mi(sual).com

(Hnam Sakhua bihchianna tih post chhan letna hi Naupang inhmuh khawmna kan buatsaih avangin kan rawn chhanglet thei lawk lo a, inmi ngaihdamna kan dil in, kan hman ve leh kan rawn chhanglet nghal e)

Hnam Sakhua bih chianna ka han hmu a, a rawn bih chiangtu hian a thu lakna pawh ‘An zirtirnate leh an chanchin,’ tih bua mi a ni a, kei pawhin kha lehkhabu kha ka lo chhiar ve tawh nghe nghe a ni. Amaherawh chu a bih chiangtu hian a thu lakna hi belh chian dawl leh innghahna tlak takah a ngai a ni chek ang a, a ring tawk hle ni tur a ni. Kha lehkhabu khan thil thenkhat chu a sawi dik viau laiin tuna Hnam Sakhua hi chu a bih chiang tawk lo hle niin a lang a, a tlangpui tal ka han hrihlfiah law law teh ang.

Kum 1978-ah khan Zorama Kristian Evangelist-hoin an Pathian thu hmuh kha khaw hrang hrangah an tlangaupui a, nimahsela an thu hmuh chu khatih hun laia Kohhranho chuan an Pathian thu hriat dan nen a inkalha an hriat avangin an kohhran atangin an hnawt chhuak ta hlawm a. Hetih lai huna an thu aupui thin tam tak chu tuna Kohhran mite hian an man thiamin an pawm thei leh deuh vek tawh a, tun ang huna Kohhran mite pawm dan hi khatih lai hunah khan lo pawm thei ni sela chuan an hnawh chhuahho pawh khan hnawh chhuah chu an tawk bik hauh lo ang. Nimahsela Pathian thil tum hi kan lo hre hauh lo mai a, Ani chuan Zoram mipuite’n an hnena Pathian inpuanna an kal pensanna lak ata hruai kir leh a tumna a lo ni tih reng tumahin an hre phak lo a, kan hre phak lo vek a ni.

Chuti chuan Kohhranhoin an rawih duh tak loh hote khan pawl an din a, ‘Mizoram Evangelical Association(MEA)’ an lo tih thin chu an din a, a hnu deuhah ‘Mizoram,’ tih chu ‘Mizo’ tiin an thlak leh a. Chu mi hnu chuan ‘MEA’ chu denomination hrana dingin ‘Lalchhungkua,’ an lo ti leh ta a ni. Amaherawh chu ni 12 Tauthla(April), kum 1986-ah khan Lalchhungkua chu pawl hniha lo inthenin a phel lehlam chu ‘Lalchhungkua’ an la invuah zel a, tunah chuan ‘Lalchhungkua-Unity,’ tih a lo ni ta a. A phel lehlam chu ‘Nunna Lalchhungkua,’ tih a lo ni ta bawk a ni. He Nunna Lalchhungkua hi a hnuah ‘Nunna Lalhnam,’ tia hriat a ni leh a ni.

