Nizan (29 April 2013) mut dawnah ka’n fb zuai teh ang tiin ka han login a, chuta ka notifications hmuh hmasak ber chuan min barakhaih hle mai: Vaphai hoin Saikhumphai khua an hal thu a ni. Comments ahte Vaphai kan demzia tam tak hmuh tur a awm laiin Vaphai tan zawnga comments tam tak pawh hmuh tur a awm bawk.
Nunau pawisawi ve miah lote tithlabar a, in leh lo nei loa siamtu Vaphai khaw tan zawnga comments tam tak ka hmuhte chuan ka rilruah zawhna tam tak a rawn siam zut zut mai. Vaphai ho chet dan atang hian Vaphai khua hian dik an intiin fel an inti hle tih a lang a. A fel zawk leh tha zawk an nih pawh a rinhlelhawm lo e. Mahse, Saikhumphai hal ngawt tur hian tuin nge thuneihna pe a, an mihring puite chunga nunrawnna lantir tur hian eng rights nge an neih? Saikhumphai hi misual an nih chuan a hrem theitu, dan leh thupek kengkawhtuten hma la ang hmiang. Court in Saikhumphai tan zawngin thu tlukna pawh a siam a ni awm a, anih chuan Vaphai ho hi Court leh roreltute leh dan chunga leng emni an nih? Vaphai khua hi engti zawng pawhin thiam theih an ni lo vang. Dan anga hrem phu an ni a, a tisualtute hi dan anga hrem an nih loh chuan kan ram leh hnam tan zahthlak tawpkhawk a ni ang a, Saikhumphai chunga thil thlengah hian mawh kan phur tlang vek ang. Chuvangin, hrem phute hi kan sawrkar hian hrem mawlh rawh se!
Vaphai ho thiltih hi a bul berah chuan Burma ho ngaih theih lohna vang niin a lang a. Hei hi Nationalism thil hrin chhuah tha lo pakhat lo lang kan ti thei ang. Ram leh hnam hmangaih kan tum luatah ram dangmi leh hnam dang huat kan zir tel a, kan mihringpui an nihna kan hre pha tawh thin lo. Burma mi an ni emaw, Manipur mi an ni emaw, Tuikuk an ni emaw Chakma an ni emaw kan mihringpuite an ni tih kan hriat a pawimawh. Mi chunga kan tih hi kan chungah pawh a thleng ve thei tih hriat a tha khawp mai. Kristian inti tan phei chuan Mizo, Vai, Sap ti a buai buai hi thil inhmeh lo tak a ni. Sawrkar kan nei a, sawrkarin a tih tur a ti ang a, vai dap hna pawh Police ten an thawk mai ang. Fb a comments tam takte en hian Saikhumphai ho hi Burma mi tak tak vek emaw lo ni sela chuan Vaphai kan tan vek zawk dawn niin a lang tlat mai. Mizo Kristiante hi kan rilru hi a lo chhe tawh hle mai. Kan Mizo pui te chunga thleng atan kan duh loh kha hnam dang chunga thleng atan pawh i duh bik lo ang u, Mizo pawh Vai pawh Burma mi pawh mihring vek kan ni. Khawngaihna i nei ang
Vaphai khua hi Mizote kan darthlalang an ni. Kan rilru chhungril tak chu Vaphai khua anga hnam hmangaih hming pu a mahni mihringpuite lainatna pawh nei thei lote kan ni mial em?
Similar Posts:
- Saikhumphai khaw hal hi tu thiam loh nge?
- Saikumphai chungchang hi enge in ngaih ve dan le?
- Misual May (2013) Bihchianna
- Khawkhawm a pawi ber mai
- Saikhumphai-bawk Chungchang Kha…
April 30th, 2013 at 5:59 pm
Chh1ar ang aw…
Report this comment
April 30th, 2013 at 6:40 pm
Post hi ka thlawp
Mihring pui te chung a nunrawnna lantir hi ka duh lo. Burma e ma lo e pawh nise a khua khua a han hal chu a mak deuh ani. Thuneitu te kut nghah awm tak.
Report this comment
April 30th, 2013 at 8:11 pm
burma ho hi an ram sawrkar mumal loh avangn ram hrang hrang – usa, canada, thailand, malaysia, singapore, japan etc ah an an tlan a,ram danga hnam dang zawk te hian kan burma unaute hi an lo lainat em em a. Khawi rama mite mahin lo thawnkir an tum hriat a ni lo. Mizo vek kan ni ti a au au mizoram mipuite zawk hian kan unaute hi kan lo haw em em zawk si. Hnam hmangaih kan tum luatah kan humanity kan hloh zo ta a ni e. A lungchhiat thlak takmeuh a ni
Report this comment
April 30th, 2013 at 10:21 pm
Aw le kan han in puang tak tak a nge, Saikhumphai hi Burma mi tam na a ni an ti za ah za ka pawm, tunah hian in 40 hal kang a ni a chu mi zingah chuan in 15 chu an mahni vaphai khua leh tui mi te an ni. A tam zawk te hi Hualngo mi chhak chuak dik tak Mizo tawng nei tu (Hualngo) Burma mi kan ni e.
Vaphai ho in Saikhumphai hi Ruihhlo leh Zu leh Hel ho (mitha lo) ho awm khawm na an ti. Mahse hei e rawh hi chu dawnt mu hlum a ni em. Saikhumphai a Zu zuar a awm te hi Burma mi ni lo in an mahni Vaphai a tang a awm tha duh lo ho a rawn pem a chu ta tang chuan hna thawk paih lo in Zu zuar in Saikhumah khaw sa te an ni.
