Mizote hian tûn hma chuan inneihna hi urhsûn ve viau ṭhin mah ila, kan pi leh pute lo tihdân kha a zângkhai thei hlein ka hria. Khawthlang culture thlipuiin min nuai hnu hian Mizo tihdân leh khawthlang lam tihdân kaikawpin a ropui thei ang ber leh a hautak thei ang berin inneihna kan kalpui ta. Culture chi hnih tihdân inkawp a nih tlat avangin a hautak lo thei lova, a eng emaw zâwk zâwk kan paih phal si loh chuan a vau tumbu pawh kan khawrh tel ṭeuh a ngai ṭhin.
Tûna kan inneih dân kalphung en hian sum leh pai hautakzia te, kohhran mipui kan tihhahzia te, chhûng khat laina tâna phurrit kan siamzia te, ṭhiante tha leh zung kan sên raltîr hnemzia te hi chu sawi lova lum ni ta sela, sawi pawh ka tum hek lo. Ka sawi tum tak zâwk chu, HLIMNA NI ni si, a inneia te tân hlimna tûr hun awm mang si lo hi ka vei a, ka rawn hring chhuak ta a nih hi. Vai pathian aia hmaa thawh a ngai a, khuan-te-vîk pawh a khuan hma aṭangin buai rêng rêngin hun kan hmang a, thawmhnaw a ropui leh to thei ang ber kan inbel a, make-up a chhah thei ang berin kan invawm bei ṭhin. Ruah phing-phi-siau pawh si se, a bum theih chhûng chu bum kan duh a, kan hlau dui tawh ṭhin; thli thaw hlek se, kan hair-style a chhêm chhia ang tih hlau rêng rêngin kan rilru a hah a; ni lo sa se, thlan a tla anga make-up a tipherh ang tih kan hlau leh si. A hahthlâk a ni ti rawh u?
Inkhâwmnaah a urhsûn thei ang berin hun kan hmang a, chham sual kan hlauh ang ngeiin a ṭhen chu kan han phun sual khut a. Mipuite lah hi hlim avanga nui ni lovin nuihzat type-in kan han nui huk a. A inneia te tân hian inneih inkhâwm chhûng darkar khat pawh tling ṭha ṭhum lo hi chauhpui hnawkna tham a tling âwm e. Pastor-te lah hi mi tam tak an inneihtir tawh avangin inneih kalphung an thehlei thing thiam ang zel a, chutih rualin ‘he mite hi an vawi khat inneihna a ni’ tih hre lo niawm fahranin eng kim zei êm êm vek tûrah an ngai emaw ni. Rehearsal-naah te lah hian an han sawi zung zung a, vawi khat vêl an tichhin thuak thuak a, bel hle tûra an ngai nghâl ngawt te hi a inneia te tân rilru hahthlâk deuh tûr asin. Vawi hnih vawi thum innei tawh tân chuan thiam leh zei taka chêt vêl pawh a awl mah na; mahse, a tam zâwk te hi chu vawi khat inneihna an ni ngei âwm si a!
Inneih inkhawm zawhah darkar khat dâwn thla kan han lâkpui leh a. Nupa tuak thar te an hah tawh ang tih rêng kan dâwnpui ngai lo. Thlalâknaa lan ve loh hlau niawm fahranin kan hâwr tup tup a, list-a inziak ve lo, lâkpui duh hrim hrim lah hi khaw te rûn tham zet kan awm ziah lehnghâl. Chumi zawhah joint reception kan nei leh a, ‘vawiin te chu an day alawm’ kan tihsak hmiah a, an day berah hah thi kûlin kan siam ang lawi si. Mihring ve tho an ni a, an ril te pawh a ṭâm thei a, keimahni kan in ei puar tawh avang ngawtin an puar ve si lo, kan pumpui min ṭâwm a nih ngawt loh chuan. Heti ang hunah te hian an inhnawh puarna’n hun thâwl ṭha tak kan pêk thiam a pawimawh hle. Zanriah ei hun thleng pawhin a hnuhnung berah ṭâm chhâwl dâwna awm tîr kher hi a ṭûl lêm lo. In lamah hmeichhe lam leh mipa lamin programme hrang hrang a kimchang thei ang ber leh thlarau thawh dân a zir zêlin kan han siam leh a; heti ang nia ‘inneih speaker’ mamawh tâwka liam kan nei ṭhin te hi alâwm buaithlâk chu. Lawi boruak nên, a rih hian a rit lûk ni berin ka hria.
