Zu leh a chhehvel chungchang hi sawi leh ziah a tam tawh khawp mai, thenkhat tan phei chuan a hming ringawt pawh hi ninawm tham a ni tawh ang. Tun tumah hian Zu hi sual a nih leh nih loh emaw, total prohibition a that leh that loh thu emaw sawi ka tum lo a, ringtu, zu duhlo leh zu inngailote tana pawimawh nia ka hriat tlem ka’n thailang ve duh a ni.
Kan ramah hian zu hi heti khawp hian kan doin kan bei nasa a, zu inmite’n an sim theihna’n lah kan tawngtai nasa; Mahse engati nge zu hi a rem mai theih loh a, a pung tulh tulh emaw tih tura a awm? Engati nge kan tawngtaipui thin zu inmite hian an sim hleihtheih loh? Kan do dan leh kan do chhan hi a diklo a ni mai lo maw? Sawrkar leh tlawmngai pawl te’n an do dan leh an do chhan chu engpawh lo nise, keini ringtute leh Pathian rawngbawltute hian engtin nge, engvangin nge kan do ve? Rilru fim takin ngaihtuah teh ang.
Zu kan duh loh chhan leh kan do chhan tlangpuite(Research ka ti lem lo):-
1. Zu inmi chu an ninawm: Zu in ngailo tan chuan zurui bula awm hi thil ninawm tak a ni. An hawihhawm loin mi zahpahna an nei bawk si lo. A hun leh hmun an hrelo a, midang ngaihchanna an nei lo.
2. An tawpin an tenawm: An rim a chhiain an bula awm a hrehawm a, rui tawng tak tak bula awm phei chuan chaw ei a titui lo vek thei a ni.
3.Chetsualna a tam: Miin rui chunga lirthei a khalh vangin chetsualna a thleng a, pawisawilote’n nunna an
chan thin.
4. Chhungkua a tihlim lo: Inchhungah zu inmi an awm chuan chhungkua a hlim thei lo a, nupui fanau leh chhungkaw member dangte thlamuangin an awm thei lo. Ina an awmin buaina an siam a, khawlaia an chhuahin tawhsual tawkin a va thi mai ang tih hlauhthawn vangin mutmu pawh kan tuah tha theilo thin.
5. Chhungkaw kehchhiat/tlakranna a ni: Zu avang hian nupa tang then a tamin naupang fahrah an pung(ka zirchiang hran lo). Chubakah zu inmite chuan pawisa tamtak zu manah an hman avangin chhungkaw mamawh ai zu manah an hmangral thin; Tin, an taksa a chakloin an hriselna a pan a, damdawi manah sum sen vak vak a ngaih phah a, chhungkaw tlakranna an ni.
6. Khawlai an tiralmuang lo: Zu an ruih chuan buaina an siam a, an insual bung bung a, zu in ve miah lote thlengin tihbuai an ching. Zanah phei chuan zurui awmnaah hmeichhia mahnia kal a ralmuang lo thei.
7. An thlarau kan hmangaih vang: Zu inmite chu piangthar loa an boral chuan hremhmunah an tla dawn a, an thlarau chhandama a awm theihna’n zu in lo se kan ti. Sawi belhtur tamtak a la awm thei ang; Mahse kan sawisa ho nen hian a inang tlang put awm e.
Khi’ng a chunga zu kan duh loh chhan leh kan do chhan tlangpui kan han tarlanah khian point number 7 ang khi zu i duh loh chhan leh i do chhan a nih chuan tuna ka thil ziah hi i tan chuan i thil lo tih
tawhsa ziah chhuahna ang a ni ang a, zir belh tur vak a awm lo maithei; Mahse a tam zawkin zu kan do chhan chu an thlarau kan hmangaih tak tak vang ni loin keimahni kan inhmangaih vang tih hi thil chiang tak a ni.
Kan Biakin inkhawmnaah zurui lo lut in, engmah zahpah leh serh nei lem loin rawn lamkual vel ta se, kan zah em em kan biakin, Pathian kan biakna hmun thianghlim a rawn tibawrhbangin a rawn tizahawm lo, kan ti ngei ang. Kan hnukchhuak em lo a nih pawhin kan rilru chuan chutianga Pathian biakin pawh zahlo mihring chu kan ngei viau ang . Zu chu rui lo se chutiang chuan a awm bik awm tawp si lo. Zu hi chu a tha lo a lawm, do tlat tur a ni, kan ti rilru maithei. Mahse kha zurui pa kha A biakbuk a zah loh avangin Pathianin a rawn hrem ang a, a rawn tihlum hial mai ang, tih chu kan hlauhpui lem lo ang. Engati nge keimahni ang hian tha deuha a rawn inkhawm that ve mai loh, engati nge midang mit tikham zawngin a rawn awm? Min zah lo, chuti khati…. tih vel chu a awmdan kan duh loh chhan a ni ang. Isua kha ni tase engtin nge an tih ve ang.
