mi(sual).com

PRINCIPALITIES

(RAMHUAITE LALRAM HAI HAWNNA)

“Kan buante hi tisa leh thisen an ni si lo, lalnate leh, thuneihnate leh, he thim chunga khawvel roreltute leh, van hmunahte thlarau sualho awmte an ni zawk e.” (Eph 6:12)

“Tichuan, ani chuan, “I hnêna ka lo kal chhan hi i hria em? Tûnah chuan Persia ram hotu bei tûrin ka kîr dâwn a ni: tin, ka thawh chhuah hunah chuan, ngai teh, Grik ram hotu a lo kal ang.”(Dan 10:20)

Le, kum khat chuang zet mai draft a ka dah hnu ah a tawp a tawp ah chuan a tulna in min ur thlu ta ngang a niang e, hei ka rawn khawr pum ve ta hram e. Kan ram kristianna hi Spiritual Warfare ah hian kan hniam em em mai a, a sawtpui a mual mual te in lo awm tak in, khawnge Thlarau khawvel hi in chai leh dawn teh ang hming. Ringtu rual in ni bawk a, rinthu min tihsak vak vak biklo ula…. hehehe.

Kan buante hi kan hriat chian an ngai em em a, kan buante ber erawh chuan kan hriatchian hi an duh lo em em ang tih a hriat sa reng mai. Thlarau khawvel lam kan hap leh dawn avangin kan hre em em thei ngailo ang a, fact & figures leh documents & evidence te chu Secular Science in a lo beisei chuan pek tur kan nei hauhlo bawk ang. Thil hriatfiah theih tak tak loh, mahse min beih miau si avang leh kan tan thuapna a nih bawk si avangin mualphona sawiselna tur zawng zawng chu palzam in, kan han bitum leh chawrh mai a niang chu.

SAWI HAWNNA :

A hmasa in Gap Theory ah khan he kan chenna khawvel hi a luah hmasa bertu kan ni hauhlo mai a,  mihringte siam kannih hma daih in life-form dang an lo awm tawh a, chung life-form leh civilisation chu Pathian hremna THIM leh TUI hmang a tih chimih anni tawh a, chu chu Genesis 1: 2-3 chho a engmah an la awm hma a THIM leh TUI an lo awmsa nachhan leh, chu khawvel chu chhia, ruak, hluihlawn, rauhsan anlo ni tawh tih kan sawi tawh kha.

Chungho fossils te chu mihringte’n oil leh natural gas kan laichhuah te hi thui tak chu annih hmel a, a bak te chu tlai khawhnu ah kan laichhuah, evolution theory innghahna atana a hman tak ho, khawvel in Bible a creation account a hnawl tak rup rup nachhan te pawh anni thui em em bawk. An fossils them ringawt te pawh chu kum sang/sing liam hnu ah kan rinna atangin kan la tlukpui phah ve han han chu a ni ber e, hring fate hi kan puilo ru riau.

Chu khawvel hmasa chu tu tan a siam nge, tunge an guardian angel tih kan inzawt a nih chuan tun a kan hmelma, Setana a.k.a Lucifera* hi a nih hmel em em mai. Ezekiela 28 chho ah chuan chu pa chu Eden huan ah a lo cheng tawh thin a (he Adamic civilisation guardian angel pawh Eden huan ah a rawn leng thin ang khan), mawina tinreng leh ropuina tinreng a thuam a ni tih kan hmu a nih kha. A tawp dan erawh chu a chhe em em mai thung, “I awm leh tawh ngai reng reng lovang le” tih anih kha.

