«
»

Khawpui Zin Thu-II (Chhunzawmna)

June 20th, 2012 11:48 am by Dr Mahminga Sailo

(Beisei loh lutuk tak maia Police-in min koh takah chuan, bangbo takin khawpui zin thu ka rek bung ta ngawt a nih kha. Bangbo takin tan leh tawp mai ang aw… :-) )

Scooter tawng tak leh constable driver
Scooter tawng tak hnung atang chuan, constable min phurtu chu, inthlahrung takin min hruai chhan ka zawt a. Min hrilh tha duh miah lo lehnghal. Aizawl vawikhat ka zinna, Hrangbana college chiah ka thlen chin a ni si. Ka la kal ngai miah lohna lamah chuan min phur phei zel a. Inchhawng sang pui pui, lirthei intlar put karah chuan kan tlan phei zel a. Mahni lo maha rilru hah nak alaiin, constable lumuma lah chuan, ‘aw he’ng tleirawl nalh tak tak te hi, kan tih miah lova pasal nei mai mai tur atan chuan an va uiawm tak tirawe’ tiin nula kawngkal a it thu min hrilh phei mawlh mawlh! Thin phu dup dupa, ‘eng tak thleng ang maw?‘ tia ngaihtuah laia; nula a’n hisap kual vel chu, a tukhuma kuk lawlh tak ka nap. ;-)

Ka hming chu…
Aizawl Police station kan thleng a. Pi BM-i (Biakmawii a ni mai thei), ASI room-ah min hruai lut a. Min koh chhan hre chiang turin Pi BM-i chu ka zawt a. I thianpa admit card I laksak, I pe leh si lova, a exam theih tak loh avangin FIR an thehlut a a ti ta mai! Fur ruah sur lai, khawdur kuih kuih lai mah ni se, thlan a sa phat phat.

Chutih nak alaiin, Pi BM-i chuan thawveng fe hian, kal rawh damdawi inah min va kalpui lawk teh tiin damdawi inah te ka va kalpui leh vel. Damdawi ina hmehriat a hmuh te hnenah chuan, thuzawh fiah ngaite hi ka chhuahpui fo a nia te a ti tak deuh deuh a. Chhan hriat chian mang lohva Police station ka thleng mah zak rilruk tawh nak alaiin, a chala va pen fawk mai kha a chakawm lek lek. ;-)

Chuti chuan, Police station ka let hnuah ka statement a la tan ta. Ka hming chu.., chumi khuaah.., chumi ni leh thla.., kum.., ah ka piang a…, ka pa hming… ka nu hming.., ka thianpa pakhat admit card ka laksak.., midang a admit card laksaka min puhtu… engmah ka hriatpui lo… tih zawng zawng chipchiar takin ka inpuanna chu muang chang fahranin a ziak a. Ka chanchin chu Aizawl police station file-ah a let ve ta reng mai a nih chu!

Police min koh chhan
Ka thianpa, (kan senior) exam bei ve turin, Exam dawn tlai chiaha Aizawl a lo thlen dawn avangin, a admit card laksak turin min ngen a. Ka laksak ve mai bawk a.

Admit card ka lak ni hian, ka u pakhatin min kalpui a; kalpui awm lo chuan kal ngaihna hre hek lo i. Tichuan, ka thianpa admit card chu laksakin, ka u chuan ka thianpa admit card zawnah chuan ngaihtuah chiang mang lovin signature a pe ve ngawt a. Ngaihtha takin kan haw a.

Hetiang hian buaina a chhuak ta. Kan thianpa thianpa ve leh chhawng, admit card ka laksak miah loh chuan, exam tan dawnah a admit card a hmu zo ta lo. A exam theih dawn loh thu hrilh a nih avangin a mangang chuan FIR a lo thehlut niin. A zeldin kal zelah mi a rinhlelh thu zawng zawng police hnenah a lo sawi vak mai a! Police-in an han chhui takah chuan, ka thianpa pakhat admit card ka laksak a, signature ka u-in a lo pek ve ngawt avang chuan ka rinhlelhawm ta ber a nih chu. Ka signature pe ni ila, Police hian min ko miah lovang. Police chhuizawn dan chuan, A thianpa pakhat admit card a lakchhuah sak a, signature inang lo a hmang, admit card bo pawh hi a laksak tho a niang ti ringhlelin thu zawhfiah turin min ko a lo ni.

