Khuavang kal lai ang maiin Elm street chu a reh duk maia, thli chuan kawtthlerah vaivut te chu a rawn chhem khu chum chum maia, Californiaah khawthar thangchak ber pawlah ngaih Deadwood chuan ennawm dangdai tak a thlir mek ani.
Kawtthler laitaka chuan mi pahnih, ngawi renga inhmachhawn mek an awma, an damchhan leh thiltum erawh an hmel in anglo tluk zet in a hrang tluah ta ve ang. Jack Hobbs tan chuan a hringnun ah hun vawrtawp a thleng mek a, kum sawm chuang alo suangtuah tawh, kum 13 mi anih laia thilthleng avanga a mitthla a cham reng thin ramhuaia ngei mai chu a hmachhawn ani.
Scarface Johnny tan zawng a hmaa ding tlangval la naupang tak chu minung pakhat ani ve maia, suantlang hmanga hremhmun daikawnah tirh liam leh tur pakhat ve mai tih ni awm fahran mitmeng hi a han hmuh a. A hmuihmul leh khabe hmul te chu uksak hlawh lo anni tih hriattakin an buk sen urh hlawma, Scarface rilru sak zia leh luhlul zia hriatna awlsam ber pawh ani mahna.
“Kan nauva chu ilo va lian tawh ve”, Scarface chuan nuihsawh titih hian a han ti a, a kawr sen uk hak chu velvet manto chi a siam ni mahse, a bal in a pawrh fap tawh a, chhing ang reng takin a kawng ding lamah chuan a fawng saruh a siam Colt .45 a bet thlap a, hman ngun ti hriattak hian a fawng te chu a tle hlar maia,” ka inhmuh nuhnung berah kha chuan i nu leh pa te ruang bulah thlabar taka ding zum reng bak tihtheih i la nei lo kha” a han ti zawm zat a. ” I nu kha awm tha mai mai ni sela chuan ka kahlum tel lo tur, fork hmangin mi rawn tai khanglang a tin nih kha, kha uipui hur khan,” a mitko veilam atanga a khabe hnuai thlenga ser larsar tak mai chu a kut thap zet a khawih pah chuan a ti chuar chuar a, Jack Hobbs erawhin kamkhat pawh a chhang lo.
A mitthla ah chuan an ranch te, a nu leh pa ruang let reng te, Scarface Johnny in diriam taka a nuih lai te chu a rawn lang zung zung a, a pum chhung chu let but but hian a hria a, a hun a thleng ta tih a hre mai a. Ni sa rum rut hnuaiah chuan boruak a uap churh maia, Saloon leh Riakbuk bahthlar atang chuan kimki chawih chawih chungin nuho chuan an lo thlir a, mipa ho lah chu helhawlh tih hriattak hian kawtthlera mi pahnih te chu an en tawn chhen tawh maia.
” Scarface, i hun a tawp”, Jack chuan a han ti sap a, a lo thlir tu te hmuh mang lo laiin a kutah chuan silai alo perh chhuak nawlh mai a.
A ri thuai a,
Ka harh zawk a, thliin ka study room ah kawngkhar a rawn chhem lo ni reng in….
Aaaaaaaa…..Ka ngaituah zawm peih tawh lo, duh leh in draw tir ula, duh leh a silai chu tlawlhtir ula, duh leh kah thelh tir ula. 
Similar Posts:
- Hmeichhia te tan… :P
- Lianuma tlâwmngaihna
- Mizo hmeichhe ruang chhar!
- Breaking News: Tui tla zawngtu tuiah a tlahlum ve leh
- MTV Movie Awards 2008
April 26th, 2012 at 3:36 pm
Report this comment
April 26th, 2012 at 3:41 pm
Ngaihnawm khawp mai
Report this comment
April 26th, 2012 at 4:33 pm
Thlahrang lam a ni dawn emaw ka tia.
Report this comment
April 26th, 2012 at 4:48 pm
second sawm hmun sawm a then a hmun khat a ral leh meuh chuan, Scarface-a mit leh mit inkaran chuan Jack Hobbs a ngen mu chuan a verh fel der tawh a. Scarface-a chu a thingthi rup a, a pistol a chanve vel a phawi tawh pawh chu phawi chhuak turin chakna a nei ta lo, tual charah chuan hmai lei si rengin a tlu ta a.
Silai thawm a reh rual chuan khuavang kal lai ang maiin a reh a, hriau pawh thlauh se a ring hle awm e. Hmahhmawh tak a Sheriff Buck-a rawn tlan thawm chuan a rawn chhunzawm a, mipui phun mur mur chuan a zui nghal a……
tren tren
Report this comment
April 26th, 2012 at 5:50 pm
Cowboy lehkhabu han ziak law law mai teh; hralh sum atan.
Report this comment
April 26th, 2012 at 6:08 pm
Scarface Johnny kha a thi hlenah in ngai elo maw…a teuh lo mai! Chumi zan atang chuan Elm street kawtthlera tui ti taka Dal leh Alu hawp thin te leh Sabji bazara riak thinte chuan mutmu an tuah tawh reng reng hlei nem. Zan lamahte chuan Saloon te chu a ruak hiai huai tawh zawk asin. A chhan chu maw, Jack Hobbs-a khan Scarface kha a hahmaiah tak verhsak a, hahmai kim lova Tah leh Ha thialna hmuna kal chu a ngam ngang loh avangin Deadwood kawtthlerah chuan a hahmai bo chu zan tin a rawn zawng ta thin a ni. Chutia…
Report this comment
April 26th, 2012 at 6:35 pm
#4, chhuaklinga, part 2 ziak lo ziak law law la, keia ai pawn i thiam zawk khi
#6, buh-duha ka va han nui nasa tak em, ka pum ana vek tawh
Report this comment
April 26th, 2012 at 7:25 pm
A ngaihnawm reuh tawp.
Report this comment
April 27th, 2012 at 12:12 am
A ngaihnawm zek mai, cowboy thawnthu ziak la, i bei ngaihnawm phian ang a.
Report this comment
April 27th, 2012 at 8:18 am
Report this comment
April 27th, 2012 at 9:08 am
Report this comment
April 27th, 2012 at 11:31 am
pawl 7 vel kan nih laiin cowboy thawnthu ka phhuah min ti hre chhuak.. phek khat pawh ka phuah tlin zo lo
Lalthianghlima lehlin kha a lar thin.. 
Report this comment