(Lungleng kan kiu vawng vawng tiin kan tawp a nih kha ti r’u… )
TV
Kan khuaah chuan TV pakhat a awm ve, rawng dum leh var chiaha hmuh theih a ni thung. An sawi luai luai world cup kan en ve thin a. Infiam mite thuam inbel rawng erawh chanchinbu (The Lelte Weekly) kan chhiar hnuin kan hre mai thin. Mahse, Brazil lamin kawrdum an hak a, Holland (Netherlands) lamin kawr dum bawk an hak kha chuan, tan zawk te kan hai fo! Hei mai a ni lo, lemchan hmuhnawm rapthlak tak tak kan han en changa, thisen a’n luang dum nguai nguai mai te; nula hnawihsen a dum ta daih mai thin te leh, pangpar mawi tak a’n var hlawng mai te kha chuan mit a tivir ting tang thin. 
TV neitu te kha, kan veng Telephone kawltu an nih avangin, TV antenna kha telephone antenna-ah remchang takin an tawn bet mai a. TV a fiah loh changin, zanthim hnuaiah pawh, tlangval zuanzang deuh, telephone banah a’n lawn a. TV antenna a her thin. A man fuh lawk loh phei chuan ninawm ve thin tak a ni. Aw, aw tikhan a fiah; a fiah leh lo, ti tak khan; awh a bo leh tawh, aw a fiah ta e; tiche tawh suh… kan ti rual thup thup thin. Antenna her tur chuan, mi dawhthei leh tlawmngai tak a nih a ngai phawt.
Sin-Di-Bad
TV entur a awm chinah, nilaini thlen kan nghakhlel hle thin. A chhan chu engdang vang ni lovin, Arabian Knights lemchan bawnra leh hmuhnawm rapthlak a chhuah hun a ni tlat. Darkar chanve chhung, chuta kara fakna vawi li vel awm kha kartluanin kan nghak a. TV neitu te phalna lain, inthlahrung takin chhuatah kan han thu a. TV en an tam zana luh an phal loh chin a awm thin avangin zan dar 8:30-a chhuak tur ni mah se, dar 6:30 chuan TV hmaah kan thu tan der tawh a. Arabian Knights chhuah hun nghakin, Islam inkhawm te kan en tluanchhuak zak a. TV programme kara fakna te lah kan hre bel hlawm teh e.
Vai khabe hmul sei pui pui, thinrima an han mengbial kul mai te kha, rap viau mah ila hmuhnawm kan ti lawi si. SindBad tia kan hriat kha, vaipa chuan Sin-Da-Bad a’n ti puam ulh a. Kan veng putar pakhat ngaihdan a ni lo khawp mai. Vai chhe ho hi a, Sin-Da-Bad te han tih, Sin-Di-Bad ti tal sela aw a ti tun tun. Nia, Zopa ngaihdanah chuan, Da hawrawp nei hek lo i. 
Arabian Knights hian kan veng naupang chu mi hneh khawp mai. Vawikhat chu, nilai tlaia kan inkhelh laiin, kan thian (kan nau) chu mual sirah a lo muhil ngawt pek a. A lo harh chuan, kan tihder alawm. Nizan, zankhuain hetah hian i mu a, Arabian Knights pawh i en ve ta lo, a hmuhnawm teh asin. Sin-Da-Bad kha luikawr khawkrawk deuhva a awm laiin, misual pa leh a thuihruai te’n an um a... tiin ka sawi khum vel mai chu(h). Amah chauhva mualsira a mut zankhua ai khan, Arabian Knights a en ve hman lo kha pawi a ti zawk! 
Tipu sultan
India lal ropui, lal lukhum-lawka pawh hi kan va’n ngaisang teh reng. Pathian ni zan dar 8:30-a chhuak a ni thung a. Tipu sultan ngaihsan lai kha chuan; nu te an feh hlanin, an pawnfen kan feng ru fo mai. A mawh love, a changtute khan kawrfual an ha hluai hluai zel thin alawm. Chemsei atan lah phelsep (mau phel) kan hmang a. Vai tawng phuah chawp ngialngan hmangin, thawhtan ni sikul chawlh lawk lai chuan kan indo nasa thei rap. Sakawr chunga chuang angin, ke dinglam kan han kheng tak tak a. Thu-khu-dut, thu-khu-dut… tiin kan tlan kawi ziai ziai thin. Kan boss berin min viha, kan thih that duh loh vaih chuan, lemchan atanga ban kan ni mai. Chuvangin, a thi leh na tuar thiam apiang, boss-in a duhsak thin.
Tarzan
Vai ho kan haw tuk; eng dang vang a ni law. Tarzan lemchan hmuhnawm lutuk tak mai kha zirtawp ni chawhma dar 11:30-a an chhuah tir thin avangin. Chawhma sikul ban lawk leh chhun chawlh inkar taka a chhuah thin avangin, zirtirtu awm loh chhuanlama Tarzan en mai kha a chakawm thin.