Chu khawvel hmasa chu eng khawvel nge, engtiang tak a ropui nge, engtik hunlai a mi nge tihte hi mihringte hian kan hre tak tak lo, Bible ah hian chipchiar in a inziak bawk silo, inziah a hnekin chu khawvel chu anchhe lawk tawh, hrem tawh a nih avangin atu ate mah chu an hming diktak pawh chu hriat reng anni tawh lo bawk. An guardian angel Lucifera, Setana kan tih bawk pawh hi a hming dik hi mihring zing ah tuman an hre tawh lo, mihring beng a hriat thian tawh lo, mihring ka a lamchhuah thian tawh loh, anchhe tawh tawh anih vang a ni. Chutiang zel in Bible a ramhuai te pawh kha an hming dik tak kha sawichhuah khap anni vek tawh bawk, an thiltih ang khan an insawi ve mai thin, mitdela, bengngawnga, Nuaia(Legiona) tite in. An hming tak tak a ni lo tih chu kan hre vek awm e.

Mak ta erawh chu an tisa putlai ni chu hrem anni tawh a, mahse disembodied unclean spirit ah an chang ta daih mai hi chu a ngaihna kan hrelo, rindan ber ah chuan immortality an chang hman a nih hmel ber, chu chu kan Bible neih atanga kan zuk zeldin chuan Adama te kha an bawhchhiat hnu khan Pathian in nunna thing kawng kha a veng nghal chat mai a, a venna chhan pawh “thei chu an lo ang a, an ei ang a, kumkhua in an nung dah ang e” tih a ni (Gen 3:22). Bawhchhiat hnu pawn kumkhua a nun chu a theih tho tihna a nih chu.

Chu khawvel hmasa chu he kan khawvel hmasa ang deuh diak hi a ni ve tho hmel a, an inthlahpung a, an in develop ve fe hman a, nunna thing pawh chu an ei hman ani ber ang chu, hrem an nih hnu ah pawh immortality an la nei ta tlat mai a. Taksa erawh chu an nei tawhlo a, disembodied spirit anni tawh thung. Ngaihruat mai mai pawh in, taksa nei thin, taksa nei ta silo, a tui leh a nuam hre thin, engmah ti thei tawh bawk si lo, khawih theih nei tawh bawk si lo, thi thei bawk si lo, chawl thei bawk si lo chu a hreawm dan tur zia chu, sawi in a siak lo ve. Helai ah tak hian Pathian in Adama te bawhchhe hnu kha chutiang chu anni ve ang tih a hlau a, kumkhua a nun theihna, immortality an chan a hlauh avangin, nunna thing pawh chu an ei a khap  a ni a, chutih lai a, kan thih tawh hnu pawh a, keimahni a immortal la awm a rinna hi Bible kalh, ramhuai bumna zirtirna a ni ta tlat a ni.

A tir te ah an bawhchhe nghal lo ni a a lanna chu an inthlah pung nasa em em hman a, settlement te pawh an nei nasa hman em em a, khawpui te pawh an din a, lalram te pawh an din a, an mahni te pawh an indo ve thin a nih a rinawm em em  a ni, an tam em em a rinawm nachhan chu fossils fuel reng an lo tam mai leh  an hnuhma leh sulhnu laihchhuah tur an awm zeng zung mai hi a ni.

An nihna ah chuan mihringte aia hnuaihnung a siam annih hmel a, animal kingdom ang a sawi theih pawh a ni hial ang. Mahse intelligence nei, mihring hnuai deuh a siam annih hmel. An inawp ve a, clan ang te pawh in an awm bawk a, finna ah pawh an insan hleih in, an in ropui hleih a ang bawk. He khawvel pumpui hi an civilisation chuan an dap chhuak ve hman hial tho a nih hmel bawk. Mahse Pathian in a anpui in a siam ve lo a nih a rinawm. Mihringte Pathian in a anpui a siam an thik ta tlat mai hian a chuti zawng chuan a reason theih tlat a ni.

SETANA……….LUCIFERA ?

Le, a tawk ah ngai ila, Bible ah zawm fuh tum dawn teh ang le.

