mi(sual).com

By Pu Rochungnunga, Chanmari.

 [Source : MUP Tlangau October 2009, adt.]

 Pu H.Vanthuama hi Pu Darhulha leh Pi Darkungi Khiangte te fa 8 zinga a parukna niin, 7^th October, 1919 khan Theiriat khua, Lunglei District-ah a lo piang a. A pa Pu Darhulha hi Mizoram chhim biala Primary Sikul zirtirtu hmasa ber dawttu a ni a. A nu Pi Darkungi Khiangte hi Zawlnei Darphawka fanu naupang ber a ni a. Chhim biala Kristian hmasate zinga mi an ni.

Zirna lamah chuan kum 1933 khan Lower Primary (Lawr) a pass a. Chhungkaw harsatna avangin kum 1936 khan Middle Sikul a zirzawm thei ta chauh a. Kum 1938 khan Middle English (M.E) a paased a. Chumi zawhah Serkawn Mission Bookroom-ah thlakhata Rs. 5/- hlawhin a thawk phawt a. Chumi hnuah Jorhat Kristian High School-ah a remchan ang anga inhlawh chawpin a zirzawm a.

A harsat dan hriatpuiin Missionary Doctor pakhat, Dr.O.W.Hasselblad-an school fee te pawh a lo pek sak thin a. Kum 1944-ah matric a pass a, kum 1944 leh 45 khan St. Anthony’s College, Shillong-ah I.Sc. a zir leh a, mahse India ram politics lo sosangah khan politics-ah a zuan luhsan ta a.

Mizoram, tunhma a Lushai Hills politics-ah Mizo Union zawmin politics a khel ve ta a. Mizo Union politics hla-ah te pawh a hming  lang hial khawpin a bei a; hetiangin :-

“Pu Khawtihkhum, Pu Vanthuam,

Pu Dengthuama, Pu Thanhlira,

Pu Saprawnga an tanrual chuan,

Zoram kalsiam a her luai luai.” tih te leh

“Pu Vanthuam Khawtinkhum kan nghilh law’ng,

Hnam rethei nu leh pa in ni,” tih te pawha phuah hial khawpin tan a la ve a ni.

Kum 1946 khan  Mizo Union Party General Secretary-ah a tang a. Mizo Union nawrh vanglai 1948 te pawh khan Tezpur Jailah political prisioner niin Pu Lalbuaia leh Pu R.Thanhlirate nen an lo tang ho tawh a; kum 1949-ah an lo chhuak leh a. Tin, District Advisory Council-ah pawh member atan thlantlin  a lo ni tawh a ni.

Politics boruak sang a lo reh hnu, kum 1950 khan lehkha zirzawm lehin, kum 1953 khan B.Sc. (Agri) chu a Assam Agriculture University, Jorhat atangin pass a, Mizo zinga B.Sc.(Agri) pass hmasa ber a lo ni ta a ni. Tin, kum 1971 khan Agriculture University, Anand, Gujarat atangin M.Sc.(Agri) a pass leh a. A nupui Pi Vanlalmawii nen hian tahrik ni 14th May 1957 ah an innei a, fanu 4 leh fapa pathum an nei a ni.

Sawrkar hna lamah Agriculture Inspector hna chu Along, N.E.F.A (tuna Arunachal Pradesh)-ah a thawk a. Chumi hnuah Assam Public Commission kaltlangin Asst. Dy. Director of Agriculture-in Shillong-ah a thawk a. A hnuah District Agriculture Officer(D.A.O), Aizawl-ah a thawk a. Kum 4 hnuah Khasi & Jaintia Hills-ah; tin, Aizawl leh  Dubri-ah D.A.O hna a thawk leh a. Chuta tang chuan Principal, Gramsevak Training Centre & Farmers’ Training Institute, Cachar-ah a thawk a. Mizoram Union Territory-ah hlankai a lo nih khan Joint Director of Agriculture-ah dah a ni a. He hna hi kum 1984-a a pension thleng khan a thawk a ni.

