Thuhawnna
Pathian thu kan lak dan leh kan pawm dan te hi in-ang lo ţhin mahse, a chang chuan thil chiang tak, kan pawm tlan leh dik kan tih tlan hi chu a awm a. Kan pawm duh leh duh lohva a innghat ţhin. Helai kan thu khel tur “Pathian hrin chuan thil a tisual thei lo” (1 John 3:9) tih pawh hi, a sawi tum dik tak chu, “Piangthar dik tak chuan thil a tisual-lui thei lo” a tihna a ni tih kan chiang tlang awm e. He thuziak hi i chhiar zawh hunah chuan i thlarau dinhmun dik tak chu i inhrechiang hle tawh tuarah ka beisei a. Chuvangin, i dinhmun kha insiam ţhat i ngai a nih chuan tawi-khaw-muang lova insiam ţha vat turin ka sawm nghal che a ni.
An Va Tisual Thin Si Ve?
Lal Solomona aţangin ţan ta ila. Solomona khan Pathian lakah thil ava tisual nasa si ve!? Hnamdang-mi nupui-ah nei lo turin Pathianin thu a pe mawlh mawlh a. Pathian thupek bawhchhia-in nupui a nei teuh si!? Solomona nupui chungchang hi Bible scholar ţhenkhat-ten an chhui danah chuan, Solomona khan, hnamdang-mi nupuia a neihna chhan kha a Pathian-thu riauvin an chhui tlat pek!
Solomona rilru leh tumdan (heart & motive)-ah chuan, hnamdang-mi nupuia a neih chuan, Jehova betu an pung ang a ( a nupuite hi Jehova a biak-tir theih a in-ring a ni). Hei bakah hian Pathian thupek (chi tam tak thlah tura thupek) tih-hlawhtlin nan, Israel mi chithlah pawh a neih phah ţeuh a beisei bawk a ni, an ti. Mahse, hmeichhia hi sual tura thlêmna lam kawngah hi chuan an Pi Evi kha an an lo chhun fuh khawp a, Solomona pawh a ţang zo ta ngang lo a ni e an ti!
Theologian pakhat chuan, “Satan most powerful weapons are – Women, Money and Power” a ti a. Setana hian heng hmanrua-te hi a hmang tangkai hle mai. Rawngbawltu duhawm tak tak-te chu Lalna, Thuneihna leh Lârna (power/popularity) lakah an tlawm tawh a. Hengte hmanga a hneh theih loh te hi, Pawisa leh khawvel thila nawmsakna (money/pleasure) hian a hneh leh ngei ţhin a. Lalna, thuneihna, lârna, pawisa leh nawmsakna-in a tih-tlawm theih loh-te chu Hmeichhia (sex/hmeichhiat-mipatna) hmang hian a ti-tlawm leh ngei ngei ţhin. A pawiin a rapthlak hle. He Setana thangah hian Mizoram-a Rawngbawltu duhawm tak tak engzat tak awk tawh ang maw?
Bible scholar ţhenkhat chuan, Lal Davida pawh kha, thil tisual tur hrim hrim-in Uria nupui kha a zawngin a melh lo, an ti tlat! Uria nupui zawk hian, Lal Davida inchung zawla a len hun (timing) a hria a, Davida ît (thlêm) tur hrim hrim khan inchung zawlah inbualna tui a han siamtir kher e, an ti! Hei hi history lamah a chiang viau a ni awm e. Palestine ram khu a lum êm êm a, inchung zawla tlai lama han inbualna chi a ni love an ti! Uria nupui zawk hian Davida hi hmanraw chikim hmangin thlêm-thluk ngei tumin a bei niin an ngai a ni. Daih mai a! Kha daih kha asin!
Amaherawhchu, Pathian rilru ang pu mihring Davida chu loh-theih-loh thila suala tlu pawh nise, Sual ngaizam thei lo Pathian chuan a hrem ta tho a nih kha. Bible-ah hian Davida chanchin a thlur bing avangin, Davida hi thil tisualtu berah alang deuh zawk niin alang. Hetianga tuemaw chanchin thlur bing hi Bible ziak dan kalhmang deuh pawh a ni hrim hrim. Pathian chuan kan rilru leh thil tum (heart & motive) hi a hrechiang khawp a, Davida leh Solomona chungchangah pawh hian hei hian awmzia a nei thui hle a ni.