Nikhat chu, kan thiante pathumin Tarzan an en chak si. Kan zirtirtupa a awm lo emaw tiin TV an en ta ngei a. Kan zirtirtupa chu a lo awm nasa mai si. An TV en zo chuan, hmanhmawh baklengin sikul an rawn pan a. Kan zirtirtupa lah kan classroom-ah a lo awm der tawh si. Chhuanlam erawh an nei mai bawk a.
Ka pu kan lo lut thei ang em? (May i come in sir tih hi kan hre ve thin, mahse kan hmang ngai lo )
Khawnge in kal? (Thinrim tawkin, a hmui a sai dar dar a..)
Tui kan in a… (Inthiam vaklo, dawih aw takin..)
Dawwwwtt… (Rang fahran leh, thinrim takin..)
Sawi tur an hre tawh lo chiang asin. Tarzan chhuah hun te chu kan zirtirtupa paw’n a hre ve chiang lutuk; en chak tak chungin a insum ve hram hram a. Chuta kara, zirlaiin an thlim bik chu thil dik a ni hlawl lo. Inlafel takin kan thiante pathum an hrem lai chu ka thlir a. Mahse, Tarzan-a film chanchin min hrilh ve duh lovang tih hlauvin, chawhma kan ban chuan kan va be tlawn sap sap tho. 
Hei mai bakah hian, lemchan hmuhnawm tak tak kan en thin a. TV neitu te’n en an phal loh changa, bang awng atanga kan bihthla, min hmuh avanga min han hnawt tlan thin te kha aw.., an va ngeiawmin, lung a va tileng lawi si em. Tunah lah, TV kan en tha peih tawh der si lo.
Mahse maw, Lemchan hmuhnawm tak tak zingah, Hnarbawk film an tih fo kha ka en ta miah lo! A changtupa kha a hnar a bawk viau ni tur a ni…
Bonus…
He TV ngei hi a ni e, bangawng atanga ka bihthlak fo, nilaini zan kan nghakhlel em em a; Pathian ni tlai thleng thuai tura ka duh chhan leh vai remhre lo lutuk ka tih fo na chhan chu. Tahrikni 10 March, 2012 khan rin loh deuhvin ka hmu a, thla ka lakpui hial… 
”
Ka piana hnu lama TV ka hmuh leh en hmasak ber
July 5th, 2012 at 3:10 pm
Van ngaihnawm em…tlemin nangni ai chuan kan nau deuh naa, i tawn ang lek lek hi chu ka tawng ve hman nual mai, TV neih kha chu hun engemaw chen kha chu intihchangkanna leh a nei tan pawh induh larhna tham kha chu a ni thin reng a ni…tun hnu hian a van lo atthlak tak tiin ka ngaihtuah mai mai thin.
Report this comment
July 5th, 2012 at 3:12 pm
Thla ka lakpui i tia, nangmah i lang ve tawp si lova…hehe khitiang hmanlai model khi a tlo asin aw!
Report this comment
July 5th, 2012 at 3:36 pm
Sinbad The Sailor, Hercules, Xena (worrior princess) vel kha kan en ve thin…
I Post chuan a hun kal tawh a ti ngaih-awm hle mai..
Report this comment
July 5th, 2012 at 3:45 pm
shaktiman…
silchar cinema hall a sholay kan enthinlai te kha minti hrechhuak a lawm le 
Report this comment
July 5th, 2012 at 3:49 pm
@ Charice… I tawn chu han ziak ve ngei teh, chhiar a chakawm alawm…
TV khi thla ka lakpui ve ngei a, mahse ka kawr hak a eng teh puat lutuk a, ka in-cut daih a nih khi… 
@Atom c… Film hmuhnawm a chhuah dawn tlai kha chuan, TV neitu te chhung khan tui chawi tur, tual phaih fai tur, eng hna pawh thawh tur ti se, phur takin kan ti thin.
Report this comment
July 5th, 2012 at 4:01 pm
ka zun chhuak tawh si… a hmuhnawm lai enhman loh hlau lutuk in..pawn hladeuh chhuak hman tawhlo in luhka atang in step ah kan zung teu2 mai chuh.. min enchhunzawm tir tawh lo chiang asin aw..
a film pum in ka chan phah 
Report this comment
July 5th, 2012 at 5:27 pm
Ka lung ava tileng em !!!
Report this comment
July 5th, 2012 at 5:48 pm
Ngaihnawm thin ngawt mai. Han ziak zel teh adang pawh.
Report this comment
July 5th, 2012 at 6:14 pm
A ngaihnaw viau zel mai a…Mahse, Darrokima te chu bawl phuan a ang dawn lek lek in ka hria….
Report this comment
July 5th, 2012 at 6:57 pm
Tipu Sultan..haha! Sunday zing ah hmanhmawh tawkin kan insiam a,Tipu Sultan leh World Record en kha a nuam thei ngawt mai.