A hmasa ber ah chuan Eden huan a Evi rawn thlemtu kha he khawvel hmasa a mi a nih a rinawm. Ka chhui ve ngial na a, ka hrechiang ngam ta ngang lo, Setana leh Lucifera hi mi thuhmun anni theih ka ring nganglo a ni. Bible copy chhawng tute, lehkhaziaktute hian Bible an copy chhawn hian noun hi an upgrade fo thin mai a, Setana tih thumal te hi Babylon saltanna atanga an va hriat chawp a ni a, saltang an lokir leh a, Bible (ti zel mai ang aw, kan hrethiam vek ang chu, chunglai chuan Bible kan tih hi a la awm lo a, Judate lehkhabu Torah, Nevi’im, Kethuvim te kha anni ) an copy chhawn khan Setana hming hi an inject lut a nih hmel a, saltan hma a ziah lehkhabu ah te pawh Setana hming hi kan hmu ta nual mai si a, a dik chhui chhuah ngaihna hi a awm tawh der mai bawk silo. Bible hi heng lehkhaziaktute hian an lo twist zeuh thin tih erawh chu Jeremia pawh khan 8:8 ah “an kawlawm dawthei chuan” tiin a khak a nih kha.

Bible kan en chuan chu khawvel hmasa guardian angel chu hmeltha em em leh finna a khat, hmelthatna leh finna a tha famkim a ni tlat mai a, a hmel Isua’n a sawi pawh “tek tla ang” a ti mauh mai a, (sawifiah dan dang awm mahse), a hmeltha lutuk tih hi Bible  in min hrilh tlat a ni. Chu a hmelthatna leh a finna ngei chu a lo chapo pui chhan leh a tlukna chhan a ni chiah bawk.

Setana tak erawh hi chu a hmel hi tha tak a ngaih tur in vawikhat zeuh pawh a clue Bible ah a awmlo, monster a nih hmel zawk mah. Peng vaklo mai ila, Lucifera hi guardian angel chu a ni a, Setana hi chu pre-Adamic race a an Lalpa, reptilian race anih hi ka rindan chu a ni, mahse sawipawlh anni tawh a, thu chiang erawh hriat theih a ni chuanglo. A pawimawhna em em ka hrelo bawk.

Evi rawn thlemtu kha Angel ni lo, khawvel hmasa a an species a nih ka ring ta anih chu. Bible in rul a tih kha, Hebrew nâchâsh, sap tawng ah chuan serpent tih a ni deuh kher bawk a, tur nei chi sawina ngei a ni bawk. Bible a serpent, dragon, beast, leviathan, behemoth tihte hi an in kungkaih vek mai a ni. Chu pre-adamic  species ngei chu Eden huan a Evi rawn thlemtu chu a ni ang. Disembodied spirits anni a, an form rawn lak chu an duh duh a ni mai a, in mitthla a rul invial kual ang hi chu paih hmiah rawh u, upright position a kal thei a ni a, a rawn tleng hauhlo. Kei chuan mihring pian ang, mipa hmeltha zet, engemaw ti a hmel rul anna nei deuh si ang in ka mitthla ber mai.

Helai ah hian plain text phen ah thil inthup a tam lutuk a, a har ngang mai. Evi khan theirah nilo, a kung zawk kha a it tlat mai te kha a mak ngang mai, a sexy kan ti zawk dawn em ni, mahse chu chu Mizo Bible chuan a lehling tello thung. A detail deuh hlek chuan Eden Natna leh Sex tih ah khan kan ziah tawh kha. Pawi a rawn khawih ta a, mihring gene chu a rawn khawih chingpen ta a, mihring nen a inthlahpawlh, serpent seed chu a rawn tuh ta a ni, chu chu SUAL BUL chu a ni e. Pathian in “I thlah(seed) leh hmeichhe thlah(seed) ka indo tir ang…” a tih khan serpent  chuan chi a thlah ve thu a clue min pe ta tlat a ni. Helai topic hi chu ti hian kalsan hrih ang, a hran a chai chi ania.