Kan sawi tawh angin Zofate hi kan pi leh pute hun laia kan hnena Pathian rawn inpuanna kha kan lo phatsan a, ram dang mite sakhua kan lo biaksan ta a; chuta tanga min hruai chhuah leh hi Pathian thil tum a lo ni reng mai tih tuna ‘Nunna Lalhnam,’ tia hriat thin Hnam Sakhaw vuantute hian kan lo hre chhuak ta a ni. Chuvang chuan ‘Nunna Lalchhungkua’ tih emaw, ‘Nunna Lalhnam,’ tih emaw chu kan sakhaw hming a ni lo a, Zo hnam sakhaw vuantute inzawm khawmna hming chauh a ni e. Amaherawh chu ‘Zo hnam Sakhua’ vuantute kan nih rual rualin hman laia kan pi leh pute huna Pialral kaina turin Thangchhuah a ngai kher tihna a ni lo. Kan pi leh pute biak Chunga Pathian chuan Ama thlarau(Ama hnena mi) chu min pe a, chu thlarau chu thil siam engmah an la awm hma ata kan tana a ruat a ni tawh. Chu thlarau chuan bawhchhiatna a neih ve loh avangin thih hnuah pawh hrem hmunah a kal dawn lo a, Pathian hnenah a kal ang. Chu chu fiah takin kan hria a ni. Kan pi leh pute hunah khan an khawvel te a la zim a, an hriatna pawh a la zimin anni ang bawk hian eng hnam pawh hian pi leh pute hunah chuan an chim chin chu a la tawi vek ang tih hi hriat sa a ni. Chuti ang a nih avang chuan kan pi leh pute kha an chim chin ang anga an hriat thiam phak tawkin an hnenah Pathian chu inpuangin thu a hriattir a, tunah keini hnenah hian a aia fiah lehzualin min hriattir ta a ni. Mihring hian thih hnua hrem hmuna kal tur thlarau a ni emaw, ni lo emaw thlarau hi kan pianpui lo hrim hrim a, Pathian hnena mi, Pathian min pek chauh hi kan thlarau a ni.

‘Pi leh pute sakhua chu in duh ang anga her danglamin in be ve ta a ni maw?’ min ti a ni maithei. Kristiante pawh hian Kristianna hi an her danglam nasa hle mai a. Abrahama chuan a pa milem biak ang be ve duh loin engkim siamtu Pathian ‘Jehova’ chu a bia a; chu chu ‘Judaism,’ an lo tih taka hi a ni a. Isua hun laia Judate sakhaw biak dan kha Isuan duh loin a sawisel a, Judaism siam thatna hna a thawk a. Gautama chuan Hindu sakhua(Hinduism) siam thatna hna a thawk a, milem reng reng Pathian biaka biak a phal lo a; mahse a thih hnu chuan amah Gautama Budha lem an din a, an be ta mai a ni. Isua khan a hnena awm Pathian avangin thu mak tak takin a sawi a. Judate’n hre thiam loin mihring ni si Pathiana inruatah an puh a. Isua erawh chuan amaha Pathian awm reng zawk avangin Pathian thu a hmuh angin a sawi zawk thin. Ani Isua pawh hian milem biak te, mihring Pathiana biak te a remti miah lo. ‘Lalpa i Pathian chibai buk la, ama rawng chauh bawl rawh, tih ziak a ni e,’ ti tein a sawi a. ‘Leiah hian tumah “Ka Pa,” ti suh u, in Pa chu pakhat chauh a ni, vana mi khi,’ te pawh a tih kha. Nimahsela Kristiante chuan mihring Isua chu an be si.

‘An zirtirnate leh an chanchin’ bu chhiartu hian Hnam Sakhua vuantute mawng hlim hleah in lo ngai a nih chuan in ngaisual awm teh e. Kan mihrinna tisa taksa hi ‘Pathian a ni e’ kan ti hauh lo a, hmuh theih loh lamah Pathian kan nihna chu a awm a ni. Bible lo hi innghahna dang kan nei a, lehkha thuah kan innghat ve lo a, Amah Pathianah zawk kan innghat a ni. Bible hi pawm chin leh chin lo kan nei lo, kan sakhaw lehkhabu thianghlim zawng a ni ve lo alawm. Bible hi ‘Rinna leh thil tih tehna dik lo thei lo a ni,’ tih hi chu keini changin kan pawm lo a ni lo a, Mizo Kristian Pastor engemaw zat hian an pawm tawh lo tih in hre na nge? Kristian Kohhranho hian Bible pakhat intawm siin Bible atangin thurin an buatsaih a, an kohhran thurin nena inmil chin bak chu an duhna laiah an rek bung hmiah zel a, chuvang chuan kohhran dangte thurin nen a inmil tawh thin lo a, Kristian thurin theuh theuh hi a inkalh fur mai a ni. ‘Hlim sang’ hi chu kan hming a la ni ngai lo a, ‘van mi’ tih pawh hi kan hming chu a la ni chiah lo, mahse ‘Van mi’ pawh lo inti mah ila a dik lohna a awm chuang hlei nem. Tirhkoh Paula te paw’n, ‘Kan khawsakna chu vana ni a,’ an ti ve tho a. Tuna Hnam Sakhua hi Pathianin min hruai luh a tumna kha a ni a, nakin zelah pawh Zo sakhua tho hi kan nihna a ni ang.

