mi(sual).com

Darkar khat vel an kal hnu chuan zial zuin an thu chawl a, Rualzachhinga chuan, “Pathian hi a awm tak tak a niang a, awm tak tak ni ta sekan be khatin kan kawm ngeih lo ropui si a, min tanpui a duhna chhan tur ka hre lo. Heti khawpa kan bepawp lo chung pawha min hre renga min tanpui a ni tih hrechiang ngat ila chuan han biak ve chhin pawh ka hreh lo, thaba kan sut chu a tul a ni; nau Darh, kei aiin i nel deuh ang han tawngtai teh,” a rawn tichhuak a.

“Rualzachhing, chutiang sawi kual sawi kual angai lo. A khawngaih che a, a hmangaih che a nih chuan Jail-a tang lovin hmelma lakah pawh a hum thei reng che a lawm. Jail-ah rethei taka hrehawm tuarin rilru hah takin i tang a, i thiamna zawng zawng hmangin Vai i bum a, i tumruhna leh thahnem ngaihna leh i huaisenna avangin thi lova ruangin Jail atangin i tlan chhuak a, ti hian hah tak leh thlaphang zek zekin i awm mek a.

Independence-te hi sual hah kher ngai lovin British kut atanga India a indan rual khan lo independence ni ila, hetiang taka talbuai a ngai lo tur….duh leh Pu Haleluia hi tawngtai sela, pianphung leh hmelah pawh hotu chan an chang deuh a lawm, ani hi keini ai chuan a lo ngaipawimawh deuh ang..” tiin Zaidarhzauvan Rualzachhinga chu a chhang a. An han nui leh dar dar a.

“Ti ti dang i sawi zawk ang u,” Zailiana’n a rawn ti a, “Han ti ti rawh le, lo ngaithla turin ka beng a in-ready e,” Rualzachhinga’n a ti a,. Mahse titi dang sawi leh lovin an kal leh ta a.

An kal tan chauh tihin an hmaah thawm an hria a, an ding thap a, thawm chu enge anih fiah hmasak lohva tawn ngawt chu fin thlak bera an ngaih loh avangin kawng sirah an peng a, thawm chu a rawn hnai zel a, lawi nufa an lo ni a. Lawi a ni ih an hriat hnu chuan kawngah an chhuak a, an kal leh ta a.

Kawng peng a lo awm a, khawi zawk nge zawh tur an hre ta lova, an han inrawn kual a, a thenin vei lama kal an rawt laiin a thenin ding lama kal a dikin an ring a. Rualzachhinga chuan, “Kan tawngtai tak tak mai dawn em ni ?” a ti a. Mahse a tawngtai ta chuang lo va. Ding lama kal chu dik zawkin an ring a, dinglam chu an zawh ta a, thui an kal hmain vei lama kal chu dik zawkin an ring leh a, an kir a, veilam pengah chuan an kal ta a. Dinglam pengah kal zel se chu an hma lawk khuaah police chhuti pahnih an awm a, harsatna an tawh ngei a rinawm.

Darkar khat zet an kal hnu chuan Lalhmangaiha’n lung kuttum tia vel a raphrual sual a, a petek a, a tlu a, leilet bial tlangah a nak a sawh a, a kal hlei thei ta lo va. “Thiante u, ka tikhawtlai zo dawn che u, min kalsan mai rawh u, tihian ka theih ang angin ka lo inbuaipui ve mai ang e,” tiin a ngen a. “Kan dam leh tlang khatah, kan thih leh ruam khatah, tih anih kha, tumah kan in phatsan lo vanga, tumah kan in kalsan bawk hek lo vang” tiin a thiante’n an buaipui nghal a.

Lalhmangaiha chu an han malis nawk nawk a, reilo te an chawlhpui hnu chuan an kal leh ta a. Zing dar 8-9 velah Derby Tea Estate an thleng a. Gate puiah chuan, “No Entry, Trespassers will be Executed” tih a lo intar a.

“Mamawhna chuan dan a pawisa lo” tih a awm ve tho kha tiin gate chhungah chuan an lut ta a, thingpui huana hnathawk ho chuan an rawn hual ta a, mahse kut an thlak mai ngam bik lo va. Chutia an din hual lai chuan vai pakhat, lukhum parh khum, silai keng, an awmna lamah chuan a rawn kal a. Chet hmasak tur em ni tiin an in rawn ru a.

Silai keng rawn kal chu Rualzachhinga’n a lo bia ang a, a chhan dan a zirin chet mai tur niin an hria a, Rualzachhinga chu a tul anga vaipa silai pawhthlak sak nghal mai turin a inring ru a. Khawia kal tur nge tih a lo zawt a, vaipa chuan sa pel tura Puallawi tlanga ramvak tur a nih thu a hrilh a.

Anniho chu an han inrawn a, Puallawi-a awm Pi Lalzingi in pan mai chu thain an hria a, silai kengpa chuan, “Ka rualin kal ve mai rawh u,” a ti a, an zui ta a. Puallawi an thlen chuan vaipa chuan Pi Lalzingi in chu ralkhatah a kawhhmuh a, Pi Lalzingi in chu an pan ta a.

