SINIÂRTE HNENA KA PU SHAKESPEARE-A THURAWN :

June 25th, 2013 7:30 pm by dustin sampler14

Kan Baibul thianghlim chuan, nu leh pate thu zâwm chu an dam rei ang, tiin min zirtir a. Mahse, rei tak an nula/tlangval ang tih erawh a sawi lang tlat lo. He thu kim lo tak hi pu Shakespeare-a chuan a hun remchangah lain, kum 18 mi lek ni chunga double thosilen tu emaw a lo kaihthlakpui tawhna chu khuhmawi a tum teh chai nge ni, a sonnet bu, ‘Sonnets’ tiha a sonnet hmasa ber, ‘From Fairest Creatures We Desire Increase’ tihah chuan ngam sârhin tlangval damreite a rawn hrawk hrâih mai.

He sonnet-ah hian engvanga pawisawi lo, mi khawhar, tum lui reng pawh ni lo, tlangval siniârte hi rawn bei chiam mai nge a nih? Kan ti mai thei. Hei hi hre phawt ang: Elizabethan Era (1558-1603) a thuziakmite thang chhuah ve theihna leh an suangtuah lian ber chu, “Lal Nopui Hlan” (Royal Patronage) dawngtu nih kha a ni.

A chhan chu, chu chawimawina chuan – sum leh pai, venhimna leh zahawmna te a ken tel vang a ni. Heti a nih avang hian, pu Shakespeare-a pawh hian a khingpui dangte ang bawkin lalnu chawimawina dawn ve a chak hle a. Lehkha chhiartute suangtuahna a lak pen theihnan tiin, khatih hun laia thuziakmite thu ziahdan kalhmang (tradition) atanga a ziahfung thaidan her danglamin, ‘Mi tih loh dan’ ang deuhvin, a sonnet tam zawkah hian hmeichhia aiin mipa mawdel-ah a hmang ta zawk a ni.

Shakespeare-a hi a mawl chhe lo va, thurawn a pek turte tuiêk lek lek a fak phawtin, a tlar tir lamah heti hian an tan te te a :

“From fairest creatures we desire increase / That thereby beauty’s rose might never die,”

“Hmeltha sawiselbote hi tu leh fa nei turin a tha ve lem lote hi chuan kan duhsak thin. A chhan chu an hmelthatna hi chhuan tam tak thlenga hringfaten an chhawm zel kan duhsak thin a ni,” tiin an tan te te a, chutah fakna bawk a meiah an zial tel leh a,

“But as the riper should by time decease / His tender heir might bear his memory:”

“A taksa mawina chu leiin ei ral hun ala nei dawn a, mahse, a thatna chuan a chithlahteah hriatreng tur mawina chu ala hnutchhiah dawn a ni,” a tihna tluk a ni.

Mipain hmeichhia ni lova mipa vek sakruang mawina an sep zar zar mai hi, chhiartu thenkhatte chu an lo ip châwih châwih ngeiin a rinawm. Mahse, mipa zawng phur taka ekin khur laihtir dawn chuan nu berin a zanlam hun awl a hman thiam a ngai thin a ni, tih pu Shakespeare-a pawh hian a hre kar mai.

Chutah le, tlar 14 (sonnet) a tlar 4 lai faknana an hman zawh tawh hnu chuan, a kawpui a rawn lai chhuak tan ta! A tlar 5-na leh 6-naah chuan heti hian a thu kung chu an rawn phun sawn tan ta :

“But thou, contracted to thine own bright eyes / Feed’st thy light’s flame with self-substantial fuel,”

“Mahse, val man tam, I chhingmit paw no ruai maite kha I tan I hauh tung zel a, I tisaa mawina leh enna zozaite pawh I tam hnemtu atan I lem zo zel a,” tiin a zikno an rawn sik bal tan a. Chutah a hampui zen chho lehin tlar lehah an tawlh chho leh hret hret a :

“Making a famine where abundance lies
Thy self thy foe, to thy sweet self too cruel:
Thou that art now the world’s fresh ornament
And only herald to the gaudy spring,
Within thine own bud buriest thy content
And, tender churl, mak’st waste in niggarding:”

“Ei tur tam tak a awm laiin khawvel chu rimtamin in dah a, nang leh I hmelma, I duhawmna kha I nunrawnpui em a ni. He lei thil mawi zinga mawi ber, favang ni ti ngaihzawnawm tura puangdarhtu I sakhmel mawina chu I hma I sial luatah up bovin a awm ta! Fur tuihawkin pangpar til a len bo ang maiin, I mawina chu mawi leh ngai tawh lo turin I len bo zo ta a ni,” a tihna tluk a ni.

