Mizoram ah hian ‘pianthar’ hi kan buaipui nasa a. Chuvangin, a nawlpuia lakin a hminga ‘Christian’ inti tawh phawt, tam zawk hi chuan thlarau pianthar nan eng ‘camping’ pakhat ah emaw tal hi chuan kan lut tawh tih ila ka sawi sual tam ka ring lo. Amaherawhchu, engzah tak hian an nun thlak danlam pui tih hi zawt ilang chuan, an tam fahran ka ring lo. Eng pawh nise, chulam chu lokal hrih ta ila, ka zawhna ah khian lut ta phawt ila : Piangthar diktak hi a dak leh theih em? Eng nge ‘pianthar’ hi ni reng2?
He thu hi kum 2005-2008 chhung khan ka thil ngaihtuah nasat pawl ber anih ka ring. Pathian zarah ka naupan lai atanga Pathian thu a tui em em chi ka ni a, kum 14 ka nih khan Bible hi vawi 10 vel tal chu ka chhiar chhuak tawh ang. Sakhuanna ka atchilh em2 a, tunlai tawng takin ka inla “Kris” em em bawk a.
Eng ruihtheih thil leh zuk leh hmuam mah ka ti ngai lo a, chawlhni tin ka inkhawm mai pawh duh tawk lovin, nitin Bible chhiar leh tawngtai nan darkar 1 tal hun ka hmang thin. Kum 15 ka nihin Delhi panin Mizoram ka chhuahsan a, ka kal dawnin ka nu hian ka lu-chung ah kut nghatin Pathian ka theihngilh ngai lohna turin min tawngtai a, ka pi in a Bible roh ber min kentir bawk a.
Delhi-a ka awm tak hnu chuan thian tam tak ka chhar a; a thente chu lamna hmuna kal nuam ti em2 chi anni a, vawitam tak ka zui ve a, mahse zu leh ruihtheih thil emaw ka deh phah chuang lo. Ka rinna -ah chiang tawka ka inhriat avangin engmahin min thlem thlu theiin ka inring lova, ka tum hek lova.
Ka zirna ah ka ti tha a, kan college-ah ka lar a, ka mimal nun ka theihpatawpin ka vawng thianghlim bawk a, Pathian duh zawng tak tiin ka inhria a. Ti chuan ringlo mia nia ka ngaih hnamdang kan hostel ami te hi Christian ni turin ka hrilh nasa thei hle. A chang phei chuan mittui tla chungten ka tawngtai sak thin. Midang chauh nilovin ka chhungte ka vei tel bawk a, kum 2005-a ka pi in min boral san hma a ka lehkha thawn hnuhnung ber ah pawh vanram kan inhmuh leh tur thu in ka thlah hial nghe a. Ka piangthar tha hle a ka hriat laiin kimloh na riau neiin a chang chuan kan inhre thin a.
Chu ka hlimlohna ruk chu a lo lian zel a, kum 2006 vel ah phei kha chuan a nasa ta viau mai a. Medical tawng takin, clinical depression ka nei reng mai a, a chhan ka ngaihtuah thin a, lem taka nung angin ka inngai ta tlat ani ber mai. Saptawng takin lo dah ta ila, “I played the perfect daughter, friend, student, christian, sister, neighbour and person; but nobody knows the real me.” Tumahin a chhungrila ka famkim loh zia an hriatloh avangin min tumahin min hmangaih tak tak lo tihna rilru ka nei a.
Chutianga ka depressed takah chuan doctor thiam te ka rawn a, Pathian hnen ah pawh min pui turin ka dil nasa em em a; mahse engkim hi a reh tlok2 ani ber mai. Zankhat phei chu kan inchung atanga zuanthlak a thih daih ka tum hial nghe nghe a. Pathian hnenah ka tawngtai a, “Ka thih chuan ka thlarau mawh hi i phur ang; i tanpui ka dil che in min chhan loh avangin.” ka ti nghe nghe a. Mahse, hemi zan hian thil mak tak a thleng a, (nidangah enge thleng ka la rawn ziak ang) ka inthat ta em lova.
Chumi zana thil thleng chuan ka thinlungah zawhna a siam ta a — Pathian hi engnge ni a tunge ni reng reng? Engvangin ka tawngtaina ngaithla reng thin khan min hlimloh tir phal? Nge Pathian hi a awm tak tak lo zawk? A hrim-in Christian-na hi sakhaw dik ber ani reng2 em ni? Ka pianthar si chuan engah nge thih hial duh khawpa ka hlim loh theih? Ka sual rukna tamtak midangte hriat siloh, mahse keimah chauhvin a ka hriat te chuan min tizak a, darthlalanga ka in en te hian ka inhaw em em bawk a.
Ka inngaidam thei lova, ka intlanchhiat san thei bawk silo, Pathian, min ngaidam tu tur ber nia ka hriat lah chu a reh vawng2 bawk si. A tawp ah chuan Pathian chu a bul atanga zawn ka tum ta a. Christian anga zawng lovin mihring anga zawn ka tum ta a.