Pi Zingi in an thlen chuan thil awmdan an hrilh nghal vek a, ani chuan, “In thang rei tawh dan ngaihtuahin kan inah hian chuan rei tak awm a tha lo vang,” tiin a huan chhungah a bihruk tir ta a. Huana chawlh hahdam paha an bihruk lai chuan Assam Police te chu motorin Pi Zingi inah an rawn kal a. Pi Zingi chu Mizo tlangval 6 Jail atanga tlanchhuak a hmuh leh hmuh loh an zawt a, “Ka hmu hauh lo mai, helai hi an lo la thleng hman lo pawh ani ang e, Mizo an nih chuan kei hi an rawn pan hmasak awm tak chu ka ni a lawm,” tiin a chhang a.

Police-te chuan, “Ka pi, an lo kal a nih chuan i rawn report vat dawn nia,” an ti a. “Tehreng mai, an rawn kal hlauh a nih chuan ka rawn hrilh vat dawn che u nia,” a ti a. Police te chu an kir lehnghal a .

Police an kir hnu chuan tang tlangchhuakho chuan tukthuan an ei a, Pi Zingi’n chawhmeh a siam thiam bawk a, dul hmul khat phuarin an ei a, tukthuan a buatsaih sak bakah puana pe bawk a, “Helai hnai khuate hi a theih hram chuan tlawh lo vang che u, an mantir duh ang che u tih a hlauhawm, ding takin Mizoram lam pan mai rawh u,” tiin an kalna lam tur a kawhhmuh a, a theih angin kawng awmdan a hrilh bawk a. “Ka sawi dan a chiangkuang vak lo va, in hre thei mai ang chu maw ?” a ti a. Darha’n, “Hria ang, hria ang ka pi, min ngaihtuah suh, ka mit hi a var riau a nia…” a ti a, an nui ham ham a, Pi Zingi kawhhmuhna lamah chuan an kal ta a.

Pi Zingi sawi an ngaithla chang lo nge, Pi Zingi’n a hrilh thiam lo zawk lah hriat ni suh, darkar 2 hnuah chuan an kal zel dan turah ngaihdan a inang ta lo va, a tawngchak deuh thuin an kal zel a, an kal thui tulh tulh a, an bo chu a ni ta mai a, khua a thim ti tih ta a. Ngaw karah chuan riahhmun an sual ta a, an biscuit pai te chu an ei a, thingro an mut a, an mu ta a.

Zanlai velah chuan lo vat thawm ni awm tak an hre ta a, an thu far a, a chang phei chuan thing tluin an mutna rawn vaw phak mai tur ang tein an hria a, enge ni ber ang tiin an in rinsiak a, han rin mai tur fel fak an hriat loh avangin, “Ramhuai lo vat” tiin an phuah ta thlarawk a.

March 23 ni chuan an thil paite an ei zawh hnu chuan an kal leh a, khawi lam nge Vairengte a awm pawh an hre lo va, an rin kal mawp mawp mai a, chawhnu her atangin Lalhmangaiha’n hma a hruai a, Hmuaka’n,”I kal thiam lo a ni, kawng min bopui reng mai,” tiin Lalhmangaiha chu dengkhawng deuh takin a ti a. An inhnial ta a, “Nangman hma hruai rawh,” tih pahin Lalhmangaiha chuan Hmuaka chu chemin a vawm a, a vawm thelh hlauh a. Zailiana’n hma a hruai ve ta thung a. He mi zan hian sai tluangah an riak a.

March ni 24 pawh chuan an rin kal nileng leh a, tlai thim dawnah khaw te tak te Tippera khuaah an lut hlawl mai a, hmun dang pan lovin Tippera khuaah chuan riah mai an rilruk a.

Assam Sawrkar hnuaia Forest Deptt. mi leh sa angin an insawi a, R.Haleluia leh Zailiana te chu an hotu cheibawl a, Rualzachhinga’n tawng a let a, mi dang 3 te chu an puakphur angin an awm a. An thlenna khua te chuan an zah thim hle a, eitur tuihnai tak tak nen hneh takin an mikhual a, mutna pawh theih tawka nuamin an siamsak a.

A tukah chuan el-euhin tuakthuan an ei a, thingpui tui taka an khaukhurh hnu chuan remchang hmasa bera Tippera khua chu tlawh leh ngei tumin an chhuahsan ta a. Mizoram lam panin an kal a, mahse an tum anga kawng an hriatchian loh avangin zanah chuan ngaw karah an riak leh a, engemaw thawm mak pui pui an hriat avangin an ut pawh a tui vak lo va, khua chu a var leh ta a.

Ni 25 March 1967 zing dar 9-10 velah Vairengte thlawhhma an thleng a, chuta tang chuan an tum lam khawthlang lam chu an pan ta zel a…….!!!!

Similar Posts:

• Silchar Jail atangin – II !!
• Misual ka um!
• Ka thiannu kha…!!
• Rukru man
• CM fanu man

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, July 23rd, 2012 at 1:30 pm and is filed under Copy Paste, Mizoram. You can follow any responses to this entry through the RSS 2.0 feed. You can leave a response, or trackback from your own site.