(Khawvel hun inher dan ang zelin, suihlung a leng ve zel si… 
)
Exam kan zo taaa…
Thingtlang naupang tana nghahhlehawm tak pakhat chu kum tawp exam zawh kha a ni awm e. Buh lu nung chuha buai reng rengin ram tangrual zawng zawngin ram an riah thin avangin zirlai naupang exam bei lai leh tar hnathawk thei tawh lo te’n in kan nghak thin a. Mi tam zawk ramriaka an bo lai leh zirlai exam beih a nih avangin khawchhung pawh a reh duk thin. Tlai lam darthum vela buhherkhawl ri chu kan venga thawm awm chhun a ni mai awm e.
Tin heti hi a lo ni a, exam kan zawh ni la la chuan, ka nu leh pate ram riak zawm turin kan unauin kan inzui chhuak nghal dial a. Rilru kaptu ber lehkha zir a ngai tawh bawk si lo, aw kan va’n thawveng thin tak em!
Ram erawh a reh mawlh lo
Thlasik a inmung chho bawk a khua a thiang em em a, boruak lah a nuam bawk si. Ram riah laia chaw ei a tui thinzia te, buhzema buh chhumvun chung ngei mut a tui thinzia te rilrua hre rengin phur takin thusawi kan inchuh a, kan ri nawk nawk thin.
Lo kan hnaih ta maw tihah thenrualte Uuu hiii hiiii… tiin kan va miss call a. Phur taka buh seng lai te’n min han chhawn tak chinah phei chuan muang taka kal theih a ni tawh ngai lo. Kan mawngah hi min hawlhtu awm ni tlata hriain thlam thlen nghakhlel em em in kan tlan hlawk hlawk thin.
Bukthlam bel hliu hliau
Kar tluana buhsenga an khawsakna a nih avangin thlam bul leh a vel chu a bel tha hle a. A bul velah ni se derhken, zamzo, chuailopar, nghasih leh pangpar dang ta an lo vul chuk a. Thlamah kan tlanlut a, thlam chanve awh hial a buhzem ding ur te chuan thla a timuang em em a. A rang a rangin namthlakah kan chhuak a, kan nu leh pate buhsenga bung mek te chu kan au rawng rawng a. Lo mawng atanga min rawn chhawn van van han hriat takah chuan, an hmel hmuh chakin an bunna lam panin kan tlan dawr dawr thin.
Buh seng
Buh seng thiam lem lo mah ila, chhungte bula awm a ngaih tho avangin kan phurh awm tawk paiem/emping phurin buh sengin kan bung ve thin a. A tirah pangngai takin buh seng ve mah ila, rei a’n rial deuh chuan naupang kan nihna a lang fo. Buh vui buk tha tha lawrin kan hmanhlel ta thin a. Hnathawh tiawttu ni lovin, a tibuaitu kan ni leh mai thin. Tin, kan peih rei ngai lem lo bawk.
Buhsenga hrehawm ka tih ber chu, thlasik khawvawh laia vartianah ngei buh kung sang tak tak bawma zing dai tla han tawn vel kha. Zohnathawh kha zawng thil awlai tak chu a ni lo phawt mai. Hei vang te pawh hi a ni mahna, zohnathawh kan hreh em em ni.
Hmai mang niau nuau
Buh senga chhungte kan tanpui tak tak theih loh avangin leh thahnemngaih a nat em avangin chaw chhum turin thlam kan pan hma ngei a. Chhungte’n, ‘Mampuia chuan chaw chum a thiam a nia’ an tih fo avangin, a tak tak ni ngeiah ngaiin phur tawkin chaw ka’n chhum thin a nih kha.
Chawhmeh engemaw siam dawna bawlhlo a awm remchang lo emaw, an dahna hriat loh changin namthlakah kan ding er awr a, lo mawnga ka nute bung lai chu kan han au rawng rawng a. Nuuuu.., chumi chu khawnge I daaah’ kan han ti a. Anni lahin theih anga ringin min chhang ve bawk thin. Thlam atanga an bunna a hlat deuh phei chuan, kan inau nasa thei hle.
Nuihzatthlak te ber chu, eirawng kan bawl zo a, chhun chaw fak turin thlam an rawn pan sang sang a. Kei lah chu thlansa phungin intieirawngbawl tawkin ka lo tei vut vut a. Min hmu hmasa apiangin min nuih tet tet a. Ka nu a lo thlen chiah phei chuan hnathawk hah e ti lovin insum thei lek lovin a nui ta.
An nuih chhan chu eng dang a ni lo. Chawbel mang ka khawihna lama ka thlantla ka kut hmawra ka hruk avangin ka hmai chu a lo mang nuau niin. Samak dek an sawi iangin, mi nuih tawpah darthlalang ka hmachhawn te tea, ka nui ve hawk hawk thin.. 
Chhunzawm tur…
Similar Posts:
- Hmawlhte leh Artui in lawm thu
- Mei alh en
- Ui Hmul Tla (Alopecia)
- Ka Zak Chem Chem!
- Mizo leh Vegetarianism
November 28th, 2012 at 1:49 pm
A ngaihnawm leh dawn sa. Chhiar ang.
Report this comment
November 28th, 2012 at 2:22 pm
A ngaihnawm hle mai, han chhunzawm vat vat rawh khai. Hetiang lam hian lung a ti leng thin.