Chuti chuan sakhaw dang, Muslim, Buddhism, Hinduism, Jainism, Zorastrianism, Sikhism, Paganism mai bakah atheist ho rindan hrang2 ka zir a; thil tamtak ka hriat phah a, ka hlim phah chuang lo thung a. Chuvang chuan Bible ka en chiang leh a, Pathian hi engtin nge a lo awm, tunge tih chu ka zawng leh ta a. A tawpah chuan thil ka hrechhuak ta a..ka Pathian ka hmuhloh nachhan chu Bible chauh nilovin khawi sakhaw dang lehkhabu thianghlim ah mah a awmloh vang ani.
Bible-a ‘Pathian’ chu pakhat nimah se, a ziaktu te (eg. Mosia, Daniala, Paul-a, etc) tena Pathian an sawi dan chu a inang vek lo. Entirna lo pe ta ila, mi pakhat ka ni a, mahse ka nu leh ka ngaihzawng-in a min hriatdan chu a inang thei lo ang chiah hian mimal tin tena kan Pathian hriatdan a inang thei lova, chuvangin Bible pawh hi hmana lo awm tawh tena Pathian nena an ‘love story’ an ziah ani a; chuvangin chu Pathian chu an rinna atanga ka hriat leh rin chuan ‘third person’ in ka lo ring ve mai tihna nia, awmzia a nei lo.
Pathian nena inzawmna ka duh chuan keimah ngeiin ka ‘love story’ ka ziah a, ka experience a ngai ani. Chuti chuan ka ti ta a, nikhat chu ka room-ah ka inkalh khum a, Pathian hnenah ka thinlung zawng2 ka introduce ta a, “Lalpa, judgement day a awm anih chuan, a awm hunah nangmah hi ka lawyer i nih dawn avangin engkim ka hrilh ang che. Ka hming chu..ani a, chumi ni leh darkar-ah chuan ka piang a….” Darkar khat vel chu ka tawngtai ang, ka tap nasa hle tih chu chiang takin ka la hre thei.
Ka Pathian ka lo hmuhloh nachhan chu keimah-ah a awm vang ani a, ka Pathian chu tunah chuan ka hre chiang tawh a; i hriat Pathian nen a inan kher a ngai lo. I love story kha ka love story nen a inan a ngai lo. Chu ni ka tawngtai atang chuan kum 4 chu a ral tawh a, mahse nitin ka thang ani tih ka inhria.
Ka Pathian hriat hi chu midang tamtak sawi ang ani lova; fiamthu te hi a duh em2 a, a chang chuan kan inhnial leh nak2 fo. Mak takin, ringlo mi nia ka ngaihte Pathian thu ka hrilh thin te chu ka en dan a danglam daih tawh – a hma chuan ka vei em2 thin a, tunah erawh chuan an nunah tamtakin ka Pathian mizia ka hmu a, kei aiin a tam zawk hi an lo dawhthei a, hmangaihna an lo ngah a, mi te an lo tanpui peih zawk fo!!
Chutiang ka hmuh chuan min tizak a, ka inthlak thin. Ka Pathian hian rawng, sakhua leh hnam a thliar hran veloh avangin, a pawimawh ber an thinlung ka en phah a, chutiang mi chu eng sakhua pawh nise an bula hun hman ka duh thin. Tunah ngei pawh, ka thian 3 kawmngeih em2 te hi Muslim, Buddhist leh Hindu sakhua an ni. In la Christian tam tak aiin an nunah ka Pathian ka hmu tam fo a, an hnen atangin thil tam tak ka zir bawk.
Isua min zirtirna hi hmangaihna anih avangin a hmasa berin midang leh keima chunga ka thil tihsual te avangin ka inngaidam a, ka tlinloh zawng zawng nen ka inpawm a, ka in hmangaihin ka inzah bawk a. Hetiang hian midangte pawh hi an nihna ang in (an hnam, rawng, sakhua, etc) tiam in ka pawm a, ka rinna a dikber ti lovin, ka hmangaihin, ka respect tawh zawk a; an thuthlukna te pawm lo mah ila, ka zah sak bawk a.
Darthlalanga ka inen pawhin ka hmel diktak hi hlim takin ka hmu tawh bawk. Ka nunhlui angin eng biakin nge dik ber tiha ka buai tawh lo a; eng sakhuana nge tha zawk a ti tawh lova; eng evangelist thusawi nge rin tur ka ti tawh lo. Mahni inhmangaih a, midangte an nihna anga pawm a, hmangaih hi ka tan chuan a tawk a, biakin inkhawm tluk2 ah ka buai tawh lo. Chutiangin, Bible-ah “homosexual” duhlohna inziak mahse, chutiang mi hnenah chuan Pathian thu an awihloh thu leh an sim a ngaihthu a hma angin ka hrilhin ka thinlung chhung ah ka hmusit tawh lo. Chungte chu an mahni leh an Pathian inkar ani, ka ti mai.
Midang tam tak chuan in hrethiam in ka ringlo a, ka beisei bawk lova. Ka Pathian rindan hi tunlaia Mizoram-a inzirtirna nen a inang tlat lova. Amaherawh chu hei hi ka Pathian nena ka ‘love story’ ania, chutiang chiah chuan Pathian leh keimah inkar ania; ka rinna dik leh dikloh thuthlukna chu ka Pathian kutah a awm bawk. Ka hlimna hmuh hi midangte sawi theih anilo ang bawkin sawiselna in a ti dang dawn hek lo.
