Thilthlawnpek

November 25th, 2012 3:00 pm by saint sammoo

Ka Neih tawk a Nawi
Ka Theih tawk a Tawi
Ka Phak tawk a Phai
Ka Tlin tawk a Tlem

Chunglam ka thlir a,
Lal thar lo piang tur khian,
I hausa min ti tlat si.

A malsawm ka dawn min chhiar tir a,
Ka hausakzia ka hrechhuak a,
Chunglama ban pharin ka Tawngtai a.

“Lalpa, i piancham a lo thlen lai ngei hian,
Kei aia mamawh zawkte tan,
Ka sum bawm hi hawng ang che..” tiin.

Mi chi thum an awm..!

Thilpek dawn beisei.
Thilpek dawn beisei lem lo, midang pawh thilpek pe ngai lem lo.
Thilpek pe thin.

A chunga tarlan zingah khian a 2-na khi ka nihna a ni thin. Midang thilpek pe a, midang tanpui hi ka tihturah kan ngai ngai lem lo. Mahse kum enge maw zah liam ta atang khan ka phak ang tawk tawk a midang tanpui leh thilpek pek hi ka ching ve ta viau.

Kan Unau zingah a rethei ber ka ni a, kan thian zaho-ah ka pachhe ber bawk. Ka thawhpui te titi pawh ka zawm pha meuh lo. “Engtizia nge kei ni chhung hi…” ti a Pathian hnena vui hmui han put mai chang te pawh ka nei thin. Mahse he ti ka ni chung hian kei leh ka chhungte aia mamawh zawk hi ka hmuin ka tawng leh nawlh thin. Mi hausa leh mi liante tan chuan eng tham mah ni lo mahse midang thilpek ka pek hian a dawngtute ai maha ka lawm zawk chang a tam ka ring. A za tel leh a sang bi chauha midang tanpui tur emaw ka lo ti thin khan thilpek pek kawngah ka mit a lo ti del rei hle. Tunah chuan midang tanpuia thilpek pe tur hian tlem lua leh te lua a awm lo tih-ah hian ka chiang ta hle mai. Kum tir atang hian pawisa nawi (coins) ka neih remchan ang ang hi Krismas tuka thenawm naupangte sem turin ka khawl thin a, a tih chi phian (tunah pawh ka khawl bawm a rit leh ta fu mai… za chuang fe chu a nih tawh ka ring)

Thilpek pek dawn hian mihring rilru atang chuan an mamawh dan in ang rau rauah pek chakawm leh chakawm vak lo hi an awm duh khawp mai. Mahse ka harhchhuak ta. Thilpek pek mai kha ka tihtur a ni a, a hmanna lam chu an mahni thu a ni a, ka buaipui zui ngai ta lo. A dawngtu ni lova a pe tu zawka ka tang thei hi ka lawm tawk viau.

Kumin pawh hei, kan nu nen veng mawng lam atanga tanin Krismas tuka cheng za emaw diat diata kan pek tur leh naupang lawm kan leisak tur te, krismas tuka an sa hmeh ve tur kan lei sak turte hming te kan ziak thla tan leh ta diat diat e.

Tisa leh Thlarau-ah pawh he thu hi ka ngaihdan a ni.

“Vawi sawm tawngtai sak aiin Vawi khat thiltihsak a tangkai zawk fo..”