Antenna her…haha! 2000 hnu lam thleng khan kan antenna kha a awmna ngaiah kan la dah char char thin. World Cup en mawlh kha a nuam thin,tunah chuan mahni inah kan en thap hlawm a a boruak thei tawh tlat lo. VCR a Mad Max kan en ni han nawm zia kha aww…a head tihfai kha a ninawm. 
(ve leh nghek mai thin a!)
Report this comment
July 5th, 2012 at 7:21 pm
Sinbad, hercules, Makaivar (Macgyver), Osin, eng nge bike dum chak zet leh tha zet nei kha ka theihnghilh daih.
inchhuan thu suhah khaw khata TV nei hmasa pawl kan ni ve a, world cup tum khat kan ina kan en chu kan khat tha bawk a, thingphel chhuat an tum chim rep mai! hairehai!
Report this comment
July 5th, 2012 at 8:59 pm
Ka lung a leng ,,ka lung pawh a chhe tel,,huhuu
Report this comment
July 6th, 2012 at 12:16 am
Ha ha ha; va ngaihnawm leh tehlul êm
Report this comment
July 6th, 2012 at 12:23 am
Thla i lakpui nilovin a thla i la anih hi
Report this comment
July 6th, 2012 at 6:18 am
Van rei tawh ve le aw! Dynora Black and White TV kha kan nei ve thin a, 1981 Prince Charles leh Lady Diana te inneih phei kha chuan kan sitting room ah kan in hnawh khat tlat. Romol leh silipar chuang a awm ruih, kan thuthleng ke a tliak nual.
The fall guy, knight rider etc te kha hmuhnawm thei khawp mai.
Report this comment
July 6th, 2012 at 7:00 am
Good morning…
khawtlangin ual kap kan en a, a nuam thin. Mahse, vawih an awm apianga chhuatlaia thu, mipa naupang min rawn hau ngawt zel kha a hrehawm,.
Report this comment
July 6th, 2012 at 8:30 am
Good Morning
Ka lung a leng eeeeeeee
Report this comment
July 6th, 2012 at 9:09 am
@ chhingdailova… Darrokima hming i sawi lang elo? Ka thuziak dan turin a lo ziak hmasa a ni ngei ngei ang
Tak takin, Dara hi a hming chu ka hre lar khawp mai a, mahse vairam atang hi chuan Misual thu leh hla lo hi chu chhiar ka nei vak lova; a thu leh hla erawh ka la chhiar mang miah lo. Englekhawle, ka thuziak hian milar thuziak anna a lo nei nial nual a nih chuan, ka lawm ve viau a nia. Tak takin.., thihsak pawh ka ngam… 
@ mik3s Chongthu… TV sirah khian ka ding ve ngei a; ka thla a lan ve chuan, thuziak hi in chhiar peih lovang tih ka hlau va…
badboy hi naupang sual tak a ni, zunram thiar a thlahdah…
Report this comment
July 6th, 2012 at 10:31 am
Batman te pawh in chet that zan leh chet chhiat zan an neih thin kha!
Report this comment
July 6th, 2012 at 11:14 am
1989 khan Onida color TV, channel 8 awm kan nei ve a, kan awmna khuaah a nei awmchhun kan nih avangin kan lun thei hle. Chauh deuh zan chuan a mu hmasa sa kha kan vannei a ni mai, a chhan chu mu har kha chuan inlengte men pui a ngai tlat! 1990 World cup pawh kha a khawnawtin kan inah kan en thin a, TV pawnah kan hungchhuak tawp thin. A lunglen thlak ta hle mai.
Report this comment
July 7th, 2012 at 10:48 pm
I TV rawn post chuan lung a tileng e…keini pawhin black & white medium size? kan nei thin a, a herhna athat vakloh a vangin plyer hian a channel kan herh mai zel
Nilai zan chitahar kha chu hmuhnawm ve thin khawp mai.
Report this comment
July 9th, 2012 at 11:16 am
@ laldoma… Chitrahar tak kha maw? Twinkle-i, Ajay Degan-a’n a’n kuah vel, kan thik nasat thin zia kha.., kan zirtirtupa te thlengin…
Pliers hmangin, Channel thlakna an herh thin a, a ri fawk fawk zel…
Nizanah, kan boss (hlui), TV neitu fapa nen kan inbia a. Lung a leng vawng vawn mai…
Report this comment
July 11th, 2012 at 10:21 am
Ngaihnawm hle mai. Kan inrual tlang vel a nih hmel. Thawhlehni zana chhuak thin “Raja aur Rancho (zawngte film)” en tur khan ka pu (ka nu pa) te inah ka pain min lenpui ziah. Kan veng pa pakhat pawhin Ningani zana Sea Hawk episode a en chak lutuk a, hna a thawk thei thlawt lo aniang, a ram riak a rawn haw vang vang a, Zirtawpni ah a riak lut leh ringawt tawh.
Antenna her, bangawng atanga bih, chhuata thut tih vel chuan lung a tileng hle mai.
Chuan, Sunday ah, inkhawm hmaa Chandrakanta leh Betal Pachisi en hman loh hlauin kan hmanhmawh thei raps.
Report this comment