Thih hnua vanram leh hremhmun hi a awm tak2 em tih ka hrelo; judgement day hi a awm kher ang em tih pawh ka hrelo. Mahse, ka hriat chhun chu he khawvela ka dam chhung hian hremhmun hi a awm chiang hle – mahni ka inhuat a, ka inngaihdam theihloh a, ka inhmangaih theihloh tluka hremhmun a awm lo.
Chung te ka neih chhung zawng chuan ka hlimlohna ruk chuan midangte sawiselna te, kherna te,etc a thlen a, hremhmun ani mai. Chutiangin, ka chhungrilah ka zalen chuan midangte lakah a langchhuak a, vanram a ni mai. Damlaia hremhmun hrehawm zia ka hriat tawh avangin ka damchhung zawng hi a tam thei ang bera vanrama siam hi ka tum chu ani mai. Ka thih hnua vanram nghak turin dawhtheihna ka nei ve lo.
He thu ka rawn ziahna chhan ber hi chu, keimah anga Pathian zawng in lo awm ve anih hlauh chuan – hei hi ka Pathian ka hmuhdan chu ani a, i hlimna diktak chu i kut ah chiah a awm tih hi ani. I Pathian chu lo hmu mawlh ang che.
Similar Posts:
- Tawngtaina…awmze nei lo…(chhunzawmna..phur leh thut pek a lawm maw le)
- Tunlai ka mutmawh hnarmawh.
- Tawngtaina awmze nei lo.
- Engtin nge ni ang?
- Ka lo tawngtaipui che asin..
July 16th, 2012 at 2:07 pm
Report this comment
July 16th, 2012 at 2:16 pm
Theih e. Mahse an dak vangin an final destination a danglam tawh chuang lo.
Report this comment
July 16th, 2012 at 2:27 pm
Ka ngaihdan chuan, dak theih teh meuh mai.
Nang chauh ni lovin, mi tam takin i harsatna tawh ang khi an tawk a, Isua hunlai ngei paw’n mi hausa chungchang kan hmuh kha.
I nun ruak leh kawrawng ru tak atanga, hlimna i chhar erawh ka lawmpui che. Mahse.., Isua Krista ringtu i nih chuan, Bible-in a sawi angin, hremhmun, vanram, rorelna ni, adt., hi ring tawp mai rawh…
Ka tarlang leh hram dawn…
Heng hian putar (
) mit a tikham deuh. tak2, em2, vawng2, tlok2, reng2, tluk2, Thenkhatah dik takin i ziak tho si a.. 
A hrimin tih aiah a thuhrimin tih ni zawk se. Thil dang chu ka sawi lovang, phunchiar min ti dah ang e…
Report this comment
July 16th, 2012 at 3:11 pm
dak theih ve tak ani
Report this comment
July 16th, 2012 at 3:17 pm
A thupui khi chhang dawn ta ila, “Dak theih teh reng mai. Chatuan nunna hloh leh daih khawp pawhin a dak theih” tiin ka chhang ang.
Report this comment
July 16th, 2012 at 3:23 pm
Hmanni a a thil rawn post vang khan posttu..HawiloPari hi a da quit vek tawh tih ka hria
Report this comment
July 16th, 2012 at 3:34 pm
# 6…
Report this comment
July 16th, 2012 at 3:53 pm
2005-’08 chhungin i ngaihtuah a…? haha
Pu Chawngkhupa, lehkhathiam lo, silchar pawh pel lo chuan hla ropui tak a phuah a..’AW KHAWNGAIHTU PATHIAN’ tih emawni kha…
Pathian hrechiang tur hian mihring taka ngaihtuah vak vak a sawt lo…i a mai ang! Pu Zoho te pawh an at vek tawh hi!!
Hriatthiam iduh chuan ‘tawngtai’ ta che!
Report this comment
July 16th, 2012 at 4:00 pm
@ lrpa (#8)… Ka comment-ah hian ka sawi hman a, ka paih leh ta. Ka pawm zawng tak a ni…
Report this comment
July 16th, 2012 at 4:12 pm
@Dr. Mahminga Sailo (#3)I thurawn a tha a, lo zawm ka lo tum tawh ang e. Thu leh hla ziah lamah hian khawngaihin lo ‘phhunchiar’ peih leh zual la, ka lawm hle ang. Mizo tawnga ka ziah lohna hi kum tam tak ani tawh a, chuvangin thuziah lama thurawn min pek theih chuan ka tan a tluka tha a awm lo a, ka lawm hle ang.
@lrpa (#8) 2005-2008 chhunga ka ngaihtuah ka tih hian Pathian ka zawng ti zawk ila a dik zawkin ka ring. Hemi chhung hian mihring chauhin ka ngaihtuah lova, ka tawngtai bawk a. Pathian chhanhimna thu hi ‘chatuan nunna’ anih chuan ngaihtuah ngun hle a ngai ka lo ti asin. Dam chhunga pasal tur atan pawha nasa taka ka ngaihtuah chuan chatuan nunna tur atan lek phei chuan nasa lehzuala ngaihtuah chian tur tih kha ka formula kha ania, khatih lai khan.
