-C.D. Vanlalfamkima,
Govt. P/S Teacher, Dulte
He ka ramhuai hmuh hi tak tak a ni a. Tun thlengin ka piansual phah a. Kum 1951 vel kum 5 mi vel ka ni tawh a; duh duhin khawlai ka leng thei tawh a. Kan khua Dulte Veng chhak, Kawnzawla kan awm lai a ni a. Kan Veng chu a hrâng ang reng khawp a, zan tin hi thawm kan hre reng thin a.
Tlai khat chu, Pi Zachhingpuii tui chawi turin, pa pakhat Palianpui, mikhual hi a tawk a, Khawia awm nge i nih a, Khawnge i kal dawn? a ti a. Ani chuan, “Helaiah hian naupang dam lo kan ka tum a, ka awmna chu khinglai Bevuak tlang pang vela awm khi ka ni a,” a ti a, an in kalsan mai a. Chutih lai tak chuan kei ka pum a lo na a, chhuatah ka tal ka tal a, zanah kan han mu chu le, zan lai velah chuan ka lu ah min rawn khawih harh ta a, ka ṭe ṭhawt a. Ka nu leh pa chu an harh nghal vat a, engtizia nge Mambawih? min ti a. Kei chuan ka nu, ka pa ka hlau em mai! ka ti a. Engnge ni i hlauh? min ti a, khum mawng lam ka kawk a. Chutih lai tak chuan ka pain mei a chhem eng hluah a, (Heng hunlai chuan khawnvar te kan la nei si lo va, chubakah keini chu kan la rethei em em a ) Ramhuai ka hmu kan khum mawnga hi a thu run mai ka ti a. An hmu ve thei si lo va; ka kutin ka hmai ka hup a, ka nuin puan kawp chhah tawk thlepin ka hmai a rawn hup ve leh a, chutichung pawhin kut zung karah ka la hmu ta tho va; ka nu chu a tawngtai nasa hle.
Ramhuai awmdan chu, pa lianpui, khuma a thu chu liang a tawng a, puandum hi a ar chempai a, mi boxing tumin mi tin zuau zuau mai a. Chutihlai tak chuan Kawlkulh a ka pa Lianthiauva Silai kan kawl lai a ni a, “Ka pa, Phuai e Phung ti rawh,” ka ti thin a, Silai chu an la ve bawk thin a, mahse a hmu ve thei si lova, kah ngaihna a hre si lo. Khawvar dawnin min tin san a. Chutiang chuan zan thum min bei thin a. A zan thumnaah chuan, ka pain khawinge, ti reng reng mai tiin, Pi/Puten pawnchhe muhin len vel ila a ziaawm ngai e an tih kha maw, tiin pawnchhia chu lian tawkin a mut a, a rin len vel a; a chhuak ta a. Kei naupang la tawng fiah lo ta chuan, a pain a dep hlawk hlawk a, seh hlawk a ti a, a chhuak ta, ka ti a. Kan in a chhuah hnuin kan kawm chhakah sisu kung 2 a awm a; a zung hlir rapin leh a zung zawnah hlir a rap a, kan kawmchhakte naute, Upa Neihmuka te fa chu a la a, daipawn lamah a liampui a ka hmu zel a, Ramhnuai an thlenin ka hmu ta lo chauh a ni. Tichuan Upa Neihmuka te fa chu a thi nghal a ni.
Tin, hetih lai hian kan Veng ar chu zan thum an khuang lo reng reng a, kan arpa phei chu a chhuang a duk vek a, a thi tawp mai bawk a, tichuan heta tang hian khawsikpuiin ka na ta char char a, ka thi mai dawn emaw min ti hial a. Mahse Pathian khawngaihna zarah ka damchhuak leh hram a, ka piansual phah ta thung a, ka beng a chhet phah a ni, tun thlengin.
Tin, ka nuin a hmain a mumangah a lo hmu lawk bawk a, a hmuh dan chuan mi pakhat palianpui kan bangah a lo bet thlawp mai a. Ka lo hlau em em a, ka harh hlawl mai a ti bawk a ni. Kan Veng/Khuate pawhin min hriatpui e.
Source: RAMHUAI By MUP General Headquarters.
May 1st, 2012 at 7:33 pm
Kei hi ram-hùai leh túaldâwi kawp ka nia. Dâwi-zeh leh hùaisàr ka fàwm bawk.
Report this comment