mi(sual).com

Kan fapa zirna tur dapa Bangalore kan zin chu ka ṭhianpa u, Nutei’n (Prof. Lalrinawmi Ralte, B.A., B.D., M.Th., D.Min., D.Th.) hneh tak leh phal takin min lo thleng a, kan lawm takzet a ni. Ni 13 zet ka chamchilh lehnghal. Hmun dangah thleng ta ila ka hmuh miah loh tur mi pawimawh leh ṭangkai tak tak ka hmuh theih phah bawk nen, thlenin thlang fuh kan inti hle. Thlenin nu dawta Mizo kan hmuh hmasak ber pawh Bangalore Presbyterian Kohhran pastor ngat a ni.

Admission min tihpui turin Nutei chuan an tlangval fel te a’n be zung zung a, a tuk zinga Christ University kan thlen phei hnu lawkin Tv. Jonathana leh Nl. Tetei te an lo lang nghal a, min tihpuiin min kaihruai char char a, kan awlsam phah hle. Jonathana hi Aizawl mi hausa hlun Pu Buangthanga tupa a ni a, M.Sc. (Computer Science) zir zo chiah a ni a, tlangval fel, invawng tha thlap mai, a chetzia leh tawngkamah mihausa chhungkua-a mi a ni tih pawh hriat loh a ni. A u nula, MBA zir zo ṭep nen room pakhat an luah dun a. Kei ta pek chuan eirawng in inbawl chawp em ni? Engnge in hmeh ṭhin? tihte ka’n zawt chawt a. Dal leh alu an hmeh chhawk ṭhin tih te, sausage pawh an ei fo thin tih te min hrilh a; an taimakna leh tuarchhelna hi fakawm ka ti ngei mai. Tetei hi M.A. zir zo chiah, M.Phil. zir leh tum mek a ni a, zaithiam tak, Bangalore-a an choir lar tak, India ram pawnah pawh zaia rawngbawla fehchhuak ṭhinah member a ni ngat a ni. Ni khatah admission chu kan tifel ta nghal vek a.

Pathianni inkhawm hmain mi(sual) hlun, Dr. Mahminga Sailo-in min rawn pan vang vang a, kan inhmuh vawi khatna a ni nain ṭhian inkawmngeih sa ang maiin kan innel nghal sarh thei a, a nuam ngei mai. A hnu-ah pawh vawi khat min tlawh turin a lo kal leh a, mahse hmun danga zanriah eia kan thang hlan a ni hlauh a, kan inhmu thei ta lo. A hna lam avangin a zin bo a ngai sia, vawi khat bak kan inhmu thei ta rih lo a ni.

Weekend a tlak hnuin awmna tur lam kan han zawng leh a. Jonathana leh a thianpa, Tv. Peter-a, Lunglei tlangval fel, M.A.(Psychology) zir zo hlim chuan min han zawnpui leh vat vat a. Rei lo deuhah awmna tur PG (=Paying Guest) accommodation kan hmu leh ta mai a, Petera awm tawhna thin a lo ni nghe nghe a. Hemi ni chawhnu lam hian University-ah chuan an Vice-Chancellor, Colonel Father Doctor Thomas C. Mathew ka va hmu a, Pro VC leh Registrar te pawh ka hmu bawk (an VC hi sipai bang ngat a lo nia). Heng meeting hi International Department Director Dr. J.W. Lobo, MEA-a rei tak lo thawk tawh ṭhinin min arrange-sak a ni.

Tlai lamah Karnataka DGP&IGP, Pu Lalrokhuma Pachuau-te nupain zanriah kil turin min sawm a, min rawn lamtirin min thlah leh thlap nghe nghe. Pulit lal hlui, MP hlui ni bawk, Pu H.T. Sangliana te nupa an sawm tel bawk a, kan tlai ngei mai. Pu Sangliana hi Lok Sabha inthlan lo awm leh tura a plan te ka zawt a. ‘Min sawm leh chuan ka ding leh mai ang, Karnataka aṭang hian’ a ti. ‘Mizoram lam te hian an au nasa hle che a ni lo’m ni?’ ka’n ti ngei a. ‘A, chhuah hma hma hian min lo huphurh lawk nasa ṭhin a, Pu Hawla te khian’ a ti.

