Thuhretu nih

June 26th, 2013 8:30 am by chhana

Ram changkang ho-ah hian mi hi bus an chuan in a front seat-ah hian an thu duh mang hauh lo mai. A chhan chu accident-te lo tawk palh ta se thu hretua tan kha an duh lo a ni. A hma bera thu na na na chu thil hrechiang turah an ngai sia. Mahse, Mizoram Presbyterian Kohhran Hmeichheho ve thung chuan thuhretu nih hi an thupui a ni ve tlat thung. Mahse thu hretu nih hi a thatna lai Sam Lazarro thu ziak atang hian a hriat theih awm e:

“New York hmuna ka hnathawhna hmun ka pan na thin rel statioin-a ka kal lai chuan khua a thiang nuamin a hlimawm hle mai. Rel a lo kiu ruai ruaia, kawngkhar bula thutna awl awmah chuan thu chungin chanchinbu ka phawrh a. Engmah tihtur dang nei lovin chu rel-ah chuan 45 minutes vel ka thu dawn tih ka hriat avangin ka chanchinbu phawrh chu ka chhiar ta mial miala.”

“ Artist ka nih avangin mi nungchang leh chezia zir hi nuam ka tihzawng tak mai a nia. Chanchinbu chhiar pah chuan ka hawi chhuaka, ka thutna tlar lehlamah chuan nu upa lam tawh hi a thu a, a mutthlu a, rel pindan kil lamah chuan a lu chu a va nghata, kan inkarah chuan rawlthar sam dum, kum 18 mi awm vel hi thutna a chan loh avangin ban vuanin a ding a. A kut lehlamin lehkha ip tial hi a zakzeh bawk a. Min ep chiahah chuan nula hmeltha ve tak mai, kum 25 mi awm vel hi a thu bawk a.”

“Kawtthler 52-naah rel chu a ding zawk a. Ka thutna tlara nu pakhat mutthlu chu a lo harh bawk a. Mit nuai nawk nawk chung chuan rel atang chuan a chhuk ta a. A dawt chu Rockfeller center bul, kawtthler 50-na a nia. Chutah chuan chhuk an tam deuhva. Mahse mi tam hun pangngai aia a la hma deuh avangin chhuah inchuha innek buai vel a awm lem lo.”

“Min eptu nula pawh chuan a lehkha chhiar chu khup pahin a chhiar chin chhinchhiah nan lehkha them hi a zep zauhva. Nula hmeltha na na na chu en an lo nuam a. Hriatloh hlanin ka lo en ngun viau ni tur a ni, ngo tak sam sen lampang a nih nghe nghe thu ka hriat danah hian.”

“Nula chu a ding a, rel kawngka inhawng lam chu a pana. Ban vuana rawlthar ding chu a kal pel a.Vawilehkhatah a rawn hawi let thuta. ‘I zak nange? Naupang te si. Mi i han khawih khanglan chu le!!’ tih pahin a bag ah lai chuan a han vai a. Rawlthar lah chu kut lehlama ban vuan, lehlama thil zakzeh nei a nia. Inven pahin a ban vawnna chu a han la sawna. Rel din lai taka nghingah chuan a duh aiin a ban a vai nasa deuhva, nula hmuiah chuan a zu khak palha. Nula hmui chu a thi leh ta nghala.”

“Nula chu a thin a rim em em mai a. Rel atanga rawlthar tlanchhuak ta chu a umzuia. ‘Police, Police, hei min khawih a nia,’ tih pahin a au chelchul maia.”

“Thu lian tham tlinglova kan ngaih vek laiin rel atanga chhuk ve lo midangte chuan kan mit kan la sawn a. Thutna awl a tam tawh bawka. Thutna remin kan lehkha chhiarlai chu kan chhiarzawm leh hlawma. Tichuan, rel pawh chu a kiu leh ta ruai ruaia.”

