mi(sual).com

“Tin, Pathian hmangaihtu, amaha ruat anga a kohvate tan chuan, an thatna turin engkimin a thawhsak hlawm thin tih kan hria” (Rom 8:28)

Hun rei deuh hlek tawhah khan, Scotland rama khaw pakhatah hian Pu Clark-a te chhungkua hi an awm a. An chhungkuaa United States a zin an chak em em mai athin a, an chhungkaw ti ti berah an neih a, tihhlawhtlin ngei tumin sum pawh an tuak tang tang a ni. Kum 2/3 tehmeuh an inkhawl hnu chuan, an inkhawl ngah ta a, America a kal theihna tur Passport te pawh an tifel ta vek a, vanneih thlak tak main, lawng thar lian leh ropui tak mai, a hun laia chanchin thar luahtu ber pakhat, miten hahipa an sawi Titanic lawngah ngei mai chuan an chuang thei dawn lehnghal a, an sahawkin an hlim tak meuh a ni.

Tichuan le, an chhuah hun alo hnai ta tak zet tihah chuan, an fapa naupang ber chu Khawlaia ui vak vel mai mai thin, ui thianghlim lo tak chuan a chawnah a she ta hlauh mai a. Doctor thiam takin a hliam chu a thui sak na a, kha ui kha a chiang kuan lo hem avangin Ui a hri(rabies) vei ngei tura ngaih a ni a, an inah chuan rawmawl eng khaiin, dah hran anni ta a, ni 14 chhung chu midang zinga a awm a phal ta lo a ni.

Naktip maia Titanic lawng hmingthanga chuang a, US pan vang vang tura inngaih tawh nak lai chuan, ni 14 chhung zet mai khung hran an han ni ta chu, an tuar thiam lo hle mai a, Pathian pawh an dem rum rum mai a, Titanic in England Lawngchawlhna a chhuahsan ni chuan, Pa ber chuan tum bur chungin a thlir liam a, a mittui a tla hial a, An chhungkaw chunga harsatna lo thleng avang chuan Pathian pawh a rilruin anchhia a lawh hial a ni.

Mahse le, ni 5 hnu lekah chuan thu thar rapthlak tak mai chuan Scotland leh khawvel a tuam ta a; chu chu, Titanic ropui lutuk leh pil thei lo ang hial tura an lo sawi chu Vur tlang sut avangin tuifinriatah a pil a, a chhunga chuang mi za tam tak an thi tih thu thar chuan khawvel a deng chhuak ta a ni. Pu Clark-a te chhungkua pawh kha Lawnglian Titanic a chuang ngei tur kha an ni a, an fapa uiin a seh hlauh avanga chuang ve thei ta lo kha an ni si a, lo chuang nita se, an buai leh thlabar dan tur zia te, chhungkaw kima damchhuah a beisei awm loh zia te an han ngaihtuah a. An chunga Pathian hnathawh thalo ni ngeia an hriat Pathian pawh anchhia an lo lawh tawhna avang ngei khan, Pathian an fak leh ta thung a ni.

Pu Clark an chu thu thar a han chhiar chiah mai chu; a fapa ui she, a ke pawh la in tuam bar mai chu a kuah ta vawng vawng mai a, Pathian hnenah mittui tla zawih zawihin lawmthu a sawi ve ta thung a ni.

Keimahni theuh han in chhut let ta I la, kan chungah kan beisei loh taka thil duhawm lo tak leh ‘Vanduaina’ ni a kan hriat a lo thlen change kan thil tum leh ruahman te kan tih theih loh chang hian, kan vuiin Pathian kan dem rum rum thin em? Tam tak phei chuan Pathian awm pawh kan ringhlel rum rum thin a ni lawm ni? Kan thin a han ur tak tak chuan, kan vanduaina chhan nia kan hriatte puhmawh tur kan zawng a, Pathian hial pawh anchhia lawh kan duh mai thin em?

Chutiang ang hun a lo thlen hunah chuan, dawhtheihna kan mamawh thin ngawt mai. Tunah hrethiam rihlo mah ila, nakinah kan thatna tuar ani tih hunin ala rawn hai lang leh fo thin a ni. Kan chhungte leh kan hmangaih tak tak te an han boral change hian, tuar thiam a hark an ti thin a, Pathian kan dem rum rum a, Pathian a awm tak tak te pawh kan ringhlel rum rum thin em? Nakinah engkim a lan chian vek hunah chuan, Kan lainate, kan fa te, kan nu leh pa leh kan nupui/pasal te ngai ngawih ngawih chunga kan then tak te kha, Pathianin an thih phal lovin, dam tlang ta se, suala boral leh thamral mai mai tur, a hun taka Pathianin a lak te an lo ni ang a, Vanramah hlim tawp hlau lova kan in tawh leh hunah chuan, Lalpa kan fak tawh ang.

Lalpan a thu malsawm rawh se, Amen.

Similar Posts:

• Kristian chhungkua leh kan tehdan diktawk lo te
• RMS Queen Mary 2
• Ngaidam miah suh
• Nun Tihlimtu – Naupangte -II
• Lal Davida

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, November 25th, 2012 at 11:30 am and is filed under Event, Religion. You can follow any responses to this entry through the RSS 2.0 feed. You can leave a response, or trackback from your own site.