mi(sual).com

Ve hlauh mai a, eng thiamna mah han chhuan tur ka nei lova, eng degree mah ka nei hek lo, sap ṭawng lah chu ka thiam vak der lo leh nghal, foreign thleng thleng a kal tur chuan pawisa lah kan neilo em em mai lehnghal a, eng ti tih a foreign kaltur ta chu nge ka nih tak mai le.

Vanneih hi ka inti em em mai a, mihausa fa tan pawh kal a har the reng nen, visa te buaipui a ngai a, train leh flight ticket tih vel te tih fel vek a ngai ṭhin si a, kei thingtlang kilkhawr dai chhe kil kara miin a hming pawh ka lam thiam ṭhaṭ loh foreign lam tluang chu ka zawh ve dawn tlat mai.

ZIN VAWI KHATNA

Amak angreng khawp a, ka ram kalna tur thleng tur hian Train emaw flight ticket lak a ngai lo va, pawisa ken tam a ngai hek lo, ka nu in cheng 30 min pai tir a atawk em em a ni. Chuan fan ngai loh ram fang tur chuan motor changkang takah kan lut hauh lo, video coach velah kan chuang ang chu tih nak laiin, motor AC hlang kan rama kan hmang ṭangkai em em 407 hnungah chuan kan ding ta hmur maile, ka zin chhan hi mitthi ral tur kan ni leh nghal a, mitthi ralna tur sum ka ken kha ka nu khan a alo duh tawk em em mai alo ni a.

Mi te sawi ṭhin mizo chu kan ram kan pelh thlak a, vairam kan thlen thlak chuan kohhran mipawh milo pawh zu an in ngei ngei ṭhin an tih te kha ka rilruah ka hre ve reng a, foreign meuh ka thlen chuan MLTP Act a awm tawh dawn si lova, tlem tal chu ka lem ve ang chu ka ti rilru niap niap a, cheng sawmthum chu a tawk kati lo ta rum rum mai.

Kan tlan khu ta rum rum a, chawlhni alo ni nen motor vei vak an awm meuh lova, mitthi ral tur kan ni bawka kan ṭhahnem khawp mai, ram dang daiha kal tur kanni nen kan phur tlang khawp mai. Darkar hnih leh a chanve hnu velah chuan ṭiau lui kan thleng a, chu ka foreign ram zinna tur kal tlang tur chuan lei alo indawh zuah maia, kan ram lamah chuan Assam Riffle ho leh MAP nge IR ho pawh ka hre lo an lo duty a, hotu deuh ten an han bia a, Sumo chin lo chu motor kal tlang an lo phal lova, kan mitthi ralna tur khua Rihkhawdar thleng tur chuan ke a kan kal a ngai ta a ni.

Foreign ka zin vawikhatna ah chuan ke ngatin ka thleng ta a nih chu. A lo danglam ngei mai an motor te chu buhdengkhawl a siam ang mai a ri hlut hlut mai a, an driver side pawh kan ram ang a ni lova, an sawi chu hre ve tawh ma hila TV ah te ram dang ho motor side a dang chu ka hre tho mahse keimah ngei mai in ka mita a hmuna kan hmu chu mak ka tihna a zual a, mi tam takin a hmun ngei a an la hmuh lo ka hmu tih ka in hre kar bawk a, ka vannei ka inti a, ka inti thei hle a ni.

Kan kal zel a, an kawng han laih duhdan te chu a mak hi kan ti khawp a, kan ram PWD ho chuan a zal thei ang ber leh a nuam tur khan kawng kha an zawng a ni ngai a, he ramah hi chuan anti ve lo tawp mai, a chho ngar ngar a, a mawi tawkah a kawi leh a, a chho leh ngar ngar a, a kawi leh a. A zigzag tluan parh a, mihring tan pawh kal a har khawpin ka hria, a zawl a nuam tih lam ai chuan a hnaih dan ber an ngaihtuah ni berin ka hria. An kawng kual laite chu han uluk ve deuh awma, kan rama bus te hi chu vawikhatah an kual zo dawn lo hrim hrim.

