mi(sual).com

A thawh thawh na ah thawk teh se….

An tia lawm, vawkpui pawh hi a vah a vah chuan ek thing a tawng nge nge, tlangau pawh hi a au a au miau chuan a thu puan lo hre tawk hi an awm nge nge thin. Khawvel hi rawn in din tha leh in kei tehlul hi lo piang nawn leh pawh ni ila, a mipui hmachhawn zawng a pulpit tlangsang ah te hi chuan engtik-khawtik ah mah hian thu hi kan sawi ve hmel si lova. Chanchinbu leh hmun dangah te han ziak sasawi ve teh pawh ni mah ila, keini thi-behlo thu te chu tu pa fa lubawk mah hian chawtak khuk hian an khuk pui hmel bawk si lova. Chuvangin helai hmunah mi chihrang hrang in internet kaltlanga an chhiar theina hmun ah hian sawi leh tawp mai ila, thawh na mual mual chu a nei chek ang chu maw….

Mizo te hi Pathianthu hre tak mai leh Pathianthu duh tak mai hnam hi kan ni a, a sawi pawh kan sawi peih narawh e, hnialkhan tur lah hi kan hre hlawm zek lehnghal a. Kan ram hruaitu te pawn Kohhran rawngbawltu te ai mahin Pathian hming an lam ngun emaw tih mai tur ani a. Piangthar inti pawh kan tam, veng tin a piangthar tawh zat hi a veng chhung mi chengte let in kan tam ngei ang. Kan nun ah engchen in nge hna a thawh a ,engang chiah in nge a tak ram ah hian kan nun pui tih chu thudang ah dah ta ila, a hriat zawng kan hria a, a sawi pawh kan sawi hmem viau bawk a ni. Biakin te lah hi kan han ngah na laileng khawp a. Biakin ropui deuh deuh eng sum sum thawhkhawm atang a sak nge tih pawh hriatchian mang loh hi pali-panga veng tin maiah hian a ding khir iaih-uaih hlawm mai a. Keini veng tlabirh atang ringawt pawh hian biakin paruk lai ka chhiar thei zu nia mawle. Setana hian in biakinah hian, ‘ka ta chin zawng ka la dawn,’ hi a ti roh anga kan biakin ropui deuh deuh te hi an kawrawng huau mai ang tih chu hlauhawm ve tak chu a ni.

Mizo te hian Pathianthu hi kan inti tatu viau mai a, Pathian zawnchhuah ram kan in ti a,  Krista ringtu kan inti theuh a mahse sual thu ah ringawt pawh hian kan nihna chu a lang chiang angreng viau in ka hre ve thin. Sual  hi Lal Isua khan a haw em em a, misual erawh a ngaidam thung tlat. Hmeichhia a uire lai ngei an man pawh kha a lo ngaidam hmiah mai a nih kha. Keini ve hi zawngin misual hi kan hua a, kan veh a kan um a, kan man a, kan hrem a, kan tlang-chil a, kan sawisa hlum thul. Sual erawh hi chu kan palzam thei angreng viau lawi si a. Amah ringtu, a hnung zui tu inti si hian amah kan an lohna lai tak pakhat a ni awm e.

Bible thu te hi kan inti hre  hlawm viau thin a, Bible kan huamhauh pawh kan tin na reng bawk a mahse in ti leh teh ang,  heti taka Bibile thu inti huamhauh si hian kan rinna innghahna bu ber hi vawikhat pawh la chhiar chhuak peihlo hi a tam zawk chu kan ni awme ka ti ve mai mai thin. Tin Thuthlung Hlui huna Pathian in dan a siam, Israel fate ho tan a zawlnei te kal tlanga a pek te kha, keini hnamdang ‘Awze mi’ an tih ho tan a siam pawh a ni ve lo tih lam te ngaihtuah lo hian kan hriat chun chun hi midang te zawm atan hian kan lo it ve em em a, mahniin zawm tum der si lo. Tin khang dan kha Israel fa te khan an zawm kim hleihtheihloh avang leh mitin huap anih loh avang khan mitin huapzo turin, chatuana nuna kan neih nan Lal Isua chu kan tan rawn kalin Thuthlung thar ‘Rinna avanga khawngaihna a chhandam’ na thuthlung chu a rawn siam ta zawk a ni tih lam te hi chu kan ngaihtuah in pawm kan tum lo mai ni lo in hetiang zawng a sawi te hi chu Bible a nilo zawnga zirtir kan ti leh hlur mai bawk si a.