Lam ang letin Leitlangpuiah
Rilru nuam lo takin ka haw phei a. Engemaw thubuai a kal thui chuan lungleiah pawh haw mah la, thu zawhfiah che a tul chuan, police-in an rawn hruai ang che tiin Pi BM-i chuan thuin min thlah a. CFL-a hla, Kan vangkhawpui bela chhingkhual i rawn chan lai khan e, kar pawh awm hman lovin ka lo hmangaih reng che tih biahthu reng dawng lo. Aizawl ka zin vawikhatnaa ka biathu dawn ve chhun chuan, lung a kuai mawlh lo.. ;-)

In ka thlenin, thil thleng chungchang ka chhungte ka hrilh a, an mangang khawp mai. ‘Engatinge thu chiang awm lova I rawn haw’ min ti ta zek mai. Ka thiamna leh ka tihdikloh ni miah lovah chuan ka buai na chhan tur ka hre miah si lo. Thu a kal a kal kual chuan, thiam loh I chang daih thei asin tiin fimkhur thuhlaah min sawithaih ta deuh deuh a. Rilru a hah tan.

Jail chaw kan ei dial dial anga ni mai…
Rilru hah takin ka thianpa, admit card ka laksak chu thukhawchang sawipui ve hrim hrim a tha e tiin an inah ka han leng a. Joseph, tum loh deuhin admit card bo chungchangah, police-in ka lakchhuah angah min puh a, I admit card ka lo laksak kher bawk che nen. Engtinge ni dawn ni? ka chhungte rilru a buai riau mai ka’n ti a.

Ani lah chu, thu tung et ut chung hian a nui ta kur kur mai a. E, a pawi hlei nem. Kan tihdikloh pawh ni lo, kan thiamna renga min puh lui tlat a nih chuan, kan dikna avangin chuan jail chaw kan ei dun rial rial ang a ni mai alawm a ti duh chauh mai si! Ka thianpa fiamthu thawh a zawnga ka nuih tiza lo ber a ni.. :-( Mahse, kan thiam lohna a awm lova, a ruka thil ka tih a awm lo na na na chu; kha thubuai khan min tibuai chhunzawm lem lo.

Tichuan, Aizawl vawikhat ka zin ve hnu chuan, vanneihthlak takin zir chhunzawmna remchang tak ka hmu ve ta hlauh va. Mizoram khawpui ber, Aizawl chu zin mai ni lovin kum nga chuang lai ka chenchilh a. Nula rim ngawta lengchhuak lovin; Bawng/vawk/ui rulhut zawnga hmanhlel te’n, khuantevikah zawlkhawpui chhung leh daifem ka fankual zak zak chang a awm fo nia! :-D

Similar Posts:

Recent Posts:

This entry was posted on Wednesday, June 20th, 2012 at 11:48 am and is filed under Luangliam, Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.

28 Responses to “Khawpui Zin Thu-II (Chhunzawmna)”

  1. 1
    sheldon Says:
    June 20th, 2012 at 1:12 pm

    Post chhiar hma in – Vawin misual han reh em em zia chu, zing dar 10.32am atang a tun 1.15pm inkar hian comment 4 chiah a lut :-( :-S

    Ka la first zui mawle.

    Report this comment

  2. 2
    hiho Says:
    June 20th, 2012 at 1:16 pm

    2nd nan ….Khawpui Zin Thu- III awm tur ah ngai ang. :-)

    Report this comment

  3. 3
    century child Says:
    June 20th, 2012 at 1:28 pm

    Ngaihnawm lehpek (Y)

    Report this comment

  4. 4
    LaMea CâcTùs FLh Says:
    June 20th, 2012 at 1:37 pm

    Brahmin nula chu part 4 ah ami

    Report this comment

  5. 5
    saint sammoo Says:
    June 20th, 2012 at 1:46 pm

    ngaihmawm e.

    Report this comment

  6. 6
    Jacka Pi Says:
    June 20th, 2012 at 2:05 pm

    Thu hi i thiam sawt riau mai, a ngaihnawm thei riau zel tlat

    Report this comment

  7. 7
    saint sammoo Says:
    June 20th, 2012 at 2:31 pm

    a va mak e… Lengzem.. Chhemdamthli.. ??? Ka chhiar tawh tlata ka hriat chu le. I insawi ang hi i ni miah lo. I rilru hi a ril ru tlats..

