Ringtu Nun-a Thlarau Thianghlim Hnathawh {Pentecost Sunday Pual}

May 19th, 2013 6:01 am by Dr John

Vawiin hi Pentecost Sunday a ni a. Pentecost tih hi “Sawmnga-na” (50th) tihna a ni. Hei hi, “Kalhlen Kȗt aţanga chhiara a ni 5-na” (the 50th day after the Passover Feast) a ni (Lev. 23:16-22, Numb.28:26-31). He Pentecost Kȗt hi Judate Kût pawimawh tak a ni a, Karte Kût/Pawl Kût tia koh a ni bawk. Buhseng zawh Pathian hnena Lawmthusawina Kȗt a ni. Lal Isua kha Kalhlen Kȗt-ah khenbeh a ni a, ni 40 hnu-ah Vanah a lawn chhova. A Zirtirte (leh Ringtute) hnena rawn tirh a tiam ang chiah khan, khenbeh a nih aţanga a ni 50-na (Pentecost Kȗt)-ah Thlarau Thianghlim hi a lo thleng ta a ni.

Thlarau Thianghlim Hnathawh hi ringtu leh kohhran tan a pawimawh êm êm a, a thiltihtheihna a sângin a thȗk a, a hnathawh theih hi a tam êm êm a. Ringtu nun bikah pawh sawi tur tam tak a awm. Vawiinah chuan Ringtu Nun-a Thlarau Thianghlim Hnathawh Pawimawh tak tak 4-te chauh kan sawi dawn a ni. Mihring chu boruak tellovin rei a nung thei lova, Sangha pawh tuiah lo chuan a nung rei thei lo angin, Thlarau Thianghlim tellovin ringtu leh kohhran hi a nung thei lova, a kal rei thei lo. Chuvangin, Fakna hla siamtu chuan, “Thlarau Thianghlim Nunna ber, Awmdan Danglam-tirtu…” a lo ti-hial a, a dik hle a ni. A tlangpui chauhvin, a tawi thei ang berin sawi kan tum ang.

1. Thlarau Thianghlim-a Chhinchhiah (Sealing)
Miin thinlung chhungril ber ațanga tihtak zeta Pathian a rin veleh (a pianthar veleh, cf. Rom 10:9-13), Pathianin Amah ringtu chu, ama ta a nihzia leh a venhimna leh thlazar hnuaiah a awm tih entirna atan Thlarau Thianghlim-in a chhinchhiah (sealed) ta nghal a, “Amahah chuan nangni pawh thutak thu (in chhandamna Chanchin Tha chu) in ngaihthlak a, rin pawh in rin hnuin, amahah chuan Thlarau Thianghlim tiam chuan Chhinchhiah-in in awm kha” (Eph.1:13). Hei hian ringtu chu Pathian venhimna hnuaiah a himzia (security), Pathian fa dik tak a nihzia (authenticity), Pathian ta ngei a nihna (ownership) leh Pathian thuneihna kengtu (authority) a nihzia a tarlang nghal a ni. Sorkar official – Prime Minister, Governor, Chief Minister-ten an Letterhead-a an ziak, seal chhu a, an sign-hnan tawh Lehkha pawimawh tak ang hi a ni, ti ila hriat fiah a awl ber ang chu maw.

2. Zakhamna Thlarau Min Pe (Guarantee of Inheritance)
Ringtu piangthar Pathianin a chhinchhiah tawh chu, roluahtu tur a nihzia leh, rawngbawlnaah leh nitin nunah chakna a neih theih nan Pathian vekin min țanpui intiamin Za a Kham a, Zakhamna Thlarau min pe bawk a ni, “Chu chu Pathian ropuizia fak nan ama ta ngei tlan chhuahna turin kan roluahna tura zakhamna a ni” (Eph.1:14). Helaia Zakhamna tih țawngkam hi Greek Arabon hman a ni a, Installment-a thil pek sawina a ni. Ringtu Pathian fa, Thlarauva chhinchhiah tawh chu, Roluahtu tur a nih avangin Rawngbawlna kawngah leh nundanah thiltihtheihna neia hun a hman zel theih nan Pathianin Thlarau Thianghlim thiltihtheihna zawng zawng pumbilh tir vek chu rem a ti lova installment-in a pe a. Ringtu chu Pathian tana a inpekna leh inphalna a san dan ang zelin Pathian Thlarau Thianghlim chuan thiltihtheihna-in a chhungkhat țhin a ni. Housing Loan kan la a, 1st installment min pek hnu-a kan hnathawh a țhat dan a zir a, țanpui tlak, malsawm tlak kan nih chuan 2nd leh Last installment-te min pe ang kha a ni, ti ila a fiah ber awm e.