Inneih programme leh kalphung kan duan dân hi chu a fuh chiah lo a ni. Hlimna ni tûr berah chau hnêpin kan siam ṭhin. A hautak thei ang bera tih hi ropuina emaw kan ti tlat a, hei hi Mizote kan fin lohna lai chu a ni. Mipui an lo kal ṭeuh te hian ropui ta riauah kan inngai a, ‘kan mawina in ni’ te kan han tihkhum ang dup dup a. Mipuite lah hian thinlung lamah kan lo ‘Amen’ ang huk a. Kan mawina dik tak zâwk chu nupa tuak thar te hmalam hun kha a ni daih. Ropui thei ang berin innei mah se, holam taka an inṭhen leh si chuan ropuina ropui lo tak a ni ngei ang. Nupa awhawm tak leh zahawm tak, Kristian chhungkaw ṭha tak din tûrin inneih tihhautak hian kawngro pakhat mah a su lo (a lo su a nih pawhin a khâwk tho tho ang), a innei tura te inhmangaih tawnna, inhriat thiam tawnna leh inzah tawnna kha a pawimawh zâwk daih.
Ram changkângah te chuan inneihna hi a zângkhai thei ang berin an kalpui a, biak ina inneih hunserh te chu an urhsûn ve tho, a bâkah erawh boruak zâng tak nên hun an hmang ṭhin. Keini ve erawh zîng varṭian aṭanga zân mut dâwn thlengin a inneia te hi a hah ber ber leh rim ber ber an ni a, hahchawlhna hun chhe te pawh kan pe phal lo fo. Tih bûng bûng hi i mausâm ngam ang u. Inneihna leh inneih nia kan thil tum dik tak ‘hlimna’ hi a inneia te tân kan buatsaih thiam a hun tawh hle.
Similar Posts:
- Inneih thlalâk ka en ve a
- Argentina ramin neih inang nupui-pasala inneih an phal ta!
- Mizo Inneihna
- Min hmangaihtu vs Kan hmangaih
- Karbi Inneih na ah ka tel ve a.
May 31st, 2013 at 7:09 am
Tukchhuah nuam vek u le! Post tha tak a ni
Report this comment
May 31st, 2013 at 8:30 am
Tukchhuah nuam nawn vek u le
Report this comment
May 31st, 2013 at 10:17 am
Mizo danin kan inbe rem a, sap tihdanin kan inchei a, kristian danin hunserh kan hmang a, vai tihdanin thuam kan chhawm a. mizo danin mo kan hruai leh a, a lawmna lah chu BiakInah leh mo leh moneitute Inah theih phak bakah tlem belhin kan la lawm bawk nen, hnam chithum tihdan hautak lai ber hlir kan la a, a la hautak chho zel dawn niin a lang. (OT deuh maithei
)
Post thatak a ni.
tren tren
Report this comment
May 31st, 2013 at 11:59 am
A dik tlangpuiin ka hria. 3@ Chhuakling Comment khi ka lo ngaihtuah ve fo dan pakhat a ni.