    Report this comment

  8. 8
    Dr Mahminga Sailo Says:
    June 20th, 2012 at 2:37 pm

    Vawiin chu, misual.com ka lut tha thei der lo.. :-(

    @ LaMea… ‘Thlangkawrvai lanu ka ngai bil lo..’ tiin perhkhuang nen zaihla ka sa tawh dawn… :-D

    @ Jacka Pi… Fuihpawrh nuam tih takah, ka pawrh turh turh ta ber a nih awm hi… :-)

    @ Saint… Ka thuziah ningnel ve tak tak hi, misual.com-ah leh BMA AW-ah bak ka pe ngailo asin. Ka post hmasaah khan tlem azawng chu ka sawilang tawh mai thei.. :-)

    Report this comment

  9. 9
    ahooma_ Says:
    June 20th, 2012 at 3:05 pm

    Vawiin misual hi luh a va har ve :-O .

    Post a va han ngaihnawm em! (Y)(Y)

    Report this comment

  10. 10
    Jacka Pi Says:
    June 20th, 2012 at 3:50 pm

    In lo ni ve tho maw? Keipawh ka thinrim tawh lamah ka rawn lut leh thei hraaaaaammmmm :-[

    Report this comment

  11. 11
    Kher Kher Says:
    June 20th, 2012 at 3:53 pm

    Nia keipawn ka chhiar ve tat tawh, a hma in a lo paws nel nual tawh niang.

    Ngaihnawm khawp mai. (Y)

    Report this comment

  12. 12
    Dr Mahminga Sailo Says:
    June 20th, 2012 at 3:56 pm

    Database Error… a lo lang leh kulh thin :-( Admin-te an nuar a ni mai thei… :-D
    @ Kher kher… Nia, chipchiar vak lovin ka post/comment hmasaah ka sawi lang tawh mai thei… :-)

    Report this comment

  13. 13
    Kher Kher Says:
    June 20th, 2012 at 4:02 pm

    Ok. Part III ka lo nghak lehnghal a nia tang nasa rawh :-D (Y)

    Report this comment

  14. 14
    Master Kim Says:
    June 20th, 2012 at 5:22 pm

    Khawpui zin mana an lo vaw zek lo che chu i vannei teh e. :-P

    Chhiar a nuam khup mai. A tawi mah mah emo ni ka ti. Thu chhiar nuam deuh hi chu a tawi sam viau zel ania. :-D

    Report this comment

  15. 15
    Dr Mahminga Sailo Says:
    June 20th, 2012 at 5:48 pm

    # 14… Ka hlauh hmanzia chu a… :-D

    Police station-a koh tawh kha chu, kutkawl min bun tir ngei ringin ka lut a. Admit card laksak loh pui kha, ‘I la ngei ti raw, i signature atang paw’n kan hria alawm’ tiin min dawp paha min vuak hrep ka rin vang a nia, Aizawl nula hmeltha pawh ka thlek ngam loh. :-P Pi BM-i ka hmuh tirh te chuan, ‘dawp kher ngai lovin inpuang mai rawh’ te min ti vel. Hlauthawnawm ve duh lutuk, tumah hmelhriat an awm si lo. Inbuan chak Pu Duata kha, kan bulah a lo vei thoh thoh bawk si; min vawtu a nih teh chuan tiin ka huphurh lawk teh asin. Mahse, case tenau tak, evidence pawh awm chiang lo a nih avangin, rin phak bakin Pi BM-i khan a la-light viau zawk a… ;-)

    E taka, Hrangbana college atang Police station panna kawng, inchhawng sang tak tak leh lirthei intlar put ka hmuhna kawng kha, zarkawt kawngpui khi a ni chiang… :-P

    Report this comment

  16. 16
    muansakhi Says:
    June 20th, 2012 at 7:19 pm

    Dr. Mahminga lokalna Lunglei ah sawn kan tleirawl laiin kan zu nam kha kan lo bengchheng deuhva. Police in min man ta. Officer pakhat hmaah ka ruih loh thu ka sawi pang pang a. Min mantu ber Pi Mawizuali’n, “Kha pa a tawngtam riau mai, a ruih leh ruih loh pawh hre hrang hlei lo vuak harh deuh a ngai anih kha” an ti mai chu, ka ngawi chiang teh asin.