Tichuan Pre-Adamic race, disembodied unclean spirit chuan chi a rawn thlah ta tlat mai a, a chi chu taksa neiin Adamic race nen an inchenpawlh dawn ta tlat mai a nih chu. Pathian in Eden bawhchiatna kha a ngaidam ngawtlo kha in dem thin a, Pathian kha a nunrawng in ti rilru thin ti raw u? Kan hrelo lutuk tih  hi kan hre thiam feih feih tawh em?

THEOS/FALLEN ANGELS:
Khai, kan peng dawn e. Chu khawvel hmasa a chengte chu tun a demons kan ti, unclean spirits, disembodied spirits, ramhuaiho hi annih hmel ta ber a nih chu. Thlarau khawvel hierarchy kan en ang a, a chung ber ah guardian angel a awm a, chu chu Lucifera ti mai ang aw, a hnuai ah a domain atanga a hnuhthlak ho, fallen angels te an awm bawk a, chungho chu THEOS ti a koh anni. Theos tih thumal a Trinity leh Oneness in Shema an lo twist a, an lo hai hi a zahthlak em em asin, Theos tih a koh hmasak ber te chu fallen angels, Lucifera leh a hote anni e.Chu chu Greek Olympus Titans ho kha anni.

Lucifera hian van a vantirhkoh a hnukthla a, a helpui kan tih fo hian Third Heaven a Assembly of  angel ho a han khawih phak hi a rinawm loh bawk. A tir te a solar system guardian angel ni tur a assignment pek a nih kha a command na hnuai ah vantirhkoh host khat pek a ni ve bawk a, chung zing ah chuan bum theih a mual mual a nei a nih lek zawk hmel. Vantirhkohho, Pathian fapate zaikhawmna a a han inlan ve zet kha chuan tunge anih an lo hre mang hlawm der lo a nih kha, a lar lemlo, a han insawichawp vel a nih kha. Khatah khan Setana tih a nia, mahse chu chu Babylon saltan hnu a lehkhaziaktuten noun chu an upgrade/inject chawp anih hmel zawk mah bawk, saltan hma in Setana hming hi Juda ten an hre ngai tlatlo, a Pathian YHWH  hming zawk zawk pawh tlai khaw hnu ah Bible pum atangin an lehlinna lam ah an paih vek ang hian.

Chung theos ho te chu an bawhchhiat tak ah chuan tartarus ah khung anni ta a, chu chu khuarkhurum mawng neilo tih a ni bawk. A awmzia chu lei silo, van tawnglo tihna a ni. Van hi chhawng thum a awm a, Genesis a Pathian in tui leh tui inkar ah chuan boruak zau tak awm se la a tih, van a vuah kha THA a ti ve thei hauhlo tih in chik chuan in hmu ang a, a chhan chu van chhawng khatna chu Tartarus, fallen angels te tan in, bottomless pit, lei si lo, van tawng lo(van Pathian awmna access thei tawhlo) Pathian anchhedawngte hremna chu a ni . Isua boruak a thing anchhe dawng a khaikan leh Mosia dar rul khai kan kha a nihna chu a ni e. Boruak/van hi Pathian anchhedawng chu a ni a, chu chu Thupuan a  Leithar siam rual a Vanthar siam a ngaih nachhan chu a ni chiah bawk.

DEMONS:

Heng ho chu duhtawk leh hrih ang, an hnuai ah hian demons ho an awm ta a, Greek tawng ah chuan daimons leh daimonians an awm hrang ta a ni. Greek Mythology in en chuan theos(fallen angels) ho tirhkah, daimons leh daimonians ho an awm tih in hre mai ang. Heng ho hian hierarchy an nei hrang ta thluah mai a, an insual a, an inhua a, an iner a, an inbei a, huai deuh leh dawizep deuh, chak deuh leh chaklo deuh, fel deuh leh sual deuh, awmho theilo a rambial hrang hrang nei a awm an awm ta tlat mai a ni.