Solomona leh Davida mai pawh ni lovin, Jona pawh khan Pathian thu meuh hnial-in tlanchhiatsan mahse, Jona rilru leh thiltum (heart & motive) kha Pathianin a hmuh tlat avangin Pathianin a ţhut-chilh a, a la thlêm ţang ţang a nih kha. Jona khan Ninevi khuaa kal a duhlohna chhan bulpui ber chu, Pathian nung Jehova hmusit em em-tu leh diriam em em-tu, a hnam thlan Israel mite pawh tiduhdah em em-tu Ninevi khaw mipuite kha (Pathian a lainatna thinlung aţangin) an sual man hmu ngei se, Pathianin Ninevi khua kha hrem ngei se a duh a ni. Hei hi kan rilru ţheuh pawh a ni awm e. Mahse, Pathianin Jona mithmuh lai ngeia Ninevi khuaa mite hrem kha a hun a la ti lo mai chauh a ni.
A Ţawngkam Hi Kan Hrechiang Lo Emni?
Helai thu, “Thil A Tisual Thei Lo” (cannot go on sinning) tih lai tak hi zirchian deuh a ngai a, Mizo-ţawng hian a fun-famkim zan lo deuh niin alang. Lo phelh darh dawn chhin teh ang. Helai thu, “tisual” (to sin) tih lai tak hi, Greek. hamartanō a hmang a. Hamartanō hi a grammatically chuan (a ţawngţial-in) “present active infinitive” a ni a. Hei hian a sawi tum chu, “thil tih lai ti-chhunzawm reng” (implying continued action) tihna a ni.
Grk. hamartō hian, “thil tih lai, a khat tawka ti chhunzawm reng” a sawi avang hian, thil sual tih, ngaia nei a, a khat tawk emaw, zing deuh emaw-a tisual chhunzawm reng (practice or habit of sinning or habitual sin) chungchang a sawi a. Thilsual tih chu a nunphung pangngai (sin as a life style) ang maiin a nei tawh a, a nun-ah a bet tlat tawh tihna a nih chu!
Pathian thu hian a sawichiang viau, “Piangthar dik tak, ringtu dik tak chuan, a duh reng vang emaw, a châk reng vang emaw, tum reng vang emaw ni lovin, Pathian lakah thil tisual ţhin mahse, thil sual a ni tih hre reng chungin, châk takin, duh reng vang leh tum sa ranin thil a ti sual-lui thei lo hrim hrim a ni” a ti (1Joh.3:6, 10). Thil a tih-sual luih theih lohna chhan pawh “Pathian chi” (Thlarau Thianghlim) amah-a a chen tlat vang a ni a ti bawk (1Joh.3:9, 5:11-12, Joh.15:4, 1Pet.1:23, 2Pet.1:4).
Tum Reng Vanga Sual-lui Chu…Setana Fa?
1Johana 3:1-5-ah chuan, Piangthar dik tak-te chungchang a sawi a. Ringtu dik takin, tum reng vang ni lo (un-intentionally) leh duh reng vang ni lo (un-willingly)-in thil a tisual thei a, Pathian hnenah ngaihdam dil a, a inthen-thianghlim zel a pawimawh thu a sawi tawh a (cf.1Joh.1:8). 1Johana 5:18-ah phei chuan, Piangthar-te dinhmun ngheh zia leh ropui zia a rawn sawichiang lehzual a. Piangthar dik tak-te chu, anmahni-a cheng Thlarau Thianghlim-in a hum tlat a, Setana hian thil tisual lui turin emaw, Pathian duhloh zawng ti turin emaw a ti-luiin, a thunun thei lo mai ni lovin, thil tisual-lui tur hian Setana hian ringtu dik tak-te hi a hnaih ngam lova, khawih pawh a khawih (force/control) thei lo hrim hrim a ti a nih chu!