Kan kalna khua hi kan sawi zau law kanga, kan khua Khuangleng khua aṭanga chho kan unau te han sah/din a ni a, kan khaw pakhat angah kan ngai a ni. Mahse ram danga awm ta na na na chu a ram mi leh sa te an pem khawm ve bawk a, a tam zawk hi chu kan unau kan chipui Mizo diktak te an la ni hlawm a ni.

Khaw luh dawnah ralna kan khawn khawm a, chuan a hmunah a hlawmin an pe mai a, keini ṭhalai deuh ho chu kan kal darh a, mizo dil hmingthang leh lian ber RIHLIPUI THLAFAM LENG KAINA an tihna hmun lamah chuan kan kalphei a, a hmun pawh a nuam kher mai, a kamah Bar nuam em em mai an sa a, a chhungah chuan Zu chi tinreng mai alo intlar dul mai a, a hmuhnawm hi kati lo thei lo a ni zu tam deuh hmu ngaih hek lo i. A thenin an dawm karh karh a, a then in dil an cheng a, a then lawngah an chuang bawka, chawlhni e ti lo chuan engmah engto nei lovin ka zi mur mur mai a, kan leng suau suau mai a ni. Hei ngei hi alo nih dawn hi vanram tlafual lei Edenthar anlo tih ṭhin chu te kati ve ngawt a.

Mi chetla vel kan en hnu chuan ṭhian ṭhenkhat anlo kal a, kan lem ve dawn lawmni an tia, ka pawisa 30 aṭang khan 10 kha mitthi ralnaah ka hmang tawh sia ka va nei tlem tawh tak, mahse kan u khaw ṭhenawm ami kan hmu fuh a, kan dil tawp a, Myammar Rum cheng 60 man chu kan lei ve a, bar-ah chuan kan in chhawp ve ta ran mai a, eng ruihtheih thil mahin a ala tihbuai chhin loh kha Foreign tui sen chu kan lem ve ta pawp pawp mai a, zu ruih chu rin ai daihin alo nuam a, kan meng phet phet a, kan zang haih mai a, kan polite tawh em em mai ani. Chuan kum 2010 chawlhni hmasa ber chu foreign kal nan leh zu ruih nan ka hmang liam veta a ni.

ZIN VAWI HNIHNA

Tun ṭum chu a dan a dang ta, Sumo ah kan chuang ve tawh a, pawisa pawh 200 lai ka keng ve tawh, kan thleng a, motorin kan tlan tlang chho a, Rih Dill amah kan tlang nghal a, sa ei tur kan keng bawk a, tih tur dang vak a awm lo, dil kam vela mahni duh ang anga awm a, tlai a haw kha a ni mai. Hemi ni zet chu kal kan ṭha hnem ngei mai, motor pawh sawm chuang a awm in ka hria, Aizawl city bus te, MST te an ding fer fur a, school naupang te, collage zirlai te, Zoram hmun hrang hrang ami kan fuan khawm a, Saiha lam pang te kan han hmu chu mak ka ti letling zawk.

Beer leh zu kan han lam phawt a, Bar-ah pawh kan leng lo, a chhak deuhah chuan kan han buatsaih a, tui tel hauh lovin Burma Whiskey leh Beer kan pawlh tawp a, a tak ṭha duh cher cher khawp mai, no 3 chiah ka in ka rui em em ringawt mai a ni. Kan mi hmuh hmuh kha kan be vek tawh mai a, a then anlo chatthla a, Lawngah chuang ang kan tia, rui phur tawh nen a ṭhenin ka chuang ngam lo an tia, a ṭhenin kan chak zek zek tawh, Rih dil hi a zau khawp a, a chan ve lawng chuan nan pakhatin 20 chawi a ngaia, pariat chu kan chuangin ka hria, tui tlak palha in venna tur kawr an hak ṭhin kha kan ha ṭheuh a, kan chuang kual zel a, ka rui tawh nen ka hmu hnai tawh khawp mai, ka in hlip sawk sawk a, a chanve velah ka cheng dawn ka tia, zuan luh mai kan tum chu an phal lo tlang teh asin, i tla ang akamah i cheng dawn nia an tia.

