Thingbuk Hnuaia’n Kan Inkhawm

September 18th, 2012 3:00 pm by Dr Mahminga Sailo

(Post chi a ni ang em? tia rilru a inkhap chungin; pawi ka sawi lem lo’ng chu tiin, ka post ta mai)

Thinlung entu
Kristian te’n kan ngaihpawimawh em em; ziaktu leh thuhriltu thenkhat phei chuan, incheina atana mawi ber chu thinlung thianghlim a ni an ti thin a ni lo’m ni? Nia, kan sual tlan tura Isua Krista khawvela a lenlai pawh khan, pawnlam landan aiin, rilru chhungril a ngaihpawimawh vang a ni ngei ang; a sawilang chamchi a, Pharisai leh Sadukai te khan an haw reng a nih kha.

Kan nihna angin min pawm
A lawmawm asin. Keini ang te hi, pian leh hmel that avanga phak ang tawka Pathian rawngbawla tura thlan tur ni ila, kan va tling lo nasa dawn em! Mahse, khawngaihnaa min chhandama, khawngaihna veka a hnung kan zuina tura min hruaitu kan Pathian hian, kan nihna ang anga min pawm avangin, a hming fak lo thei kan ni lo. Halleluiah Amen!

Thingbuk hnuaia inkhawm
Tahrikni 16, September, 2012 Pathian ni chawhma khan, kan lawina kohhran thalai hruaitute tawiawmin, Dr. Ambedkar’s Institute of Technology, Bangalore-a Mizo zirlaite inkhawm kan va hmanpui a. He inkhawm hian min hnehin rilru a tithar ngei mai.

Bangalore khawpui lun lai atang inkhalh chhuakin, kawng kan bo fe hnuah; Aizawl khawpuia Bethlehem vengthlang, an tih ang hial tura penhlehah chuan ka scooty hmanthiam nen ngei, ka thiante bike changkang tak tak zuiin kan tlan ve dat dat a. Rin aiin a hla daih mai ti rilru chungin in hlui tawh tak kawta, thingkung lian tak tak pahnih a lo zar duaina hmu chu kan thleng ta a. Kawtzawl thingbuk hlim hnuaiah chuan, Engineer zirlai, Mizo nula leh tlangval te chu Pathian faka inkhawm nei turin an lo thukhawm thap a.

Mi thenkhat inla fekfawn deuh chuan, zirlai nula leh tlangvalte inthuamna chu an ngaimawhin, an sawisel duh mai thei. An remchan ang angin, kekawrbul leh T-shirt nena inthuamin, Pathian fak hla sain an lo zai dal dal a. Inthuamna zahawm ka sel lova, chutih rualin, incheina dik thinlung thianghlim pu lova, Pathian bia kan tam tawhzia te ngaihtuah chuan, nula leh tlangval inthuamna chuan rilru a la peng lova; Pathian faka inkhawm duhna thinglung an nei kha an incheina dik tak zawk niin ka hre ve tlat.

Hun kan hmang chho zel a, thuintawm (sharing) kan han nei chhova. An rilrua an veite leh an tawnhriat te an sawi diat diat a. Inkhawm a khamawm loh ngei mai.

Tihian ka ngaihtuah ta a…
Mi tlemte suahsual rawng lo bawl avanga India ram khawpui hrang hranga Mizo emaw hmarchhak mi anga kan hmingchhe leh thin hi a pawi thin. Chutih rualin, phaia mizo awm tam zawk erawh, theihtawk leh hman hun huna kohhran leh khawtlang tana thahnemngai a, hunawl an neih a Pathian biak inkhawm ngaipawimawh mi an ni tih hi i hriatsak ang u.

Dr. AIT zirlaite hi, tunhnaia ka tlawh te an nih avangin ka sawi lang mai chauh a ni a. An awmna a hlat em em lai hian, Mizo Biak Ina zirlai inkhawm tawk an awm ve reng bawk a. Mizo khawtlang thiltihah pawh mi tangkai leh tlawmngai tak tak an thahnem khawp mai. Tin, college danga Mizote pawh fakawm tak tak leh, zirlai belhchian dawl tak tak an awm teuh mai.

Chuvangin, kan thian thenkhatte lo chet khawloh hlek emaw avanga phaia awm him lo leh sual rawngbawlna ringawt kan sawi chiam thin hi ngaihtuah chiang fo ila. Mizoramah kohhran leh khawtlang tana mifel leh chhenfakawm an awm a, misual buru tak tak an awm ang thovin, ram danga Mizo te pawh hi kan ni e tih kan hriat hnu mah ni se, ka’n sawi lang ve leh a ni e.

