Ni 27, Pawltlak thla, 1991 a lo nih meuh chuan Chhanchhuahnakhawpui enkawla luahtu turin Lalhnam Sipai lâkna chu zan dar 7:00 atanging hming inziah luh tan a ni ta a, mi 22 an inziak lut nghal a. A hun lai na na na kha chuan Nunna Lalhnam tlangval ve lêm, Lalhnam Sipai han nih loh bik kha kan tum lo tlang hle a ni ang; Sipai pawh kan pung chak reng a ni. Hun a kal leh deuh a, kar lohah buh tin 70 hmun lai mai lo chu kan vat zo ta mai a.
Tin, kan sawi hmaih hauh loh tur chu kan hruaitute rilruah chuan kan khaw din chu Sakhaw hmun thianghlim, ruihtheihthilin a tihbuai loh leh nungcha zalenna hmun a nih tur thu an puan thin chu a taka a lo hlawhtlin theihna turin ni 7, Ramtuk thla, 1991 zanah zûk leh hmuam, ruihtheihthil reng reng leh nungcha tihhlumna hmanrua ang chi reng reng chu vawm khawmin hâlral a ni ta a ni.
Tichuan, hun a kal leh deuh a, ni 10, Ramtuk thla, 1991-ah chuan Zoram hmun hrang hranga Nunna Lalhnam thalai nula leh tlangval, Lalhnam Sipai tur zawngin Puithiam Rorelliana hoin feh chhuah leh a ni a, Ni 12 Ramtukthla 1991-ah Rawpuichhip atanga tanin mi 7 ngawt mai ziah luh nghal an ni a.
Tv. Liantea(tuna pu ni ta, Lalhnam Sikul zirtirtu ni mek hi) ho a hlo râl kan han nuai thei tur chu a thlamuanthlak teh a sin! A ni kha a hmel en aiin a rorum hrep leh nghal a. Tichuan ram pumah Lalhnam Sipai tur zawngin Ramtukthla chhung zawng chu Puithiam Rorêlliana hoin hun kan hmang a ni ber mai.
Ni 25, Ramtukthla, 1991 a Pasaltha Lalchangliana( Puithiam ni ta) te khua Khanpui kan lut chu thu mak tak maiin min dêng ta tlat mai a, awih mai pawh har kan ti hle. Mizoram Police ten Chhanchhuahnakhawpui lama kan hruaitu awmte Pasaltha Lalramzauva te, Pu Chawngchhuana(tuna Kolasiba awm ta) te, Tv. Malsawmate ho chu man an tum a lo ni a. Chu thil avang chuan Chhanchhuahnakhawpui lamah Pasaltha Lalchangliana leh a thuihhruai hote pawh an lo liam thla a lo ni a. Ani(Pu Changa), pa tuantha tih takah a rang a rangin a lo ving thla ther ther mai a lo ni a.
Tichuan, keini pawh kan tih tur angte kan tih fel veleh kan Pasalthate ngaihven turin a rang a rangin Khawruhlian lam kan pan nghal a. Khawruhlian kan pan hmain MAP patrol duty haw lam Gypsy nen kan intawk hlauh a, kan hotute’n chanchin an han zawh chian chuan in lama hlau leh khura hun hmang mek tura kan ngaih Pu Chawngchhuana leh a hote nem tha taka an inthlah thu kan hria a, kan ngaihtuah hman tehreng nen kan hlimpui ta zêk zawk a.
Amah Pu Chawngchhuana phei chuan, ” An zing ami tumah khan boxing-ah min cho lo a, boxing ring an han hmuh khan an zâm ta mai niin kan hria,” a ti. Mizoram Police-te thil rawn hriat duh hi tih awm rêng pawh niin a lang. Sipai tur lak tâk mup mup mai chu, kan ralthuamte pawh min chindarh sak nasa hle a, mahse kan ralthuam chhêk khawlte an hmuh chuan helna lam paw chhuak tur hmel an hmu lo a ni ang.