Donald khan ‘thlarau nazawng an fiah lo a,’ min ti a ni maw? Kristiante hian thlarau engzat nge in neih a? Paula khan in Bible-ah khan, ‘Thlarau ngei chuan keimahni thlarau nen…’ te kha a ti a! Keini chuan thlarau pakhat chauh kan nei a, chu chu Pathianin ama thlarau min peka hi a ni a, fiah tham kan nei ve hlei nem. Pakhat chauh a ni a, kan mihrinna hi chuan a lo pian lai khan thlarau a pian chhuahpui ve lo a ni.

Irpa, min han bih chiang tak tak teh u; bih chian chu kan dawl mai thei, dawl lo mai thei e. Donald Zawhna 1-na atanga 4-na thleng hian a dik e.

Hindu philosophy hi chawk luh kan tum a ni hauh lo; Bhagvad gita hi kan hnam sakhaw lehkhabu a ni bawk hek lo a, a chhungah hian thu hlu tak tak chu a inziak alawm. Bible bu chhungah pawh hian thu hlu tak tak a inziak tih hi kan hai hauh lo. Hnam tinte hi Pathianin  thu(Pathian thu) a pe vek a, an hnenah a inpuang vek a, chu Pathian inpuanna chu mihringin ama duh dana a paih then emaw, a belhchhah emaw, a tihdanglam emaw chuan miin ‘Pathian hnen atanga ka dawn,’ ti mah sela, a inmil thei tawh thin lo a. Pathian hnen atanga an dawn dik tak kha chu mi hrang hrang hnena a inpuanna ni mah sela a inmil zel tho thin a ni. Entir nan Bible pawh hi a tirah chuan an ziak zawm put a, coma te, semi colon te engmah a awm lo. A hnuah ni awma an hriat dan ang angin an then hrang a, chu chu Sap tawngin an han letling a; an lehlin dan pawh a inang lo nuaih mai a. KJV te, ABS te, BSI adt. a hrang ta a ni. Tunah phei chuan Mizo tawng Bible pawh letlingtu mi hran hran an awm tawh a, an kohhran duh danin an letling zel hlawm a ni. Roman Catholic Kohhran pawhin an kohhran duh dana Mizo tawnga lehlin an tum ve mek ni awm tak a ni. ‘Biblues’ tih atangin ‘Bible’ an lo ti a, chu chu duh tawk loin ‘Holy Bible,’ an lo ti leh a; chu chu Mizo tawngin an han ziak leh a, ‘Pathian Lehkhabu Thianghlim,’ an han ti ta a ni a. Pathianin van atanga a rawn thlak chu a ni lo a, mihring ziak a ni tih kan hria a ni. 

Similar Posts:

• HNAM ROLUNG
• Hnam Sakhua: Ka chhiar ve e!
• Chungkhuanu (Pathian)
• MIZO SAKHAW BIAK DÂN LEH A TOBUL ~ 1
• Kristian sakhua leh Mizo hnam sakhua danglamna

Recent Posts:

• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!
• PI ZIRI A CHING EM NI?
• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.

This entry was posted on Friday, August 3rd, 2012 at 4:00 pm and is filed under Opinion, Religion. You can follow any responses to this entry through the RSS 2.0 feed. You can leave a response, or trackback from your own site.