An thlarau boral mai tur kan hmangaih vanga Zu inmite vei leh zu do kan nih takzet a, Pathianin tul a ti a nih bawk chuan engvangin nge zu hi a rem loh tehlul ang a, engvangin nge Zu inmite hian an sim theih loh tehlul ang. Kan tawngtai nasa lutuk, tlaivar varin kan tawngtai a, camping te kan siam a lawm, kan ti maw? Eng ang pawhin tlaivarin, chaw ngheiin tawngtai mahla chhanin i awm chuang lo ang. Miin zu in lo se, Zu hi bo se i tih chhan kha dik miau hek lo(In dil a, in dil dik loh avangin in hmu lo, nangmahni nawmsakna’n in dil si a)
Zu leh zurui kan buaipui hma hian a buaipuitu turte hi kan harhfim phawt a ngai. Kan mihring mit chu kan meng kuau a ni maithei, kan thlarau mit hi kan men a ngai a ni. Khawilaiah emaw Zurui intibuai an awm a, thih phah te pawh an awm a, miin rui chungin motor a khalh a, a chesual a a thi ta a, e’nge i rilruah awm? Zu duhlo tu, ringtu tamtak chuan, ‘ Zu hi chu a va tha lo tak em, rui lo se chuan an insual buai awm si lo, rui chungin khalh lo sela chuan a chesual awm si lo. Zu hi a tha lo a ni. Total prohibition-te hi ka sawisel e an tia, zu hi han thlah zalen vaih phei ila chuan hei aia chhiatna tam hi kan tawk ang’ tih vel kan ngaihtuah ngei ang. ‘A piangthar hman awm si lo a, a thlarau chan tur chu ka ngaihtuah mang e,’ tia indawm kun chu kan tlem ngawt ang. He thuziak chhiartu zaa pakhat pawh hian chutiang chuan kan ngaituah lo ang.
Kan vengah zurui an awm loh chuan khawlai a ralmuang ang a, zana bengchheng ninawm leh au lung lung an awm lo ang a, nuam deuhin kan mu ve thei ang chu. Zanah thil a bo ang tih hlau reng renga ven a ngai tawh lo ang. Ka unaupa, ka pasal hian zu a in tawh loh chuan inchhungkhur a lo nuam tawh ang a, min hau vak vak tawh lo ang a, mi zingah zahpuiawm deuh deuha khawsain min timualpho tawh lo bawk ang. Hetiang vel ringawt ngaihtuah avanga zu hi bo se kan ti a nih chuan kan hlawhtling ngai lo ang. ‘Nangmah i inhmangaih angin i vengte hmangaih rawh’ tih a nih kha. I vengte zurui kha nangmah vanrama kai i duh ang chiahin han duhpui la, i thlarau i hmangaih ang chiah khan a thlarau han hmangaih la, Pathianin rem a ti a nih chuan engvangin nge i hneh loh ang?
Zu inmite’n zu in an bansan chhan tlangpuite:-
1) Taksa hrisel loh vang: Zuin an taksaah hna a thawh nasat tawh vangin an hrisel tawh lo a, zu in thei dinhmunah an ding tawh lo hrim hrim.
2) Dinhmun/Nihna nena inrem lo: Chanvo leh nihna thar engemaw neite’n an nihna thar nena a inrem chiah loh avangin zu hi a nghei ve chawk.
3) Pawisa renchem: Sum dinhmunin a zir loh vang leh inrenchem hrim hrim duh vangin zu hi nghei ve theih a ni.
4) Rinna lamah: Pathiana siamtharna changte’n zu in chu an tih tur ni tawh loin an hria a, zuin an bansan thin. Etc.
AN SIM CHHANAH HIAN I TEL VE EM?
