mi(sual).com

Vanneihthlak takin Aizawl atanga hla vak lovah sawrkar hna ka hmu ve hlauh mai a. Hna sang tak tia han sawi tur chu ni lo mahse, a hming chuan ‘Officer’ intih ve theih tur hi a ni a. Ka lawm hle. Chu khuaah chuan chhungkhat laina hnai nei lo mah ila a chengte an felin nuam ka ti hle a. Kohhran leh khawtlanghah pawh ka phak tawk in ka inhmang ve a. Thalai thil tih khawmnaah pawh hruaituten ‘Ani hi chu chhuah awih miah a ni lovang, kan nulate khan lo hre r’u..’ an tifiamthu fo thin a. Fiamthu mahnise inhmuh len phah nan hman a awl duh khawp mai.

Kum lamah kan naupang chhe zawk zawk tawh lo a ni tih hmel atangin a lang reng a, hna ka nei tawh bawk a, nupui neih chu ka hmabak ni tawh maiin ka hria a. Chawlhni tlai khat chu thalai fellowship banah ka thiannuin an ina thingpui in turin min sawm a. Tahchuan, a thiannu ‘Mapui’ a tih chu a awm ve a, min han inhmelhriattir a. Mapui chu keimah ang thova hnathawka rawn awm hlim hlawt a ni a. A nu nen sawrkar in luahin an khawsa a. Thian kawm tur ala neih vak loh thu te, a la tlang nel loh thu te pawh a sawi luam a. A tawngkam a fel faiin, nula inringtawk tak, hawi zau ve thawkhat a ni tih a hriat a. A hmel leh a pianzia pawh, Pathianin Adam hnena Evi a hruai a, Adama’n, “Hei zet chu(h)…”a ti heu ang mai kha’n ka rilru te tein ‘Hei zet chu(h)! chawlhni tuka fate thawhlawm semtu atan a iaiawm hauh lo mai’ ’ka ti neuh neuh a.

Hun leh ni a liam a. Mapui nen chuan kan inkawm fova, an inah pawh ka leng lut zing hle a. Hmangaihna chung chang pawh kan sawi ri ta zauh zauhva, ka hmuh tirh atanga ka rilru a luah zia thute pawh ka han tihrik zauh kha. ‘Zanin chu va leng ila, hmangaih biahthu hlan ve phawng mai teh ang’ tiin ka inkhalh chhuak a.

Nula fing leh fel, puitling tak a ni ka tih tawh kha. Hringnun hi a zir thiam a, a nun a tlang a, thil reng reng hi chhanah ala thiam khawp mai. Tleirawl lai anga ngaihzawng neih mai mai a hun tawh loh thu te, tunlai mipate chu ‘In duh hunah inti huam a, inhmuh hnuhnun apiang in hmangaih thei zel a lawm’ a ti a.  Kei chuan, ‘Tunlai mipa chutiang an nih chuan keichu ka tunlai lo hle a nih chu..’ ka ti fiamthu a. Kan nui dun hawk hawk a. Keipaw’n chhungkaw din ka duh tawh thu te, puitling taka damchhung kawppui tur ka thlan fel a tul tawh thu te chu inringtawk tak, zam ru deuh si hian ka han hrilh ve niah niah a. Ka sawi zo chu,  kan mit leh kan mit a intawng fuh a, ‘serious’ tih hriat fahran hian rei lote chhung chu kan ngawi dun vang vang a.  Chutah zawitein a kut no tak mai chu.. (ehem!) Nghet takin ka vuana, hun engnge chen chu he lei anchhedawng hi damlai pialralah kan chantir ta a ni.

Chuta tang chuan kan inzui chawt hi a ni ber mai a. Duh ber tawn takah chuan ka thian te pawh ka thlauhthla tana, ka chhungte ngei pawh ka theihnghilh chang a tam khawp mai. Chawlh remchang a, mahni inpui lama haw ai chuan Mapui bula awm chu ka thlahlel zawka, a kianga awm chu ka ning lo a ni ber e.