Hei chiah hi a nia, Paula’n Ephesi 6 a kan buante chu tisa leh thisen anni silo a tih tak chiah te chu. Enchik  ang aw:
1. lalnate (Principalities)(arche’)
2. Thuneihnate (Powers)(exousia)
3. He thim chunga khawvel roreltute leh (Rulers)(kosmokrator)
4. Van hmunahte thlarau sualho awmte an ni zawk e. (Wicked Spirits)(pneumatikos poneria)

A mal mal khian chai laih tham vek anni, (khawvel tih te khi kosmos, he khawvel sawina a ni miahlo a nia aw, aion, he age sawina hi a ni zawk). Chuan pakhatna, Principalites, Gk. arche bik khi kan thupui a ni a, khi khi kan umzui bik ang.

STRONG no. G746

ἀρχή

archē

ar-khay’

From G756; (properly abstract) a commencement, or (concrete) chief (in various applications of order, time, place or rank): – beginning, corner, (at the, the) first (estate), magistrate, power, principality, principle, rule.

Kan umzui tur ber chu “inlalhleih dan indawt” tih leh “rambial hrang hrang inawp sem”  PRINCIPALITIES tih hi a ni ang.

Daniela hnen a Gabriela inlar khan Daniela ni 21 a tawngtai a, ni 24 na ah a rawn pawh chiah a(vantirhkohte hian sabbath hi zuk serh ve a?!?), chuta a thusawi chu Daniela tawngtaina kha a tir atanga hriat a ni a, nimahsela Persia ram hotu in a lo dodal a, hotu lian Mikaela(Prince of the Jews) in a rawn dopui anih  kha.

Chik ngai ta chu khatih lai a Persia Lal chu Darius emaw Cyrus emaw anni a, anni in Mikaela leh Gabriela an do thei ngawt lo, Thlarau Lalram sawina leh Thlarau indona a ni zawk! Chumi hnu ah Gabriela chuan Greek Lal do tur in a kal leh tur thu a sawi zui bawk.

Hmm……Khawvel Lalram phen ah Thlarau Lalram invuakthuah chu kan hailang tan ta e. Daniela mumang a Sakawlh indawt chho te, Milim  element hrang hrang indawt te , Thupuan a sakawlh lo lang tur zawng zawngte kha hmuhtheih sawrkar phen a hmuhtheihloh sawrkar vek annih kha. Alexander the Great  an Artexerxes II a run  a ni ngawt lo, Thlarau Lalram inbuan leh inlehthalna anni zawk. Chutiang chiah chuan khawvel sawrkar zawng zawng phen ah hian Thlarau Lalram an awm vek a, an indo a, an inpaihthla a ni zawk e. Lucifera chuan hei hi a thlir reng a, a tawp ah a chak ber a awn thuraulpui dawn  a ni e.
KAN RAM MUTAN LAM:

Le, kan ram hi en ve chiah ila, Pre-Adamic civilisation ah he kan ram ah hian eng ber nge cheng kan hrelo, mahse chi ropui leh chak tak chu an cheng lo a, kingdom ropui tak chu an dinlo a ni tih chu hei tun a kan hmuhthei thuneihna inrelbawlna atang hian kan hmuthiam thei ta ruak mai a ni. Ka rindan chuan tun a kan ramluah ah hian daimonians ho, a hnuaihnungho bak kha an lo awm ngailo. Chu chu kan mizo thawnthu atangin kan rin hriat thei a ni. Tlang tin hi an inluahsem ve fir fer a nih hmel a, unau pawh tlang hrang an chan in an indo zel nachhan hi, thlarau possess tu, KHUA an tih kha an hrang zel tihna a ni e. Chutiang in SA an biak pawh hnam khan an nei hrang zel bawk. Chu chu SA-KHUA kan ti lo chhuahna hi a ni. Kan hman sakhua unaute lo tihsualzia hi sawi ngaihna pawh awmlo khawp a pawi a ni e.

