mi(sual).com

Kekawrbul mawng pawp
Thingtlang mipa naupang harh rual kan nih avangin kekawrbul kan ha nasa a, hak thlak erawh kan nei tam lem lo. Chu a chhapah, thingkung thap tak taka atanga kan mawng tawlh thlak zauh zauh vang te; phelsep (mau phel) chunga chuanga, awih tlanah tawlhphihrit kan tawlh thin avang te a niang chu, kekawrbul mawng khan min phatsan hun a nei fova. Kan mawngtam a hriam vang pawh ni bik miah lo vin, mawngtam pohna zawn erawh a pawp awlsam hle.

Hetianga kekawrbul mawng a pawp pawh hian, mipa naupang zahna chang la hre lem lo kan nih avangin kan pawisa lem lo. Amarawhchu, mikhual an awm chang emaw, nula hmeltha deuh hmuh chang chuan, chhing takin kan chawi chho mai a; mawngtam lang lovin, kekawr mawng pawpin kan ngum a khuh daih loh vek leh kawr fual deuh hak bawk si chuan, zahna-kawn ata kan him thin.

Adama suit
Khawlaiah eng eng emaw tiin thianzaho kan ding khawm taih a. Inrin hman hma hauhin rualu zawkte’n kan hnug lam atangin kan kekawrbul min pawh thlaksak thut mai kha chuan, hrilh a hai duh thin teh e. Haw dawng ngawt ila, an thinrim kan hlau bawk si. Tum loh deuhin kan chhungkuain kan ding kawh leh tau thin. Zak tak si, a rang thei ang bera kekawrbul chawi chhoh kha kan himna

Kawr hma suih
Nghawngawrh (neck tie) kan hmu khat khawp, kan pastor lo zinin a awrh kan hmuh thin mai loh chu. Mahse, thil suih hrim hrim erawh vawihuihrui leh japan-hlo hrui kan hman tangkai thin avangin kan hneh viau.

Kum hmasa lama Krismas kawr emaw, uniform hlui emaw kan neih kha chhehchhawla hak mai loh chuan, hak tur dang nei hek lo i. Naupang harh rual ta chu, infiam pahin kan inum kawi zawr zawr a. Kan taksa min man beh hmain kan kawr kha man behna remchang tak a lo ni nen. A chak thei ang bera tlan laia kawr hnung an han man chaih tawh chuan, a ri tuar a. Vanneihthlak takin kawr erawh a thler lo hlauh. Mahse, kawr hma kihna kepte/kawrkilh (button) a tla phiar thung.

Kawr hma kilhna awm loh avanga ina haw mai chu a hmanthlak lutuk. Tin, inah nu leh pa te an awm lo, lovah an feh vek. Chuvangin, kan ngaihtuahna kan seng ve bawk. Kawr hma phelh hiang huanga awm kha chu thingtlang naupang mah ni ila, kan zak ve tho. A tihdan erawh kan hai lo. Kawr hmawr vei lam leh dinglam chu kan vuan kawp a, kan suih hmak mai a. Dul kiar lang tur tal a veng alawm. Chutih rualin, kawr erawh a chuar duh deuh!

Vawih pet
Hei hi facebook thlalak pakhat ka hmuh atangin ka hre chhuak. Tunlai tlangval tam tak (nula pawh tiamin) hi an naupan laiin an vawih pet vek ang. Tenchhe deuh chu in uak mai thei, mahse thudik a ni tlat.

Kua a that vak loh laia, zun a’n chhuak tawh bawk si, inthiarna remhang mai a awm si loh khan, zun tawp dawna vawih pet kha a awl riau a sin. Vawih pet ka tih awmzia chu in hriat reng kha. Mahse, eng tin tin emaw kan kekawrbul mawng ro lai hmang tangkaiin, remchan apiangin kan nawt zeuh zeuh a, nawh ro hun a awm ve zel mai a nih kha maw le.

Panlai nun ho leh tawp leh thing ru zeka kan chen laia, vei leh engto nei miah si lova hlim taka kan nun lai si kha, ngaih vawng vawng chang ka nei fo nia.

.

Similar Posts:

• Talent Hunt ka en ve
• Mawng chhuichianna
• Fiamthu (in refresh nan)
• Panlai Nun – Zipper Tihbaiawm!
• Vawih

Recent Posts:

• YMA
• Hringnun thim lam
• Mithianghlim-te Inpâwlkhawm {Sunday Pual}
• C.P. Road
• Thalai ni si:

This entry was posted on Saturday, April 20th, 2013 at 4:41 pm and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.