Helai “misual chuan tawh pawh a tawk thei lo” tih hi Greek. haptetai hman a ni a. A awmzia chu “thih ngam khawpa hliam tuar” tihna a ni. Ringtu dik tak-te chu, Setana hian harsatna (khawsak dinhmun danglam vek khawpin) leh lungngaihna (lusûnna leh khawharna) hrang hrang hmangin nâ takin min khawih-in, min hliam ţhin mah sela, thihna khawpin (kan chhandamna bo khawp leh Pathian nen-a kan inzawmna chhe khawpin) min khawih thei lo, hlauh pawh kan hlau tur a ni lo, tih hi Pathian thu nung ding reng chu a ni (Joh.14:27, 16:33).
1Johana 3:6-ah chuan, Setana fa chungchang a sawi thung a. Mi tupawhin, tum reng vang te, châk reng vang te, duh reng vang te-a thil a tisual lui ţhin a nih chuan chu mi chuan Pathian nen inzawmna a nei lova, Pathian fa ni lovin Setana fa a ni zawk tih chiang takin a sawi a. Piangthar (Pathian fa) anga a lo inchhal ve a nih pawhin, “thil tisual chuan amah chu a hmu lova, hriat pawh a hre hek lo” a ti tawp mai a. Hre reng chunga châk taka, duh vang reng leh tum vang reng a, thil tisual lui chu, piangthar angin inngai mahse Pathian nen hian an la intawk lo hrim hrim a, Pathian pawh tunge a nih a hre lo, a ti hial a nih chu! 1Johana 3:10-ah phei chuan, hetiang mi hi chu Setana fa an nih thu chiang takin a sawi ta a! Setana fa ni ta na na na chu ahringtupa Setana chuan thilsual ti turin duh duh-in, a duh hun hunah, a duh dan dan-in a thunun ţhin a nih pawhin thil mak a ni lo reng a ni!
Bible scholar-te chuan, Davida leh Solomona khan rilru-a sual tum sa leh, thilsual tih tum lawk êm êm-in thil an ti lova, an thil tihsual kha Pathian pawhin a ngaihnathiamna chhan leh an thlarau nun (chhandamna) a khawih pawi lohna chhan chu ‘tum reng vang leh duh reng vang leh châk tak leh inbuatsaih lawk sa thlap-in thil an tisual lui lo tih a hria a ni’ an ti! Pathianin a hmanzui zel dan leh an chungchang thu-a a thiltih aţang hian Davida leh Solomona khan Pathian ngaihdam theih-loh-sual chu an lo khawih lo tih a chiang a ni (Pathian meuhvin a ngaihdam theih loh sual hi remchang dangah la khel leh ila).
Piangthar Dik Tak I Ni Chiah Em?
Paula chuan, “Rinna-ah chuan in awm emaw, nangmahni ngei inchhin ţhin ula, nangmahni ngei in fiah ţhin rawh u. A nih loh leh, nangmahniah Isua Krista chu a awm tih nangmahni ngeiin in hre fiah lo vem ni? Duhloh in nih nghal loh chuan” (2Kor.13:5) a ti a. Pathianin a hnawl tawh (Setana leh Vantirhkoh sualte, etc.) kan la nih loh avangin, tunah hian Pathianin kan dinhmun in enfiah turin khawngaih chunga khawngaih leh chhawnna hun min hawnsakah ngai ila. Thlarau lama kan dinhmun dik tak hi mahni ngei hian kan lo hrefiah thei ber a ni tih Bible hian min hrilh chiang hle a ni.
Pawnlam aţanga midangten min hmuh dan leh min hriat dan chu a chiang lo thei ţhin a ni tih hei hian a tifiah nghal a. Pawnlam-a thlarau-mi êm êm anga lang, chhungril nun belhchian dawl lo tak te a awm theih a. Pawnlam lan dan-a berh tak, dawrawm tak, mahse chhungril lamah chuan thlarau lama hausa ru êm êm, Pathian nen-a thûk taka inpâwl ru reng si te pawh a awm theih a ni. Piangthar (ringtu) tia kan sawi hian, Piangthar dik tak, ringtu dik tak kan sawina a ni. Chuvangin, kan dinhmun ţheuh in enfiah ila, in-siamţhat kan ngai a nih chuan i in-siam ţha thuai ang u.
