Ka Zak Chem Chem!

August 7th, 2012 11:00 pm by Dr Mahminga Sailo

(Tunlai chu in inhnial reng bik a. Inchhiar zau ve tan lo chuan, in post/comment lo like leh ngawtbak tih theih ka nei si lo. Ka’n ho ve mai te’ng.. )

Ka chechhe ngai miah lo ti ngawt ila, tuma’n in awih dawn lova. Chetchhiatna tawk miah lo mihring an awm pawh ka ring hek lo. Chetchhiatna tlem te ka nei ve a, chu’ng zinga pahnih lek chu ka’n sawi mai mai ang e.

1. Kum 2007 kum tir khan North India khawpui thenkhat tlawh turin ka zirpui te nen kan zin a. Guwahati atang Bareilly (UP) kan pannaah, kan thiante zinga ningkhawng hre deuh leh Hindi thiam nal deuh chuan kan chaw ei tur an order a. Riltam hmel pen na ve tak thin ka nih avangin, station pakhat kan thlen chuan train chhunga eisiam ni miah lo chuan, mi a lo bum lek niin. Hei, in chaw order tiin min rawn pe ngawt a. Kei lah chuan ringhlel miah lo leh ngaihtuah chiang bawk lovin pariat kan nih thu ka hrilh a, chaw chu ka la ve mai bawk. Pawisa ka pe fel tihah kan chaw order tak tak chu a rawn thleng leh ta si!

Ka chaw lei chu ka’n ei a, a tui lo em em mai lehnghal. Thin a rim ruk nak alaiin, ka thiante lah chuan min nuih rawn ta hrep bawk si (thiante zinga naupang ber ka nih avangin mi hi an chhaih peih hrim hrim bawk a). Ka tlawmngaih fuhloh ber tum niin ka hria. Ngai teh! Kan zinpuite zingah khan * ve deuh ka nei lehnghal! Hnar a lian duh lawr lawr khawp mai..

2. Guwahati chirh dum uih hmen hmawn tak ka dai
Kum 2008 july thla khan, Delhi pan turin Guwahati-ah ni khat kan cham a. Kan thianpa leh kan thiannu nau, Delhi-a BBA zirlai tleirawl chhe lem lo tak nen tlai thim dawnah kan chhuak a. Guwahati khawpui kawngpui sira tuihawk luankawr an thenfai lai a nih avangin kawng sirah chirh uih tak tak, dum ngek nguk an chhungkhawm thluah a.

Tin heti hi a ni a, kea kalna (footpath)a kan zawh phei zel chuan, chirhdiak hel ngai a awm ta. Khua a thim deuh tawh bawk si, ka thian te chuan chirhdiak helna zawngin muang changin an kal a. Kei pek chu, nula hmuha chirhdiak han zuankan zauh zauh ka’n chak tlat pek a nih kha.

Tichuan le, vaivut ro niawma lang chu zuan thlen inring takin ka zuang phei auh a. Vaivut awzawng a ni lo! Chirhdiak dum-uih tha tak mai chungah chuan ka tum chat mai le. Ka chappal (fitness var sar mai kha) a pil thawih bakah, ka kekawr tlawn (track-pant) senlar ver vawr inches thum vel bawk thlengin chirhdiak a kai ta luai mai. Ka kalpuite’n min hmu chiah chu(h), eng dang an sawi thei lo, an nui dir char char. Min lainat bawk si, nuih erawh an insum thei ngang lo. Mittui tla phungin min nuih karah, za lo deuhin ka nui ve. An nuih a za reh deuh tihah, ka ke an han en a; a ngai te bawkin an nui leh thin, nuam lo ve tak a ni. Hnar hmu lawrh lawrh chungin ka nui a ni ber.

10 Responses to “Ka Zak Chem Chem!”

1
ɪ̣uɪ̣pnoɥ Says:
August 7th, 2012 at 11:08 pm
Chhiar phawt i1a.
Report this comment
2
H.Vangchhia Says:
August 7th, 2012 at 11:11 pm
Ka ek khamah ka rawn chhiar sak ang che
Report this comment
3
ɪ̣uɪ̣pnoɥ Says:
August 7th, 2012 at 11:14 pm
Ha ha ha!

