mi(sual).com

(A thupui tur pawh ka phuah thiam meuh lo, rem lo takin ka rawn vawmkai ve thuai mai rih e)

Zan dar 9 a pel ta maw tih chuan hostel chunglam chu angai tein ka pan chhoh leh hnak hnak a, chaw eikham ka nih vangin ka rit luk mai. A chungsang ber maiah chuan ka tih dan pangngai bawk chuan van lam en turin ka mu siai siai a.

Helai hmun hi ka ngaina khawp mai; kum hmasa leh hmasa lamah ka thianpa nen kan ti ti vawrh dunna a nih avang hian ka ngaina em em a. A chang leh mahni chauha lungchhia leh thinlung inhawng taka ka tahna hmun anih avang hian ka hlut em em bawk. Chutia hlut em em e tilo chuan “beer” nena hun ka hmanna ani leh lawi bawk a, nilo…ka bialnu ngei pawh hemi hmun ngat ah hian ka be fo thin a ni.

 Chutia ka mutna chin ah chuan dar 10 alo ri dawn dawn ta mai. Tihdan pangngaiin ka thianpa chuan ka awmna lam panpah chuan “beer la ila” min rawn ti a. ka hnial bik lo. Khawlum nen, lehkha zir ngaihtuah peihawmloh nen! Pawisa neih ang ang zawng khawmin beer zawrhna dawr kan pan dun hnak hnak a.

He dawr hi kan kal thanna anih tawh avangin chutia kan thleng chu a neitupa hian minlo hmelhriat tawh khawp mai; mi thenkhat  ramvachal ten ” a rim atang ruah a sur dawn leh dawnloh ka hre thei” an ti ang deuh hian dawrnghaktu chuan min melh “beer” nghal run mai zel a. A chang chuan beer la tur niloa kal nikhua hian “beer chahie?” alo ti lauh lauh zel. Zialo thei thin khawp mai a chang hi chuan!

Chutianga kan lak zawh chuan hostel chung chu kan pan dun leh mai thin. Achhan chu helai hmunlo hi hmundang nuam leh thawl nuam tak tak awm mahse helai hian kan lung a dum ber a, duh duh sawi theihna leh mahni chanchin, unau ang maia sawhbuak hawk hawk nan chuan hmun duhthusam chu ani hrim hrim reng a ni.

” I thlit a hun e” tih pah chuan ti ti kan han vawrh tan a; Keichuan, “tunah hian mizoramah awm ila chuan ka bialnu bulah ka awm ka ring” tih atang ka tan dawn emaw ka tia, “kha nu te kha chu a hmeltha reuh a sin” tih atanga tan a ngai thin! He hmun ah hi chuan mipa pahnih inkawmna a ni a, duhleh kan bialnu te chu kan dah tha rih ang a, duhleh midang kan sawi thei a lawm. Hmangaihna kan sawi rih lo a, hmeichhe hmeltha tih kan sawi mai mai chauh a ni.

Rei deuh hlek kan khel hnu chuan “ka bialnu kha enge a an ve?” tih ah kan luh a ngai leh tlat! A mak lo, kan dawmlai, kingfisher bur ngei mai hian min nawr kal zawk a lawm le. Keini pawn kan iai rukna lai zawng zawng nghilh thak khawpa duhawmin kan bialnu te erawh chu kan chhuah thung thin. A fair a nia he ti ti hi… Kan inzui tan dan atanga kan intihthiamlohna te, hun hlimawm leh nuihzathlak lai te chuan kan nuih hi a tiza em em a. Mipa inkawm dun e tilo chuan hmeichhe chungchang hlir kan khel lawi a, intipa e tilo chuan kan bem ngamloh hmeltha tih te kan ui thu kan sawi vul chuk thung erawh chu a retheih thlak mang a. Hmeltha kan tih ten min ti ve silo, hmeltha vaklo kan tih ten hahipin min sawi thung si a le!

 “Thiana, kan lak belh leh dawn em?” tih pah chuan bur khatna ve ve chu kan ruak ta huai mai. Ti ti kal tluanglai karah “tehreng mai” tihpahin, “a bawp nalh zia te kha I hria em, fate nu atan chuan itawm tak a ni” tihloh leh, “khumlaizawla chetpui atan chuan ka iai lo khawp mai” tih kan sawi ri zauh zauh. Kan thil in chuan min fan tan der a ni tih kan inhailo ve ve, keiphei chu in ngun e tilo chuan ka hai riai riai a, hai chhia erawh ka nilo. Mahse tawng nuam tawk vel anih zia chu ti ti atang a hriat mai. Reilo te ah kan phone kan hmet nauh nauh tan a, balance kan nei em tih chu ka rilru a lo awm nghal a ni.