Thlabi hlawh nei ve ve, chhungte bula khawsa lo ta chu nun a zalenin hmangaihna kawng pawh chintawk zawh thiam a har thin khawp mai. Kei ka parawl a, ani pawh a nuin a awmpui theih reng loh hunte a awm ve bawk a. Remchangah thian hnaite sawmin chaw eikhawmte pawh kan buatsaih fo thin a. Chuta tang chuan zu pawh ka tem ve ta zauh zauh a, Mapui pawh phai lam chhuak a lo ni ve bawk a, eng teh chiamah a ngai lem lova. Mite hriat lohvin kan pahnih chauhvin kan ‘kerh kerh’ dun fo ta mai a.

Tuk khat chu a pu a dam loh thu leh a kal mai pawh a hlauhthawnawm thu te, a rang lama haw a ngaih thu a rawn sawi a. Kei chuan pawi ka tih thu leh ka lo tawngtaipui tur thuin ka thlahliam a. A hnu lawkah a pu thih thu leh a la cham rih deuh tur thu a rawn sawi a.

A hmel hmu lova han awm chu hrehawm ka tiin ka ngai thei hle a. Nitin maiin a lo haw hun tur ka thlir a, ka rin ai takin a cham rei ta phian a. Tin, chanchin pawh a rawn sawi khat ta hle mai. Ka ngaih a tha vak lova. Zan khat chu va biak ka tum a, waiting-ah alo awm a, a hnu rei vak lovah ka han tum leh a, mahse a ngai ang bawkin waiting! Chutia vawi thum vawi li vel ka han tum pawh chuan a la ‘waiting’ reng thova. “Biak tur pawimawh dang a nei ani ang e’ tiin mut ka tum thu ka ‘text’ a, mut zai ka rel ta a.

Ka mu chu ka muhil thei ta reng reng lo mai. Ka ngaihtuahna a kal thuiin, ‘Vawi thum vawi li vel ka phone chung pawhin a ‘busy’reng si a, eng thil nge thleng ta ang’ tiin ka ngaihtuahna chu a kal ngut ngut a.  Chutah zan rei deuh tawh mahse, ka han call leh reng reng teh ang ka ti a ka va call leh ta a. Ngaiteh, a ngai bawkin a phone chu ala busy char char a. Chutah zet zawng , patling thinin a tuar ta lova, ka insawh a, thlantui fimin min bual ta bat bat mai. Ngaihtha taka awm mai mai chi a ni ta awkawng lo mai le.

A tuk zingah chuan ka be tlang thei hram a.

“’Ngati nge nizan?”

“A… ka thianpa nen kan inbia a..”

“Tu I thianpa maw?”

“Hmana, naupantet atanga inkawm thin kan ni a, ka childhood friend a nia….’’

‘Chu pawh nise…..”ka ti hluk a

Chutah ani chuan, “Thinrimna tur a awm em ni?” ati a

 Keichuan, “chu bak bak” ka ti a, phone ka dah nghal a.

Chuta tang chuan chanchin kan inhrilh khat ta hle mai a, a hmaa ka ngaihthat loh rukna pawh kha atakin a lo thleng taah ka ngai a. Ka bing mup mup a. A hnu kar khatnaah chuan a rawn haw a. Ka biak paw’n tawngkam rul tawk chauhvin min chhang ang, sms pawh arawn chhang ngai ta meuh lo.  Chutia chiang lo taka awm ai chuan, sawi fel law law ang tiin an in lam ka pan a. Phone in ka bia a, a mut tawh thu leh zan danga lo kal turin min hrilh a. Ka inkhalh haw leh ta a. Ka mut hmunah chuan ka inngaihtuah a, “Mipa ka nia, officer ka ni a, ani lo pawh hmeichhe dang an tam em, then hlen hmak ang” tiin ka infuih sauh sauh a.

