fanu Bawihmamtuai Diana-i hi indirect-in i that a ni. Nuthlawi Parker-i ngaizawng lovin, innei țha hle hle ula chuan hetiang thil hi a thleng lovang” tia an charge ngei ka ring hial!

He mite thuziak ațang hian Prince Charles chanchin hi chu a chiang țek țawk hle. Mi fate hi chu an frank asin aw, “He admitted to adultery with Camilla Parker Bowles during his marriage to Princess Diana” (Ref. https://www.biography.com/people/prince-charles-9244936), tiin khawvel hriatah an phochhuak hmiah. Princes Charles emaw, a chhungte emaw-in FIR an thehluh thu kan hre lova, “min ti-hmingchhia” tia an chanchin dik tak chhuahtute an khin chiam thu pawh kan hre lova, an insawifiah chiam thu pawh kan hre lo. Mi fate chu…

Tichuan, Prince Charles chuan a nuthlawi hmangaih, Nuthlawi Parker nen chuan April 9, 2005 khan an innei ta nge nge! Ka ngaihtuahna a kal thui hle. A pu Edward-a hnung chiah chiah a zui a ni si a! Thil tam tak hi inthlahchhawn theih a ni ngei a ni, ka ti ta! Nu pakhat pawh a laizawnnu-te chenin patil ang hi an ni mai a. Hmeichhia si hmeichhia bawk nupui-ah te a nei vel a. Pasal a nei ve bawk a, fate pawh a nei ve. A fapa chu a tuai daih thung a. Amah ber pawh hi an pa (pasal) aiin a pa zawk. Hlauhawm deuh a ni…

…Bawngpui Pawhin Luangno Bawk A Duh Lem Lo…
Mizo upa-in “Bawngpui pawhin luang no bawk a duh” an tih hi hemi te putu (Edward & Charles)-a a thlen dik dan hi chu a dang ta! Edward leh Charles tan kha chuan tleirawl hmelțha leh malmum etc, tih lampang chu a rilru-ah a lut lo tihna a ni. Tleirawl malmum, la hawn loh ai chuan, Secondhand, hawn sa diam tawh, elastic pawh thawl vek tawh an ngaisang daih zawk nia! Chuvangin, an thiltih dan ațang hian “sakawlin sakawl a hring a, sahrangin sahrang a hring” an lo tih kha an chungah a thleng dik ta zawk a ni.

…Tunlaiah chuan ‘Buy 1 Get 2 Free’ Tih A Lar…
He thu hi phaia ka awm lai kha chuan, Shopping Mall-ah a lar hle a, News paper-ah an thil zawrh lai fak nan an hmang nasa hle bawk! Mahse, hmanni-ah Facebook-a țhian 1 chuan awmze nei em em-in ‘nupui-pasal inzawn’ thu-ah fiamthu thawh nan a rawn hmang a. A sawitum a dang ta daih a! A thûkin, a ril raih mai a, a fiah bawk si! Chutihlaiin a nuihzatthlak ru tlat bawk si! lai tak mai hi țha ka ti. Thenkhat chuan “Nula II” te pawh an ti ve bawk awm e.

Thenkhat phei chuan, “…Mobile phone kan hman nasat lutuk aleiah kan chi a hut a, fa tak ngial pawh kan nei theih tawh loh laia a free-a neih mai theih te chu a țha lutuk alawm, nau ek suk leh fate enkawl mah a har nak alaiin, sorkar hnathawk te an nih lek phei chuan… saihlum pakhatin sava 3 kan perh-thla a ni mai alawm…” an la ti ta deuh deuh!?

A dawihzep deuh pawhin biru zuai chungin, “Hmanah chuan mipa in hmeichhe chawm nih an duh ngai lo a, tunah chuan nupui, anmahni chawm thei tur an zawng!” an rawn ti hram bawk. Tunlai țhangthar inla-changkang, engkim duh leh mamawh, hna hmu zo lo, thawhchhuah nei silo tan chuan hei ngei hi chu a hlawk-in, a tih chi ve em bawk a tin a ni ang! Hetiang ni ve lem lo tan pawh a applicable thovin ka ring bawk.