Report this comment
July 16th, 2012 at 4:23 pm
Engpawhnise H.Par..i ziak thui lutuk a..kan chhiar zo peih thathum lo a lawm le..
Ka bulah lo kal la ka lo hrilh melh melh ang che. !! Kei pawh ka ‘zawm’ theih chuang lohah hian ka ‘nghet’ ve bur chu anih awm hi maw..:”)
Report this comment
July 16th, 2012 at 4:31 pm
Evangelical mi dik tak ka ni bawk a, Mahni pianthar chiah leh chiah loh chian tlatloh mai hi chu ka hrethiam ve chiah lo. Tin, chiang taka Pathian nena intawk(piangthar) tawh hian an tluk hlen san phal theih hi ka ring lo bawk. An tluk hlen phal/ngam chuan an la piangthar chiang tak tak meuhlo aniang.
Report this comment
July 16th, 2012 at 4:31 pm
# 10…
Thuziak zawm/diklo ka’n sawilan hram chhan chu: Mizo tawng ziakah hian; Mi(sual).com hian hmasawnna kawng tam tak min pe a. Midang paw’n an tangkaipui ka duhsak vang a ni…
Zam lovin kal zel rawh. I zui Lal Isua hi zuitlak a ni e.
Post dangah ka sawilang tawh thin. Ka thianpa pakhatin a sawi hi dik ka ti fo thin. Ruihtheihthila fihlim te chuan, ruihtheihthil avanga thlemna tam tak an tuar/tawng ve lem lo a ti. Chutih laiin, chaklohna, fellohna leh sihhnipna erawh an nei vek lawi si. Ruihtheihthila an fihlim ngawt avangin, an rilru erawh a thianghlim bik tihna a ni lo.
Chuvangin, Eng ang mi pawh niin, nungchang leh mizia hrang nei thliah mah ila, kan tlinna leh famkimna erawh Isua Krista chauh a ni si. Amahah hian tlulut fo ila, damna famkim chu kan hmu ngei ang.
Report this comment
July 16th, 2012 at 4:56 pm
Atheih aniang keipawh ka da mek
Report this comment
July 16th, 2012 at 5:18 pm
Kum zabi 17-na laia Pietist harhna atanga lar ta em em PIANTHARNA chuan mizoram chu kum 1899 bawr atang a rawn hrut tan ve det det a. Kum sangbi tharah meuh chuan nasa em emin mizo mai nilo,sap pachal ngei pawh “pianthar” loh hlauin a hman hlel a, theologian thenkhatin hnial thlak an tum mek bawk!
Hetiang em em a piantharna ngainat leh duhluat avang hian setana beihna alo lang ve chat a, chu chu hei hi a ni;
Piantharna dik takah chuan rinna(faith) leh simna(repentance) hi a hmasa zet ang a. Chumi hnuah Isua hnung a zui ta ani tih lanna atang baptisma hi a chang tur a ni. Entirnan, Mipakhat chuan kawng thui tak a kal hnuin ticket a la a, bus-in an khaw lam a pan thin. Hetiang chiah hian kawng thui tak hian rinna leh simna hi a entir a, ticket hian baptisma a entir a. Bus- a chuan hian chhandamna a entir a ni. Tihian sawi ta ila
Rinna+ Simna+ Baptisma= Salvation…
Tunlai piantharna erawh ah chuan rinna leh simna hi kal kan duaiin baptisma hi kan va chang daih thung a. Baptisma chan hnuah rinna leh simna hi abul atang bawkin kan inzawh that tir leh thin. Hemi avang hian piangthar da leh, sual leh ta, piangthar nih inhrelo, piantharna awmzia hrelo, piangthar nih leh nihloh hre lo an lo kat ta nuk mai a nih tak hi. Pawi tak a ni e, pawi tak!!!
Piangthar tawh chuan sual ala hria em? Rawngbawltu tam tak leh speaker tam takin tihluihna hmangin sual huat tirna, sual hriatloh tir tumna, sual tihloh tir tumna chi an tuh vak vak thin. Heng mite rilru leh an rinna nun thanlendan erawh chu sual hriatloh tumna avanga sual an hriat tam tak lutuk avang leh sual tihloh tur an bituk tam luatah mahni leh mahni JAIL chhungah an inkhuang ta daih mai thin a. Bible zirtirna a ni em? Piantharna dik ani em hetiang hi? Paula chuan ‘Pathian thlarau chu a zalen tur a ni” a ti daih. Piantharna dik chu ava nilo lulai teh lul em!!
Kan pianthar hian keimahni kan piangthar tihna a ni lo tih hriat a ngai. Miin amah kha piangthar ni a inhriat tlat chuan chakna(desire) emaw sual alo lan leh ni ni kha a tluk lehni a ni mai thin a ni!! Bible hian piantharna hi mihring piantharna lam a nilo tih hi min zirtir dan zawk a ni. Greek tawng ah chuan “chunglam atangin” tihna daih a ni a. Mihring piantharna lam niloin keimahni a ISUA alo PIANNAWN lehna lam ani zawk a ni!