Sakhaw dang be ho Hindu te , Islam sakhaw be ho te leh sakhaw dang dang be ho te hi chuan an sakhaw lehkhabu hi an lo hre hneh in an lo chhiar chhuak ngun thei hlawm khawp mai. A hriat lah an hria. Vawikhat chu Team kan zui ve lai hian kan thianpa pakhat chuan thu a sawi dawn a, a Bible a bag a a dah emaw a tih chu a lo dah hauh lo mai a, a thusawi tum changthlan ber kha a theihnghilh ta tlat mai a, Isaia 34:16 tlawhchhan in Babel insang sak thu kha a sermon ta nghek mai a, mihlim ho pawh an Amen nasa tliar tliar viau mai a. Kan haw hnu a a bible chang tlawhchhan ber kan han en chuan Pathianin thilnung a siam famkim zia te, a enkawl hneh zia lam te, kawppui tur a nu leh a pa a siam thu te lo zuk ni daih pek a mawle. A tu amah khan Babel insang chungchang anilo tih kha an hre chuang lo reng reng.

Camping, crusade kan han nei a, mikhual speaker lar Synod Speaker ngat, rawngbawlna hmachhuana duhsaktu ten thisensang vei dawn dawn  khawpa hmuihmera a an chawm thau ngei mai kha kan han ruai a. Eng thu nge a sawi tih lam leh eng angin nge a sawi tih lam kan ngaihtuah tawh lo, eng pawh sawi se kan ‘nau piantha chawduh lem duak duak’ tawh mai a. Kan tualchhung upa te leh thusawitu te sawi ang tho pawh sawi se rau bik riau in kan hre tlat tawh zel. Chutah kan han harh thar hluai a, kan zai tui a, kan lam khur chingchivet nawk nawk a, tawng hriatloh nen inti thlarau changsang tawkin kan ‘ het-de-de det, chet-chet- chet…, kha-bereka-uuu- sha-be-re-ka…’ kual vela, Thlarau a tla tha kan ti a. Kan mi rawih te an haw a, kan rau chan chu an haw pui ta emaw tih mai turin kan reh leh duak a. Tawnghriatloh lo inzirtir lawp lawp tawk lah bo lo.  Zai tui, lam rui, tawng hriatloh vak vak ringawt hi Thlarau hnathawh a ni lova, a bak a taka nunpui lam zawk hi a ni tih te hi kan hriatchhuah a hun ve tawh viau in ka hre ve mai mai thin. Vawi tam kan harh thar tawh a, kan nunah hmuh tur a awm si lo.  Tuna ka thu rawn sawi ngei te pawh hi tu speaker lar dulkiar coat suit leh necktie buhtlei tiat a hlai awrh, Dubai sawhthing rep ei ngat  sawi emaw chu ni se, chithli tla dawn dawn in kan chhiar ang kan lem duak duak emaw kha a ni awm si a.

Kros thu mawlh hi kan sawi fo mai a, Lal Isua khan Kros thu kan sawi te hi rawn ngaithla ve ta se mak a ti hian ka ring thin alawm. “ Mi tupawhin mi zui a duh chuan mahni hreawm pawisa lovin  nitin a kros puin mi zui rawh se” a tih chang chawi hian nu ho thenkhatin, “Keichu ka kros put chu kan pa hi a nia” “kei chu ka fapa sual hi ka kros put chu a nia” te kan han ti ta mai thin ania. Khami tuma Lal Isuan a hrilh mipui ho te khan kros put chungchang kan han sawi zau tak tak phei hi chu hre ve se ngaihnawm an ti ve ngawt ang le. An ni ngaih ah kha chuan kros pu chu misualber ,nung tlaklo an mahni thihna ngei tur pu te kha an ni si anga. Lal Isua  pawh khan a sawi chhan ber ni a lang chu hnunglam hawikir miahlovin thih thlengin min zui rawh se a tih na lam daih kha a nih hmel. Pathianthu te hi kan duh lai lai hi kan la lawk a, “Danglamna reng reng a awm lova, mi zawng zawng in thil an tisual tawh vek a,Pathian ropuina an chang zo ta lo” tih lai te hi khawilai  zu ngawl vei in emaw, drugs ngawl veiin emaw, “ Kohhran upa te pawh enge an nih bik,” tih nana lo hman mai chi a ni reng reng lo…Kohhran upate leh khawi emaw lai a zu, drugs ngawl vei te chu an inkar a hla em mai.