April 8th, 2013 at 11:15 am
Chh1ar dawn 1la
Report this comment
April 8th, 2013 at 1:39 pm
Sunday pual ve deuh tura ka tih a nia, ka lo ziah theihnghilh a nih khi, pawilo mai
Report this comment
April 8th, 2013 at 1:39 pm
Mizo Christian theology:
Zu in mi chu vanram kal lo tur,
Zu in lo chu vanram kal tur, corrupt engti mahse
Zu in mi driver ah hman hreh loh tur
Zu in mi pasal ah iai loh tur, an hausak phawt chuan
Mipui kalhona ah zurui lo kal ve phal tur
Midang pasal zu in vei em em tur. In concern riau!
Report this comment
April 8th, 2013 at 1:50 pm
Zu topic hi ad nauseam in sawi ani tawh.
Report this comment
April 8th, 2013 at 3:17 pm
Ziaktupa i ziakthiam e!
Zuin mi hi chu midang tan ka hnawksak lo, Ka thawhcchuahin ka in a, ka zu in in kan chhungkaw economics a tibuailo te pawh ti thin mahse, an inngaihdan mai2 ani,fact ah chuan a tibuai tho tho, vasual beng bung lo mahse.
Ka putea hi zu duh deuh mai, mahni thawhchhuah ngei a zu in, tumah va sual leh inchhungkhur a sual lem lo ni mahse,zu a arawn in tawh chuan a zurim vang khan chaw ei tlan ho a har in, inchhung a a awm ve tawh chuan a rim a vanga luak tawk kan awm fo, chu chuan chhungkaw ah inhauhna a thlen leh nge nge thin..Ama thawhchhuah ngei a zu in mah nise, kha zu man kha chhungkua ah han lut zawk ta se chuan,hmasawnna engemaw tal a thlen ngei bawk ang.Chuvang chuan zu hi chu hnawksak a tling ka ti lo thei lo..
Report this comment
April 8th, 2013 at 9:53 pm
Zu…
Report this comment
April 8th, 2013 at 10:14 pm
Thuziak tha tak a nih hi le…
Report this comment
April 9th, 2013 at 11:08 am
Tha hle mai! Ka zu in mi rilru a deh dan a dang, min hneh phian mai ka ti! Zu hi nghei ni ka la nei chek turah ka ngaih laiin nghei phal chi-ah ka ngai chiah lo tel a.
Midang tana hnawksak chan kan chan tum chu a tamin ka ring, kan rim ringawt pawh hi chhuanawm loh tak a ni. Chutih laiin Zu-in a in mite min tih hlim thin zia leh over a glass of whisky-a ram hnuk kan sawichhuah(harhfim laia sawi ngam loh tha tha) leh a ti thei an lo tel ve palha ram-in kan hlawkpui tak thil te leh socialize nana singlemost effective catalyst a nihna han thlir telte hi chuan ruih pui kher lova in atan chuan thil hlu tak niin ka hre thung.
A pawi zo ta chu kan rui luk thin hi a ni. Ruih loh thiam hi zir theih a ni a, a in mite chuan zir i tum ang u. Ruih luk vanga chetchhiatna ka tawng zeuh zeuh tawh. ka in chhuang lo khawp mai. Zu in aiin zu ruih hi sim ka tum mek leh ka tlin tan mek a ni;in ve thin dangte pawh hemi thlen tum turin ka sawm nghal bawk.
Zu rui biak ina inkhawm leh rui lo hailo biak ina muthlu thinte hi khaikhin ila tunge an biak zah lo zawk ang tih hi ngaihtuah tham a ni ka ti thung.
Zu hi sual tinreng bul a ni lova, tangka sum ngainatna zawk hi a ni sual tinreng bul chu..
Report this comment
April 9th, 2013 at 3:10 pm
Atha khawp mai,kotlaman sawi pawh khi ka rilrem zawng tak ani,zu inloh tawp mai hi chu ka rilru ah ala awm meuhlo a,mahse zuinmi chu midang buai lohna ah hian kanlo buai bik em mai,eng hnathawk pawh ni ila kan first impression hi below average ani nghal bik ringawt lehnghal a,kohhran upa zuin an sawi fiamthu ang deuh a,tlemte tak deuh a in tal chu zir atha ang.
Report this comment
April 9th, 2013 at 10:14 pm
Post tu pa hi ka han zawt koh teh ang.
Zu hi ruih theih miah loh ni ta se la,
Mi in, zu hi an in duh ang em?
A tui loh leh a khak fek fuk nen.