Entirna siam leh ta ila; Mitdel chuan khawi hmun nge kalna tur? step a awm em?, hmun hlauhawm a awm em? Kham a awm em? Sual a awm em? Bang sut theih a awm em? tih hi amah leh amah lo inngaihtuah vak vak se, hlawkna a neilo. Amah enkawltu Doctor chuan khawilai nge kalna tur, hmunhim a ni em, hmun zawl a ni em, mitdel chetthlatna atan hmun duhawm a ni em, tih a hre vek a, chumi hmunah chuan Doctor chuan a hruai mai thin zawk a ni.
Hetiang chiah hian keimahni a Pathian alo pian miau chuan keini sual tihloh tur lo siam vel hian awmzia pakhatmah a neilo, tawl mai a ni! A dik tak chuan Isua lo piang hian hmun him leh ral muang chu a hre lutuk , min kai zawk a, min hruat thin zawk a ni chumi hmunah chuan. Keini sual tihloh tur lo siam chawp nen chuan inhlat fia fia tak a ni!!
Tunalai miten an buaina fo chu “influence” hi piantharna emaw an ti fo a, kohhran pakhaat phei phei chuan a la sual lutuk tlat! Influence hi piantharna dik anilo a, KJV-in “possess” a tih leh “born angain” tih hian a rilzia hi a sawi phalo!!
Tunlaia piangthar inti tam tak hi chu “harhthar” tih zawk emaw rinna leh simna stage chauh la kal te an ni. Pianthar har zia leh a namailoh zia hi tunlai danah chuan kan ngaihhlut luatah awlsam te tein chan kan tum ta mai a, chuvangin kan chandan leh chantumdan pawh hi bible nen hian a inkalh rem rem khawp mai. OT ah hian “piangthar” an awm miah lo a, NT a piangthar tawh te hi an DA ngai tawh lo. Chuvangin mi a piangthar dik a nih chuan DAKNA a awm tawh lo zawk a ni e!
Report this comment
July 16th, 2012 at 5:20 pm
Rahsi-veng pa pakhat pawh, gospel camping neih nikhuain a ri hluai a, a da leh mai thin a ni awm e. Tum khat chu a unaupa’n a zilh a: Nang ve hi, i ri hluai a, i dak lahin i da chhe thei si‘ a ti a.
Chu pa chu a dang duh miah lo. Ti hian a unaupa chu a chhaglet: E, Bawihipa, pangpar khawi hi i en ngai em? Pangpar lem hi chu, a bal te a nih ngawt loh chuan, a vul ngai hian a vul reng a, bawmtu rannung pawh an awm ngai lo asin. Pangpar tak erawh, a chuai a; reilo teah a par vul leh thin a. A parzu dawt tumin khuai leh rannung te’n an bawm thin. Hetia ka daka, ka tlakchhiat em em laia, min bawm buaitu an awm nak nak tawh hi chuan; ka parvul a hnai leh tawh a ni tih entirna a ni e a ti daih asin.
Report this comment
July 16th, 2012 at 5:53 pm
Dâk leh theih tehreng mai.
Sawi teh luam pawh ngaiin ka hre lo ve.
Report this comment
July 16th, 2012 at 5:56 pm
Ka ngaihdan chuan piangthar diktak pawh a dak leh theih. Mihring ve mai kan nia, khawvela awmchhung chuan thil chi hrang hrang kan tawng a, tin, thlarau nun pawh a chak reng theilo ve bawk a. Piangthar diktak pawh ni ila, dak lai leh inthlahdah hun a thleng thei teh meuh in ka hria.
Tu te rin dan nge ka hre lova, chhandamna bo theilo a an sawi hi chu ka pawm miahlo. Misual pakhat a piangthar a, a hnu deuhah sual rawng a bawl chhunzawm leh a, a thihni thleng a Pathian hnena a kir lehlo a nih chuan a lo pianthar tawhna khan a chhandam phak lo in ka ring.
Report this comment
July 16th, 2012 at 6:01 pm
@ sheldon… Ka ngaihdan chiah…
Thih thlengin, rinawm leh fel takin lo awm la… a ti tlat alawm ti raw..
Report this comment
July 16th, 2012 at 6:10 pm
@Mahminga, chuvangin nangpawh beer zawng duk duk tawh suh aw:-D
Report this comment
July 16th, 2012 at 6:18 pm
H. Pari, i rinna zinkawng chu a bumbohvin a rorum angreng hle mai. Hetiang mi hi i ni tih hriain zirlai khirhkhan deuh Pathianin a pe che a ni mai thei. Tin, i felna, thatna leh krisna lai takah khan Setanan rawn beiin rinhlelhnaah a um lut che a, nangmaha sual awm ve reng si kha tar langsarin rinhlehna thangah a um awk che a, mahse Pathian chuan i bo hlen phal lovin amah ngeiin a pek che i theihna hmang ngei chuan a khai chhuak leh ta che hi a ngaihnawmin a ropui hle mai.
I theology lai hi sawi tur a la awm nualin ka hria…
Report this comment
July 16th, 2012 at 6:24 pm
Ka han tangulh vei vel lawks..kan bopilna a thui hem hem bawk a, tawngulh vei vel vak mai teh ang…
PIANGTHAR hi mihring piantharna niloin mihringah ISua alo piannawnna zawk a ni. Ramhuaiin mihring kawchhung an luah hian an DA ve mai mai ngailo. Isua hian mihring kawchhungah alo piang a nih chuan a DAK LOH dan tur chian zia chian zia chu!!