“Thiltha ti atan a siama awmin,
Ama kutchhuak kan ni si a;
Chu thiltha tih chu kan awmna tura,
Lalpa’n a buatsaih a ni”

“Dr. AIT, Mizo Zirlaite nen”

15 Responses to “Thingbuk Hnuaia’n Kan Inkhawm”

1
Chhuaklinga Says:
September 18th, 2012 at 3:15 pm
Chaw1h manah ni1engin ka on1ine dawn takngia1, chhiar i1a out phawt ang.
tren tren
Report this comment
2
Chhuaklinga Says:
September 18th, 2012 at 3:30 pm
Chanchin chhiar nuam tak a ni e.

Pathian biakna kawnga incheina kan ngai pawimawh lutuk hi chu a over deuh chu a ni. Felfai pangai taka inthuam hi a tawk mai reng a ni.

Hla chang tlar tawp – “Lalpa’n a buatsaih lawk a ni” (inthlahrung)

Khiangkawi ipte ak khian lan that a tum hmel e. (out nghal vang vang)

tren tren
Report this comment
3
Dr Mahminga Sailo Says:
September 18th, 2012 at 3:44 pm
Comment hmasa ber chu, a va’n ziak ler reuh eee…

@ Chhuaklinga.. A ni zawk tak, ka lawm e..
Admin zahawm tak te hian, khawngaihin min siamthat sak se ka va ti em…
Report this comment
4
Awmtea Khiangte Says:
September 18th, 2012 at 4:03 pm
A van tha tehlul em! Post chhuah loh theih loh chi a nih zawk hi.
Nimahsela, a thupui “Thingbuk hnuai’n kan Inkhawm” tih a, ‘hnuai’n’ tih tak khi ka hrethiam chiah lo. ‘Hnuai atan’ tih kaihtawi a ni awm si a..
Report this comment
5
Dr Mahminga Sailo Says:
September 18th, 2012 at 5:03 pm
@ Awmtea.., hnuaia’n tih khi hnuaiah khan tihna emaw a nih hmel. Ka chiang ngam bik lo na’ngin, thu leh hla thenkhatah ka hmu zauh zauh a..

Ka zal ta’ng e, piallei thim hnuaia’n
Turnipui hrang hnuaia’n
Report this comment
6
Amah Charice_mizo Says:
September 18th, 2012 at 5:34 pm
Van ziak tha ve aw…mizoram thalai tam tak ai hian phaia awm zirlai Pathian ngaihsak leh inkhawm taima zawk hi an tam ania. kan campus ah pawh hian CF hnam hrang hrang inkhawm sunday ah kan nei thina, open air ah, thing hlimah kan thu ve thap thin, thlawhna alo thlawk zing angreng si a, thusawitu tan a buaithlak tep thin. Mahse open air-a inkhawm chu thinlung lam hi a thawveng halh maia, nuam dangdai tak a ni.
Report this comment
7
Awmtea Khiangte Says:
September 18th, 2012 at 5:38 pm
A ni thei tho mai maw
Report this comment
8
Dr Mahminga Sailo Says:
September 18th, 2012 at 5:45 pm
# 4…

@ Awmtea.. i comment khi ka tangkaipui khawp. Hnuaia’n tih thumal hi ka hmu/hre tawh thin a, mahse ka chiang lutuk bik lova. Ka’n google zauh a, Pu Rokunga hla ka’n hmu fuh hlauh mai a. A din thei tho ang chu ka ti ta mai…
Report this comment
9
levodopa Says:
September 18th, 2012 at 6:26 pm
Dr. AIT zirlaite hi an fakawm e…he an inkhawmna hmunah ngei hian ka lo inkhawmpui ve tawh a, khawlum hnuaiah thahnem ngai takin an lo kalkhawm a, an chanchin kimchang theuh hrelo mah ila, Pathian chibai buk tura Mizo zirlaite an pungkhawm hmuh kha a nuam hle mai
Report this comment
10
saint sammoo Says:
September 18th, 2012 at 6:58 pm
Hnuaia’n tih chu a dik lohna a awm lem love.. mahse thuziak thupui a tan chuan hnuaiah tih ka thlang..
Report this comment
11
Dr Mahminga Sailo Says:
September 18th, 2012 at 9:24 pm
# 10.. I’n sawi takah chuan, a dik hmel zawk riau…
Report this comment
12
PKfanai Says:
September 18th, 2012 at 9:56 pm
Sual kan tih hi a tawng bul lama chhui chuan, ‘Tum thelh’ tihna ani awm e. Phaia kristian thalai tum thelh duai ho chanchin chhiar thin hian lung a tizing thin a, mahse hetiang a, kristian thalaite nih dan tur dik taka khawsa chanchin han chhiar thin hian, min ti hahdam sawng sawng thin a ni.
Report this comment
13
H.Vangchhia Says:
September 18th, 2012 at 9:57 pm
#12, a dik hmel hle mai
Report this comment
14
chhangteval Says:
September 19th, 2012 at 12:24 am

Report this comment
15
Jacka Pi Says:
September 19th, 2012 at 4:10 am
Zing thingpui in tawh mai teh ang
Report this comment