mi(sual).com

Tlawmngaihna chungchang hi a awmzia leh nihphung chu kan hre tlangpui hlawm anga, midangte tana mahni nun pekna, a let leh beisei lova midang tana inpekna ti ten kan sawi fiah thin. Hei bakah hian Tlawmngaihna hian awmze ril tak a la nei fo mai. Huaisenna te, chhelna te, chakna, hmangaihna te hi Tlawmngaihna hian a keng tel vek bawk. Mi Tlawmngai ni tur chuan dawihzep a rem lova, mi der dep leh duap tak tak tan chuan Tlawmngaih tak tak pawh hi thil harsa tak a ni a, Tlawmngai ni thei ni thei tur chuan rilru leh taksa hrisel neih hi thil pawimawh em em mai a ni a. Hei vang hian mi tlawmngaih kan tih te hi an ropui em em a ni.

Tunlai thangtharte nunah hian Tlawmngaihna a tlak hniam tawh thu sawi a ni fo thin a.Chutiang chu lo nita sela, nih leh engvanga kan Hnam ro pawimawh berte zinga mi Tlawmngaihna nun chu lo tlahniam ta zel nge tih hi kan hriat a, chu mi hriatna chuan engtinnge Tlawmngaihna tluchhe zel tur chu kan tun din leh theih ang tih hi thil pawimawh ber mai chu a ni ta. Doctor tan pawh damlo natna hre lova, damdawi lo rin chawh ve ngawt chu a dik lovin, dam lo tan damna a ni kher awm lo ve. Hetiang bawk hian, thangtharte nunah Tlawmngaihna a thlak hniam tawh thu te, an nu leh pa, pi leh pu te hunlaia a an Tlawmngaihna kha an phak tawh loh zia te hi thangtharte hnenah sawi vak vak thin mah ila, awmzia a neih thui kher hi a rinawm lem loh a ni.

Tlawmngaihna dalna chhan pakhat chu kan ‘nihna’ hi a ni awm e. A bikin kan Politics khelh dan hian kan Tlawmngaihna hi nasa takin a tidal kan ti thei ang. Hman lai kan pi leh pute Lal rorelna hnuaia an kun lai leh a hnu deuh a thleng kha chuan thalaite nunah Tlawmngaihna hi an nunpui tha em em thin a. Hei hi a chhan chu thalai tlawmngaite kha chu an dah sangin an chawimawi thiam hle thin vang a ni. Tunlai hunah erawh hi chuan tlawmngaite tan tlawmngaih hi thil chakawm lutuk a ni thei meuh ta lo. Kan Politics khelh dan hian thangtharte nunah nasa takin a chhe zawngin nghawng a nei a. Tlangval tlawmngai tak leh fel tak mai, mitthi lumen tlaivar leh thlan laih ni a theihtawp chhuaha inpe thin pawh lo awm se, kan Party a nih ve miau loh chuan induhsak tak tak harsa ka ti fo thin. Hei bakah hian Tlawmngaihna tichuai tu chu kan ‘nihna’ hrang hrang, sum leh pai dinhmun te, Kohhran lawina ah etc., te hian kawng tam takin Tlawmngaihna vul zelna tur ah kawng nasa takin kawng a dal thin bawk a ni.

Awle, tlawmngaihna hi a nihphung kan sawi dan ang hian ropui hle mahse a nihna ang a, a taka lanchhuah tir tur meuh chuan thil harsa tak a nihna chen a awm lo thei lo a ni. Phut let nei miah lova tlawmngaihna lan chhuahtir theih chu mi tam ber tan chuan thil harsa tak a ni ngei ang a, han indem theih em em pawh a ni lo. Kan Pasaltha hmingthang khuancher a pawh khan tihian a tih kha, “Mangan leh thlaphan niin, in lam leh ram lamah Khuangchera ka ni a, induhsak niin Khuangchera ka ni leh silova, ui beh mi ka ni love”, tiin an khua a pemsan phah hial a nih kha maw.

Ringtu tha em em te tan chuan he thu ‘thil tha tih chu kan awmna tura Pathianin a lo buatsaih lawk a ni’ tih atang chuan thil theih a nihna chu a awm mah na le. Chuvangin ‘Beisei let miah lo’ han tih ngawt mai hi chu Tlawmngaihna sawifiah nan chuan a dik hlel deuh ang ?. In duhsak theihna laiah chuan kan in hriat ve thin hi thil tul tak mai pawh a ni reng a ni. Lal Isua pawn chatuan nunna kan neih theih nana a nun min pekna hi ngai hlu a, fak turin min duhin min phut a sin. A phu te tan chuan fakna hi kan ui tur a ni lo. ChuvanginTlawmngaihna mawi taka par tir tur chuan a titu leh a lo dawngsawngtu te hian mawhphurhna kan nei ve ve a ni tih hi kan hriat theuh a tul awm e.

Similar Posts:

• Tlawmngaihna, kan chhuang ‘over’ em?
• Tlawmngaihna hi a tlahniam em?
• Hai ang tho r’u “Tlawmngai Val rual”
• Chawimawi duh Tlawmngaihna
• Tlawmngaihna

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, August 16th, 2012 at 12:17 pm and is filed under Mizo Society & Culture, More than words. You can follow any responses to this entry through the RSS 2.0 feed. You can leave a response, or trackback from your own site.