Tlangkawmna
Lalpa chhiahhlawh Mosia te, Joba leh Davida-te kha an tum reng vang te, an châk reng vang leh an duh reng vang-te in thil an tisual-lui lova, Setana pawhin a thunun-in a tilui (control & force) thei lo hrim hrim bawk. Piangthar dik tak chuan, tum reng vang (intentionally) emaw, hre reng chung leh duh reng vang emaw, châk êm êm vang (knowingly & willingly) emaw, remruat sa thlap chungin hreh miah lovin thil a tisual-lui thei lo hrim hrim. Hriatloh vang te, vanduai vangte-a bum thlûk a ni emaw, tum reng vang ni hauh lova beisei loh deuhva thil a tisual-palh a nih pawhin a tih-sualna ngaiah a ti-sual nawn thei lo hrim hrim bawk ang. Hei hi ringtu dik tak zia (true nature of truly born-again believer) a ni. “Piangthar dik tak, Pathian fa ka ni” tiin i thinlung chhungril ber aţangin i sawi thei em le?
Similar Posts:
- Heroda Khan A Tisual Lo {Sunday Pual}
- Natna hi sual a ni em?
- Pathian hian mi zawng zawng nun dan tur hi a hre lawk vek ang em?
- Isua Thlahtu Davida Hi Tu Davida Ber Kha Nge?
- Setana Thlêmna Thang Hlauhawm Ber 3
October 14th, 2012 at 6:39 am
Buai chung chungin kan first lawk
Report this comment
October 14th, 2012 at 7:38 am
a van tha teh lul em,pu dingte,nge ni leh ang maw ka lo ti a
Report this comment
October 14th, 2012 at 7:45 am
Pathianni hman nuam ule
Report this comment
October 14th, 2012 at 8:35 am
2
Report this comment
October 14th, 2012 at 8:37 am
4na ka ni reng sia,lol
Report this comment
October 14th, 2012 at 8:42 am
Excellent post.
Sunday hman nuam vek ule.
Report this comment
October 14th, 2012 at 9:41 am
Helai thu hi a rilin a thlamuan thlak si a. Ka rilrua a chian ang hian ka sawifiah thiam tawk si lo va. I rawn sawifiah chiang tha kher mai. A lawmawm tak meuh mai. Piangthar dik tak hian sual han tih palh leh zeuh te chu k(an) nei ang. Mahse, amaha Thlarau Thianghlim awm khan nuam a ti lo va, inchhirna a pe thin a, a tih chhunzawm duh ngai lo a ni. Piangthar inti si, sual tih inthiam lohna nei miah lo, lawm leh nuam ti taka tih chhunzawm pat mai chu, a lo Piangthar tak tak lo a ni mai thei a ni. Niminah All Arunachal Private Schools Association 7th General Conference kan thleng a. Vawiin lamah NERIST ah thu ka sawi dawn bawk si a, Sunday pual pawh, Dr.John hi ka ring rih ta mai. Ka hman leh zan lamah NERIST a ka thusawi tlangpui ka rawn paws dawn nia.
Report this comment
October 14th, 2012 at 9:45 am
Report this comment
October 14th, 2012 at 9:49 am
Mual-za kar dana thawnthu ka’n chhiar hrep le!
Report this comment
October 14th, 2012 at 9:58 am
A ngaihnawm hle mai, Dr John nge nge..!!
Ni e, helai thu hian Pathian thu hi chhiar liam puata hriatthiam chi a nih loh zia leh tihtakzeta zir ngai a nihzia a tichiang khawpin ka hria. Greek continuous present form hian vawikhat thil tih emaw sual eng emaw bik chungchang sawina a ni lo tih a ti chiang a, habitual attitude lam a hawi a ni.