DAKNA- OT ah hian piantharna a awmlo tih chu kan hre bawk a. NT lamah hian piangthar DA hmuh tur an awm hauh lo nia. Piantharna hi ‘influence” ani lo a nia. Ani emaw kan tih vangin influnce lohlai hi DA emaw kan ti thin!!
Piantharna hi possess hian a sawifiah tep, mahse a fiah zolo ka ti…
“KA DA LEH/KA DA” ti tu te hi an piangthar lo, an piangthar emaw tiin an mahni a sualawm leh thin, leh sual an tih chakna la reh lo chuan sual an tihni chu DA ah an inngai mai thin. Deception turu tak a ni..MAHNI INTIHPIANTHAR TUMNA MAI A NI!!!
Report this comment
July 16th, 2012 at 6:32 pm
PIANGTHARIN A DA TIH A INHRIA HI AVA MAK NGAI EM!!!
John 3:6- ah chuan “thli khawilamah nge a tleh, khawi atang nge alo kal, khawnge a kal dawn tih tuman kan hre silo, chutiah chuan piangtharte chu an awm” tih a ni!!
Mitdel hian khawiah mah kaldan leh kalna tur a hre lo, kalna tur lo insiam vel pawh a ngailo. A tul bawk hek lo. Amah enkawltu Doctor chuan a hruai mai zawk a. Khawnge a kal dawn, khawnge kal tur, khawinge him – engkim mai hi a hre vek zawk a ni.
Tunalai piangthar inti ten “ka DA” an inti hi a mak lutuk, mak lutuk! Isua anmahni control tu chuan engtin tak khawih vel tak maw. Dik tak chuan “ANMAHNI an piangthar zawk a ni, ANMAHNIAH niloin!
Hemite rinna hi a easy em em a, a mawlin a fiahlo a, a rillo a, a hnunhnang heklo a, tlukna leh der nun a tam em em a, Setana counterfeit anih loh vek chuan piantharna dik tak- DAK NGAILOHNA hi dawt zawk a ni ang…
Report this comment
July 16th, 2012 at 6:34 pm
Ka thlirdan hi thenkhat chuan a liberal lutuk in ti mai thei a. Chumi chu a piangthar/a piangthar lo, vanram a kal ang/kal lovang kan ti ve sek te hi ka duhlo. Chhandamna chu kei leh Pathian inkar a ni. Inkhawm khat deuh te vanram kailo tura kan dah ve ngawt te hi ka duhlo bawk.
Report this comment
July 16th, 2012 at 7:10 pm
piangthar = zethup
Report this comment
July 16th, 2012 at 9:36 pm
Piangthar DA leh = Mizo Kristian tawngkam.
Piangthar dik tak – Piangthar lem (dik tak lo)a awm em ni?
Bible khawii laiah hian nge Piangthar da leh chungchang inziak aw. Tluksanna tih erawh hi chu a awm e. Piangthar da tih ngawt ai chuan a pawi hmel khawp lehnghal.
Report this comment
July 16th, 2012 at 9:49 pm
@Lta,
I sawi tha khawp mai
mahse tlema sawi zau deuh ngai a awm. I sawi angin piantharna hi mihring lama chhuak nilovin ‘chunglam atanga hrin’ tihna a ni a, chumi awmzia chu misual boral tur kan nihna lak ata Pathianin khawngaihna vangin Isua Krista hmangin min chhandam a; a thihna leh thawhlehnaah mi zawng zawng chhandama awmin, mihring thar/thilsiam thar, Pathian fapa/fanu nihna kan chang theuh a ni. Pathianah chuan mi zawng zawng hi Isua Krista zarah PIANGTHAR kan ni tihna a nih chu.
He chanchin tha hi thlarau thianghlimin mihringte kal tlangin AD 30 vel atang khan tun thlengin khawvelah a puang ta a. Chumi ringa pawmtute chu mi piangthar tiin Kristiante chuan tawngkauchhehah kan lo hmang ta a ni. Hetah tak hian ngaihdan hlawm hnih, tuna kan chai mek hi a awm leh ta a. Mi piangthar dik tak a da leh thei em, thei lo em tih hi a chhana mawl tak chu ‘thei a, thei lo bawk’ tih a ni. Hei hi a chhan chu miin chhandamna thu a lo hriat a, Isua Krista a lo rin hian mi pianghthar a ni tlat a ni. Amah a piangthar lam nilovin, Krista zara Pathian khawngaihna avanga piangthar a lo nih daih tawhna a lo hriata, a lo pawm khan a nihna diktakah a lo harhchhuak tihna a ni.
Ama’rawhchu, hetah hian thil pakhat lo awm thei ta chu, chu mi piangthar chuan Krista Isua zui zel lova, ama duh duha a nun zui chuan hmelma pa in a rawn bei a, mahni inrinhlehna te, mahni inthiamlohna te, chhandam nih leh sual ngaihdamna chang tawh a nih a inhriatna te kha a lak bo sak a, a fiah lo tual tual a, a tawpah phei chuan chhandam nih ve inrin lohna leh hremhmun kal tura inhriatna a neihtir ta tlat a, a ngaihna hre lovin beidawngin takin a hun a hmang ta thin a ni. Rinna in a nun tawh tlat loh avangin Krista ringtu, Pathian fa tih theih a ni tawh lo.