“Mahse ka’n ngaihtuah chianga. Ka lehkha chhiar a tui ta hauh lo mai. Rawlthar bul chiaha ding ka nia. Nula kha a khawih lo tih ka hmu chiang si. Kut lehlama ban vuana, kut lehlama thil zakzeh chung khan rawlthara khan hmeichhe pawi khawih tur khawpin eng pawi mah a khawih thei lo hrim hrim. Tin, a hmui a va tauhnate pawh a invenna lamah a ni tih ka mit ngei hian a hmu chiang em em sia. ‘Nula khan police a auh fuh vaih chuan a thiamthu a’n sawi anga; police-ho chuan nula kha an lo tan ngei dawn sia. Ho deuhvah rawlthara kha an man mai awm mange’ tiin ka ngaihtuaha.”

“Ka’n hawi kuala, kha thil thleng kha keimah chiah hretu niin ka inhre ta tlat mai. Ka thutpuite chu thutna sawnte leh lo lut tharte an nia. Kei khan ka hmu chiang hle sia. ‘Ka thil hmuhte kha ka sawi chhuak dawn lovem ni?’ tihte thlengin ka ngaihtuah phah ta a ni.”

“Kawng lehlamah chuan ho ka tia. ‘Lo manin thiam loh lo chantir ta tehreng pawh ni se hremna na tak a ni thei lo. Tin, an man ngei a ni tih pawh ka hre lova. Rawlthara kha a tlan chak zawk daih awm sia. A tlanbo daih tawh ang’ tihte ka la ngaihtuah deuh deuhva. Ka hnathawhna hmun ka pan laita chuan ka ngaihtuah chhunzawm ta chiam maia.”

“Office-a ka hna ber chu chanchinbua chhuah tur milem ziah a ni mai. Dan pangngaiin ka dawhkan ka’n thutchilh nghala. Cartoon ka ziak dawna, eng dang mah ka ngaihtuah theih loh avangin ka ziak hleithei ta tlat lo mai. Nulain, ‘Police, Police,’ a ti tuar tuar mai kha ka bengah a cham reng mai.”

“Samari mitha ang maia hmelhriat miah loh han puih chu hna ropui tak chu ni se a chakawm letling a. A thu a nep si. Mi hnenah han sawi chhawng dawn ila ka sawina apiangah ho an ti anga, hun tamtak ka seng awm bawk sia. ‘Nula kha ka hre lova; ka hmelhriat hnaivai tak chhungte a lo nih phei chuan…’ te ka tia. Tukverhah ka dak ka dak ta ringawt maia. A tawpah rawlthara kha an man a nih chuan thu dik puanzar chu ka tih tur a ni tih ka hre ta. Rilru ka siam fel ta.”

“Chanchinbu mi nih chuan a har hran lo. Vawi li chiah phone ka han be kuala. Kha thil awmdan thlithlaitu police-te ka be fuh thei nghal mai. Mak ti takin, ‘I hmu a maw? Rawlthar kha tleirawl dan bawhchhiate hremna hmun (juvenile court) ah kan thawn daih tawh asin,’ an lo ti ta mai.”

“Juveline Court chu ka han be leha. Rawlthara hming chu Steven Larsen a ni tih ka hre thei a. A nu leh pa adress pawh ka la bawka. A nu ka han phone fuh meuh chuan thil awmzia a chiang ta.”

“Chhungkaw rethei em em mai hi an lo nia. Steven-a nu chuan a fapa tlanchhuahna tur takngial pawh a neih loh thu tap zawih zawih chungin min lo hrilha.”

“Puih duh mah ila, hetiang lam thil hi ka hre lo em em mai a. Ukil hmelhriat lah ka nei bawk si lo. Ka thawhpui nula pakhatin ukil thian George Fleary a neih chu engtin tin emaw inhriattir chawpin Steven-a aiawha ding turin ka va ngen chawt mai a. Thil awmzia ka han sawi chuan din sak a inhuam thu min lo hrilh ta a. Ka lawm hle mai.”

“Court-in thu a ngaihthlak ni, Thawhtanni chu a lo thleng a. Rorelna pindan chhunga kan luh hnuin Fleary-a chuan rawlthara chanchin chu min hrilha. He thil a thlen hmain Steven-a hi kum 15 mi a nih laiin a thiante nen car ruk tum thubuai an neih avangin police-te’n thu an zawhfiah tawh thu min hrilh a. Chu thu chu nula ukil hian a sawi chhuah ngei a rin thu a sawi tel bawk a.”