A pawimawh lai ber zawk nia ka ngaih i rawn tarlang lo erawh hi chu mihring perspective atanga i rawn thlur deuh vangah ka’n ngai deuh ngawt a. Pathian hrin chuan thil a tisual thin lova, a tihsual [zui zel] theih loh nachhan chu Pathian vang liau liau a ni. Pakhatnaah chuan sual hi a tehtu chu Pathian a ni a, Isua Kristaa piangthar tawhte chu sualna nei lovah a puang a, an sualnate chu Isuaah phum/khuh bovin a awm [zel] tawh a ni.
Pahnihnaah chuan sual an tih chhunzawm zel lohna turin Thlarau Thianghlimin kawngdikah a hruai thin.
Lal Davida suala a tluk khan, ama felna leh chaknain kawngdik a zawh hauh lo. Sim ahnekin a sual thupna’n sual dang a la khawih cheu zawk a. Pathianin zawlnei Nathana hmangin a kaiharh leh a ni.
Pathian, thinlunga ring tlata, a thuawih tura nitina bei hram hram thinte hian tihsual chang nei fo mahse, an sualnate hi hliahkhuh sak an nih tlat avangin Pathian chuan sualna/khawlohna neiah a ruat tawh lova, sual an tih zui zel lohna turin an chhunga thlarau thianghlim chuan kawngdikah a hruai thin a ni.
Report this comment
October 14th, 2012 at 10:09 am
Pu Rinzo, Kristian inti ve si, sual tih thulh chuang hauh si lo, i hmuh chuan, “I nu leh pa sakhua tawmin, Kristian chu i inti ve bawk a, Piantharna tak tak changin, Pathian Thlarau Thianghlim in tih hian, a la chenchilh ve lo che a ni maw?” lo ti thin rawh.
Report this comment
October 14th, 2012 at 11:02 am
Good post. I sawifiah thiam thin e.
Report this comment
October 14th, 2012 at 11:30 am
Ngaihnawm hle mai…………..Mihring nih chhunga thil ti sual thei lo hi a awm theih loh hrim2….Perfection chu Pathianah chauh a ni e………….
Report this comment
October 14th, 2012 at 11:53 am
A tha hle mai a.
Thuziak tha leh kristian nunkawng hruai thei tur tak a ni. Ngaihnawm pawh a ngaihnawm e!
Pu donald khian a lo comment tha leh kher mai a. Ka chhhiar lai mek hian SEMI-PELAGIANS ngaihdan zuitute kohhran thenkhat ka mitthla deuh hman tep a, in tu lutuk lo mah se… I comment khian ka thla a timuang sawt mai. Tin, Tum reng avanga sual chu setana fa tih chho atang khian ka thla a muang hrim hrim bawk.
Sualna hi Isua Krista thisen chauha tlenfai theih a ni.
Good Post.
Report this comment
October 14th, 2012 at 12:48 pm
Nimina ka thiante nen kan inhnial fiamna chiah i rawn ziaka a tha hle mai.
Tunlaiah rawngbawltu tha tak ni a kan hriat te an tlu leh kan hmuh hian mi tam tak thlarau a ti nghing thin a. Miten Pathian hnaih pawh hi eng an ni bik chuanglo tih angzawngin mahni inthiamna kawng zau tak a hawn thin. Amaherawh chu i sawi tak ang khi keipawhin Piangthar ka hmuh dan chu a ni a, piangthar tawh tan chuan tluk hlen hi thil har tak a nih ka ring ve tlat. Thilsual an tih pawhin inthiamlohna nasa takin an nun a nghawng ngei ngeiin ka ring. Lalpa hnenah an kir leh thuaia rinna hi ka nei bawk a. Thilsual ti chunga rawngbawl thei te hian Pathian an la hmu tak tak lo ni ah ka ngai bawk.
Pathian hre tawh, thlarauin a hruai tawh nun hi chu a danglam a ni. “Ka mi chu tlu mahsela a tho leh ang” Bible in a tih hi a dik ka ring….Thlaraua inchiah tawh suala a luh leh chuan nun ruak in a bawhbuai ngei ngei a, Pathiana kir lehna kawng remchang an dap leh ngei ngei thin tih hi ka rin dan a ni.
