mi(sual).com

Pastor leh kohhran upate pawh hian Committee-naah chauh zu permit pek an duh lo va, anmahni (mimal) chuan permit pek an duh vek titute hi kohhrana inhmang vak lo, kar khata vawi khat bak inkhawm ngai lote an ni. Mi pahnih khat titi sawi uar ching sawi a ni an ti.

Zu hi duh hun hunah lei tur a awm, permit pek lai ang tho kha a ni. Zu permit pek loh avangin zu chhia a tam a, thih phah an tam a ni ti an awm thin. Hetianga sawi chingte hi a rûka zu in ching an ni a. Kohhran leh khawtlanga tangkai ve tak takte pawh an awm an ti. Zu permit pek lai kha a rei tawh a, khatih lai khan kartin zu truck trip sarih lak luh a ni a. Tunlai hian kartin truck trip thum man tur a awm ang em? an ti.

Mizorama Zu permit pek laia ‘a sen chi’-ah khan Zu chhia a tam em em mai a. Zu chhe in an tam avangin an taksain a zo lo va, ‘chiri’ an tam hle a ni. Chiri lo chhuahna bul a ni an ti. Chuvangin, a sen chi duh lova Mizo thlawr Rakzu in zawk tlat an awm nual a ni, an ti. Zu permit pek leh rawttute chu a tlangpuiin a ruka zu in, mahni in control thei, thlaraubo vei lama mi thahnemngai vak lote an ni an ti. Zu in duh nghei thei lote chuan zu permit pek leh hi an sawi an sawi ve ngai lo, an mamawh tawk chu an hmu ve zel an ti.

Langsar taka zu zawrh a nih loh avanga zu in ta lote hian zu permit pek leh a in leh an hlau ber an ti. Insum zawh loh an hlau a ni an ti.

Zu permit pek lai khan Aizawl nula zaa sawmrukin zu in an ching a, tlangval zaa sawmriatin, pa kum 60 hnuai lam zaa 70 in zu in an ching a. Zu permit pek loh hian nula zaa panga leh tlangval zaa 10 velin zu in an ching a. Pa kum 60 hnuai lam zaa sawmin zu in an ching. Zu in ching tih hian a remchan avanga in mai an ni. Zu permit pek lai khan Regular taka zu in thin veng tinah mi sawmthum atanga za, veng len leh têt a zirin an awm a. Zu nghei thei lote an ni. Zu permit pek loh hnuah chuan vengtinah zu nghei thei lo, Regular taka in thin chu mi panga atanga sawmhnih veng len dan a zirin an awm an ti. Hei hi Aizawl khawpui bik atanga teh a ni, an ti. (In veng dinhmun han teh ve teh le).

Pastor leh upa zingah, “Kei chu zu permit pek leh hi pawi ka ti lo, Committee-ah kan rel tak na a, MLTP Act hi tul ka ti hran lo,” tia mi zinga sawi ching te hi ordained an nih hnua zu in rûk chîng leh sum leh pai ngaihtuah thiam deuh te an ni a. Pathian thuchah nung tak an kawl ngai lo, an ti.

Politician zingah pawh zu permit pek leh duh te chu zu nghei lo, mahse vantlang tibuai zawnga khawsa ngai lo, mahni Bed Room leh Sitting Room-a inti changkang taka zu in ching an ni a. An rilrua kohhran aia Party rilru pu lian zawk an ni an ti.

I awih zawng a ni emaw? Zu zawrh phalna petute leh Zu eng chi pawh zuar an awm chuan an thlah kal zel te chu Pathian thu awih lo leh Rinna bansana sual kawng zawh a thi mai mai an la awm ang an ti. “He mite chhung hi hmanah chuan Zu zuar, Zu sa an ni, tiin an la sawi ang,” an ti.

Sawrkar phal vang a ni emaw harsat avang a ni emaw sum hmuhna a rem vang emawin zu kaihhnawihin ei zawng lo la i him ber ang an ti.

Similar Posts:

• Jail ah Pastor?? (Lectern?)
• Meizial nghei nan china hriau??
• Zu zuar hlawhtling
• Mizoram UPC vs NEI UPC Court thurel
• Two wheeler taxi buaipui mêk

Recent Posts:

• MIZORAM KANGTHELH TUTE PUIHNAN!
• February 2016, Mizo(ram) Diary
• RIP lushai_er
• Kolasib tuilut an lut
• JANUARY 2016, MIZO(RAM) DIARY

This entry was posted on Saturday, January 12th, 2013 at 9:06 am and is filed under Mizo Society & Culture, Zu. You can follow any responses to this entry through the RSS 2.0 feed. You can leave a response, or trackback from your own site.