A lehlamah chuan da leh thei tawh miah lo tura piangthar (Isua Kristaa a piangtharna fiah taka thlarau thianghlimin a hriattir tawh tih zawk tur a ni) hi a awm theih tho bawk. Heng mite avang hian piangthar a da leh thei lo tih pawh hi a dikna chin a awm tho mai. He dinhmun chan hi chu thil namai a ni lo thung; thil awlai a ni hek lo. Thuthlung hluiah a hlimthla kan hmuh chu khatia Pathianin Israelte Aigupta atanga a hruaichhuah a, tuipuisen (baptisma anpui) an kan hnu-ah ramtiama lut chu Joshua leh Kaleba chauh an nih kha. Kanan ram hian vanram niloin thlarau chawlhna ram (ringtuah)a entir a ni. Kristian thenkhat chuan he thlarau chawlhna ram hi, malsawm vawihnihna ti te paw’n an sawi thin. A nihna tak erawh chu Pathianin ringtute min hruai luh a tumna hmun a ni a, Krista rinawm taka zuitute chan ngei ngei tur a ni zawk. Thlarau thianghlim leh meia baptisma ti paw’n a sawi theih. Isua lokal leh hma zawng him tak leh muang taka, khawvel hreawm leh harsatna kara ringtute a humhimna hmun a ni. NT-ah chuan apoltol-te zawng zawng khan he ram hi an kai tlat a ni (Juda tih loh).
Helai thu hi Isua khan tehkhin thu hmangin a sawi:
Matthaia bung 13-ah khan buh chi tehkhin thu kan hmu a. Hmun li-a then a, hmun khat chiah a nih kha Pathian ram chanchin hria a, nghet taka ding zui ta. Amah ngei khan a sawifiah a, “Chutichuan, buh chi thehtu tehkhin thu chu hre rawh u. Tupawhin ram thu chu benga a lo hriat a, a ngaihna a hriat si loh chuanin (a hriatthiam si loh chuan), mi sual chu a lo kal a, a thinlunga theh sa chu a chhuhsak thin… Tin, lei tha chunga theh chu, thu chu benga hriaa a ngaihna hre bawk (hrethiam tiin Lehlin thar chuan a dah) hi a ni” tiin.
A awmzia chu chanchin tha, chhandamna thu, piantharna kan tih hi a hrethiam leh a ngaihna hria te chu bo/da leh mai mai turin thim thiltihtheihna hian a ngam tawh lo tihna a ni. “he lungpui chungah hian ka kohhranho ka rem chho ang a, Mitthi Khaw kulh kawngkharte chuan chu chu an ngam lo vang” tih ziak ang khan.
Tichuan he hmun dai thleng tur hian hriatthiamna a ngai tih Isuan chiang takin min hrilh a, mihring beih vakna emaw zir vak ringawt a tawk lo. Thlarau Thianghlim atang lo chuan hriatfiah chi a ni lo. Engtin nge chu chu kan neih ang tih pawh Lal Isua’n min hrilh theihnghilh hauh lo.
Tirhkohte paw’n min hrilh bawk a:
Piangthar/ringtu an DA fo mai hi chu hriatthiamna tak thlarau thianghlim zara an la chan loh vang a ni. Chumi chang turin Isua hnung hi kan zui rei peih lo em thin bawk a. Kawngkhat zawnga ngaihtuah chuan heng mite hi an la vannei tih theih a ni. A chhan chu hriatthiamna tak chang tawh, thlarau thianghlim zara van thiltihtheihna tem tawh, lo DA leh nise an chung a pik ngawt ang le.
Report this comment
July 16th, 2012 at 10:14 pm
Bible in ‘tlu’ a tih hi ‘da’ kan tih ang hi a ni mai a, a dak/tluk theih aniang. “Ka mifel chu tlu mahse la a tho leh ang,” tih te mai atang pawh hian a chiang viau mai. Mahse ringtu diktak tlu chu a tho leh ngei ngei ni awm tak a ni.
Report this comment
July 16th, 2012 at 11:00 pm
@ sheldon (#20).. Ka hmu ve chiah, ka nui huk alawm le. Beer chu ka zawng tawh lovang, pehteh kher ka pet tet ve duh tawh…
Comment a ngaihnawm hlawm hle mai..
Report this comment
July 16th, 2012 at 11:08 pm
Pu Donald,
Ava han tha teh lul em!! Tunlai chu PIANTHARNA hi ka zir nasa em em a, a hlut zia leh pawimawh zia te, chan a harsat zia leh invuiliamna a nih zia ka hriat hian a rura ti ila sawi thiam a awl ber zawk ang e. Ka ngai hlu vet vet tawh khawp mai.
