Tunlai chu Special Report leh Chanchinbu vel atanga ka hmuh atangin hman atanga ka sawi tawh, ” A thleng lovang” kan lo tih ve thlak rawk thin kha a thleng ta tlat mai. Denomination tarmit hlip thla theuhin i han sawi ho chhin teh ang u hmiang… Thenkhat hi chuan he ka post avang hian min en dan pawh a mak deuh maithei a, dawt ka sawi lem lo bawk a, in duh tawk khan min lo luak khum teh u.
Misual.com a ka post hmasa ber ah khan Mizoram a missionary rawn lut hmasa ber chungchanga ka zawhna ka rawn post a, History khawihbuai theih anih ka hlauh vang a ni tih pawh ka ziak tel nghe nghe a. Tichuan, tun Synod inkhawmpui chuan “Chanchin Tha thlen ni ah March 15, 1891 an pawm” tih thu Vanglaini ah a lo ziak kulh mai a. Mizoram Gospel Centenary 1994 kuma Mizoram pumin kan lawm atanga chhut chuan kum 3 lawihin kan lo lawm sual anih deuh hmel tak ber chu..!!!
Engati nge tun ataka Missionary lo luh hun leh tute nge lo lut hmasa tih hi kohhran ber hian a la buaipui le aw??? Hmasa nih duh leh hmahruaitu nih duh vang ringawta he thil hi ti an nih chuan a ropui lo khawpin kohhran neitu Isua ngeng a chhun khawp ang le..!! Document leh proof tha tak tak Synod hian a lo nei khiau anih chuan engati nge Gospel Centenary kha 1994 khan a lawm ve kher? Engati nge 1991 ah khan a hranin a lo lawm mai loh aw????
Mizoram Gospel Bi-Centenary chu kan lawm ho dawn tawh lo phawt chu a ni a, thangtharte hian engtin tak min ngai ang maw? Vanramah pawh hian kan thu hrang thup mai dawn nge, kohhran pawl dang thutpui duh lo tur hi kan tam awm mange…. Pulpitah kohhran dang lawn thiang lo, Kohhran inneih pawlh thiang lo…thiang lo..thiang lo…kan hmu tam lutuk hi Vanramah pawh Mizo kristiante chu a “Ten chhe” pawl tak kan nih ngei a rinawm..!!!
Tin, thurel pakhat lo lang tel leh chu ” Hlamzuih ni 90 ni thin tih tlem rawtna” hi kohhran bil hmalakna chi nge ni ang, YMA leh sawrkar tangkawp, dan siamtu leh kengkawhna lama mipui hmahruaitute tih chi ni zawk ang?? Kohhran pakhat duhdan hi Mizorama kohhran zawng zawng duhdan a ni angem? Sawrkara ngenna thlen ni lova tih tlem rawtna tih anih avang hian Presbyterian member te chauh zawm tur atan an ti nge phei chu a hriatthiam har tak a ni.
Thangtharte hi thil ngaihtuah leh chik lamah hian hma an sawn nasa tawh angreng si a, kohhran inpawngnekna avang leh kohhran huanga thil duhawm lo tak tak thleng thinte avang hian kan thalai tam tak hi kohhranah hian an hel tan ta tih hi sawi kher ngai lovin pawl 3 pass pawhin kan hrethiam vek ang le. Hetia kohhran(Eng kohhran pawh) mission field a inluhthuah, ringtu in thlemchhuahsak, kohhran innek ran, Kohhran dangin an ramchhunga an thil tih ang apiang a ram lehlama thungrulh tum tlat mai te, eiru tih hriat ngawih ngawihte sum nena kohhran sum hrawm na tak takte avang hian Zoram thalai tam tak beng a thlep tan a, Atheist hial an lo awm tan ta hi a mak hran hauh awm lo e.
Ka post leh comment lamah te “Mizorama Missionary hmasa ber thlak anih tep” ka rin thu kha hei a thleng dik chho mek a, January 11 Missionary Day a kan hman te pawh hi Mizoram Sawrkar holiday a ni a, thlak tum anih leh ngei a rinawm a, Zarkawt tlanga Centenary lungphuna Mizoram Missionary hmasa ber hming inziahna lung te khi khuh emaw thlak a ni tep tawh a rinawm hle a ni.
Remna siamtute chu an eng a thawl e…
Mizoram Gospel Centenary Khuang lianpui pawh kha an lum bo duh tep tawh ang a.. 
March thla ah Holiday an puan leh dawn chuan holiday tam sawt ni mai a, sawrkar hnathawk ho tan nuam a belh leh ni mai. 
Similar Posts:
- He thil hi chu kohhran(denomination) ang zawngin i la tawh lo hram teh ang u, khawngaihtakin!
- Church Denomination leh Mizo Kristiante
- Sikulpui Centenary
- Mapeka’n khiang a awi ve ta
- Mizoram hmun ka hmuh duhte
December 14th, 2012 at 8:48 am
Century siam hram teh ang. Hlamzuih chunghangah hi chuan Synod thurel hi tha viau in ka hria. Mi convince chuang lo tur a history biased deuhva kan reinterpret thin hi erawhchu a pawi thui ang tih ka hlau khawp mai. Mizoramah hian kohhran a ropui khawp mai. Rational taka bei tur kan mithiam leh university professor te hi a thusa nasa ah an la tang lehnghal a. Mahse hetiang reng hi a ni ngawt dawn lova, a kohhran ngei hian Pathian ram buaipui lovin intih ropui an tum chuan suicide kawng an zawh mai ang. “2010s kha Mizoram kohhran ‘heyday’ a ni” an ti lauh lauh mai ang fimkhur tlang teh se.
Report this comment
December 14th, 2012 at 10:02 am
Pu Vakul, baptisma chungchang hi chu naupang chhandamna an rawn mention keuh avanga thual nawn mai ka ni. Tin, hlamzuih tam vak tawh lo tihbova, a social consequence thlir map lova hmalakna a awm ber hi tih hi a ni e. Hlamzuih tihbo hian rin aiin stake a ngah dawn a, mizo khawtlang zawng zawng huap anih avangin a reltu tur dik tak kutah dah mai se ka ti zawk a ni e, a tihbo duh loh ngawr ngawr vang ni lovin. MZP in zirlai hamthatna buaipui lova political issue a lo khel ve chhen ang anih ber chu. Tha viau tho, mahni kuang lo nawr, mi kuanga chaw awm nawrbuak palh hlauhawm tho si.
Report this comment