Hel ho (Burma) hel ho awm na ti in Sorkar ah an zual ko hei pawh hi dawt muhlum a ni, Vaphai khua ah hian (Burma) hel ho hi an awm na zawk dik tak a ni e. Vaphai khua mi diktak Burma hel pasal a nei hi Mipa thum(3) a hming pawh ka sawi thei ang mahse sawi lo mai i la. Saikhum ah hel a buai tih hi sorkarah pawh ni se chanchi buah pawh in a la hria lo ang, Vaphai ah tih hlir ah a la ni e.
Chanchi bu then khat ah chuan Sorkar in Buhfai leh Dal te supply te a ti a dawt vek a ni e. Leilet khua Burma in hnen leh Farkawn leh Thek te leh thek Pui khua te hian ei leh in mi buatsaih sak. Sorkar ho chu Ka pu Lalthanhawla chu Puja lam a la bui a ni ang a la hri lo.
He thuah hian dikna chu Lalpa ta a ni e. He Indona hi lalpa ta a ni. Lalpa kan mi harsa te hnenah hian i thlamuanna thlazar hnuaiah thlipui leh ruahpui kar ah i vel himna ka dil dak e. Amen.
Report this comment
April 30th, 2013 at 10:42 pm
Christian Muslim ho an nih hmel Vaphai khua hi. An pu per Ben laden an thah sak vang a lungawi lo an ni mai ang te ka ti ta mai mai.
Report this comment
April 30th, 2013 at 10:59 pm
Vaphai khua mipui hi i pawngpaw dem ngawt lovang u. Mahni mihringpui ah pawh kan mizopuite chunga hetiang chet duh ching hi an mahni vaphai mipui zingah pawh hian duh lo fe fe an tam ka ring a haltute erawh an dem awm khawp mai. Mizoram buailai a VAI SIPAI ho in IN an hal mah ngei tawh nak lai a 21 century ni tawh a, global village kan tih sup sup tawh lai a IN hal ching kan la awm leh zel hi chu kan MITHIAM ten SEMINAR VAPHAI khua ah hian va nei se a tha ngawt ang a.
Report this comment
May 1st, 2013 at 8:47 am
Ngawi teh u; Rangvamual leh Phunchawng pawh khu,
Crime Organization hovin
an suasam tep a ni awm e.
YMA in ram leh hnam hum halh kum
a puan a piang in, an hum halh tur
HNAM kan pet darh zawk hlauh thin.
RAM hum halh maw? Kan hum halh ngam lo a ni ang. Assam ho vin min hneh chhuh zel. Chin Hills tlangtawng a tan, Mizo tawng hman an duh na pawh, kan tih su kuk sak leh dawn a nih hmel. Mizo hnam leh Tawng hi
a ti lian zawng a hma lak dan CYMA hian, a hre thiam phak lo va. Mizo hnam then darh zawng leh, tai te zawng a kal hi, Ram leh Hnam hum halh dan tur dik tak ah a ngai a nih hmel.
Report this comment
May 1st, 2013 at 9:54 am
Misual tak leh mitha lo tak an nih a, kan chunga dik lo tak leh fello taka thil an tih pawhin Mihring hian thungrulh ve lo ila. Pathian Phuba lak tur leh thungrulh tur hian dah ila. Pathian hian thungrulh dan a thiam-in a hre ber a, Pathianin a thungrulh hi a na ber bawk. Mihring (keimahni) kan chet chuan Pathian a che thei tawh thin lo. Hei hi keimah ngeiin ka tawn-tawh avangin ka sawi a ni.
Report this comment
May 1st, 2013 at 11:05 am
“Mikhualte lawmin awm fo rawh u” tih ziak te pawh kha a awm a ni lawm mi? Hei hi emni mikhualte chunga that kan chhuah duh dan chu???
Report this comment
May 9th, 2013 at 4:31 pm
Tu thiamloh nge tih chu hriat a har hmel e. Vaphai khua nge, Saikhumphai khua? Mizo nge, Burmese? Kan Sorkar nge, Burma Sorkar? Lu a ti hai i zawhna chhan tum hian.
# 4, “Tour report of Pu Lalrohlua, BDO, Khawbung R.D. Block Regarding the Issue of Foreigners’ in Saikhumphai” dated
25 Oct, 12 a mi-ah kha chuan mi 73 (an hming nen lam) foreigner ang a cheng Saikhumphai-ah hian an awmthu a sawi tel.
Report this comment
May 9th, 2013 at 5:21 pm
Ethnic politics leh nationalism hian inkalh burna lai an nei.
VHP (Vishwa Hindu Parishad) hmuh dan chuan keini an Indian pui, Muslim, Christian, Northeasterners te aiin South Africa, UK, US leh ram danga a ethnic Indian, Hindi speaking leh Hindu mite an Indian zawk tlat. Ethnic Mizo ni sek sek mahse, Burmese, US, Malysian national an nih chhung chuan foreigner, a then phei chu illegal immigrant, anni tho tho.
Ram dangmi ethnic Mizo aiin Mizoram chhung ngeia awm Chakma, Gurkha leh Lai te hi duh lo eltiang mah ila kan hnampui anni tlat.
Vaphai ho thil tih sawi mawina ni lovin “Kan Mizo pui” tia sawi mam ta mai comment zinga ka hmuh nual vangain ka rawn ziak ta nuaih anih hi.
Report this comment
May 9th, 2013 at 6:26 pm
In hremhrem lovin in ngaidam tawnin in rem tawh rawh sela, inpumkhat tawh rawh se kan ti.
Report this comment