Sawrkar hna bakah, kohhran leh pawl hranghrangahte pawh hruaitu hna hrang hrangte pawh a lo chelh ve tawh thin a. Kum 25 chawl hauh lova Sunday Sikul zirtirtu thawk chawimawina pawh a dawng a. Jt. Director of Agri. anih laiin, Mizoram Govt. Employee and Workers Federation Vice President niin, Sawrkar hnathawkte’n Medical Reimbursement (M.R) Durtlang leh Serkawn Hospital a an hmuh theih nan Delhi-ahte zu kala nawrin, a nawr chhuaktute zingah a lo tel ve tawh a.

M.U.P lamah hian kum 1983 khan tel ve tanin, M.U.P Chanmari Unit-ah President pathumna a ni a. Kum 1984 atangin kum 1987 thleng Unit President a ni. Kum 1985 khan M.U.P General Headquarter-ahExecutive Comt. Member niin, M.U.P Chanchinbu (tuna MUP Tlangau bu) chhuah a lo nih khan Editor hmasa ber a ni a.

Tin, kum 1988 khan M.U.P Gen Hq-ah President atan thlan a ni a; kum 1991 khan thlan nawn a ni leh a. Kum 1993 khan Vice President atan thlan a ni bawk a, a kumte a lo tamin amah a lo chak lo ta deuh nain kum 1995 khan Sr. Adviser atan dah a niin, kum 10 (sawm) chhung chu a tang a. He pawlah hian “Hruaitu/Hotu min” chawimawina pawh dawntir a ni.

Mizoram U.T a lo nih khan, “How to Develop Mizoram Effectively” tih thupui hmanga 25^th April 1973-a insawisiakah khan Lawmman pakhatna a dawng a; Lt.Governor Pu Mukherjee khan a hlan nghe nghe a ni. Tin, “Mizoram Politics Chanchin, kum 1952 hmalam” tih lehkhabu pawh a ziak a; kum 2001 khan he a lehkhabu ziah hi a tichhuah a ni.

Kum 1998 atang khan lung lam that lohna neiin, Birla Heart Institute, Kolkatta-ah enkawl a ni a, Pace-maker vuahsak a ni a. Chumi hnu kum 10 lai hnu, kum 2008 atang khan zun kawng lam that lohnate a nei ta a. Bethseda leh Greenwood Hospital-ah te enkawl a ni ta a.

Mahse, a khawvel zinkawng zawh tawp ni tura Pathian ruat ni, tahrik ni 2 April 2009 chu lo thlengin, a chatuan ram panin he khawvel hi a lo chhuahsan ta a. A chhungte, chhungkhat lainate leh khawtlang leh keini MUP, Chanmari Unit memberte chuan ui tak chungin April ni 3, 2009 khan puandum batin kan thlahliam ta. A chhungte Lalpan thlamuan zel rawh se kan ti.

A chhungte a kal san tak te hi…. :-

A nupui :- Vanlalmawii.

A fate :-

1.Zothlamuani
2.Thanliana [L]
3.Zochhuani
4.H.Zoliana
5.H.Malsawmi
6.H.Lalzari
7.H.Lalruata
Tu hi 20 a nei a, tuchhuan 7 a nei bawk…!

Similar Posts:

• Mizo Technical Graduate te (Agri. lam)
• HNARUAK
• Class XII Science Optional subject ah Agriculture
• Mizoram Agriculture
• Vanglaini Mizo Award Pu Thena hnenah!

Recent Posts:

• REISISS!
• Hlawhtlinna kawng
• MIZO THALAITE TAN THU KAMHNIH-KHAT
• ANA ASIN
• Pathianin Mihring A Hmangaihzia

This entry was posted on Sunday, October 14th, 2012 at 10:00 am and is filed under Copy Paste, Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.