Zan dar 11 a pel ta maw, dar 12 a ri mai dawn! Ti ti lah chu a vung dun tawh em em a. Ka thianpa phei chuan a hmeltha tihnu kha khumah a mutpui thei lek lek ta; mahse atakah nilo, a suangtuahna leh a ti ti zei zia, hmeichhia a hnehsawhna lamah a ni daih thung a nia. Mahse kan ti ti pawhchah a ngai tlat, “lak belh ang” tih pah chuan tho kan rual a, dawr lam panin kan kal leh ta hnak hnak a.

 Hetianga chhuah hi chu kan uar ve pangngai a nih avang hian vai pawn eng tehual ah min ngai lo. Kan ngai biklo a. Kan inkawm diam dial hi a ni zawk ber. He zan kher pawh hian kan lak belhna lam tur ah vai changkang, intichangkang a nih chu; beer um hnih ve ve mnin treat anih chu mawle. Ekhai, manhla tak a sin! Kan letleh chu post ngaiah bawk kan kal leh a. Ti ti ngai bawk vawrhin kan bu leh tluk tluk ta. Mahse a hma ang chu ani thei tawh hauh lo! Ka thianpa ngei pawh chuan a hmelthai chu mutpui a hnekin an mutna room atangin a chhuah tauh san emaw tih tur tak hian a chhiatna hlir a bir tluk tluk ta thung. Engpawh nise a tha vek e!

Chutia kan ti ti mawlh mawlh lai chuan kan thiante min au thawm chu kan hre thei a, ui talh an tum thu a ni. Zinglai dr 12 a pel tan mek a. Ui zawng tur chuan kan chhuk ve ta a. Ui hi a awm mailoh avangin ui zawn a ngai a, ui pawh chu kan duh tur chi chu – thau tak, vun hrisel, mam tha tak, thianghlim tak, a bawp nalh tak ani tur ani tih hi a ni.  Mizoram lama chakai khawrh ngailo, ram kal ngailo ho kha kan ni a, keiphei chu uisa ei ngailo ka ni. Mahse mizo nih manah ka kal ve chuan a nuam ang tih ka ring tlat. Zing dar 12 leh a chanve vel ah chuan kan zirna khua chu kan fang chhuak tan ta a. Kan ui duh ang chi kher chu vang tak a ni! Vang tak!

 Hetianga zanlaiah ui zawnga kan chhuah hi ka hun tawn tawh zingah chuan a nuam khawp mai. Thalai nun za tawk kan nih vang nge police hian zing dar 1 leh 2 velah hian ui kan vai chu hrethiamloin min um vak vak zel a. Keini thaza tawk vel lek, hlauh em em neilo, BMX intikhalh thiam em em tan chuan inum tir chu nuam tak a ni. Hostel thlen hnu hian sawiho a nuam zual em em a. Thinphu leh thlan tla hlawp hlawp a tlanhchhia te ai chuan game anga ngai tu tan chuan nuihpui tur hi a tam teh e. Hei hian ka hringnun an luah khat hneh em em a ni ber.

 Hetianga hun kan hman fo thin deuh thaw avang hian dar 3 emaw dar 4 vel ah zing thingpui in turin muloin train station te kan pan leh mai thin. He hun kal dan leh hun hlimawm tak tak hian ka nunah thalai nih ropui zia leh Pathian tih pawimawh zia min hriat nawn tir fo thin. Ka hmangaihin min kalsan tum pawh khan he hringnun nuihzathlak leh hlimawm tak hian min hnem fo thin. Thiante hi anlo va hlu em tih hi tun hnu hian ka ngaihtuah reuh reuh a, ka lungleng thin khawp mai!

Similar Posts:

• Drinking beer does NOT give you a Beer Belly!
• Hmeltha hi an va hlu tak!
• Ka thian tha ber
• Prince William leh Catherine Middleton an in hual ta
• Nula te hriat atan

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Friday, July 13th, 2012 at 11:27 am and is filed under Lifestyle, More than words. You can follow any responses to this entry through the RSS 2.0 feed. You can leave a response, or trackback from your own site.