Hmanni lawk khan kan nau-te inneihnaah ka kal ve a, chuta ka ngaihtuahnaa awm thar ta riau chu i rawn thai lan ang hian, inneih sawngbawl hautak dan (sum leh pai leh tha kan sen hnem zia chu thu dang nise) mo leh a neitute tana phurrit kan siamsak nasa lutuk mawlh mai hi a lo ni. Ni dangah chuan inneih inkhawma tel bak hi ka peih meuh thin lo a, inneih inkhawm banah ka hawsan mai thin. Ama’rawhchu tel zui ve loh theih loh, tel zui ve loh chuan vui tur, an hmel hmuh leh huna phat ruai tul ang chi-ah chuan thu hran nise. Hmannia ka kalna pawh chuti ang chu a ni a. Inkhawm bana join-a an lo buatsaih thingpui sa vervawr kan in zawha khua kan hawi thengthawt fe tawh hnua moneitu in lama function, KTP-in an hman tura tel tumin kan chho a, an in hi biak in bul mai a ni a,e khai! Thla an lo la lak pui laih laih zu nia maw le! Chu mai a ni lo, moneitu inah mipuiin rei tawk kan la nghak zui, khaw lum uap churh hnuaiah hmanhmawh map lovin hunserh hmangtuin a hman zawhah, hmeichhe lam leh mipa lam chhungten lawmthu an han sawi ve ve leh te te a, chutah present neuh neuh thlengin pe tura a mal mala koh an han ni leh zui a! E khai! Khaw lum nen mipui huhang nen, an zan lam boruak thlengin duhthu a sam lo zo vek ang tihte a nia ka lo suangtuah pui rum rum tak tak ni. Ka ngaihtuah ngai loh lam tak, ka ngaihtuahnaa luah thartu tak i rawn thai lan avangin ka lo vei em em thin lam dah thain ka’n lo tuihnih ve a nih hi. Hman chuan vei tak zawk rawn comment ka tum ang.
Report this comment
May 31st, 2013 at 12:37 pm
Inneih ropui chu sawi loh thin ropui alawm kan ngaihsan. Inneih nia sum leh tha lam a hautak zia in sawi chhuak thiam kher mai.
Chhiatni pawh hian hetiang deuh hi ani. Mi pakhat rei ve a damloh hnu in a lu men a ngai a, a chhungte hah dan chu tute mahin an chhut lem lo aniang, a tuk leh zan pawn mi tlawmngai ten zan rei tawk thleng program an neih pui zui.
Hnam changkang zawk ah chuan lu an men ve ngai lo. Mithhi ruang hi mortuary ah an dah a, funeral pawh a tuk ah ani kher lo. Chhungte pawh an muhil mai a, in lamah an leng heng hung ngai lo, “wake” ceremony an nei anih loh chuan. Wake ceremony pawh hi zawi zawiin an bansan tawhin a lang.
YMA hall a vuina programme neih hi tha ka ti riau. Rem elh rem lo, kham kherek kara in hnawh hung, thusawitu tawng pawh hriat theih mang loh ai chuan a zahawm daih zawk. Tha taka vuina programme neih hnu hian an in lamah len kher kher tum lo ila. Mahse pensioner te, mihlim te leh lenna dang hre lo (laina leh thian hnaite bakah) erawh chu leng thin se a pawi lo. Midang beisei kher loh tur, ka tihna.
Report this comment
May 31st, 2013 at 4:57 pm
Ka rilruah a lian reng thin a, insiam that erawh kan la harsat ngawt chuan ka ring.
Report this comment
May 31st, 2013 at 5:01 pm
Ngaihtuahna a ti thui khawp mai. Ka lo tawn ve tawh a ni bawka a dik thawkhat tih ka hria.
Report this comment
May 31st, 2013 at 5:23 pm
Nupui neih ava huphurhawm ve le
Picnic spot velah pastor, chhungkhat leh thenrual tha te nen ti keuh ila ka duhdan a nia
zanlam pawh puitling chin chhugkhat thenrual tha te chu In lamah lo inkawm hrang se, a thalai ho pawh thiante nen khawiah emaw hmang hrang bawk ila(duhthusam :-D)
Report this comment
May 31st, 2013 at 5:37 pm
Kei pawh tih bung bung hi ka duh vak lo. Sawm kual duah ai chuan tlem rem rawm hi sawm ila, a vui turho hi chu an vui tho tho ni te hian ka hre ve a.