Report this comment
October 14th, 2012 at 12:59 pm
A va han fiah fai tha kelh kawlh ve
Report this comment
October 14th, 2012 at 2:03 pm
Thil tisual (to make mistake) ai chuan thil sual ti a ni zawk ang em le aw?
Post tha khawp mai.
Report this comment
October 14th, 2012 at 2:03 pm
thil tisual vs thil sual ti
Report this comment
October 14th, 2012 at 2:36 pm
Fiah fai fel chiang tha dap dap khawp mai
Report this comment
October 14th, 2012 at 4:24 pm
Sual ah a tlu a, a sim a. Sual ah a tlu leh a, a sim leh a.
Chu chu em ni? kristian te awm dan tur chu ni ber a?
Khi ti ang khi, kristian te awm dan tur a nih vang a ni maw
EIRUK hmang, koh hran u pa an lo tam tak viau na chhan chu.
Thawh tan – zir tawp ni in kar chhung zawng, pan ham takin an khaw sa a,
chawlhni a piangin, an sual te an sim leh dial thin.
Zakaia pian thar anga piangthar lah, pa khat te mah
an la awm rih lo. Chung ho Pathian chu, an ngaih tuah na mai a ni.
Thlarauthianghlim lo thlen hma a, Petera’n, Lal Isua a rin dan anga
Lal Isua ring, peih chen chen a zui a, hlauh awm a lo thlen ve leh a,
Ar khuan hma a vawi tam tak, phat san tu chuan, a ma mi hring duh thlanna leh chak na ang zel in, krista hnung a zui a,
Thlaruathianghlim pawlna leh chen chilh na, an la chang hauhlo
tih na ah ka ngai. Hebrai 6: 4 — 6 hei hi kristian in ti te chuan,
kan chhiar tel fe fo a tha awm e. Amaherawh chu, mi fam kim sawi sel bo
kan la nih rih loh a vangin, tih sual palh chang kan neih paw’n,
sim a a hnen a, kan kir leh vat e rawh a ngai ang. A maherawh chu,
hre reng chunga kan ti sual lui fo a nih chuan, Pathian chu kan ngai nep in
kan hlau lo hle a, hlau tlak ( tih) tlak ah kan ngai lo a ni ang.
Post ril tak, ringtu puitling tawh tana, chhiar chi tak a ni e.
Rin na-a la nau pang tak te tan chuan, tlukna tawlh pahrit
nal tak te pawh a ni-in ka hria.
Report this comment
October 14th, 2012 at 9:31 pm
Nizan zanlai vel atangin ka nuam lova, vawiin Chaw-ei thei lo leh Inkhawm thei lovin ka mu nileng a. Ka Post ning-nel tak pawh ka vil hman lova, in lo sawi tha thuai thuai hle mai. Ka van lawm tak em! In in-thlahrung mah mah thin.
#2 buhtlei chu, Pu PK-a thawh-hlawk tur-zia min ngaihtuah-tir nasa! Pu PK-a pheikhawk-hrui phelh tlak pawh ni lo mahila, a hnung tal zui ve ka’n tum a ni ang chu…
#7 Pu PK-a chu i ti lawmawm thin e. Nia, kan hnungkar kha i lo post lova, ka lo hawihai der asin! Vawiin lama NERIST-a i thusawi chu rawn post ngei ngei rawh aw.
#10 donald, 12 sheldon, 13 malsta27, 14 Ignatia, 15
Asteric™, 16 Jacka Pi, 19 Phivawk, Ka Lawm E.
#17 Terem, I zawhna, “Thil tisual (to make mistake) ai chuan thil sual ti a ni zawk ang em le aw?” i tih hi, Mizo tawng hian a eng hi nge dik kan tih zawk tih thu a ni deuh mai em aw? A sawitum hi chu a thuhmun reng maiin ka hria “committed sin” (thil tisual/thil sual ti) hi a sawi tum a ni.