Mahni inngaihbel thei tam tak misual zingah pawh hian kan awm a, kan pu ber pawh hian a tha zawngin a inngaihbel ngeiin ka ring. Mahse, he sonnet atanga kan hmuh hmaih miah loh tur chu – pu Shakespeare-a hian hmel naran lo pu rei nazawng hi a ui vek kher lo va, vanduai vang maia leng rei tate pawh a ngaihsak vakin a lang lo. Mahse, taksa pianhmang leh hmel pu vannei bikte erawh a ui hliah hliah bik a ni.

Mi tam tak chuan hei sonnet hi khatih hunlaia lal chi leh kuang, nula leh tlangval hmeltha tak tak, in la hai-fai tak tak tihthaihnan leh sawithaih nana a ziah niin an ngai thin. Tin, mi thenkhat leh chuan, naupang te a nupui a lo neih tawhna hliahkhuh nana a ziah nite pawhin an sawi bawk. Mahse, a tawp akharna tlar hnih (couplet) hian a thahnemngaih vanga ziak a ni, tih chu a ti chiah hlein ka hria:

“Pity the world, or else this glutton be / To eat the world’s due, by the grave and thee.”

“Khawngaih he lei mihringte chungah hian zahngai hram ula, fa thar lo piang chhuak leh turten chen dâk chakawm khawp, hmelthatna an hmuh zel theih nan FA HRINSAK RAWH U. A nih loh zawng, mahni hmasial in lo ni dah a nge,” tiin duhthawk takin a tlang a kawm thei hram a ni.

Similar Posts:

Recent Posts:

10 Responses to “SINIÂRTE HNENA KA PU SHAKESPEARE-A THURAWN :”

  1. 1
    Lal Ch. Chhehlawn Says:

    Ngaihnawm hle mai..

    Report this comment

  2. 2
    Amewase Renthlei Says:

    mizotrawng thiam tak chu i ni phawt mai….. (Y)

    Report this comment

  3. 3
    Chawngthu Pa Says:

    Tha dap dap hle mai. Hei zet chu misual zinga tlangval siniarho inngaihbel atana post a nih hi le!

    Report this comment

  4. 4
    Joel Lrsa Says:

    Va ril ve

    Report this comment

  5. 5
    suaka Says:

    Saptawng aiin mizotawng i thiam …

    Report this comment

  6. 6
    chhana Says:

    6ha hle mai.

    Report this comment

  7. 7
    Awmtea Leo Khiangte Says:

    (Y)

    Report this comment

  8. 8
    Ruata 4 Cabin Says:

    ava han tha over em em ve le..Shakespear sonnet te hi chu a thuk dan leh a ril dan hi Mariana trench ang mai a ni a, heti taka fiah leh mawi leh chianga i rawn chinglet thiam hi mi namai lo tak i ni tih a lang chiang ngei mai..a dang pawh han ti zel teh,,poetry lam kaihhnawih (i rawn post dan chu a ni lo na a) hi hmuh tur a tlem thin si a..a awm chhun te hi chuan kan dangchar lutuk tur hi tlem chuan a ti ziaawm thin a nia.

    Report this comment

  9. 9
    malsta27 Says:

    Shakespeare a phenah hmeichhia a awm a,a thuziak tamtak pawh hmeichhe irawm chhuak tamtak a awm tih ai chuan hei chu dang leh deuh e…….tha khawp mai.

    Report this comment

  10. 10
    posicionar mi pagina web en google gratis Says:

    posicionar mi pagina web en google gratis

    SINIÂRTE HNENA KA PU SHAKESPEARE-A THURAWN : | mi(sual).com

    Report this comment

Leave a Reply

You must be logged in to post a comment.