Lal Isua kha ni ta se, eng tin nge kan ti ang? Lal Isua khan, zu a rui thin in i ring chiah a maw? Zu in mi za a sawm kua hi chuan, an ruih duh vang a in a ni chiang mai. Mi hi kei mah ni ang ngawr ngawr tur ah, kan ruat tur a ni lo. Zu ruih ching ho hian, an ruih nan a, an hma an sial ang hian,
mi dang hma an sial sak ve em?
Nang mah i in hma ngaih ang in,
i veng te pawh i hma ngaih tur a ni
tih te chu a, an ngaih tuah na ah,
a lut pha tueh lo. Zu in na tur an neih theih na tur a nih dawn phawt chuan,
an nupui te puan bih lai thleng pawh in, Zu man ah an dah kham hlauh zawk thin. Zu khap hi, ka thlawp lo.
Zu ruih e rawh, khap ni zawk se la, a tha ang. Do loh tur leh khap loh tur zawk, kan dova, kan khap zawk hlauh hi, a dik ka ti lo.
Tisa leh thi sen nei lo ZU hi, tha rum a khap hneh chi a ni lo.
Report this comment
April 9th, 2013 at 10:54 pm
Kan thil sawichhuah dan atang hian kan nihna leh mizia te hi a lang chiang thin ngawt mai!
Report this comment
April 10th, 2013 at 3:41 pm
Sihtea, Zu hi ruih theih loh ta se chuan a nihna a phulo hle a niang
Lal Isua khan zu a rui thinin ka ring tih ka ziah tel loh khi. Chuan, ka comment hmasaa ka sawi ang khian heihi sunday puala ka tih deuh a nia(sunday pual chhiar peih chinte chhiar atan deuh) chuvangin zu inmite’n mahni hmasialna an neih ang te, midang an ngaihchan loh angte hian awm lo ila, keini sunday pual chhiar peih chin hi chuan mahni kan inhmangaih angin kan vengte i hmangaih ang u, tihna lampang a ni e.
Kan thil sawichuah dan atang hian kan nihna hi lang thin se ka ti ngawt mai, a bikin biakina sermon tha tak tak sawitute nun dan ka hmuh thin chang hian
Report this comment
April 10th, 2013 at 7:24 pm
@ahooma hei kei ni mizo te hi,
hnam mak sak deuh mai kan ni a.
Kan thu sawi thin leh kan nung chang hi, a in per san leng lawng thei teh mai a ni’a. ZU hi a mah lawng tawp hi chuan, sual a ni lo. Mi hring ka chhung a a luh tam hian, a in tu ngaih tuah na kha, a ti chapo thin a,
sual tih chak na ril ru a neih tir thin a.
Chu a thil tih tir chu, tih hlawh tlin tir a tum bawk a, a thil tih leh a hna thawh ah hian, a hlawh tling thin reng a ni.
A chhan chu, no4/6 a luh na mi hring kha, a tih at thin vang a ni.
Zu hi chu kei paw’n, 1985 kum vel a tang khan ka in a, a that na han sawi mawi chawp tur ka tla chham tlat.
Vawi in thleng pawh in, ka la in reng.
Tum thum mah ni pawh in sa seng thei lo khawp in, ka rui sual ve tawh nge nge. Kum 2000 hnu lam ah chuan, rui khawp khawp a zu in chu ka ban san a, ka neih rem chan chuan ni khat ah,
no hnih te te in ka in thin a, chu chuan, chapo na tual ah
Report this comment
April 10th, 2013 at 7:32 pm
A chung a mi chhun zawm na.
Zu ka neih chang chuan ni khat ah,
no hnih te te in ka in thin a.
Chu chuan chapo na tual ah,
min hnuk chhuak pha lo.
Report this comment
April 10th, 2013 at 9:30 pm
Nia
Sihte, ka post hi ‘ZU’ a ni na a, zu that thu emaw, that loh thu emaw inhnialna atana ka tih pawh a ni chiah loooo. Post chhiar chiang la.
I commet hi chu amah ngau ngau chuan a dik reng.
Report this comment
April 10th, 2013 at 10:09 pm
engnge ZU intih fo hi, kan ro a ei chi nge chhum tur? A tui hmel in sawi zing malh malh em mai…
Report this comment
April 13th, 2013 at 4:23 am
Ziak thra in a dik hlawm hle mai.
Sihte’a pawh dik.
Report this comment