Rev. Dr. Zairema’n KTP General Conference 1961-ah, “Cachar phaiah hian kan piputen milu an lak zah tal hian Chanchintha avanga nun chan huam ila, hruaitu emaw zuitu emaw nih ka huam,” a tih thu chuan thalaite rilru a khawih hle a. Hmarthlang Presbyterian (NWP) KTP Mualvum Conference, 1961 chuan phaituala rammut thu a rel ta a.
A hmun atan chuan Bengkhuaia pasaltha hovin British mi Winchester-a an thah a, a fanu Mary an man na hmun Alexandrapur, Chalmara thingpui huan tlang ngei ni se. A hun atan kum 92-na champha 23rd Jan, 1963 zing dar 8:00 ni se tih chu kan lungrual he a. A thupuiah, “Thisen Phuba Chanchin Thaa Rulh” emaw “Thihna Hmunah Nunna” emaw “Sual Thupha Chawina” tihte sawi a ni a. Thalaite rilruah Vaiho zinga sual thupha chawi chak lohna a awm deuh nge ? “Alexandrapur Rammut Vawi Hnihna” i ti phawt ang tih a ni ta a.
Pastor Zairema, Silchar-a Missionary-a awm chu kan dawr a, min phurpui thiam hle mai a. Ram enthithlai tur, Chalmara leh Kristian unaute dawr bawk turin mi 5, 30 Nov 1962-ah Upa Tluanga, Upa Enga, Pu Saikhuma, Tv.Thanglura (MCS ni ta) leh Tv. Laldailova (Doctor ni ta) te kan tir a. Chalmara te, Rev. Luka te, Hachhek tlang dung KTP te an lo phur em m mai a. Winchester-a an thahna tlngah Bengali putar deuh maiin a hruai a. An thah dan leh Mizo Pasalthain serthlum kung behchhana a kahna sertlum kung tar deuhte a kawhhmuha. Winchester-a tlukna lai a tihah chuan bawkkhupin an tawngtai a. “Kan tap nasa theuh mai,” an ti.
Committee-in “Winchester-a thahna tlangah kum 92 Champhaah Halleluia Chorus kan sa ngei tur a ni. Za rual talin zir ni se,” a tih avangin Tv.Rualchhinga, Durtlangin a hruai a. Branch tinah kan zir bawk a, sum kan tuak theuh bawk a. Tichuan theih ang tawka inbuatsaihna chu a lo kim thawkhat a. A hun leh ni pawh a lo thleng dawn ta a.
Chawlhni 20th Jan 1963-ah Diakkawn Biak Ina min thlah turin Missionary upa ber J.M. Lloyd-a leh Pastor upa ber Rev. Liangkhaia leh Central KTP hruaitute sawm an ni a. Aizawl nula leh tlangval eng emaw zat an lo chhuak a, Diakkawn Biak Inah Pu Lloyd-a chuan, “Nunrawnna thiltih a tawp ta a. Chanchin Tha puanna hun tha a ni. Thihna hmunah Nunna zuk thlen ngei ang che u,” tiin min chah a. Pastor Liangkhaia chuan, “Thalai Pawl ten hetiang tihna chang an hriat chuan, keini hranghluite awm lo mah ila, kan Zoram Kohhran zawng a din ngheh theih tawh dawn hi,” tiin min fuih a.
Kan thawmhnaw te tel felin 21st Jan Thawhtan zingah Kolasib dai Project Vengah kan innghakkhawm a. Kan zinga upa ber ve ve Pastor Liangkhaia leh Pu Khanpuia, ringtu nih vanga Lalzika sawisak leh hnawhchhuah ve vein tawngtaiin min thlah a.
Tichuan a nawlpui ber mi 500 dawn lai chu kan chhuak ta a. Khawpui nula tlangval mahni thawhnaw leh mutbu ak a, ni 2 lai thingtlang kawng mel 50 vel kal tur pawh chu an zam lo hle mai a.
Tuichhuahen lui kan kan a, thinglubul tlang kan lawn liam a, Saihapui kan kan a, Dairep tlang kan lawn liam leh a. Kalapahar bulthut Lalramthar (Tuikuk khua) kan thleng a, Bairabi-ah eirawng min lo bawlsak a, kan riak ta a. Zing 6:30-ah Biak Inah inserhna inkhawm kan nei a. Chaw kan ei a, kan inthen ta a.
Saitluang zawh zelin ramri hrulah kan innghakkhawm a. Tlang ram mel 3 vel kan kal hnuin Gharmurra phai chu kan thleng a. Phaizawl kan kaltlang hnuin Tlawng lui kan theng a, Lawngin kan inthiar kai a, Gharmurra Bazarah kan chawl a. Thingpui dawra ei tur awm zawng zawng kan ei zo vek mai a. Barkataki, Commissioner leh a hote an lo thleng ve a. Chawhnu lamah Bus awm zawngin Alexandrapur panin min hruai a, a hnuhnung ber chu khawvar dawnah kan thleng a.