Kan kal hmasak khan tui khaw vawi khatmah ka dai lova, tun ṭum zet chu cheng lova haw ka tum tawh lo hrim hrim. Kan kual chhuak ṭep tih ah chuan cheng tawh rawh le an tia, ka phur kher mai, lawng aṭang kan zuangthla pawp mai a, kan hleuh vel a, ka inti hleuh ve khawp mai, kan ding chiah chu ngal rek thleng chauhah ka lo hleuh ve barh barh chu niin, a engpawh nise a nuam hrim hrim e.

Haw a hun ṭep tawh ah zu hawn kan duh ve si a, Dil kamah a to si a, tiau kam ami lei turin kan tlan thla leh a motorin, kan kai hlawm bawk aniang kan chiar thla nawk nawk tawh, kan in lei liam liam a, kan tlan chho leh a, sipai duty na lo lamah kan hawng ta daih a, kan ram kan luh hnu lui kan thlen velah kan chawl a, kan in phih harh nak nak a, kan titi pawh a tui tlang khawp mai.

Khua kan han lut chu, kan han in en chiang a, ka zu lei ve kha a awm reng reng lo mai, ka earphone pawh benghnawhna lai takah abung ve ve a, ka tarmit pawh alo bo daih mai, cheng 200 ka keng a, cheng 700 man hu vel chu ka chan a, ka hlawk lo khawp mai.

Ti hian ka ngaihtuah a, MLTP Act kan nei a, zu chu kan nei reng tho va, Foreign ka zinna ah kha chuan engmah an khap lova, an ram mi leh sa rui buai leh rui hmuh tur an awm der silo, nitin sum tamtak an la lut hem hem a, a tam zawk chu kan ram aṭang leh nghal, Burma kan tia kan deuh ve em em a, Burma tui in chak leh duh in sum tam tak kan seng ral chu a ni ber e. Khap bur lo ila kan ramah misual Jail tan ngai kan tlem sawt anga, eng emaw kangah kan intodelh phah ve anga, Zu chhe ina thi kan tlem anga, sorkar hian dan mumal tak neiin rorel sela, chhiah ṭha takin an pe anga, zu avanga kan buai luih luihna hi kun 5-6 hnuah chuan changkang takin kan hman ve phah thei tho awm sia, keini mizo hnam fing leh hmasawn tak hian te ka ti vel ta mai mai a. Ka zu in duh leh chak vang hrim hrim lam nilovin, ka foreign ziina ah chuan zu an zuar tlep tuarh a, kan ram India Rum leh Whiskey te chenin an zuar a, lei turin a ruka kal ve kher a ngai lo, mahse keini ah chuan kan zo buh ngeia kan thlawr pawh a ruk aral a lei angaia, inti krist tak tak ho lahin misual tiin min la sawi zui vanduaina chi khat chu ava ni ve tak em te ka tia kei mimawl hian. Ka ngaihdan ve mai mai a nia, that ber phei zawng a tha ber chuang lo mai thei, ka vision ve mai mai.

Similar Posts:

• Hei le foreign
• Ka zin ve a…
• Mizoram zin leh Indian visa chungchang
• Mizo Chawhmeh Tenawm Ka Tih
• Ka Mittui A Tla Hial..

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Sunday, July 29th, 2012 at 3:00 am and is filed under HAHAHA. You can follow any responses to this entry through the RSS 2.0 feed. You can leave a response, or trackback from your own site.