Rinna chungchang kan han chaih kual leh tak tak a, “Rinna chu thil tih tello chuan thi a ni” tih lai kan changchawi a, mi a thiltih a chezia ah a lan loh chuan rinna neilo dawn dawn angah te kan ngai thul…Rinna hi a san a san chhuah lam emaw, a pek a pek chhuah lam emaw a ni hauh lo a , a dawn a lo dawn lam a ni zawk. RINNA HI CHU PATHIAN IN THIL MIN TIHSAK LO DUHTAWKNA HI A NI MAI.

Mizo te hi Kristian in ti si hian Pathian Pathianna pathum; (1) Engkim ti thei (2) Engkim hria (3) Khawi hmun ah pawh awm; tih te hi kan hre chiang lo viau emawni tehreng ni. Kan thil tih duh zawng te, kan ngaihtuah duh zawng te hi midangin min hmuh pui loh chuan Pathian lam hi chu kan hre chang tawhlo hi a ang thin khawp mai. Engkim hria, khawi hmunah pawh awm tih te phei hi chuan kan ngeng hi a chhun pha vak hlawm lo a nih hmel. Pathian mitdel, bengngawng kan nei kan inti emaw tih mai tur hian kan khawsa a. Pindan chhungril ber a tuemawni nena kan awmna an pawh a awm a, kan mobile a  SMS, kan Facebook inbox te thleng pawh hian a hre vek tih te hi kan ngaihtuah ngai lo emaw?

A tawp ber atan chuan keini Mizo te hian Pathianthu hi kan inti hre fu a, “Inti” tih a tel tawh reng reng hi chuan thil hi a lo famkim tak tak thin lo. Pathian ropui zia hmu thiamlo Kristian te hi kan ni ang tih te hi a hlauhawm a. Nunna chu sawi loh, khawlaia lungte kan chhir leh mai mai te pawh hi khawvel scientist te chuan a insiamdan , a molecular structure zawng zawng te chu hre vek mahse lungte pakhat pawh an la siamthiam lo chu a nia. Chuvangin heng thilsiam mawl ber a kan ngaih atang te hian Pathian ropui zia hi hmu thiam lo ringtu kan nih chuan keimahni kan in enfiah deuh chu a ngaih hmel.

A pawimawh ber ah chuan Krista ringtu kan in tih si chuan kan awmdan ,kan rilru put hmang , kan chezia, kan incheina engkim hi Krista chanchintha nen a inmawi em tih lam hi ngai pawimawh tlang ila. Kan hnathawhna ah te, kan in thenawm khawvenna ah te hiah ringtu kan nihna hi lang sela. Pathianthu hi keimahni ngaihdan a kal pui mai lovin Bible min hrilh dan, Lal Isua min zirtir dan leh tum dan nen a inmil em tih hi ngaihtuah ngun fo zawk bawk ila, ‘a ni pawh enge anih bik’ tihvel hi chuan chatuan nunna min thlen dawn lo tih hi hre reng ila. Tuna kan awmdan ang theuh hian thi ta thut ila kan thlarau hi vanram ah a lut angem tih hi in ngaihtuah chiang in ngai pawimawh bawk ila tichuan kan Zoram Kristianna chu harhtharna hranpa ngai lovin kan harh reng a ni mai…

BigDaddy Hmahmatea

(R.Lalhmangaiha)
Kulikawn

Similar Posts:

• Kimkimi
• Enge Pathian Thu?
• Sam 37:5 leh 6 hi lehlin dik lo a ni thei em?
• Eng ang rawngbawltu nge i nih ve le?
• Pakak….2

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Sunday, February 3rd, 2013 at 7:31 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.