Kan cham chhungin ka ṭhiannu Machhungi (Dr. Hrangthan Chhungi, B.Com., B.D., M.Th., D.Th.), Executive Secretary, Commission on Tribals and Adivasis, National Council of Churches in India (NCCI) te nupain zanriah eiah min sawm bawk a. Hun hlimawm tak kan va hmang. An fanu Suzanne Sangi hi tun hnaia lehkhabu lar thar Facebook Phantom tih ziaktu hi a ni a, tunah kum 17 chauh a la ni. Novel dang a ziak leh mek. An nufa-thumin zai mawi takin min awi a, thiam leh thiam loin ka’n lo zawm ve ang awl awl a. Machhungi hi a vanglai na na na chuan zaithiam tak mai a ni ṭhin a, tunah pawh a la thiam vang vang khawp mai.

Pathianni ka cham hnuhnun zawk tlai lamah, Mizo Inkhawm te kan zawh vek hnuin, United Theological College (UTC)-a an inkhawmnaah ka va tel ve a (ka thlenin nuin min tel luihtir a ni mah zawk ang chu). Inkhawm zawhah min ko chhuak a, pangpar ṭawnkhawm mawi tak min pe nghe nghe. Mahse he inkhawmah hian Pathian sawina a awm apiangin ‘Father’ ti lo-in ‘Parent’ an ti tlat mai chuan min tinuam lo deuh ul mai. Lal Ṭawngṭainaah pawh ‘Our Parent in heaven…’ an ti ngat mai (Our Father…ti lo-in). Mizoram Presbyterian Kohhran te pawh active taka kan tel venaa hetianga an ti tlat mai hian ngaihtuahna a hruai deuh veng veng a ni.

Ka haw lamah excess baggage ka nei a. Tun hnai mai aṭang khan India ram airlines-te hian economy class tlawm chia baggage allowance hi 15 kg. lek an lo ti thar hi a lo nia. Bangalore aṭanga Mumbai thlawhna atan 5 kg. excess min chawitir a ni. Mumbai aṭanga Istanbul pannaah hi chuan Turkish Airlines-ah ka chuang a, anni hi chuan a hma aṭang rengin excess baggage a neih pawhin tihdan kan lo ngaihtuah ang an ti sa tawh a. Chu mai ni lo-in check-in counter-a duty pa khan ‘mut i duh takin kan tia, nangma seat bakah i bula seat 3 hi kan block-sak che a nia’ min lo la ti nghe nghe. Flight hi a khat viau bawk sia, min duhsakna chu a lawmawm duh ngei mai. Mahse han mut deuh zuah tak tak chu ka tum ta chuang lo a, a hnu deuhah phei chuan vaipa thau deuh pakhat hi a rawn insawn a, a hnar ring phian lehnghal!

Ka zin apiang mai hian hlawkna ka chhar thar ṭhin. Tun ṭum pawh hian mi thar tam tak ka hmelhriat bakah Bangalore kawngah chuan car ṭha leh man to ber ber pawh auto-rickshaw speed baka chakin an kal thei chuang bik lo tih te ka hriat thar leh tak kha.

Similar Posts:

• Bangalore Mizo hruaitu ten Dy. Speaker an kawm
• Bangalore Mizote Atangin Lehkhabu Thar
• Wishing All Da Best
• Ka nuih a za miah lo!
• 2012 October Fiamthu

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Friday, June 14th, 2013 at 12:15 am and is filed under Adventure, More than words. You can follow any responses to this entry through the RSS 2.0 feed. You can leave a response, or trackback from your own site.