Report this comment
November 28th, 2012 at 3:29 pm
Lunglen thank hle mai, ka nu leh pa thi tawhte min tingai zualin chhungkim lai a va ngaihawm ve aw! Behlawi leh lakher anthur rah han chum pawlh Mai leh chaw rum tui tak Han ei te kha aw! Lunglen thlak kher mai.
Report this comment
November 28th, 2012 at 3:37 pm
Lakher anthur rah chhum pawlh nuai mai tin tur.
Report this comment
November 28th, 2012 at 4:46 pm
@ Zoelife… A mak khawp a sin. Khawpuia khawsaa, nitina office kal si hian (nih kan chak em em thin kha) thingtlang nun ngaiin ka lung a leng fo nia. Mihring nunphung dik tak a ni zawk nge ni?
Tun ang hun a thlen hi chuan, ka nu (fam) ka ngai vawng vawng thin…
Buhfai thar hlim ngei mai, zo thuka hem lum changel hnah chunga kan han khawrh khu vung vung a, Behlawi tui hang te, Fangra kawmei bawl phawn hluah te, hmarchate-sen rawt kawi nuai mai te han seh pawlh lai khan, hah taka hnathawk ni mah ila, lung a muang a, dam man a awm hliah hliah thin..
Report this comment
November 28th, 2012 at 5:37 pm
I thu ziak a ngaihnawm theih dan em em hi aw.. ka mitthla thiam nghal vek.
Report this comment
November 28th, 2012 at 7:11 pm
Mahming I sawi dik lutuk. Ka naupan lai nunah chuan buh seng ramriah zun hi ngaihawm ber pawl ani. Pakhat leh chu vaimim leh fanghma thar Hun vanglaiah inrinni ah loah kan feh a, thlamah maian sih hlimawm hlawt, kan han bai a, anthur, lengmaser, berul leh thlai dangte sawntlung pawng ami (thlam bul ami) lai chawp ngei kan han bai pawlh a, thereng a lo hram veng veng a, a van nuamin bai tui tak mai leh zobuh changel hnah a fun ngei kan han ei ho dar dar te kha, ka lung a leng lutuk, ka mittui a tling kiau mai
Report this comment
November 28th, 2012 at 8:04 pm
@ hnarliana.. Ka lawm e..
mahnia khawsak vang hi nge ni, nunhlui ngaiin lung a leng thin..
@ Zoelife.. Kan hun tawn a inang hle mai. Rualawh nei reng reng lova, kan thawhchhuah ang ang hlim taka kan chen kha a hlu ngawtin ka hre thin.
Report this comment
November 28th, 2012 at 8:30 pm
A ngaihnawm ka tih rualin ka hriatthiampui ve der lo mai che
Report this comment
November 28th, 2012 at 9:42 pm
I chhung te’n chaw chhum tur a an tirh che in thlam namthlaka ding poh el awlin “Chaw hi tui nei in nge nei loin chhum turrrr ??” tiin i au ve liah liah tawh em? Nunhlui ngaihawm tak a va ni em!
Report this comment
November 28th, 2012 at 9:55 pm
# 10…
@ ninja.. Nikhat chu ka pi thingphurin Zo-chhang chhum min vil tir ngawt a. A hmin nge hmin lo tiin tulthirin chhang chhum lai ka vit tawh alawm. Ka pi’n chhang a thur chiah chu mak a ti teh asin! Chhangfun ka vih pawh ber kha a lo putchhuak vek niin..
Report this comment
November 28th, 2012 at 11:27 pm
Khawih ngaihnawm leh khawp mai…
buhseng ramriah kher hi chu a vawt duh awm 
Report this comment
November 28th, 2012 at 11:35 pm
Ngaihnawm leh khups mai
Report this comment
November 29th, 2012 at 4:07 am
“You can take a man from a village, but you can’t take a village from a man !” an ti em aw ???
Chuvangin “parlak” & “buh-phal” te…Fasuar & buh-vuak te hi i rawn cont. ngei tur a ni !
Buh-chhek kha chu thu hran nise
Report this comment
November 29th, 2012 at 4:23 am
Tha ve
Report this comment
November 29th, 2012 at 8:57 am
@ Puii… Ka ziahlan ang khian, zing daitla han tawn vel khi chu vawt ve tak a ni. Buh chungah kan mu tlangpui a, a lum nuam thin khawp thung…
@ lushai_er… I thu ziahchhuah chu ka pawm zawng tak a ni, confi vak lo mah la..
Buhchhek, tlang-buh-phurh, ladt., ekhai, ka phur lutuk ang tih ka hlauhlel love a.. 
Report this comment
November 29th, 2012 at 6:54 pm
Mahming, tia i rawn ziah hi chuan nghilh tawh hnu tam tak min hriatchhuah tir thin. Buhseng ramriah erawh a takin ka tawng lova, lung erawh i tileng.
Report this comment
November 30th, 2012 at 9:21 am
@ sheldon… Ka lawm e.
Thingtlanga chen bakah, kan khua kha a thingtlang rei ve bawk a. Naupang te e ti lo vin thingtlang nun tawnhriat erawh ka nei ve nual. Tin, hun kal tawh ka dawnkir changin, ka nu (fam), hunawl ka neih apianga a hnathawhnaa ka zui thin ka hrechhuak fo thin..
Report this comment