Rei tak kan lo inzui ve tawh a, innei tura palai hial tirh pawh kan duh rum rum tawh kha a ni a. Mahse, engkim a danglam zo ta. Khawvel hi ka tan chuan anchhedawng a va’n ni chiang tak em! Mapui theihnghilhturin ka hun leh nite hman ka tuma, mahse ka thei si lo. Khaw’nge….Zu leh sa lamah tiin tlan ka tum a , mahse thui ka kal ngam bawk si lo; tunhma min lo ngai zawng ve em em thin tute kha ka han be ve leh a, mahse, ka rilru la peng thei reng an awm bawk si lo.  Ka mangang a, ka thinlung a rum a, hmangaihna chuan nasa takin min hliam mek a ni.

Inriinni tlai a ni a, chutia mangang tak leh tanpuitu mamawh ngawih ngawiha ka awm lai chuan, ka thianpain min rawn be pawp hlauh mai a. Ka chanchin ka hrilh a, ani chuan alo hrethiam hle mai. A lo tawn ve tawh  thu leh chuta tanga a talchhuah dan ngaihnawm takin a sawi a. Pathian a hnaih tak thu te,mihring hmangaihna chuan tawpchin a neih thu te, Pathian hmangaihna chuan englai pawhin, kan sual lai ber paw’n min la hmangaih reng a ni, tih thute a rawn sawi a. Nula leh tlangval kara hmangaihna pawh  hi Pathian a tel loh chuan a tawpah mualphona leh ser nung a siam a, doral a chang leh mai thin. Mapui nena kan inkar chin fel hmasak ai chuan Pathian nena kan inkar chin fel hmasak phawt a tul  thu te, kan sualte sima a hnen kan pan chuan min la ngaidam duh a, hmangaihnain min la kuangkuah thei reng a ni, tih thu a rawn sawi a. Chu chuan ka thinlung a hnehin thuk takin thu a sawi a.

Tawngtai inkhawm  zan a ni a,  rilru khingbai takin biakin lam ka pan a. “ Lalpa, Lei malsawmna tam takin min vur a, officer hna hial min pe a. Mite awt lo leh mite awh ni hial zawkin min siam a, nun duhawm tak min pe! Mahse, he’ng zawng zawng hi nangmah theihnghilh nan ka lo hmang a, ka duh zawngin ka tlan a, ngaihzawng ka nei a, ka rilru zawng zawng chutah chuan ka pe a. I tan hmun reng a awm ve lo. Mite mit hmuhah alang amawiin I rawng ka bawl a, lang thei lo lamah erawh nangmah zahna leh tihna reng ka nei si lo.  I chungah thil ka tisual a, ka nun hi ka ten a, ka inhaw ngawih ngawih a ni. Belh tur dang ka nei tawh lova, I hmangaihna chauh lo chu innghahna tur ka nei love.  Ka sualte simin I khawngaihna leh I hmangaihna chang leh turin I hnen ka rawn pan e…” tiin mittui tla zawih zawih ka inhlan ta a.

Chuta tang chuan ka nun pawh chu a hlim chhova, Mapui vanga ka rilru natna te pawh chuan zawi zawiin min kiansan a. Ka tan khawvel hi a mawi thar leh a, nun hian awmzia a nei thar lehin ka hria a. A lang a mawi chauhva rawng ka lo bawl thin te, Mihringte hmangaihna derdepzia te, Pathian hmangaihna ka ngaihzawngah ka hralh tak pawizia te leh chuti chung pawha A hmangaihna ala kang lo ani tih hmangaihna atang veka min hriattir leh chu mak ka ti a.  Hmangaihna phena hmangaihna thuk tak mai chu benga hriatna mai ni lovin a takin ka hmu ve ta a ni.

Similar Posts:

• Hmangaihna
• Nu Hmangaihna
• Hmangaihna 131
• Hmangaihna hi enge a awmzia dik tak?
• Khawinge Hmangaihna zawk niang le?

Recent Posts:

• RIP lushai_er
• Kolasib tuilut an lut
• JANUARY 2016, MIZO(RAM) DIARY
• KAN EK IN
• PATHIAN THU ZIR HI I UAR TEH ANG U

This entry was posted on Wednesday, October 3rd, 2012 at 6:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.