mi(sual).com

Pi leh pute hun kha kan thlir let chuan an tawngkam hman te, an nitin khawsak dan leh khawtlang nun inkaihhruaina an kalpui dan te zir tham tam tak a awm awm e. A bikin tawngkam hman danah an fimkhur hle a, tawng malsawm leh mawi hman hun an hria a, chutih rualin khawtlang mipui nun siamthatna atana zilhna tawngkam erawh ngêng chhun hlak tur khawpa nâ te pawh a awm nawk bawk thin.  A zavaiin sawi vek seng lo mah ila, tlangval mit tikham deuhte hnena zilhna tawngkam an hman thin zinga pakhat ilo thlur bing dawn teh ang.

Kan hriat angin Pi leh Pute nun kha buaina leh thlaphannain a khat a. Khua leh khua inrun an chin avangin khaw kar kawng leh feh kawngah a fala kal a ralmuang lova, thlawhhma a binga neih pawh a ralmuang lo hle bawk. Chutih hunlai chuan khawtlanga hmingtha leh huaisen nih hlawhna chu sa kah theih vang te, tlawmngaih vang te, sahuai laka khawtlang venhim mai bakah, huaisenna atanga huaisen leh chhawnna avanga mi lu lak kha a ni. Chutiang mite chu khawtlang zah an kai a, tlangval naran el phak an ni ngai lo. Tin, Lal leh Upate pawhin ram chhuah leh ram mut thu hlaah pawh an thu an ngaichang thin. Nula ina thut khawmnaah pawh tlangvalte’n an zah hle thin a, chutih rualin chung nula rima thut khawmnaah chuan tlangval hawihhawm lo leh nungchang mawi lo an awm ve chawk thin a, chutianga mit tikham an awm chuan mi lu leh sa lu la thin, mihratkhawkhengte chuan, “Khah, kiang rawh ka chhâwnin a hem ang che” an ti thin a ni. Hmanlai chuan Kel chal hmul leh latuak an chhum pawlh thin a, chu chu mihuaisen, ral lu leh sa lu la theite’n an khim thin a ni. Chung mihuaisente chauh chuan he tawngkam, “Kiang rawh ka chhawnin a hem ang che” tih hi an hmang thin.

Tunah chuan kum zabi sawmhnih pakhatna kan chuang kai ta a, kan nun dan leh khawsak dan a danglam ta khawp mai. He tawngkam hian thangtharte hriat a hlawh tawh meuh lo pawh a ni thei e. A hriate pawhin tunlai atan chuan a pawimawhna a awm tawh lo kan ti mai thei bawk. Mahse he thu hi hmun hrang hranga Mizo zirlaite’n kan hriatreng turte zinga mi a ni. Hmun hrang hrangah Mizo thalaite chhan hrang hrang avangin kan inzârpharh a, kan hmalam hun atana kan  inbuatsaihna kawngah hian  he tawngkam hian kan rilruah hmun luah se tumruhna min pe thei a ni. Mizo thalaite hna nghet mumal nei lo thahnem tak kan awm a, hnathawhna awm chhunah lah chuan hnamdangin an duh duhin min chawklet leh ta nghal a. Hotute’n, “I hun a tawp tawh” an tih ruala hna chawlh san ngaih chang a awm fo thin. Hmun tha leh hotu nihna hnamdangin an luah khat a, thenkhat erawh Mizo hming ti tha, chhuanawm tak tak an awm rualin a tam zawk chu hnamdang hnuaiah anmahni tihlawm loh hlau reng rengin hna kan thawk a, min hnuaichhiah a ni ber mai. “Engatinge hnamdangin min hrual min hrual bik le?” tih hi Mizo thalaite’n kan inzawh makmawh a ni.  Hnam dang hnuaia kan kûn fo na chhan chu an tumruh leh taihmakna avangin Mihuaisente Chhâwn (thiamna tak tak) an khim tlat vang  a ni. Chu an chhawn khim hrereng chung chuan Mizote min sawp kual thin a ni. Chuvangin Mizo thalaite kan thangharh a ngai a, taima tak leh tumruh takin thiamna tak tak kan zir chhuah a ngai a ni. Mi lu leh sa lu lak vanga chhâwn leh diar tial khim ni lovin, taihmakna leh tumruhna avang zawkin, Kel pa hmul leh latuak atanga siam ni lo, tunlai thiamna leh fina ‘chhâwn’ ngei hi khim kan tum tur a ni. Thiamna tak tak kan nei a nih ngat chuan hmanlai Lal leh Upate’n mi huaisen te thu an ngaichang ang khan miten kan thu an ngaichang ve dawn a ni.

Engvangin nge mi huaisente khan tlangval naran te hnenah chutiang thu an chhakchhuah ngam? Chiang taka a chhanna lang nghal chu tlangval naran te khan chutiang thu sawi ve turin chhawn an la khim ve loh vang a ni. Chutiang chiah chuan thiamna tak tak nei si lova kan inzir chhuak a nih chuan, thiamna tak tak neia zir chhuakte’n an thiamna chhâwn-in hmun hrang hranga hna kan thawhnaah te, a bik takin hna zawnnah diriam takin min hem kiang sawk sawk mai dawn a ni.

Thiamna tak tak neih tum lem lova lehkha zir ve satliah hian awmzia a nei lo. Chuavangin Mizo thalaite tumruh leh taima takin thiamna tak tak (quality) neih tumin tan la ila, hnamdang ten an duh duhin min hnuaichhiah tum mahse thiamna tak tak kan neih chuan mimal tinte hian khawi hmunah pawh, aw chhuaha he thu sawi kher ngai lovin, kan thiamna chhâwn khim chu hmathehah hmangin ‘Kiang rawh ka chhâwnin a hem ang che’ kan ti thei dawn a ni.

Similar Posts:

• Mizoram Designers’ Week
• Thalai ten tan kan lak a ngai
• Mizo thalaite kan chep lo, kan thawl mah mah!
• kan hmeichhiate..
• Ram dang mi Mizoram a chengte

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, November 22nd, 2012 at 9:00 am and is filed under Advice, More than words. You can follow any responses to this entry through the RSS 2.0 feed. You can leave a response, or trackback from your own site.