mi(sual).com

NIKHAW HRELOVA A TLUK LAIIN PAWNGSUAL A TAWK A NAU A PAI A, A KUT LEH KE A ZENGA, PILE CANCER A NEI A, LUNGNATNA IN A TLAKBUAK BAWK..SAMARI MITHA I NI VE THEI DAWN EM LE..

9th November : Lawngtlai Disrict Vathuampui khua-a cheng Pi Chhawnchiri chuan fa hmeichhia hlir 6 a nei a, a fanu 6 zinga 4 te chuan an tet laiin an boral sana naupang ber dawttu Vannunthianghlimi leh a u uleh Tlanmawii te chu an dam khawchhuak a, a pasal nen an inthen hnuah a fanu te pahnih chu Pi Chhawnchiri hian a tulpui chho ta a ni. Pi Chhawni chuan a fa te chawm nan a rem rem thawkin lolam hna te a thawk thin a, zing dar 6 ah chawfun nen fehchhuakin a chang chuan thim dawnah te in a thleng chauh thin.

Vannunthianghlimi chu hmeichhe naupang kum 9 mi a nih laiin an khua atanga ke-a darkar khat kal vel, Chamdurtlangah mi mo hruaitur kal rualin a zirlai bu tur, mi lehkhabu hlui dil turin a kal ve a, hemi ni hian mi inchhungah luhaiin a tlu a, a chilphuan te a tla a, biaktheih lohin a awm zui ta a ni. Chutia a kaih atang chuan a kut leh ke a zawi a, a zeng tan ta bawk a. A nu feh hawngin a chanchin a hriat chuan Chamdurtlang atangin an khua Vathuampuiah a hruai phei a, chutatang chuan khum betin Vannunthianghlimi hi a damlo zui ta a ni. Hmeichhe naupang thantha pang ngai tak ni thin kha a kut leh ke a zenga kum khat chhung chu tawng thei lovin a awm ta a, chmi hnuah chuan a khat tawkin kaih/phungzawl kan tih ang hian a tlu ta fo mai a ni. A kaih zin chang chuan ni khatah vawi thum lai te pawh a tlu thin a, a kaih nat chang chuan karkhat zet te a khum beta nat chang a nei thin. Chutianga na taka a kaih chuan, a kaih leh hun kha a chang a khat deuh thin a, na vak lova ni khata vawi hnih vawithum a kaih fo ai chuan na deuh taka a kaih khan a chhungte tan a zang khai thlak deuh zawk ni a hriat chang te an nei thin.

Vannunthianghlimi u chuan kum 2005 khan Aizawl lamah pasal a neih san a, a nu nen chauh chuan an awm ta a ni. A nu Pi Chhawni chuan nitin ei zawngin a fehchhuah san lo thei lova, amahin inah a kalsan mai thin. Chhun lama a lo kaih chang pawhin ama harh harhin a lo harh ve leh mai thin a, chutiang reng reng chuan damchhung hun an hmang chho ta a ni.

Kum 2008-ah chuan Vannunthianghlimi chu kum 17 mi vel a ni ve tawh a, a kut leh ke zeng te chu a na thin a, a na a rawn chhuah tawh chuan a vung nasa thei hle mai. A ke leh a kut zeng na a chhuah chang chuan awmngaihna pawh hrelova awm chang a ngah thin. Chutiang dinhmunah chuan awm mahsela an nufa chuan Pathian lakah an vui ngai reng lova, a na a chhuah lohlai chuan Vannunthianghlimin chuan inkhawm a thulh ngai lo. Harsa takin zawimuanga kalin Pathian biakin lam a pan hram hram thin.

A u in Aizawl lama pasal a neihsan hnu chuan a nu feh hlana a tluk chang pawhin bawihsawmtu a nei ngai ta lova, chu chu remchangah lain an kawmthlang pa Pu Lalchungrela kum 60 mi vel nupui fanau pawmlai nei chuan bawlhhlawh takin a lo khawih thin tih a hnuah an hrechhuak ta a ni.

Vannunthianghlimi hi a tluk dawn hian a au vak thin a, nikhawhrelovin a awm zui mai thin. Chutia a au thawm chu hriain an kawmthlang pa chuan amah buaipui niawm taka kalin damlo nikhawhrelova awm, rualbanlo nula khawngaihthlak lakah chuan sex a lo hmang thin niin an sawi. Vannunthianghlimi chu a thatin thi neih a tawp a, a pum a lo lian tan bawk a, a nu Pi Chhawni chu nau chhar thin a nih avangin a fanu awm dan chuan a ngaih a ti tha thei lova, thil awmdan a zawt chiang ta a ni. Natna avanga riru leh taksa lama rual banlo nula khawngaihthlak chuan a chunga thilthleng chu a nu hnenah a sawi ta a ni.
Nikhawhrelova a awm lai a an kawmthlangpa in a khawih lai chuan tumkhat chu a rawn harhchhuak a, a chunga thil tenawm tak lo ti tu chu a kut zeng chaklo tak chuan a theih tawpin a han chum thin a, awmzia a awm si lo. A rilru a na a, a tap a, a khawihtupa lah chuan a sawichhuah chuan kahhlumah a vau vangin a hlau em em maia a chunga thilthleng rapthlak tak chu a lo sawichhuak ngamlo niin a u Tlanmawii chuan a sawi.

Chhung hnaivai leh thenrual te hrilhin an chunga thilthleng chu an ngaihtuah ho ta a, Pu Lalchungrela pawh thilawm dan an zawt a, a ni pawh chuan a thiltih dan chu sawiin vawi tam tak a lo khawih tawh tih hriatchhuah a ni ta a, Police lamah FIR te pawh an thehlut a, nimahsela Pu Lalchungrela hi man a ni mai lo niin Pi Tlanmawii, Vannunthianghlimi u chuan min hrilh.

A nau pai a lo lian zel a, Pi Chhawni chuan a fanu chu Aizawl lam a panpui ta a ni. A nau pai thla a kim hmain Vannunthianghlimi chu a nantna ngai bawk avangin a tlu a, a pum lam a sawh nat avangin emergency-in Civil Hospitalah a nau pai chu kum 2009 march thlak khan an zaichhuah sak ta a ni. Naute chu hmeichhia a ni a, an dinhmunah enkawl thei chi ziazang an nih loh avangin Child welfare ten naute chu an la ta a ni. An dinhmun hi hriain Pi Vanramchuangi (Ruatfela Nu) te an che ta vat vat mai a, pawikhawihtu Pu Lalchungrela pawh chu Police ten an mana Jailah dah luh a ni a, mahse rei tang lovin an bail chhuak leh thuai niin Vannunthianghlimi u chuan a sawi bawk.

NATNA DANGIN A TLAKBUAK..
Kawvelah hian vanduai tur bika ruat hi an awm em ni tih mai a awl thin! Vannunthianghlimi chu a naupai zaichhuah a nih hnu chuan Pile Cancer a nei tih hmuhchhuah a ni a, a Pile Cancer chu zai a ni a, a nakah a ek siakchhuakna tur siam a ni. Chumai a la ni lo! Vannunthianghlimi hi lunglam natna in a tlakbuak zui bawk a, Tunah hian Aizawl Zotlangah an nufa hian mi inhnuaiah an cheng mek a, mimal leh pawl ang tea tanpuina an hmuh te chu an in tunnunna a ni. Nimin November ni 8 khan Samari mitha tanpuina cheng singkhat kengin kan va kan ve a, hemi te nufa hian i tanpuina an mamawh takzet a ni…”Heng mi te ber chunga ti chu ka chunga ti in ni” a ti si a..