Intodelh tura taimak :
Pi leh pute khan buh leh bal intodelh an tum tlat thin. Khaw dang hnena pur chawk ngai hauh lova awm bakah, a theih phei chuan hnianghniar taka ei leh bar neih a, khawdang kep thei hial nih an tum tlat thin.
Chutianga khawsak theih an tum avangin buh leh bal thawhchhuah tamah nula leh tlangval leh mimir an inel a, zing vartianah an thawkchhuak a, thim rualin in an thleng leh chauh thin. Hritlang khawsik satliah mai maite chu an palzut a, hna an thulh phah ngai lo. Chu chuan taimakna leh chhelna a hring a, thatchhiat tluka hmusit an nei lo.
Tuna kan ram ei leh bar dinhmuh kan en chuan mi rama harsatna an tawh ang em chu kan la tawklo pawh kan ti mai thei. Mahse, mi thawhchhuah ringa nung chu kan ni ber mai. Vawiina kan buh ei te hi kan ram thar chhuah a ni em? Power, petrol leh gas kan hman te hi kan ram siamchhuah a ni em?
Leihnuai hausakna kan neih loh chu thu hran ni se. Kan ei khawp buh kan thar lo bakah, kan in leh Biak in sa turin ram pawn mi cement mistiri kan chawk lut a; mutia leh kan nauawmtu thlengin ram dang miah kan innghat hi chu kan inngaihtuah chian a hun tawh hle.
“Kan ram min sawrtetsak”, “Kan hnam min hmusit”, “Min chimral dawn”, kan ti thin em? Midang thawhchhuah ringa nung chu mi kut hnuaia kun an ni; thil ti thei leh mi zahawm an ni tak tak ngai lova; an huaisen taktak thei lo bawk. Thawhchhuah kan neih miau si loh chuan hnam anga tlakchhiat leh mualpho hun chu a la thleng ngei ang. Khawvela hnam ding chhuakte leh zahawm tak tak te hi hnam taima leh intodelh an ni zel. Thawh hreh nei lo tur leh taimak inzirtir tur chuan chhungkua inenkawl dan a pawimawh a; sawrkar kalphung leh khawtlang nun sukthlek dan hian thui tak kawngro a su bawk ang.
Mizo Culture leh Mizo thilte humhalh :
Mizoram leh a chhehvel han en hian keini aia hnam upa zawk ten min hual a, khawchhak leh khawthlang culture te’n media te kaltlangin in tin deuh thaw min luhchhuah deuh vek tawh bawk a. Kawng kawi hnihkhat lekah ‘Inla-Korean”, “Inla-Sap”, “Inti-Vai” hmuh tur kan kat ta nuk mai. Incheinaah chauh pawh ni lovin, kan nunphung/khawsakzia leh kan Pathian biak dan thlengin “A sap thei ang ber/A tunlai thei ang ber” -in kan kal chho mek niin a hriat theih a.
Kan culture humhalh kawnga tan kan lak nasat loh chuan Mizo hnam zia hi zawi zawiin a boral ral tial tial ang tih a hlauh awm hle a ni. Culture hian hnam nihna leh hnam rilru a kentel avangin, culture pawlhdal anih tawh chuan hnam rilru thlengin, pawlhdal a ni tawh thin. Chuvangin, kan culture kan humhalh hian Mizo hnam kan humhalh tihna a ni. Chutiang tur chuan kan nunphung leh kan khawsak danah Mizo culture leh Mizo thilte ngaihhluta, chawilar thiam a pawimawh hle. (Hmanlai thei ang bera nun tur tihna erawh a ni kher lo)
Mizo culture leh Mizo thilte humhalh tih hian vawnthat ringawt a tawk lova; a tha leh entawntlakte chawisan leh thehlar hi humhalh dan kawng tha tak a ni a; sawrkar revenue peipunna hmanrua tha tak a ni thei tih pawh kan hriat tel a pawimawh. Kan ram naubante hi World market ah a hlu viauin a rinawm.
Ramdang atangin police man nih pawh huamin an ru chhuak reng lai a, ramdang pangpar kan lo buaipuiin kan ti lar a, festival hming te hial kan lo put tir hi chu kan inenfiah a ngai hlein a rinawm. Nikum (2011) lawkah Mizo lemchan thiam rual, India ram hmun hrang hranga zin kual a, lemchan entir thinten Vanapa Hall ah lemchan an entir a. Chuta an lemchan thawhthu chu Shakespeare ziah “Juliet & Romeo” a ni mauh mai!!
A bultumte kha khawimawlai veng kil khata nula/tlangval teirawlai mai maite thil tih chu nise ngaihkhata ngaih theih pawh a ni mahna. Mahse, a bultumtute ngaihtuahin “Mahni hnam thil ngaihhlut nachang hre lo chu mi ngaihsan an ni tak tak ngai lo’, tih hi Mizo hnam angin kan hriat a va pawimawh em!
Ramngaw humhalh a tul:
Zoram buai hma kum 1950 hmalam khan a ram pumpui deuh thaw hi ram ngaw in a la bawh a. Mahse, tunah chuan 89.10 % (Forest Survey of India, 1997) chin hi thing leh mau leh hnimhnah hringin (Forest&Vegetation) a khuh tawh a, ramngaw tak tak erawh chu 122 sq. km vel chauh a ni tawh a ni. Mizorama chhungkaw 221,077 awmah ei rawngbawl nana thing la hmang chhungkaw 98, 367 an la awm a. Heng bakah kum tin ram tin 3,000 vel hal a ni ziah bawk. (Vanglai ni 6.6.2012) Chuvangin, kan ram ngawte hi kum tinin tlem lam an pan tial tial a ni tih chu a chiang a ni.