“Ka rilru a buai thar leh ta. Ka mit ngeiin ka hmu a, nula a khawih awm reng reng ka hmu lo. Hetia ka han ngaihtuah let pawh hian ka mitthlaah a la chiang em em a ni. Mahse Steven-a chu rawlthar sual kherkhiap zet mai hi a lo ni anga; a ruka thil tih zeuh zeuhte hi a thiam anga; misual hi ka humhim a lo ni mai angem? Tihte ka ngaihtuah leha. Ka rilru chu a buai angreng ta khawp mai. ‘Thil tul miah lovah, hun tamtak sengin misual ka humhim a lo nih teh chuan a pawi dawn mange,’ tihte ka ngaihtuah a.”

“Engpawh nise Steven-a hi thiam loh an chantir a nih chuan thla ruk atanga kum khat tan inah a tang thei a ni tih Fleary-a chuan min hrilh tel bawk a.”

“Rorel tan hmain Steven-a nu a lo thleng ve leh a. A mittui a parawl teuh mai a.”

“Steven-a chu sikul-a zirlai a nih leh nih loh ka zawt a, ka hlauh ang ngeiin,‘ni lo. A tet laiin sikul a bansan daih tawh a lawm,’ tiin min chhang lehnghal. ‘Mahse office pakhatah dak semin a inhlawh thina. Copywritter nih hi a chak ber chhu a ni,’ a tih zawm leh a. A pasal lo tel ve leh ve loh thu ka zawh hmain ‘Kan pa hi lawng chawlhna hmuna bungraw thiara inhlawh a nia, lo tel ve chu a duh lutuka. Mahse ni khat a chawlh paw’n kan nghei mai dawn sia. Chuvangin vawiin pawh vawiin pawh hian a lo tel hman dawn lo a ni,’ tiin phun sep sepin min hrilh a.”

“An retheih zia chu hai rual a ni lo. Mahse dan chu dan a ni. Chuvangin dan vek hmang lo chuan chhanchhuah ngaihna a awm silo.”

“Roreltu a lo lut a. Nula aiawha ding chuan thiam zet mai hian nula dikna lai awm chu sei zet mai a han sawia. Chumi zawhah roreltu chuan nula chu thil awmzia a’n zawt ve leha.”

“Insumkar leh zahpah nei miah lo ang mai hian nula chuan a nasa thei ang berin Steven-an a khawih dan chanchin chu a han sawi pap pap maia. Nula thusawi chu kan ring dawn a nih chuan mipain hmeichhe remtihna la hmasa lovin an taksa an han chulsak ang chiah pawh hi a ni lo. A awm mai mai lai chu Steven-a chuan a hmaiah a hnek bur ang hi a ni ber mai. Steven-a lah chu tawng ngaihna pawh hre lo hian a lo ni awm ringawt maia. Hnuai lam a bih reng ringawt mai a ni.”

“Nula thusawi chu an han ngaithla zel a. A mak em em mai a. Roreltu pawh chuan mak a ti deuh a ni maithei, ‘Sawi kual thui lovin I sawi tur tak sawi teh. Tin, hei he thil thleng hi a hmuna hmutu an awm bawk a nia…’ tiin nula thusawi chu a pawhchat ta zauh mai a.”

“Chutia thuhretu dang an awm tih an sawi veleh chuan nula chu a hawikual a. Kei chu min rawn hmu ta a. Min rawn hre nghal mai a. Chuveleh a awki a danglam nghal vek. A hmaa a thusawi ang pur pur khan a sawi ta lo. Chu mai nilovin a hmaa Steven-a kutthlakna a sawite kha ni chiah lova a rin thute a sawi kai ta.”

“Chutia nulain minute nga vel zet thu a sawi hnu chuan roreltu chuan nula aiawha ding leh Fleary-a chu a bula kovin a ti ti pui ta sep sep a. An lu an bu nghauh nghauh reng mai a. Chutah roreltu chuan, ‘Nula hian rilru doctor a mamawh zawk niin a lang. He case hi tihtawp a ni,’ a ti ta mai a.”

“Steven-a lawm lutuk chuan ka kut chu a rawn hmer vawng vawng maia.A nu lah chuan tap chungin min kuah bawka. Lawmthu min hrilh bang lo a ni.”

