mi(sual).com

Kum nga nufa zet a liam ta e. Ka nun tam zawk buai reng renga ka hman hnuah, inchhir reng reng bawkin ka lo hmang zo tawh a. Ka rilru leh mitthla-ah erawh an la riak báng lo, inchhir-in bãn a chen ta lo…

Thingtlang khaw cheng ker atanga thing delh lo, lung delh lova chawr ta nafam chu, zirna avanga khawpuia ka input luh a tul a. Zirna In a ka tel a chinah, min ngaihmelhtu ka tawn hnu phei chuan ka nun ka hlauh zo ta. A tel lova darkar tam ka hman liam ka hlau va, sikul hawisana a kianga ka tal hun kha, a tam zawk hial reng a ni!

A kuma kumpui linglet thum a liam meuh chuan, kan lo dai pilril ta a ni ang e, ka nun tam zawk buainaah ka inhnuk lut ta. Lehkha ip ka dawng a, heti hian a lo inziak a- “Ka ruak lovin ka hria, nangmah nen ngeia fiah a tha in ka hria-Linda” tiin a lo inziak a. Mak tihna erawh ka nei hranpa lo, ka hmalam ka thlir erawh chuan, thinlung a bang bo va, thinlungin ar bo a zawng tak meuh meuh thung.

Kum naupanna leh chhungte ve ve atanga dodalna nasa tak avanga, zawhte no nei ang maia nun kan hman dun erawh a tam narawh e. Engkim huam a, chaw bel hran kan ur dun hnu phei chuan, put tawrh bak thiam nei lo ta nafam chu inhlawh lawp lawp chang lah a tam. Rilru hah a zual chang chuan, mahni nunna meuh pawh dahthat ka nap bang hek lo!!

Rilru hah luat avanga ka tih ngai loh ka ruih suakbak avangin, ekna ngaia é leh tura kan in mangtha hial a tul ta. Lunglen tuara ka rum chang a tam, zantlai nêma kan zalna laikhum ka belh ngam loh kha a tam lua e. Ka fa lo piang mai tur kha, lo piang lo thei tal se…vaihna vartian-in var zai a rel mawlh si lo.

Ka nun a ro, a kal sual tial tial a. Ka suahsualna vawrtawp avanga hremna na zawk ka tawrh phah hial a tul ta. Chutah chuan chhun leh zan a dang lam lova, mite hlauh rawn kei ka tana lung in bang chu a chhah ngei mai. Chutah chuan ni eng a lang ngai lova, beiseina chauhvin ka nun ka chhiar a. Nuntha zawk neih nana hman ka tum tlat a, mahse tah mai a awl fo thin. Ka fa ngei lo piang tur chu, ka hmuh phalsak ka ni a. A pian ni leh thla, a hmui hmelah ka fa ngei a ni tih ka ringhlel lo. Holding her hands with tears from my eyes,”min lo nghak reng rawh aw”ka tih lai kha mitthlaah a rawn lang nawn awn awn a. Lung In bang thim hnuaia zal leh tura ka liam a tul a, tawrh a va han har chung chuang em.

Ka hremna ka tling tla dawn tep tawh a. Mahse, mahse…patling thinlung keh chhe vek khawpa thu thin thawng ka dawng ta! Ka fapa Dolrich-a ngei chu ka fa a ni lo mai thei a, chiangtaka engmah a sawi theih loh thu min hrilh ta lawi a. A hmui hmelah ringhlel mah suh i, mak tihna leh rinhlelhna thar ten min buan tup tup a. A va na ngai em…!!

Ni e, a na a ni. Ka han chhût neuh neuh va, ka hmel leh ka hming a hre ngai lovang maw? Ka hmangaihna derthawng te tal a dawng ngai dawn lo em ni? Chunglama ka pa chauh khian, ka rilru leh a natna a hrethiam awm si a…zan tam hetah ka la zal dawn…zawhna tam tak ka inzawt a, ka buai nuaih a ni ber. He ka hremna hi lo tling tla thei pawh lo ni ta reng ila, ka tan In pawn chu, hremna tual zawl aiin a nep hauh chuang lovang.
Hun a her ang zelin, kum a her liam ve zel a. Zalen ka ni ta (I’m set to be free) ti a ka hlimna ni a lo inherchhuak ta. Tan In pawna ka hmuh chu, ka nupui, midangin ka fa a pawm, a pa ni zawk tur chu a ni. Thingthiin ka tlu a, ka tap a, mi â ka va ang ngai em!

Hei erawh ka hai chuang lo, kei he khawvel dana convict hlata a awm theih nana a dawt sawi a ni. I believed the lies she told me, now here am I alone and blue, all because I loved no-one but her. A kuta an khen behna aiin a nep chuang lo-kei ka tan chuan.
Mahse, dem thei ka ni lova, ka dem phal ngai chuang reng reng lo’ng. Khatia hun lo taka ka lo chet sual pui tak mai avang khan, hremna ka phu a ni. Chapel bul ngei ah chuan, a thinlunga hmangaihna mêl lung bun thei ka ni a, ka thiam loh a ni. Inchhirin awmzia a nei lova, ka hringnun ten kal lai an kham reng dawn ta a ni.

Similar Posts:

• Bang Rawh Se
• Kum hlui thlah zan chuan
• Lalremruata – A thlawn mai maw
• Nau ka awi ve a!
• Enteh a lo her chhuak leh dawn ta(Krismas Hla)

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, November 22nd, 2012 at 6:57 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.