Report this comment
May 31st, 2013 at 6:31 pm
Material taka kan changkanna hi kan rilru hian a la pha mang lo ni hian a lang thin-kan rilru a puitlin tak tak hunah chuan a zia chho turah ngai ang.
Report this comment
May 31st, 2013 at 7:02 pm
Report this comment
May 31st, 2013 at 7:28 pm
3@ Chhuakling-in a sawi bawk khi kawk leh ta fo ila, hehe.. tawi te kim angreng phian si a ni tlat mai. Hei hi chipchiar takin sawi zui ta ila, a kim thawkhat ang. Man leh mual kan ineitir dan erawh sawi hmaih chi a ni lo ang.
Mizo danin palaite kan intir hmasa phawt a, palaite kaltlanga Engkim sawi fel a nih hnu-ah man inhlan a ni thin. Hei tak hi ka sawi chhuah duh pakhat chu a ni. Man ei chungchangah hian kan karkalak zau ta mah mahin Vai leh Sap thlengin kan fanute man kan eitir ta mai mai zel a. Mi ang pangngai chuan man eitir hi an duh dik sawt viau mai a, a lawmawm, mahse awm ang lo fe fea man ineitir hi an la tam viau reng a ni.
Report this comment
May 31st, 2013 at 7:40 pm
Good post
Pasal hi nei leh tur ni ta ila tih dan ka thiam ngawt ang. Chhungkhat leh thian hnai tak tak te chauh nen awlsam takin ka ti ang. Inneih na ropui tak hi nupa nun hlimna pawh ani ber love.
Kan lan ropui duh luat vanga nupui pasal nei ngam lo te pawh an awm ka ring hial mai. Kan ti hluai zel hlawm si a. A pawimawh ber ah chuan hmangaihna anih kha
Report this comment
May 31st, 2013 at 7:58 pm
Tha hle mai..
thehlei thing thiam tih khi an hman vak ka hrelo a,maimawm tuithiam tih erawh kan nei a,a dik vek tho ang cu mw,tum thuhmun a nih hmel..
Report this comment
May 31st, 2013 at 11:05 pm
Kei pek, Mizo inneihnaa, Hmeichhe man tlem leh lutuk hi, ka vei ru khawp mai. Hmanlai cheng 400/- kha, tunlaiah chuan, cheng sang 5,000/- vel tal te chu nise, tha tur hi a nia. Tin Swn man, cheng 40 phei hi chu a!!! ka fanuin sawn pai ta se, sawn man an rawn pek chuan, an nei duh dawn lo, tihna ala ni zui dawn si a, Cheng 40 lak ai chuan, “Kaal mai teh u” ka ti duh maiin ka ring deuh. Cheng Singkhat emaw, ‘engemaw chen chawm zui’ tih ang vel hi a tul tawhin ka hria. Khawi Society-ah pawh hian, mihausa leh miropuiho tihdan hi hausa leh ropui ni ve hawt lo hian, tih ve teh kan tum thin hi, a tullo khawp mai. Amaherawhchu, kan inneih tuma, Sap kawrfual thui lova, Puanchei ka ventir ta mai kha chu, tunhnu hian, ka ui leh ang reng si viau mai. Hawh tur pawh a awm reng si a. Damchhunga vawikhat chauh tawng tur, hunpui Ropui ber pakhat hi kan theih ang chinah chuan, Urhsun tak leh theih ang tawka lawm hi chu a phu ve e. Tunhmain Tlangvalten ‘Lengi’ man an tuak tauh tauh thin kha ani ngai a, tunlaiah chuan nikhat hlawh pawh a tling tawh si lo.
