mi(sual).com

“Engpawh ni sela, kan thlen chin atang khan hma I sawn zel ang u” (Philippi 3:16)
Tumkhat chu, Shillong-a College ka kal laiin, Police bazaar-ah kan leng a. Kan haw lamah Anjalee Cinema hall lamah kan haw kual a, Rhino Sipai Camp kan kalpelh lai hian, Sipai Officer fapa ni ngei tur, no nuak mai, thau em em mai hi pa hang rin ren, palian vaklo hian Wheel chair-ah hian a rawn nawr a. Chu naupang chu, a tawng thei lova, zaizir vekin an bia a, engmah amahin a ti thiam lova, tihsak vek a ngai a, thluak tha lo ‘mi a’ kan tih ang hi ani tih a hriat reng mai a. a pumraw len danah chuan kum 10 vel bawr chu anih ngei tawh a rin awm a, mahse engmah na nei awma lang silo kha, a thau lutuk avangin a kal theilo nge ni Wheelchair-a nawr a ngai bawk si. A thil ei reng reng, mahnia ei a tum lova, a barh vekin an barh a, a nui ang vun vun a, a rap awm zawk ang reng hle a ni.
Tunhnuah hian, Kristian nun ka ngaihtuah apiang hian, he naupang hi ka ngaihtuah chhuak thin a, ka mitthlaah chiang takin a lo lang leh thin a ni.
Naute lo piang nunna nei chuan Chaw a mamawh a, a thang tur a ni a, alo than len zelin a tih theih a neih belh zel thin a, Sikul a kal a, a kum phu tawkin a class a lo sang zel a, thiam a neih belh zel thin a, a tawpah phei chuan, a lo puitling thin a, midang rinchhan lova mahni kea ding thei alo ni thin a, nupui/pasal neiin an lo in thlahpung zel thin a ni.
Chutiang chiah chu Kristian Nun pawh hi a ni. Tisaa kan lo pian hnuah Thlarauvah kan lo piang nawn leh thin a, Piangthar hlim chu Naute pianghlim ang a ni a, uluk taka midangin Pathian thua an kaihhruai leh an chawm a ngai thin. Amaherawhchu, ‘mi nung’ alo nih tawh tlat avangin a ngaia awm reng tur a ni lo va, thanglian zel tur a ni. Thanglian tur chuan Thlarau lam chaw a mamawh a, chu chu Taksain regular taka chaw a mamawh ang chiahin Thlarau pawhin chaw a mamawh ve chiah tho a, nitin Thlarau chaw Bible chhiar leh tawngtaiin kan ei thin tur a ni. Chutilo chuan, chawei lo chu an chau thin angin kan lo chau tial tial ang a, tluk chhiat leh engmah ti theiloa awm a hlauhawm em em a ni.
Shillong-a ka naupang hmuh kha ka han ngaihtuah thin a, a nu leh pate chu an va mangangin an rilru a va han hah thei thin dawn em ve aw, tiin ka ngaihtuah a. A thianteho chu kum an tlinin an kal thei vek ang a, ani chu a kal thei dawn si lo. A thiante chu kum 2 an nih chuan tawng an zir tan ang a, ani erawh cuan engmah a sawi ve thiam dawn si lo, kum 4 an nihin Sikul an kal sang sang ang a, Sikulah thil an sawirual dual dual ang a, an lehkhabute an chhiar ang a, ani erawhchu Wheel chair-a nawr a ngai ang a, Lehkha zir te chu khawi lamah a ni dawn si. A thianten khawlaiah infiamin ball te an pet ang a, ani chu Wheel chair atangin a lo nui vur vur thei chauh dawn si. Ava manganthlak dawn teh lul mai em.
Keini Ringtute pawh, zawi zawia lo thang liana, midang chawmhlawm ringawt nilova, mahnia Bible te chhiar a, Pathian thuziak tha tak takte chhiar a, tawngtaia Pathian pawl thin tur leh, kan neih ang tawk tawk pawh min petu Lalpa hnena kan lawmthu sawi nan leh a ram lo zauh zel nan pe let ve thin tur kan ni. Pathian hian a malsawmna min pek atang hian hmun sawma thena hmunkhat hi a hauh tlat a, Full time-a a rawng bawltute ei tur leh Kohhran ho inenkawl nan a ti a ni.(Malakia 3:8-12).
Tirhkoh Paula meuh pawh hian, “Hmu tawh reng inti ka ni lo va, famkim tawh reng inti pawh ka ni hek lo; “Krista mi man chhan chu ka man thei dah law maw,” tiin a umin ka um zawk a ni. Tia sawi zelin… Hnung lama thil awmte chu theihnghilh, hma lama thil awmte chu banin, Krista Isuaa Pathian chung lam kohchhan lawman hmu turin tiam chin lam chu ka pan talh talh a ni,” a tia ni. A tawpah phei chuan, “Eng pawh ni sela, kan thlen chin atang khan hma I sawn zel ang u” tiin ringtu tin te min ngen a ni.
Sakawr Tawlailir chu Sakawrin a hnuk kal thin a, Sakawr chu Tawlailir hmaah a awm a ngai a ni. Sakawr chu Tawlailir hnunga kan dah tlat chuan, a kal thei thin lo a ni. Chutiang bawkin Piantharna chiang tak an neih loh chuan Kristian tam tak an kal hlei thei thin lo a ni. A Piantharna khan a pawt kal zel tur a ni si a. Chutihlai erawh chuan, Mi Thlarauva lo piang thar chu, minung thar alo ni a, lo thanglian zel tur a ni. Kristian nun than len zelna leh mahnia rawngbawl ve thei tawh tura ngaih, he naupang piangsual leh mi anglo ang maia, buhhawp fah ngai leh nawrkal ngai kan nih reng mai zawngin, Kan Lalpa hi kan va ti lungngai thin dawn em.

Similar Posts:

• I ngaihtuah ngai em?
• Chaw duh vanga Kristiante leh Krismas
• Zofa te leh kan kristianna
• Thu awmze nei
• 100% Kristian kan ni em?

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Sunday, November 11th, 2012 at 12:50 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.