Nula leh tlangval rual, Lalhnam sipai rual chenna tur a ni bawk a, hmunhma buatsaihin kan hmanhlel tlang hle hlawm thin a. Hah pawh sawi thei loin infiamna hmun tur Volleyball Court, boxing ring(phulraw phela siam) leh thil dang eng eng emaw te buatsaih a ni a, duhthusam chuan inpeih hmanlo mah ila mi sawm vel bawr ni khat thawh atan chuan kan duhtawk ve hle tho mai.
Ni 1, Vauthla, 1991 a lo inherchhuah meuh chuan Lalhnam Sipaia tang turte Zoram khaw hrang hrang atangin Khawruhlian(tamtak phei chuan a hming pawh an la hriat ngai loh) lam panin an rawn fuan khawm ta a. Hetih hunlai hian hmar tlangdung lamah lirthei tlan la tam hek lo, buai fe fe an tam kher mai. Zan dar 7:00 ah Khawruhlian Indoor Stadium-ah nula tlangval rual mi 72 zet lo kalkhawmte chu hming chhiar chhuahnate neih fel vek a nih hnuah Puithiam Rorelliana chuan thuchah sawi pahin kan hun hman chhoh dan tur pawh felfai takin a sawi a, chuti ang chuan chumi ni chu hun hman a ni.
Ni 2, Vauthla, 1991 zing dar5 velah Val upa Ngûrthanchhînga leh Nl. Vanhmingi(fam) te nen lo zuk kal hmasain thngchhuah luiah kan lo awm a, pawlin a duhloh thilte keng lut palh an awm leh awmloh endik tura ruat kan nih angin mi chi hrang hrang lokalte chu uluk takin kan lo dndik zel a. Lawmawm ve hrim hrim chu Valzaia(aieng zuar) in a ran vulh lai khawmin arbawm a rawn kawt lawih mai a, amah lah feet4 awrh a sang a ni bawk si a, a buai ve hle a ni. Tlai lam dar2 velah kan inendik fela, kan haw chho ta a, chawn a na duh hle mai.
Chhanchhuahnakhawpui lo vah hi kawng dung km2 a ni a, lo mawng atangin lo lu hi 800mtr vel a ni bawk a, ni 3, Tau thla, 1991 a lo inherchhuak leh ta, zingkarah volleyball te kan beng a. Tukthuan eikham dâr 10 velah khatih hunlaia Ramrorelkhawl Chairman Pu C.Lalhnuna, Chaltlang, kaihhruainain hunserh hman a ni a, Lalhnam Sipai thisena hming nem ni chu Puithiam Rorelliana chuan Pasalthate; Lalchangliana, Lalhmunsiama, Vulmawia, Rohlua, Lalnunsanga, Lalramzauva leh Lalbiakzauva te chu thisen an kutphaha nem hnanin a hlan diat diat a. Chumi zawhah pasalthate chuan Generalte; Vanlalsiama, Ramdinmawia, Lalduhkima, Lalnunthari leh V.L.Hmunluahpuia te an hlan ve leh a.
Similar Posts:
- Lalhnam sipai leh chhanchhuahnakhawpui – part-4
- Lalhnam Sipai leh Chhanchhuahnakhawpui part-2
- Lalhnam Sipai leh Chhanchhuahnakhawpui – Part-1
- Lalhnam ka hmuh ve dan/lalhnam sikul-ah ka kal ve a….!
- ‘Remna’ Palai Bâwngte
August 10th, 2012 at 2:19 pm
Post chhiar loa comment ka’n chhiar vak vak chu le
Report this comment
August 10th, 2012 at 2:21 pm
Misual.com ah hian comment close hi a theih emawnile part 4 ah hian a in closed tlat mai a enge a chhan ni ang aw
Report this comment
August 10th, 2012 at 2:23 pm
cove-te..first kan chang teh ang chuti..
Report this comment
August 10th, 2012 at 2:38 pm
Post schedule tu in a lo close palh a nih hmel, admin discussion forum ah comment a close na chhan engmah a rawn sawi si lova. Comment ka rawn hawng e pu covenanter.
Report this comment
August 10th, 2012 at 2:40 pm
Nupui pasal hmu zo mai lo turte pawhin nupui pasal kan nei ta nawk mai a……….
Report this comment