…Ramar I Duh Chuan Chepa Thlang la?
Tlangval pakhat pawh nupui neih a chak ve tawh bawk si, a tihngaihna tak hre bawk si lo khan, “Kei chu nupui min zawnpui dawn chuan, hmeichhia ni ngei se, a zung thei ngawr ngawr a nih chuan ka duh vek” zu han ti ngawt a!  He tlangval bawk hian, nupui a nei ta a, a lawm ngang a ni ang. A thian-te nupui la nei ve lo te hnenah chuan, “Nupui inneih dawn chuan, hmeichhia ngei nei ang che u…” tiin thurawn a pe a, a fuih vel!

Ngaihdan hi a in-ang lo thei hle mai. Thenkhat chuan damchhung tawite-ah, tlangval emaw pathlawi emaw pawh ni ila “Mi sakawr chuan hnu lo chuan ve ringawt te chu a… nula, hawn loh ngat le” an tih laiin, țhenkhat thung chuan, “Sakawr pawh sawizawi tawh nge nge hi an țha. Nuthlawi chuan engkim an lo hre tawh a. An zei zawk a, an rilru a zau zawk a, sorkar hnathawk an nih ngat phei chuan… van-lawmna a ni ringawt e” an ti thung!

Mizo fiamthu an sawi kha min ti hrechhuak. Tlangval leh naupang khan an thangkam en-in an kal a, Ramar leh Chepa a lo awk hlauh mai. Tlangval khan thiam takin naupang chu duh a thlan tir a, “Ramar hi i duh zawk chuan chepa thlang la. Chepa hi i duh chuan chepa thlang law law rawh” a ti e, an ti, thlan tur zawk chu a chiang kek kawk hle mai.

…Khai Le… Engtin Nge Ni Ang Le?
Bible hi en ila, Pathianin “ka rilru ang pu ka chhar ta” a tih, Lal Davida ngawih ngawih pawhin, Uria nupui, Nuthlawi Bethsebi bawk chu a ni lawmni a âtchilh kha? (2Sam.11, Heb.bath-she’-ba, the seventh daughter, the daughter of an oath, etc.). Bible chuan Puithiam (priest) tan chuan ramri kham chiang takin a nei a. “Puithiam chuan nupui atan hmeithai emaw, mâk hnu emaw, hmeichhe hminghliau emaw, nawhchizuar emaw, a nei tur a ni lova, a chipui zinga nula thianghlim (virgin) ngat a nei tur  ni” (Lev.21:13-15) tiin.

Davida ang hi sakhaw hruaitu, ram hruaitu leh sorkar hnathawk zingah kan awm nual mai thei? Nuthlawi neih hi a țhatna leh țhat lohna engnge ni ang? Lal Davida leh Lal Edward leh Lal Charles-te ațang khian, nuthlawi neih hian mipa-te dinhmun leh nihna (dignity & status) te a khawih pawi tel thei ang em? Khawtlang leh mipuiin an en dan (thlir dan) a dang thei ang em? Mizo society-ah hian eng dinhmun chiah nge a luah? I sawiho teh ang u.

Similar Posts:

• Prince William leh Catherine Middleton an in hual ta
• Lalbanga (King Edward VIII) kha!
• History of football
• Chhandamna Man To Zia Hi I Ngaihtuah Ngai Em? – Part 2 (Adapted From My Sermon, “A Costly Christmas” Delivered on Dt. 27-12-2015)
• Nuthlawi nge Hmeithai?

Recent Posts:

• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games
• Sehrep thenfai dan awlsam
• American flag thui hmasaber tu chu tunge?
• mi(sual).com hi!

This entry was posted on Wednesday, April 25th, 2012 at 8:30 pm and is filed under Information, Lifestyle, Mizo Society & Culture, More than words, Opinion. You can follow any responses to this entry through the RSS 2.0 feed. You can leave a response, or trackback from your own site.