Pakhatnaa i tawn ang deuh khi ka tawng ṭêp tawh, chaw rawn zuar ve ringawt khi.

Pawn lam miin pawr deuhvin rél chhungah châw a rawn zuar a, rél chawsiam pangngaihovin an hnek hrep! Vaiin mi a hnek tak taka an hnek ka vawi khat hmuhna! Ka khawngaih tak tak a aw! A ṭap hlei thei lo lehnghâl ha ha ha!

Pahnihna khi chu nula awma chêt pà i tum lutuk vàngah ka ngai a, ka khawngaih hran lo che
Report this comment
4
Ruata Pachuau Says:
August 7th, 2012 at 11:20 pm
“thiante zinga naupang ber ka nih avangin mi hi an chhaih peih hrim hrim bawk a”………Awihawm loh loh, thian te zinga bawl chi hi chu in awm ve hrim hrim a lawm.
Report this comment
5
Art-a Says:
August 7th, 2012 at 11:26 pm
Pakhatna khi chaw duh mi tak ka nih ve naah zia lo ka tih pui hle mai che

Pahnihna khi chu .. ih ih.. huat awih loh…. i toh eeee
Report this comment
6
H.Vangchhia Says:
August 7th, 2012 at 11:36 pm
Chaw chu tur a tello hlauh a i vannei a nih chu mawle hairehai.

Guwahati ah khan an film star/model lar tak ṭhin, Luna Lahkar kha Mizoram house ah a rawn leng a. Pu Andrew (Synod conference hall manager ṭhin) khan thla an lak zak zak hnuah rui tawkin zu dang lam turin ka chhuah pui a, ka ṭha tawh viau mai lehnghal a, a tukah a zah zia thu min hrilh. Kar hmasa mai khan fiamthu-in kan sawi chhuak dun a, ka la zak reng tih ka inhre chhuak hairehai
Report this comment
7
lushai_er Says:
August 8th, 2012 at 1:17 am
#Khawpakhatah mikhualna-ah chaw kan ei laiin fian pakhat chauh kha a awm si a, kan ban dawn a, midangin min lo ban khalh a…ka zak chem chem

#Chutiang deuh bawkin Chaltlangah milian inah chaw kan ei a, an dawhkan chawhmeh dahna lai kha a vir thei a, chawhmeh ka suah lai khan dawhkan kha an tuai vir ta mai si a; fian kha ka lek kang ta reng mai a, ka zak chem chem …
Report this comment
8
Dr Mahminga Sailo Says:
August 8th, 2012 at 9:07 am
@ ɪ̣uɪ̣pnoɥ … Chu chu alawm, chaw min lo pek lah khan, kan order sa min pe ang mai khan a rawn ti ve thlap bawk si a…

@ Ruata Pachuau… A dik (hmel) viau bawk si…

@ Art-a… Pahnihna khi ka inkhawngaih zawk asin! Mizoram house ka pan vang vang a, ka silfai fe hnuah pawh, ngaih a tha tak tak thei lo…

@ H.Vangchhia… Ka thianpa pakhat rui tawh siin, Hijra a vin vak kha min ti hrechhuak… Rs. 10 a pe a, Rs. kir turin a duh si. Hijra pahnihin Rs. 5 kir tur an zawng nasa teh asin…

@ lushai_er… Chaw einaah hian, chetsual a awl bik riauvin ka hria. Zah deuh te bula kil ve phei chuan…
Report this comment
9
sheldon Says:
August 8th, 2012 at 11:50 am
Kei chu ka la che chhe lo reng reng…hahaha
Report this comment
10
Dr Mahminga Sailo Says:
August 8th, 2012 at 1:01 pm
@ sheldon.. Ka awih leuu.. ka chetchhiatna awm chhun ka rawn tarlang mai mai alawm..
Report this comment