Heti chung e tilo chuan hmana ka tui baptisma chan kha ka va ngai ho ta vek mai pek a; a chhan baptisma hi piantharna zawng zawngah hian a last stage- ticket lai ber mai niin ka hre ta a nih chu. A awmzia chu baptisma ngawr ngawr hmalam ah hian zinkawng thui leh tihtur tam zia, TT puihna a tih tur leh hneh ngai tam zia hi Baptisma hian a sualchhuak chiah ni hian ka va hre ta a. Tunah chuan simna leh rinna hi ka nei tak zet tawh hian ka inhria , baptisma pawh chan nawn sak duhna ka nei a nih chu…
Nia, piangthar hi DA ngai miah tawhlo turin ka ngai hmiah a. Bible ah hian Piangthar DA LEH hi ka la hmu miahloh vang a ni. DA tih pawh hi pianthar duh ho, piangthar tha thei silo, pianthar duh tho si te hian an sual thup nan DA tih hi an quote chhuak ni ber hian a lang ta a ni!!
Chuan kan ngaihfin a ka hriat fo thin chu TT “possess” leh “influence” kan ngaihfin vang hian DA hi a awm thei ang em ka ti thin. Bible chang ilo sawi chhuah tak, piangthar ang a awm, mahse tlu leh te ang kha. Samsona hi possess a nih ka ring lo a, influence a nih a rinawm a, Lal Saula te…adt. an tam mai hetiang TT -in a khawih, mahse a chenchilh siloh te hi.
Report this comment
July 16th, 2012 at 11:25 pm
Keimah hi chu ka chiang ve tawk a, midang erawh sawi sak thei ka ni lo e
Report this comment
July 16th, 2012 at 11:40 pm
Nunna bu a ka hming khi nawh reh leh mai mai theih turin PENCIL-a an ziah ka ring lo reng reng..
ka thlarau nun a chauh deuh changin an nawt reh anga.. a chak deuh hunah an ziak tha leh ang a..haha..
Ka hming zawn chu an nawh reh leh an ziah thatna lamah a pawp hrup tawh ang a….
Nunna Bu/Roll-ah chuan i hming chu a chuang reng ang.. mahse roll an call hunah nangmah ber kha i awm miau si loh chuan a buai thlak ve mai thei..
A bu neitu lama awm lova setana hnena i lo awm daih chuan i hming kha lam lam mahse present tur awm lovin a ni lo lamah i lo thu kuk thei…
Report this comment
July 16th, 2012 at 11:42 pm
Hetiang hian tehkhin ta ila- kelte pakhat hian kham ko pang a rawn zawh phei zet zet a, mahse a rap sual palh a, a hnuaia chirhdiakah chuan a tla thla ta bawrh mai a. Kelte chu kelte dik tak a nih chuan chirhdiaka awm chu nuam a ti hauh lo vang, chulai hmun kalsan turin theihtawp a chhuah ngei ang.Mahse kelte dik tak ni lo a vawk,kelte anga in lantir mai a nih erawh chuan chirhdiakah chuan nuam ti takin a tal hruah hruah mai ang. Chutiang bawk chu a ni piangthar dik tak dak leh chungchang chu.
Report this comment
July 16th, 2012 at 11:46 pm
Ka chhiar peih lo mai, a thupui ka ena , a chhanna chu “THEIH LOH” ni tawp, ka lawm e
Report this comment
July 17th, 2012 at 3:24 am
Piangthar-ah diktak leh diklo a awm dawn em ni aw. Piangthar chu piangthar, piangthar lo chu piangthar lo ni maiin ka hria e a!
Report this comment
July 17th, 2012 at 11:17 am
@lrpa – Baptisma chan chungchang i rawn sawi hi a pawimawh ka ti hle. Ka Baptisma chan hmasak ber khan kum 12 ka nia, engmah ka hrethiamlo; khua a lum em avangin tui inhnim kha nuam ka ti hle tih chiah ka hria. Simna leh piannawnna tih te kha chu theory ve mai anni. Kum 2009-a Baptisma ka chan nawn erawh chuan a dang hle. Ring chunga chang ka nih bakah khawvel leh thlarau rama mite zawng zawng hma ah keimaha mi hlui chu a thi anih tih hre chungin ka chang a; tui atanga ka taksa min pawhchhuah lai tluka ka hlimni kha a awm lovang. Khami ni atang khan mithar niin ka tho a – i sawi ang hian ‘piannawn’ ka lo ti ve chiah. Kei pawh ka ngaihdan chuan mi in Pathian a pianthar/nawn diktak chuan a ‘dak’ leh mai mai theih tawh lo, a chhan chu a chiang tawh lutuk a, a theihnghilh mai mai theih tawh lo tih hi ka hriat (experience) ve chu ani.
Report this comment
July 17th, 2012 at 11:27 am
@ Ma H.Par,
baptisma chu a pawimawh khawp mai! mahse helam ka comment awm pawh ka hre lo 
Piangthar dik takte chauh hi da thei an ni. Piangthar diklo te chu da sa an nia..
Da thei tur a piangthar kan ni bawk. Pathian pawh hian thlemna kan tawh hi a phal ani. Isua meuh pawh setanan a thlem anih kha. Da kan tih hi ‘setanna bumna/thlemna a vanga khawvel thil a kal leh ta te’ tihna a ni ber ang chu.
Report this comment
July 17th, 2012 at 1:08 pm
Mizoram mipui zat aiin piangthar zat an tam tawh an tih kha
Report this comment