Report this comment
June 1st, 2013 at 2:07 am
Post tha tak, a tihhlawhtlinna erawh mahni atanga tan chat tur chi a ni thung.
“Hmeichhe man a tlem” tih hi chu sawi sawi tlak pawh a ni lo, an man lo tam pawh nise an hlutna a pun phah chuang lovang, Mizo hnam dan a nihna hi a hlutna zawk chu a ni e. Hman kumah pawh Mizo Customary Board lamin tihpun a tha lo maw tia ngun taka an ngaihtuah hnu pawhin, “India tangka hi hmeichhe hlutna tehna a ni lova, kan hnam dan kan ken hi a la hluin chhawm zel chi a ni e” tiin thu an lo titlu dim diam tawh mai. Hmeichhe hlutna hi an man (India Rupee) tam lama kan teh dawn a nih chuan tun ai hian an hlu lo sawt awm e a, KS hlutna an tehna pawh a ang rum rum dawn alawm mawle
Report this comment
June 1st, 2013 at 7:19 am
Kei ka neih ve dawn hunah chuan tih bung bung hi pehhel hram ka tum ang ka lo ti rilru ve neuh neuh a. Ka thei dawn emaw chu ka hre law. Hmeichhe man leh sawn man chungchangah hi chuan a tlem chu ka ti ve deuh. An hlutna keng lo angin lang mah se, sum leh pai hian mihringte nunah hlutna a nei tlat si alawm.
Report this comment
June 1st, 2013 at 5:09 pm
Hmeichhe man hi maw? Kan pi leh pute khan tunlai angin sum fai (cash) an hman ve loh avangin, silai te, sial te, darkhuang leh thil hlu an neih ang zawng kha an inpe mai thin. Thenkhat phei chuan an fanu manah, a mipa lam ro thil hlu eng emaw kha an phut lui tlat thin a ni awm e.
Hmanlai chuan hmeichhe man hi an ran vulh zinga lian leh ropui ber sial hmangin an bithliah mai thin. Hnamchawm nula thuam chhawm tur nei tha pangngaiin sial 5, thuam chhawm tur nei lovin 4 an man thin. Lal fanute erawh chuan se sawm an man thin thung. Tangka chelek a nih hnu-ah sial pakhatin cheng 40 a hu thin a ni. Tichuan Hnamchawm thuam nei lo cheng 123 an nih laiin thuam chhawm nei cheng 143 bithliah an ni thung thin. Hei hi tunlai milin han hisap ve chiah ula? Khatih laia sawn man kha sepui pakhat a ni a, tangka fai chuan cheng 40 a ni thung. Sum ala hlu viau tih a hriat theih. Tunlaiah sial pakhatin cheng engzat nge a hen tawk ka hre hauh law. Sial man chu tam tual tual mahse kan hmeichhiate man erawh a tangka faiin a ding ngar ngar mai zu nia!
Report this comment
June 1st, 2013 at 6:17 pm
18 boihapa
ka sawi tum tak a ni. mizo customary Law board member zingah hìan mipangai deuh an awm lo em ni le? Nge Thaibawih awmkhawm, hmeichhiate huphurh a, dan hmanga rahbeh tum ho zawk le? Hmeichhe man hi India pawisa hmanga teh an duh loh te chuan, ‘Tlai'(Sial nufa) in pe ang hmiang. Sial an vulh lo anih chuan, a leina tur ka hria e. Mahse cheng Singthum tal chu an pek a ngai ang. India pawisa an hnualsuat te chuan, India pawisa an hriat hmaa, mizo man leh mual kha hmang ang hmiang. Sawn man cheng sawmli hi Sial hen anih chuan, sial puitling thankin hi cheng singhnih aia tlawma lei tur in hmuh chuan, in vannei viau ang.
Report this comment
June 1st, 2013 at 11:23 pm
Hmeichhe man hi san deuh ta se, a awm ka ti viau ang.
Report this comment