mi(sual).com

Sports lam tui leh ngaihven te chuan, US mihang Jesse Owens a chanchin hi kan hre hle awm e. Hitler-an Nazi a kal vung pui vanglaiin, an khawpui Berlin-ah ngei mai, 1936 Nipui Olympics ah khan, Hitlera ideology kalh tlatin, Aryans ho khumin Gold medal 4 ngawt mai ala anih kha. Lar namen lovin a lar ta a, a elpui ber khatih laia Germany leh Europe Champion nilai leh Hitlera’n a chhuan em em, German tlangval sam buang thar mai Lutz Long erawhchu hria kan tam vak lo mai thei e.

Lutz Long tia hriatlar tak, he German tlangval hi a hmingpum chu Carl Ludwig Long ani a, Kum 1913 April ni 27 khan Leipzig-ah alo piang a ni. 1936 Summer Olympic Germany in an khawpui Berlin-a an thlen tum khan, kum 21 mi niin, a vanglai a hmang mek a. Long Jump-ah phei chuan European Champion nilai niin, European Record siamtu ani mek a. Hitlera, khawvelah hian Aryan ho an chungnung bik ani tih ring tlat tu leh thehdarh mektu pawhin, an ram leh a ideology tidiktu tura a hual leh a chhuan em em a ni.

Long Jump-a heat an han lak naah pawh chuan, a zuang tha hle mai a, Olympic Record a khum nghal pang mai reng a. Amah han el pha deuh ber tura ngaih chu USA mihang Jesse Owens chu ani a. Anni pahnih han in el chu mipui hmuh chak leh Chanchinbumi te pawhin an sawi hot ber mai chu ani reng a. Jesse Owens a han zuan dawn chiah chuan, Hitler-a chuan hmuhsit entir nan, a tho hluai a, hmun dangah a kal san a ni. Chu thil inhmuhsitna ngeiawm tak chuan Jesse Owens-a rilru chu a chawk buai hle mai a, a han zuan chhin pawh chuan, a foul ta zel mai a, a thawh thum na a a foul leh chuan, disqualified ani tawh dawn a, a zuang zui thei tawh dawn lo a ni.

Jesse-a chuan, a lo thawhrimna leh beiseina zawng zawngte chu, ho deuhin a thlawn vek thei dawn tih a hria a, a rilru a chiai zual hle mai a, a thlanfimte a lo bawl tak tak mai a. Chutah tak chuan, mipakhat hian a darah a rawn kuah ta a. Amah rawn kuahtu chu a han en nak chuan, tudang nilovin, a elpui ber tur German tlangval sam buang thar mai Lutz Long-a chu alo ni reng mai a. Chutah Lutz Long-a chuan, nui sang leh thlamuan tum tak tih hriat hian a han nuih sak a, Jesse-a chuan a zuan hmasak vawi hnihah khan, qualify tura a mamawh zat Metre 7.15 (Feet 23 leh inches 3) chu a zuan pelh zan thin thu chu a rawn hrilh a. Zuan tanna tur atanga feet khat velah rin tur leh chumi chu zuan tanna tur anga ngaia zuang turin a rawn fuih ta a, chutia a tih chuan, foul lovin, a qualify hle tho dawn ani tih a rawn hrilh ta tlat mai anih chu!!!
Lutz-a thu chu zawmin, zuan tanna atanga feet khat velah chuan ava rin ta a, chumi en chuan a zuang ta a, feet 23 leh inches 7 zet zuangin a qualify chiang hle a ni. Tichuan, anni pahnih chu inel chho zelin Jesse-a chuan Gold Medal chu ala ta nge nge a, Lutz Long-a chuan Silver Medal ala ve ta thung a. Jesse Owens hian Metre 8.06(Feet 26 leh inches 44) zet zuangin World Record a siam ta nghe nghe a. Item dang Metre 100 leh 200 intlansiak naa Jesse-a te an intihsiak lai pawhin, an hlauh em em an Pu Hitlera hmuh lai ngei chuan, a awrawl tawp tawpin Lutz-a chuan Jesse-a chu alo au thin a ni.

He thu hi rei tak chu zep tlat ani a, Hitler-a pawisawi hlauh vang anih a rinawm. 1964 kuma Olympics lam film siamtu Bud Greenspan an “Jesse Owens Returns to Berlin” tih film a siamah khan, Lutz Long-an Jesse-a hnena alo chah angin Lutz Long-a fapa Lutz Kai-a hnenah Jesse-a hian a hrilh ta vek a ni(Hitler-a hlauh tur a awm tawh lo bawk a).

Infiammite hian an elpuite an fuihin an tanpui ngailo viau a, Lutz Long-a erawhchu infiammi naran ani ve tlat lo; a elpui ber Jesse-a hlawhtlinnah a lawm em em a, lo fuihtu ber ani tlat a ni. Infiammi narante chu theihnghilh anni thuai thin a, Lutz Long-a te ang infiammi mak danglam takte erawh hi chu, hriat reng anni zel dawn a, a chanchin hi an la sawi zel ang. Kei pawhin, mi sawi hnu ka rawn sawi ve leh pek hi.
Kristian te pawh hi Khawvel mi narante ang nilova ‘danglam’ tura koh kan ni a. Kan Lal leh Chhandamtu Isua Krista anga inhuatna hmuna Hmangaihna lantir tur leh hmangaihna chi chu tuh tiak tura koh kan ni a, miin kan pawi an sawi chang pawha ngaihdamna lantir thei tura koh kanni a, buai leh thim pik karah ‘Enna’ mawi tak chhuah tir thin tur kan ni. Midangte hriatthiam ngai fo tur nilovin, midangte dinhmun leh harsatna hrethiamtu ni tura koh kan ni.

American ho ngaihdanah chuan, Nazi chu ‘Sual’ chhinchhiahna ani a, American Democracy chu Thil tha chhinchhiahna a ni. Chutihlaiin, Hitlera Nazi thurinah chuan, Aryan ho chu chi chungnung bik larh anni a, Midum ho chu ran chung awrh, chi hnuaihnung tak an ni.

Nimahsela, heng ang zawng zawngte hi Lutz Long-a chuan, a ngai pawimawh ve lova, a nun a kaihhruaitir hek lo. Kristiante pawh hetiang hian a tha zawngin kan danglam ngam tur a ni. Tripura Chief Minister Manik Sarkar-a mi danglam tak mai chanchin avanga Communism kan ngaihdan lo danglam ta leh, Communist Party hotupa kan han fak ta mai te hi ava mak em! A danglam tlat vang a ni. Mahatma Gandhi te Abraham Lincoln te kha an danglam ngam teh e. Kan Lal Isua ber mai kha a danglam nasa anih kha. “Kei erawh chuan” tiin a zirtir hmiah hmiah mai a, Kraws-a khenbeh hial alo tawk ta anih kha.

Nang I danglam ve ngam dawn em?

Similar Posts:

• Can anyone solve this problem?
• Kit Carson
• Something about Bhutanese women
• Macho Man a thi
• Godzilla Sighting at City Park

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Sunday, March 17th, 2013 at 6:24 am and is filed under Event, Lifestyle, Religion. You can follow any responses to this entry through the RSS 2.0 feed. You can leave a response, or trackback from your own site.