    Report this comment

  17. 17
    Dr Mahminga Sailo Says:
    June 20th, 2012 at 7:46 pm

    #16… :-D :-P
    Vuakharh ber kher chu a huphurhawm ngawt ang.. Ka hlauhzawng tak. Min vua ang nge vaw lo ang? Tih ngaihtuah lai vel kha a hrehawm.. :-(

    Report this comment

  18. 18
    Jacka Pi Says:
    June 20th, 2012 at 7:56 pm

    #16. Pi mawizuali vuak ber kher phei chu !!!:-D

    Report this comment

  19. 19
    mamboihi Says:
    June 20th, 2012 at 8:13 pm

    Aizawl vawikhat kal na ah experience i va nei rapthlak ve hehe!! Mahse Scooty i chuan phah nih khi haha!! :-D

    Police station in thlen lai vela i awm dan vel tur khi a nuam lo ngawt ang… Ka khawngaih che e..

    Report this comment

  20. 20
    Chhuaklinga Says:
    June 20th, 2012 at 8:15 pm

    A ngaihnawm leh pek e. (Y) Nia, i thukhawchang chhiar a nuamin a ngaihnawm tawlh tawlh, han ti zel teh.

    Police custody a i awm a, i awmdan tur khi ka hriatthiampui lutuk che. :D (Y) Hmanah keipawh i sawina police station-ah ngei khian ka thiam lohna awm miah lovah ka stateman an la ve tawh. A case erawh nangai chuan a sang deuh :-P A rem leh post hranin ka la rawn ti ve ang. :-D

    tren tren

    Report this comment

  21. 21
    Chhuaklinga Says:
    June 20th, 2012 at 8:20 pm

    Edit :stateman: ni lovin :statement: tih zawk awih, hehe.. ;-)

    tren tren

    Report this comment

  22. 22
    Saitawk Says:
    June 20th, 2012 at 9:31 pm

    Ka awihlo, Aizawl i kal vawikhatna a ni sia, i admit card i hai aniang! i la palh a ni hrim hrim ang! :-P

    Report this comment

  23. 23
    Dr Mahminga Sailo Says:
    June 20th, 2012 at 9:36 pm

    K’u mamboih.. Constable-in min phurhna khi chu Scooty pawh a ni phak lo, Iskuutar tih awm a mawi a ni… :-P
    @ Chhuaklinga.. Stateman khi a dik zawk emaw ka ti hman thelh alawm… :-D I tawn chu han ziak ngei teh, chhiar a chakawm riau… :-)

    Report this comment

  24. 24
    chhana Says:
    June 21st, 2012 at 1:27 am

    A ngaihnawm phian chu le, keipawh misual.com vanga min man tum khan bike ka chuan phah, vuak ka hlau ve tho, mahse, hei, tun thlengin ‘a ṭul thut a nih leh kan rawn ko leh ang che’ tih chu call ka la dawng leh lo chu a nia.

    Police man han nih ve chu a nawm dan a dang duh khawp mai.

    Report this comment

  25. 25
    Charice_mizo Says:
    June 21st, 2012 at 2:58 am

    I van che chhe bawk ve mawle aw…ngaihnawm e. A dang pawh ila zep teuh ka ring, Part III te rawn siam leh la :-)

    Report this comment

  26. 26
    TuaiSialA Says:
    June 21st, 2012 at 3:01 am

    @Charice, nia, ka lo siam leh dawn nia.

    Report this comment

  27. 27
    houdini Says:
    June 21st, 2012 at 3:14 am

    #26 Lo siam leh lo zâwk mai rawh.

    Report this comment

  28. 28
    Dr Mahminga Sailo Says:
    June 21st, 2012 at 7:34 am

    @chhana… Nang chu, bike-ah tal i chuang pha a, tlemin constable pawh an changkang deuh tawh a nih chu… :-D misual.com avanga Police station i tlawh chungchang chu lo ziak ve la, misual.com-ah bawk hian lo chhuak thuai teh se… (Y)

    @ Charice… Che chhe ve thei deuh hi ka ni roh va. Mi’n an ngawihpui mai mai hi, ka sawi chhuak leh zuah zuah thin.. :-P Zep then a awm lo… ;-)

    @ TuaiSialA… Part III chu min han tansak teh, tawmhnih man aia to lo turin… :-D

    Report this comment

Leave a Reply

You must be logged in to post a comment.