Hetah hian vai ringtute leh Hachhek tlang dung thalaite’n eirawng an lo bawl a, mi 807 kan thleng tawh a. Pastor leh Missionary 13 an tel bawk a. Bengali Kristian leh Hachhek tlang dung Kristianten Thingpui huan neitu Pu Chalmara hovin min lo hmuak a. Pu Chalmara kudam leh buh in te ruakin buhpawl an lo phah a, in pangngaia leng rual kan ni si lo va.
Winchester-a thah ni leh hmun champhaah chuan zing dar 8 velah kan kawi chho ta nguai nguai mai a. Mi 807 kan ni tawh a, a thlirtu mipui an pungkhawm bawk a. Bangla hmun hluiah chuan bungbel kehte an lo dahkhawm a. Tlang pawng nuam tak chu an lo sam fai a, an sam faiah chuan kan leng lo hle a.
Kan han inrem fel a, Tv Lalzarliana, Secy CKTP-in Bible chang Matthaia 28:18-20 chhiarin min hruai a, “Tuh hma kum 92-ah khan kan pi pu ten mi tam tak an that a, salah an hruai bawk a. Vawiin ni ang leh hmunah hian Winchester-a an that a, a fanu Zoluti salah an man a. Tunah chuan chutiang chu kan duh tawh lo va. Mi nunna lak chu chatuan nunnaa rulh leh kan tum a ni. A thlawnin kan hmu a, a thlawn vekin pek kan tum,” a ti a
Rev.Zairema’n Sam 103, 106, leh II Korinth 5 chhiarin a tawngtai a. Tawngtaina Rev.Thanfianga leh Upa Nandi-a ten an hmang a. Chutah Halleluia Chorus, nula – tlangval 100 rual zetin an han sa a. Pu Rualchhinga’n thangte atangin a hruai a- “Khawvel ram zawng zawng hi chatuanin, Kan Lalpa leh a Krista lalna ram a lo ni si” an han tih lai te chuan lungchhe mittui nen a tam berin kan ngaithla a. Pu Lloyd-a pawhin a hnuah, “Handel-a’n he hla a phuah laia zel anga awm ang kha niin ka inhria,” a ti hial .
Chutah kan zavaiin tawngtai rualna kan nei a, mahni tawng theuhin, Pu Lloyd-a pawh Welsh tawngin a tawngtai ring hle. A lungchhe hle niin ka hria, Upa Hmangaiha’n a ti. A tawpah Kan Missionary Rev.Lloyd-an malsawmnain min tin a. Ngui nghuaiin tlang pang kawng kawiah kan chhuk thla duah duah a………..!
[He post hi Alexandrapur Rammut Vawi Hnihna, Pu V.L.Nghaka lehkhabu Sakawrhmuituai liam Lalram ka zinna tih atanga kaih tawi a ni]
Similar Posts:
- Hachhek Constituency Development Committee din
- Embed map in a blog post
- (Sunday Pual) Lalpa lo kal a hnai ta
- Mizoram Lower Primary Exam hmasaber kha
- Mission Veng
August 11th, 2012 at 9:13 am
ka chhiar zuai zuai a, a ngaihnawm e. Ka save ang. Thil hi in hre tha thei bik eee..
Report this comment
August 11th, 2012 at 9:13 am
ka chhiar zuai zuai a, a ngaihnawm e. Ka save ang. Thil hi in hre tha thei bik e
Report this comment
August 11th, 2012 at 10:22 am
A ngaihnawm hle mai.
Report this comment
August 11th, 2012 at 10:25 am
4th phawt teh ang?
Report this comment
August 11th, 2012 at 10:59 am
A ropui hle mai. Hetiang hi thar thawh leh se, eng pawh huama kal peih an la tam ang em le????
Report this comment
August 11th, 2012 at 11:15 am
Rin loh lam daih zuak nia…!
Report this comment
August 11th, 2012 at 11:23 am
Zonet.in hi luh ka tum a, hei hi a lo inziak
https://img842.imageshack.us/im.....tantim.png
Report this comment
August 11th, 2012 at 11:32 am
A va ropui ve, hriatreng tlak anih hi..
Report this comment
August 11th, 2012 at 11:33 am
a ngaihnawm thei e…@ Post tu nu..
Report this comment
August 11th, 2012 at 11:48 am
He programme-ah hian ka pa kha a kal ve a, a chanchin min hrilh ve zeuh zeuh thin.
He an tawngtaina hmunah hian tum hnih chu tawngtai turin ka kal ve tawh a, a hmuna zu tawngtai kha kan chak ve tlat bawk si a..thenkhat tan chuan a ho awm mang e.
Tunah chuan khang lai kang khan kal a harsa tawh lo va, Garmurra lam kawngah khuan kal ila..kolasib atang darkar 2 leh a chanve bawr vel chauh kal a ni ta. By sumo.
Upa Hmangaiha hming a rawn lang zawk a, a chanchin hi ziah hluai tham a awm maw le, mi titi thiam lawt lak a ni. A makpa Pu Khenglawta khan cassette hnih a nei. Billy Graham-a chibai teuh phei kha chu a ngaihnawm hle. A thusawi pakhat ka hriat reng chu a Bawngpa that zia sawina “kawtkaiah kan han thlung tum bar mai chu, ka Bawng a ni na vang vangin ka awt khawp mai” zu ti a.