#20 Sihte, i rilru ber khi ka rilru a nih ve avangin he thu hi ka Post chhan ber a ni zawk asin! A ruk emaw, a lang emaw-a thil tisual (thil sual ti), inthlahrunna leh zahna chhete pawh nei map silo-te ka hmuh hian Pathian thu nen hian a inkalh lutuk-in ka hria a. Heng mite hian Pathian nen inzawmna an nei miah lova, Thlarau Thianghlimin a chenchilh hauh lo a nih tih an hriat ka duh avangin ka ziak zawk a ni. I lo tang nasa lutuk khi ka lawm hle mai. Misual zingah hian “Defender of the Faith” in lo inphum ru teuh tih ka hriat hian ka thla a muangin, ropui ka ti. Ka Post khi nguntakin chhiar-nawn leh la ka duh khawp mai. Mizo-tawng ka thiam tawk loh bakah, tawngkam thiam loh nen a inkawp lehnghal a, ka sawifiah thiam lutuk lo a ni ang tih ka ringhlel love. Mahse, “we are in the same-side and in the same spirit” tih kha lo vawng reng rawh.
Report this comment
October 15th, 2012 at 1:11 am
Ka sawisel duh lai chu
Solomona’n nupui a neih treuh chhan khi Politics lam a nih hmel ber zawk…Bible thu atang pawhin. A thenawm ram zawng zawng tenena inrem kha a thupui ber a ni a, a lal hun chhungin indo pawh a awm ngailo reng a ni. A thenawm ram te lal fanu deuh zel a neih chhan pawh chu chu a nih hmel. Pathian ram zauhnan a tih hmellohna lai ber leh Pathian pawhin a huat ber zawk chu, khang a nupui te kha zalen taka an nun theihnan an rama an pathian theuh te chibai an buk chhunzawm theina turin an pathian in a sak sak nghal zel zawk a ni.
Solomona’n a buaipui chu a lang chiang reng, a hausakna kha a chen tak tak hmanlo a ang, a ram mite pawhin an chen hman lo a niang chhiah a tamin hna an thawh hah thu a fapa Rehoboama lo lal laia an vuina leh hnam hnih inthen chhan bulpui atangin a lang. Pathian ram zauh lam aiin ram inrelbawlna politics lam a tuipui vanga tlu chhia a nih hmel mah zawk. Inremna a uar lutuka pathian lem thlenga a rempui(pal zam) lutuk kha a tlukchhiatna bul ber chu a nih hmel ka han tia ni.
Report this comment
October 15th, 2012 at 2:40 am
Vawi khat piangtharin ngaih tha takin awm hmeks ila ti nia
Report this comment
October 15th, 2012 at 11:42 am
post tu pa, chu ti-a nang ber i lo dam loh tak mai chu le.
Pathianin a tih dam ngei che ka bei sei. Kanlo tawng tai pui dawn che ni’a.
I rawn sawi ang khian, mi hring chu mi fel sawi sel bo, mi tha famkim
tu mah pa khat te mah kan awm lo chiang khawp mai.
Duh reng vang pawh nilo tum lawk na pawh awm miah lovin, thil kan ti sual palh thei si a. Chu vang chuan a lawm Joba pawh khan, ka fa ten
thil an ti sual palh dah law maw ti’a, Pathian hnena in thawi na a hlan fo ni.
Chu vangin kei ni pawh in, a lang a pauvin thil kan ti sual kher lo mai thei,
a maherawhchu, kan ril ru leh ngaih tuah na te hi a thiang hlim loh chang
a awm fo thin a vangin, ni tin-in kan sual thu pha kan chawi ve thin tur
ni-in ka hria. He ti’ang chhung ril nun-a sual lo awm leh thin hi,
mi thiang hlim Puala pawh khan, a ning ve thin hle in ka hria.
Thu hril tu then khat ten-a an sawi fo thin, tak sa mar tar hi chu a awl a,
ni tin’a nun a martar chu a har an tih kha a dik viau mai thei.
Report this comment
October 15th, 2012 at 11:47 am
#24 Sihtea
Ka Lawm e.
Report this comment