3. Thlarau Thianghlim Awmpuina (Power & Blessing)
Ringtu chu Thlarauva Chhinchhiah-a a awm hnu ah, Zakhamna Thlarau pek a nih hnu chuan, Thlarau Thianghlim Thiltihtheihna leh Malsawmna-in a awmpui tlat a, hma a hruai sak a, hnung a dawl sak a, chakna leh thlamuanna, thil țha leh lawmawm, ropuina leh chawimawina-in a thuam țhin a ni. He Thlarau Thianghlim Awmpuina hi a pawimawh êm avangin Lal Isua pawhin a Zirtirte hnenah khan, “Jerusalem khua kalsan suh u, Pa thiltiam ka sawi in hriat kha lo nghak rawh u… Johana khan tuiin a baptis țhin a, nimahsela ni rei lo te-ah Thlarau Thianghlimin baptisma in chang ang. Thlarau Thianghlim chu in chunga a lo thlen hunah Thiltihtheihna in la nei ang; tichuan Jerusalem khuaah te, Judai leh Samari ram khaw tinah te, kawlkil thleng pawhin ka thuhretute in ni ang,” a ti tlat a nih kha (Tirh.1:4-5, 7-8). He Thlarau Thianghlim, min awmpuia min tichak țhintu hian khup-zawi leh bân uaithla-te a tichak a, dawihzep-te a ti-huaisen a, hlauthawng leh thlabâr-te a thlamuan a, damlo leh nâ te a tidam a, thil mak tam tak ti a, mitthi hial-te kaitho thei turin thiltihtheihna mak tak a pe țhin a ni. He Thlarau Thianghlim Awmpuina nuam leh thlamuanawm tak hi neih i duh chuan tih tur pakhat chiah a awm, “Tupawh ama chunga chu mi beiseina chu nei apiangin Amah a thianghlim angin a in-tithianghlim țhin,” (1 Joh.3:2-3).

4. Thlarau Thianghlim Hruai Theih (Led By the Spirit)
Bible scholar-te chuan, (achunga kan sawi tak) Thlarau Thianghlim Chhinchhiahna te, Zakhamna te, Awmpuina te khi Ringtu puitlinna tak tak thlenna tura inbuatsaihna mai a ni a. A chhan ber chu, ringtu (mihring) khan tih-tur leh tih-theih a nei tlêm êm êm a, Thlarau Thianghlim kha a engkima engkim a ni a, a rah-chhuak pawh ringtu tan chanchin lawmawm leh malsawmna hlir a ni a! Chuvangin, Ringtu puitling kawng tak tak zawk chu, Thlarau Thianghlim Hruai Theih-a awm hi a ni zawk e, an ti! Tirhkoh Paula chuan, “Pathian Thlarau hruaia awm apiangte chu Pathian fate an ni si a. Hlauva awm leh turin bawih nihna thlarau inhmu a ni si lo va; fa nihna thlarau inhmu a ni zawk e, chu thlarau avang chuan “Abba!(Ka pa!)” tiin kan au thin hi. Thlarau ngei chuan keimahni thlarau nen Pathian fate kan ni tih min hriattir țhin; tin, fate kan nih chuan roluahtute kan ni a; Pathian roluahtu, Krista luahpuitute kan ni; a hnena chawimawiin kan awm ve theihna turin amah kan tuarpui tak zet chuan. Tunlaia tuarnate hi nakina kan chunga ropuina tihlan tur nen chuan tehkhin thamah ka ruat si lo” a lo ti a (Rom 8:14-18).

Pathian Thlarau Hruaina hi chu a nuam tawh hauh lova, hlauhna te, hrehawmna te, țahna te, mittui te, lungngaihna te, thihna te, chânna te, khawhârna te, hmuhsitna te, tihduhdahna te, nekchêpna te, dawta sual tinrenga puhna te, etc. a ni tawh zawk a! He ruam-a kal-te Thupui chu “I Duhlohna lamah an kai ang che” (Joh.21:18) tih a nih avangin Thlarau-in a Hruai theih loh an awm țhin a. Missionary te, Pastor te, Kohhran-a rawngbawltu duhawm tak tak-te pawh an zâm a, an tlu a, an kal ngam tawh țhin lo! Amaherawhchu, hei hi vanram in nuam tak kawng, kross kawng a nih tlat avangin ringtu puitlingte chuan an zawh ngei a ngai si a, țap chung pawhin kross kawng hi zawh zel turin an intiam țhin a, hma lam an pan hrâm hrâm țhin a, hrehawm mahse Lalpa ta an ni tih an inhria a, he țawngțaina hmang hian Lalpa duhzawng ti turin an Nun an hlan țhin a ni,

Lalpa kal tura min duhna hmun apiang chu,
Tlâng sâng tak leh tuipui fawn vel kar pawh nise,
I thu leh Kros mawia min thuam chuanin,
I Hmangaihna thu hi ka hril zel ang.