“Hetiang court-ah hian ka la kal ngai bik lova; a hretu ber pawh chuan engmah ka sawi hman ta mang si lova…a mak angreng zawk hle mai. Fleary-a chuan, ‘a ni reng asin, thuhretu hi rang takin kal thin se chuan ukil-te hian midikte hi a thlawna din sak kan hreh hleinem. Tin, thudik hi miin court-ah a nihna ang taka a rawn luhpui chuan a zahawm em em bika. I sawi loh paw’n huhang a ngah em kha,’ tiin min hrilh a.”

Thuhretuah tang lovin lo ngawih bo pui ta ila chuan nula khan a sawi uar tawlh tawlh anga, amah a inrintawk chhung chuan pawn lamah a rilru buaina a lang chhuak miah si lova, a thusawi kha ngaithlatu zawng zawngte khan an awih vek ngei ang. Thudik hmutu ka awm tih min han hmuh chiah khan a rilru buaina a lo lang chhuaka. Tichuan a taka ka dinpui pawh ngai miah lovin, a hun takah thudik chu a mahin a rawn inpuang chhuak ta mai a ni.” tia a thuziak ka chhiar tawh.

Mahse hetiang hi thil awm thei ni mahse mi tawng duh lutuk chuan mi ngei an hlawh tih chu kan pu Josepha atang khan a hriat mai awm e. A ni kha kum 17 mi a nih laiin a unaute ho nen an khawsa hova; a unaute thiltih sual a pa a hrilh thin a. Kha khan a mah an huatna a tizualin thah duhna thinlung hial an put phah a nih kha.

Chuvangin thuhretu a tan hi a hun leh hmun hriat a tha awm e.

Similar Posts:

Recent Posts:

17 Responses to “Thuhretu nih”

  1. 1
    Awmtea Leo Khiangte Says:

    Chhiar dawn ang.

    Report this comment

  2. 2
    Awmtea Leo Khiangte Says:

    Ka first ve… :-)

    Report this comment

  3. 3
    drake Says:

    Ram changkang i tih saw khawi ram nge, mini bus ah an chuang khat sin changkang ah chuan, mahni private vehicle ah lawm an chuan mai le, NY erawh parking man to nen metro leh bus in an kal in ka hria :-)

    Report this comment

  4. 4
    Sihtea Says:

    Chhiar man hla tak a ni hi a.
    “Ti a thu in ziak ka chhiar tawh”
    Tha dap dap khawp mai.

    Report this comment

  5. 5
    Borat Says:

    Mizoram chanchin emaw a sawi dawnn tiin ka chhiar chhin a, US lama chang ziah daih alo ni.

    Aizawl ah chuan witness (thuhretu tia lehlin mai hi a dik em aw? Lehkhathiam tak emaw hla thu hre tak pawh “thuhretu” anni si a) nih hautak zia an sawi thin. Traffic jam vang ani deuh ber.

    Ram dang nun lh Mizoram nun chu inang lo tak ala ni rih.

    Report this comment

  6. 6
    SHauzelSailo Says:

    Chhiar thra hle naa chu a tawpa I thuron hi, thuhretu ah trang suh u tihna ang anih hi.
    Kan pu Joseph atrang khan a hriat mai awm e te I ti sia.

    Kan pu Joseph’a kha a trawng duh ani reng reng lo, thudik hrilhna tur hnenah a soilo theilo ani e, mi dik tak leh ngil tak anihna a lang ani e.

    A trul chuan thih ngamin thuhretu diktak ah kan trang tur ani zawk, a tawp malsawmna chu kan Pu Joseph’a ah a lan chian kha.
    He ti zawngin titawpla a van fuh leh zual dawn em, I thil chhiar I ron ziah leh hi.

    Report this comment

  7. 7
    chhana Says:

    drake@ car nei ho pawh hi bus a chuan mai remchan zawkna chi-ah hian an chuang ve fo bawk a nia. Ka rawn sawi ho hi chu Israel, England, Italy leh Jordan tih vel a ni e.
    SHauzelSailo@ i ti dik khawp mai.

