Franz Reuben
Khawvêl changkang zelah Zofate pawhin an sawi Computer Age chu kan lo chuangkai ve ta reng mai. He “age” changkang tak maiah hian Zo fate pawhin nun han kan zir chho mék. Ngaihtuah chian ngai ta deuh mai a awm. Thil engkim ti thei ni maia kan lo ralkhat ngaih “kháwl thluak nei” kan tih mai (computer) chu in tin deuhthawah kan húng ta far mai. A ropui. Kan changkng. Mahse he kháwl changkang hi engtin chiah nge kan lo dawnsawna kan lo hmelhriata kan lo hman tih hi i ngaihtuah tláng teh ang u.
Kan changkànnain a ken thil zawng zawng lei thei nih tum Zo fate chuan an sawi computer pawh chu changkànnaah ngaiin neih thing lung kháwngin kan lei ve hlawm a. Nu leh pa tam tak pawhin “Kan faten sikul lamah IT (Information Technology) an zir tawh a, computer an hmelhriata an thiam ve a ngai tawh” tiin neih zawng zawng séngin “kháwl thluak nei” chu an han lei ta hlawm a. Chu kháwl changkang chu an fate, mathematics-a fail ziah ṭhin, lehkha zira tui miah lo, changkàn duh hrim hrima latest fashion nena Pathian bia, bike neih loh chu ṭhing ti tlat, Mizo chawhmeh ngainêp tlat, grape wine ruih vanga pawi khawih mai ṭhin, kut hna thawh chu ṭhing ti ngawih ngawiha, nu leh pa pawisa thawh chhuaha inchhek pár tluan ngamte chuan an han khàl ta reuh mai a. An nu leh pate chuan cheng 20000 chuanga an lei kháwl an fate hmaa a han inchhawp rup mai chu ropui an ti a, room lehlam aṭangin an fate nun chan zir chu engmah hre lovin an lo thlir ta ṭhin a nih chu. Chutia lo thlirtu nu leh pa chu ṭhenawm-khaw-véngah a awmthei chin an nih ngat si ṭhin avangin induh pawh an induh deuh larh ṭhin. MAHSE chuti ang kháwl ropui chuan an fateah eng “chanchin ṭha”(?) nge a thlen tih lam erawh an ngaihtuah pha si lo.
Ni e, nu leh pate zingah changkang tak tak nia lang, mahse IT hlutna hrethiam bik si lo an tam hle mai. “Computer Age”-ah kan awm tawh a, kan fate hi computer hmaa zan rei tak tak thlenga ṭhu an ni ve tawh a … ” tih ṭawngkam belh chian tlâk loh chhâk chhuak mai mai kan ngah ta. Kan Mizo culture-in a phût tlàwmngaihna thl tih zawng zawng pawh tlànsana zan khaw tai reka computer thut-chilh thalaite chu an nu leh paten an ngaihhnathiamin an ngaisáng! Mitthi lu mennaa kal lova zan dár 2—awh, zing dar 2!—thlenga mengte chuan ropuina lallukhum an khum tawh a nih hi! Mahse eng nge an men chhuah? A tam bein an men chhuah chu knowledge ni lovin LERHNA leh HURNA! Encyclopedia keu ai chuan porn site tih angreng lama luha a remchàn huna practie ve dàn tur ngaihtuah te kha a ni mai.
Kan fate, sikul lama IT subject te an neih ve tawh avang leh a changkan ve hrim hrim avanga an nu leh pate computer leitirte hian an computer neih hi eng chen nge an ṭangkaipui le? Eng computer application mah hi tih tlâkin an thiam lo! Game an khel char char ringawt mai a nih hi. Game thar apiang an nei thei a, mit lama buai khawpin an khawih a, mahse engmah an chhu (type) thiam mang si lo. An nu leh paten lehkha pawimawh engemaw “Hei hi nalh leh dik thlep thlawpin min han chhut chhuah sak teh” ti ta se an buai chhe nghâl. Sikul lamah chuan thil pawimawh leh awmze nei an zir ve ngei a, mahse kha lam kha chu an tuipui pha lo va, an khawih zui peih lo. Nakin lawkah lehkah zir thui vak lote tih theih àwm tâwk hna chhete an han dil ang a, computer application pángngai ho te te a bul aṭanga man chawia khawiilai hmun kilkhawr emawa an zir leh a ngawi dawn!
Tichuan intihchangkànna atána sum tam tak sénga kan kháwl ropui lei hi inkhelhna kháwl lianpui leh kháwl tenawm leh zahpuiawm tak satliahah kan chantir mék a nih hi!
Similar Posts:
- Zirna tha kan tih hi..
- Thalaite khawvel vs ram siamthatna lam
- Class system Mizo zingah..
- Mobile Phone ka nei ve a
- Sangpuiipa’n Rel Garage a sa
April 6th, 2013 at 3:58 pm
A lo nih hi!!
Report this comment
April 6th, 2013 at 4:14 pm
Computer Age hi Frustration Age te pawh a tih theih dawn hi maw le
Report this comment
April 7th, 2013 at 12:36 am
Ka computer hi hmeltha ka ti. Ka hmelhriat tha khawp mai.
Report this comment
April 7th, 2013 at 8:14 am
Ka computer hi a hmel a ṭha a nia. Ka ṭhian ṭha tak a ni bawk.
Report this comment
April 10th, 2013 at 6:03 am
A va tha em
Report this comment