Zo hnahthlak ah pawh Mizoram luahtu hi daimonians ho khat(Khua pakhat, Sa pakhat),chutaing zel in Chin Hills luahtu hi daimonians ho dang, a tlang ang leh a region ang leh a hnam ang hian an hrang a, an indo, an iner, an inphiarru tih hi lang thei lam atang hian langtheilo hi kan hmuthiam thei ta a ni.

Mizoram bik ah pawh hmar lam luahtu leh chhim lam luahtute hi an la inhnaih viau na a, an inkar ah neuh neuh a awm chiang tih a hriattheih. Aizawl khawpui bik ah pawh veng hrang hrang hi an turf ang in an inchansem tih hi a hriat fo thin, hote ah inhuatna leh inepna hi a alh leh hluai thin. Vaiho nen phei hi chuan daimonians te hi an inanglo chiang bal tih hi a hriat. Kan pipute thawnthu kan chik ngat phei chuan mizoram a daimonians te hi an hniam khawp mai, mihring te kha an hlau deuh fo a, thawm ri bengchheng te khan an hlau ngawt zel a, a khua khua a a pem ta te pawh hmu leh hria an awm thin anih kha.

Pawi ta, kan hriatthiam bawk siloh chu, Mizoram a chanchintha eng a rawn luh a, daimonians hnuaihnung zawkte hlau a an kaldarh lai khan, Setana hian Mizoram hi a en chik ta bik chiang tih hi ka hmuhdan a ni bawk, daimonians te kan hneh mai a, mahse daimons ho an rawn luh belh ta tlat mai thung a ni ber e. Daimonians te chuan ngaituahna an seng vaklo, an finglo ti mai ang, ei leh tisa chakna lam an thupui ber a, daimons te chuan taksa aiin thluak, rilru leh thinlung lam an bei tawh zawk a, chu chu kan ram politics leh kan khawtlang nun, sakhuanna leh kan moral leh value system a kan mutan ni ta tlat hi anni ber mai. Taksa an possess hi chuan hriatchhuah an awl a, rilru, ngaituahna leh thinlung lam an influence erawh hi chuan beih hi a sak tawpkhawk a ni e. kan ram a sualna felfai zet zet, eirukna, bumna, mahni hmasialna, inphiarrukna te hi mihring ah an intan lo a, an tawp ngawt bawk lo, kan buan turte chu heng daimons ho, thluak, thinlung leh ngaituahna khawihtute ho hi anni e. An fing a, an huangtau a, an phakar a, daimonians te ai a class sawng zawk anni. Chu chu Bible a kan hmuh, in ruak, thinlung phiahfai (rilru bun ruah, yoga leh meditation lam), Thlarau Thianghlim in a luah siloh ah chuan an mahni aia sual zawk an rawn hruailut a, a hma aiin an chhe zual sawt thin tih kha a ni.

Sawi hmaih ka nei lawk, heng daimonians te hian hmanlai chuan taksa neiin he khawvel hi an lo luah tawh thin tih a lan chianna pakhat chu taksa luah leh hi an thlahlel ngawih ngawih a, mihring taksa luah te hi an la chak em em a, chumi kaltlang chuan hmanlai a an lo khawih thin ei tur, leh tisa chakna leh thisen chhuahna te hi an rawn ti puitlung chauh thei thin, mihring taksa an luah theihloh pawh in(khaptu a awm si a), ransa taksa tal hi luah an la chak fo bawk thin. He tah  hian vawk leh mizo sakhua leh vawk mizia hi thu ka ziak tawh a, chutah chuan helai bik hi detail deuh in ka ziak a, ka la ziak zo lo thung.