Mithiamte chuan tunhma ram ropui leh hnam ropui tak ni thin Mesopotamia mite leh Mayan hnamte tlukchhiatna chhan pakhat chu khawkhen leh tam tlak vangah an ngai a. Mihring an lo pung chakin, mamawh phuhruk nan ramngaw an ti chereu nasa a, chu chuan sik leh sa a khawih danglam a, khawkhen leh tamin a zui a. Ei leh bar a lo harsain hmelma ten awlsam takin an hneh theiah an ngai a ni. Chuvangin, sik leh sa mumal taka awmtirtu ramngaw humhalh hi ram leh hnam humhalh nan thil pawimawh tak a ni.
Chhiatrupna lakah kan inven a tul :
Chhiatrupnate (Natural Calmities&Disasters) hian mihring thihna a thlen mai piah lamah intundin leh nan sum tam tak a kalral tir thin. Tunhnailawkah Italy ramin lirnghing vawi 2 an tuar a, nunna tam tak an chan bakah sawrkar economy dinhmunin a tuar a ni tih thu an puang a ni. Khawvel ram hrang hrang te hi leilung pianhmang a zirin lirnghing thlen theihna hmun hrang hrang zone 5 ah then a ni a.
Earthquake Zone 5 na hi lirnghing thlen natna ber tura ngaih hmunte an ni. Mizoram hi earthquake zone 5 na ah kan awm ve avangin, kan hmaah chhiatna nasa tak lo thleng thei reng a ni. Kan ram leilung a nghet loh zia te, kan in leh lo din dan mumal loh zia te, invenlawkna mumal kan neih loh zia te ngaihtuahin Mizo hnam tan a him mawlh lo a ni. Nikum lawkah Japan ram lirnghingina a sawi kha kan hre theuhvin a rinawm.
An ni ang ram changkang leh invenna lamah pawh tunlai technology hmang thei mahin an tuar na sa a ni a. Heng atang hian Mizote pawh kan inven that viau loh chuan hnam anga chhiatrupna leh tawrhna kan hmachhawn thei tih kan hriat a tha hle. Sawrkar lam pawhin Disaster Managing Board te tun aiin thuam that nise, chhiatrupna lo thleng tur laka invendan te, kan inchhanchhuah dan tur te, inenkawl zel dan turte thlengin YMA leh Volunteer Organisation dangte nen tun aiin chak zawka hmalak chi niin a rinawm.
Similar Posts:
- RAM LEH HNAM HUMHALH – IV
- ‘ZOLUANKAWR’ Pu P.L.Liandinga’n a tlangzarh
- Thiandun Titi
- Kan culture hi…
- Tial Tial
July 14th, 2012 at 12:51 pm
I va han sawi dik tehlul êm
.
Mahnia thawhchhuah nei lova inlapàwr hnam, váichhe laka kutdawh chunga inlasâp, sum-sam dawn châka hmanhlel hnamchawm rual han nih ngawt mai hi a va han zahthlâk ngawih ngawih êm! Kan hruaitute lah chuan vai intlawnsîak bâk an thiam si lo… Kawng hi a kaw lo teh e!
Aw Zoram!
tih hlä nunpui hi kan va han hlat tehlul êm!
Ngai reng rawh unau! Inthlan a lo awm leh mah ang a, Zoram mahni kea dintir tumna hlacháng aiin vai tlawn thiamna hlahril a ni an chham leh ut ut dawn ni kan hotute hian!
Zawng rual indèprawn pawh kan tluk lo ve
.
Report this comment
July 14th, 2012 at 1:16 pm
kum tam ka lo sawiin ka lo vei ve tawh thin..beidawnna mai… Pathian thil mak tih a ngai.. a ngaihna a awm tawh lo.
Report this comment
July 14th, 2012 at 1:56 pm
Post tha lutuk tak mai a nih hi. A hlawhtlinna erawh mimal kutah thui tak a innghat
Report this comment
July 14th, 2012 at 2:13 pm
Mizo Culture leh Mizo Thilte Humhalh khi; Full support, chhiar zel phawt ang
Report this comment
July 14th, 2012 at 2:24 pm
Post tha e. A tha khawp mai. Mizoramah hian mihring kan tlem a, resource nei tha lo mah ila, tang tak tak ila chu ‘model state’ kan nih theih hi ka ring khawp mai. A tha lamah chuan kan lungrual thei (entirnan halpuah hal loh chungchangah mai mai pawh). Kan mamawh chu ‘hruaitu tha’ ni ber in a lang!
Report this comment
July 14th, 2012 at 3:00 pm
Report this comment
July 14th, 2012 at 3:19 pm
Hetiang lampang sawi chuan ka nghilh deuh dup zel, ka bei hi a dawng deuh nghual zel bawk
Report this comment
July 14th, 2012 at 3:55 pm
Post tha tak a ni e
Report this comment
July 14th, 2012 at 5:36 pm
GAS a vag mai2 anih cu
Report this comment