A Jail tan lai te, a chanchin a sawi hrim hrim hi a ngaihnawm a, hemi tum pawh hian vawikhata an kal nghel vek theih loh avangin a hnuhnung pawlah Upa Hmangaiha hi an sdah a, an ning lo reng reng..Mutbu remthuah chungah an thuttir a, a titi tak tak chu darkar hi a liam zung zung mai an tia lawm.
Ka peih leh a thusawi tlem ka la post ve ang.
Report this comment
August 11th, 2012 at 12:15 pm
Pu Vakul:
A ngaihnawm hle mai. Ngaihtuahna tha tak tak min siam e.
Thenkhatte chuan tullo an ti leh ngawt anga sin. ‘Khu lai vela zu kal ai chuan mi rethei tanpui rawh se’ tih lam rawngkai deuhin an lo ti leh khar khar mai ang…
Report this comment
August 11th, 2012 at 1:37 pm
#9 : Post-tu nu chu an ti lo deuh ang a
Lalhnam ho pawh hian Pathian an nih te, Kumsang Lalram te an hriat phahna kha a ni a, John Winchester hi lo that ta lo se…Lushai Expedition kha a awm awm si lo va…
MIzoram buai 1966 kha lo awm ta lo se…..Mizoram hi a nuam awm mange(D)
Report this comment
August 11th, 2012 at 1:42 pm
Mizo ten Chanchintha hrilh duhna tak tak thinlung kan put tanna tak tak kha he movement atanga intan hi a ni thei mai lo maw? 1930s velah pawh khan ramchhunga chakma leh Bru te zingah chuan kan thawk lauh lau na chungin, a siruklaa rampawn lama fehchhuah duhna thinlung min puttirtu pawimawh tak chu a niin ka hria. Good Post
Report this comment
August 11th, 2012 at 1:45 pm
An zing inkhawm zawh hian ka rek bung ta mai a, chhun lam inkhawm leh zan lam inkhawm sermon vel pawh a tui zual tan chuan a la awm teuh va……comment dan a zirin peih leh kan rawn chhunzawm ang.
Btw, “Halleluia Chorus” hi chu a mawi ka ti ve khawp mai, mi 100 rual vel chuan an sa mawi khawp ang. Gospel Centenary khan mi 1000 velin an sa bawk an ti em ni kha ?
Report this comment
August 11th, 2012 at 1:45 pm
Pu Vakul., pu hmangaiha chanchin chu nghakhlel takin kn lo thlir ange
Report this comment
August 11th, 2012 at 1:52 pm
@Vakul : Pu Khenglawta[L] fapa te nen hian naupan lai atangin kan inkawm thin a, a (Pu Hmangaiha) fapa cowboy-a kha live-a hmuh hian a chanchin an sawi nen hian a inhmeh lo ka ti khawp mai…! Zanlawn khua a an vanglai kha rawn post teh, kan lo ngaichang e
Report this comment
August 11th, 2012 at 1:57 pm
He post hi Kohhran Chanchinbu atan ka lo la chhawng ve teh ang aw. Post tu hian rem i tih chuan??
Report this comment
August 11th, 2012 at 2:23 pm
# 17 : Phal te chu phal teh reng mai !!!! Ka duh lai lai ka lawr khawm a ni a, Kohhran Chanchinbu atan meuh chuan ka va sit ve; a original hi ka scan anga ka rawn thawn zawk ang che chu…?
Report this comment
August 11th, 2012 at 2:34 pm
@Charice : email ila chhang lo…!
Report this comment
August 11th, 2012 at 2:46 pm
Hetiang lam hi chhiar a nuam duh viau. A lunglenthlak riau in ka hre thin…lungleng mi tih tak ah.
Report this comment
August 11th, 2012 at 2:51 pm
Chhang tawh!
Report this comment
August 11th, 2012 at 3:28 pm
ngaihnawm reuh ve..
Report this comment
August 11th, 2012 at 5:27 pm
lushai_er, i rawn kawnṭi ṭha thei hle mai. A bung hmawk reuh pek a a dang chhiar zel a van chakawm ve aw!
Report this comment
August 11th, 2012 at 5:41 pm
A va ngaihnawm ve…!! mi a fan ngaih ngaih mai…..a dang pawh part twoah beisei ila…
mahse a tawp dan hi…ngui nghuai tih tak hi..a happy ending lo tlats!!
Report this comment
August 11th, 2012 at 6:04 pm
lushai…zanlawna a mi lian hmuh kha an sawi i hre tawh
collect ka lo tum ang.
Report this comment
August 11th, 2012 at 10:29 pm
A va tha ve a. Hetiang hi rawn tizel teh. Pu lushai_er hi ka ngaihsanna a rei ta mange.
Report this comment
August 13th, 2012 at 12:42 pm
ka hman ve deuh ta, comment char char dawn
Report this comment