Tin, a tir lam a kan sawi theos leh daimons leh daimonians te danglamna chu an movement sawi a ni reng reng hian, theos te chu chhuk leh chhu(up & down) ang hlir a sawi anni a, daimons leh daimonians (an pahnih hian english chuan demons kan ti vek thung a) te movement erawh chu he lei a vakvel ruai(wandering to and fro) ang hlir a sawi anni thung. Taksa nei tawhlo mahse hmanlai a chenna hmun lo nei thin annih vang a ni ngei ang, chenna hmun te hi an la thlahlel em em mai a, thing, tlang, sih, lung, ramhnuai te hi an la inti neitu em em bawk. Tin, sawm annih leh an mahni lo welcome na deuh bungrua, tawngkam, bungbel tekan chenna in ah an awm chuan chu in chu an inti neitu ve ngam thin bawk, chu chu inhrang kan tihte hi anni. Amulet an mahni lam rawngkai miin a bun chuan chu mihring chu an bawh deuh ngei ngei thin, kan film en duhzawng, kan music ngaihthlak duhzawng, kan inchei duhzawng, kan titi duh zawng te hi an ngaichang a, mihring  rilru an hriattheihloh avangin an chaklohna hi heng atang hian an chik a, an zuam tur an zawng thin.

STRATEGIES:

An hnathawh ber chu Eden huan a natna hrik kan thlahtute atanga kan lo kai tawh, Setana gene kan ti dawn nge, serpent seed kan ti dawn nge, kan DNA overwrite thei trojan horse inphumru chu rawn activate an tum  a ni ber mai. Chumi atan chuan sound, wave, frequencies te an hmang thei vek a, kan 5 sensory preceptors, kan thil hmuh, kan thil ngaihthlak, kan sawi chhuah, ka hnar a kan hipluh, ka taksa leh kan kut leh kan vun a kan deh te kaltlang hian kan taksa a sualpu Eden natna hrik chu an zuk activate thei vek a ni. Tin, kan ngaituahna te pawh hi electro-magnetic  energy hmang a chawm anni a, chu chu kan boruak hipluh oxygen hian a chawm tur a nih laiin, kan boruak hiplut atang te pawh hian kan thisen ah kal in, kan heart ah kan thinking faculty hi an han command thei a, chu chuan kan neurons ah command an han pe thei bawk. In ngaihtuah duh loh deuh deuh te hi in ngaihtuah fo mai ang, hetiang ka ngaihtuah duhlo ti mah ula, in thluak a neurons an trigger tawh chuan in ngaituahna atangin in paih thei miahlo ang, chutaing chuan in awm thin. Ka ti tawh miah lovang, ka duhlo  ti engang mah ula, in thluak ah an la lui thei tlat tawh che u a nih chuan, kirleh hi a  sak tawh lutuk, naupang thanglai ah hian fimkhur a ngaih dan zia hi sawi in a siak lo ve. He topic bik pawh hi a hran a chai a chi zawk ang. Compulsive behaviour, addictive behaviour, nerve problem, eating disorder, obesity, sexual perversion, thinchhe lutuk, negetivism, pride, adt…zz hi hengho vang vek hi anni e.

Medical science hian heng hi a hrethiam vek lo, mood swing, Bipoplar nature, schizopherina, passivity te hi hengho ziarang hi anni vek. Enge an khawi ber ni a lang chu gland leh nervous system an khawi a nih hmel ber, annin direct in an khawi a ni lo a, an agent, kan lo pianchhuahpui, acid chikhat, activate a kan DNA overwrite thei kan pai hi a ni ber mai. Chu chu inherited sin chu a ni. Sawi tur a tam, lo chhui zui ve rawh u, thisen, beat leh smoke te nan an inzawm vek e. Belief leh doubt leh disbelief te pawh hi heta tang a lochhuak vek hi anni, a original Thlarau thianghlim nen a an indona pawh hetah hian a ni, kan hriatloh hian Thlarau sual zawk kan lo tanpui nasat zawk zia hi pawi tak a ni.

Tlip dawn hnai ang aw, heng ramhuaite hian khawvel hi a region ang leh  a hnam bil ang hian an inchansem a, hmanlai a an lo luahtawh a nih pheichuan an huangtau em em a, hei hi ram leh ram indo chhan, hnam leh hnam in huatna leh inbeihan chhan, nationalism, patriotism, racism, hman feeling, ram feeling, khaw feeling kan tihte hi an ni.

He thil hi Babel a sakhaw diklo atang khan pandora’s box ang chiah a lo taidarh ta a ni a, tawng a hrang a, an kaldarh a, khawvel hi Pathian remruatloh dan zar zar in principalities thenhran hrang hrang ah Thlarau khawvel hian an awp ta thup mai a ni. Chu chu Pentikos ni ah khan Thlarau Thianghlim chuan a rawn dodal ta chiah a, he khawvel hi system pakhat ah luankhawm tir a tum ta tang tang a, chu Pentikos Thlarau changte chuan hei hi an hmufiah a, Kalvari ah Vanlal nau ang an dang chuanglo ve, an lo ti thin a ni.

In hmuh thiam em? kohhran ah, hnam ah, veng ah, ram ah, party system ah power inchuhna, indaidanna, a cause diklo ah reng reng chuan heng daimons leh daimonians te hi a phen a thlarau chu anni vek ang.

TLIPNA:
Chu chu Thlarau sual lalram chu a ni e. Pentikos Thlarau diktak changtute’n ram leh hnam leh tawng leh pawl ram indaidanna ah hian chanvo an nei ve lo e. Isua hian he indaidanna bang, politics, hnam, tawng, culture & traditions, races, ethic races, pawl ram, hnam bil, veng bil, khaw bil, adt… zawng zawngte hi a rawn nuaireh vek dawn, a chhan chu a phen a Thlaraute chu a rawn do ber tur chu anni.

Chutah he khawvel hi lalram pakhat, hnam pakhat, tawng pakhat, biakdan pakhat, system pakhat ah a rawn luankhawm tir dawn a, chu a model chu kan hai loh nan Abrahama hnen ah a thukru daih tawh a, amah ngei mihring ah lopiang in a enchhin tawh a, chu system chu a tha tawk tih Pa hma ah a finfiah tawh. Chu chu Jentail te leh chu hnam chu zai khat ah luankhawm tir chu kum 2000 kalta ah khan tum a ni tan tawh a, mahse chu Pathian Institution lo dingchhuak in, khawvel hnam dangte leh lalram dangte a nuai reh vek tur chu heng daimons te hian an do let nasa em em a, chu chu History ah kan hmu vek e.

Mahse hunbi tiam a ral dawn a, chu ngei chu Messia hian a rawn champion pui dawn a, chu ngei chu a rawn tungding dawn. Chu chu Setana leh a hote chuan sawi hleihtheihloh khawp a nasa in tun atang hian an dodal dawn bawk. Chu Yah’shua hming leh a manifesto avang chuan khawvel in chumi lo support tute chu a huatrawn dawn bawk.  Nimahsela, in eng a la thawl ang tih ziak a ni e.

Tu pawh hriatthiamtheihna thlarau neite chuan hrethiam rawn se.
Kan Pathian Yahua leh kan chhandamtu Yah’shua te chu chawimawiin awm rawh se, Amen.

Similar Posts:

• Khawvel Hmasa vis–a-vis Setana leh Ramhuaite
• The Oneness of God
• Thlarau Khawvel
• Enge Pathian Thu?
• Immortality of soul

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Monday, October 29th, 2012 at 9:00 am and is filed under Mizo Society & Culture, Religion. You can follow any responses to this entry through the RSS 2.0 feed. You can leave a response, or trackback from your own site.