    Report this comment

  8. 8
    Sihtea Says:

    Ram dang nun leh, Mizoram a mi cheng te nun chu in ang lo tak a ni.
    Kan ngaih nep leh kan hmuh sit em em, kan duhduh hun hun a kan hnawh chhuah thin, Chin u nau te tak ngial pawh, rilru pui tlin na kawng ah kan tluk lo a ni ang. Chin state ah ZU an khap lo va, mah se ZU rui a buai na siam an awm ngai lo. Chu tih lai in,
    kei ni lam ve chu, ZU khap sak ngai khawp in, ZU in chin tawk hre lo rilru hniam kan la tam lu tuk. Pathian in, a mah ring tu te lak a a phut tlat chu.
    Khawvel thil bawlh hlawh lak a in thil fi hlim hi a ni si a. Khaw vel thil bawlh hlawh lak a tang a in thiar fi hlim chu peih lo vin, kan hmuh phak a khaw vel thil chu, dah bo kan tum ta zawk hlauh va. Chu chu Pathian thil tum a ni si lo va. Ni se lang chuan, Eden huan a chhia leh tha hriat na thing kha, a rah hma in, a vantirhkoh te tir in, a kih thluk tir ang a, a hal ral tir ngei ang. Mizo Kristian te chuan,
    Evi leh Adama kha thiam loh kan chan tir ve lo. Chhia leh tha hriat na thing zawk kha, a thiam lo zawk ah
    kan puh zawk a lawm. Pathian in, tun thleng in a mi te chu, khaw vel thil bawlh hlawh lak a tang a in thiar fi hlim tur in, a kohrang a. Khaw vel thil bawlh hlawh SUAL lak a tang a, a koh chhuah, a kohhran tak te chu, Pathian kohhan te an ni a. A kohhran te in pawl khawm chu, KOHHRAN ti a vuah an ni. Pathian kohhran hi kan lo ni ngut lo mai ang a. Sual lak a tang a, in thiar fi hlim tur kan nih lai in,
    kan hmuh phak lo vah, Sual dah bo kan tum ang he hu a.

    Report this comment

  9. 9
    Joel Lrsa Says:

    He thuziak hi “Lengzem” chanchinbuah ka chhiar tawh. Thu chheh dan leh engkim hi a inan diak diak avangin Copy Paste tih a chiang hle (1st Para. leh a tawp kharna tih loh khi chu)

    Mi thuziak kan copy paste chuan a source tarlan thin tur. “Tih ka chhiar tawh” tih ringawt hian a huap lo; a ngial a ngana kan type chhuak thei a nih chuan a source chu kan la hre chiang hle tihna a ni a, tarlan loh chhan a tling lo.

    Report this comment

  10. 10
    Charice_mizo Says:

    A van ngaihnawm em em..

    Report this comment

  11. 11
    Sihtea Says:

    Pi Charice i la dam gui gui zel a ni maw? Tun lai chu i reh riau mai
    i chhang chhe ve ta em ni?

    Report this comment

  12. 12
    chhana Says:

    Joel Lrsa@ nia tiraw.

    Report this comment

  13. 13
    Dr John Says:

    (Y) BVT khawp mai…

    Thuhretu (Witness) Dinhmun hi a pawimawh khawp mai…
    Thuhretu-a Tan Duhloh teh ngawt zawng a chi lovin ka hria.
    Thuhretu (especially eye-witness/spot-witness) te phei hi chu an Pawimawh nasa khawp mai. Court Thuremnaah ngat phei chuan Tuteemaw Nunna leh Thihna chu an Kut-a Innghat ang a ni hial a, an pawimawh tawp. Chuvangin, Thudik tak sawi ngam Thuhretu (Witness) hi Khawvel hian a mamawh a ni.

    Kohhran pawhin a ngai pawimawh khawp bawk. Dawt-a puh avanga Hrehawm taka an nun hmang ta te pawh an awm nual. Thuhretu Diklo leh Sual thiltih vang a ni. A Chhan chu Hriatpuitu (Witness) tellovin Thubuai a rem theih loh. He link-ah hian lut la, Chhiar mah teh an Pawimawhzia leh Thuhretu Dik-lo thiltih pawi zia pawh i hriat belh nual ang… https://drjohnhamlethlychho.blo.....hrist.html

    Report this comment

  14. 14
    Natala Says:

    A ngaihnawm kher mai. Entir anei tha si a (Y)

    Report this comment

  15. 15
    Kima Bawitlung Says:

    A ngaihnawm hle mai

    Report this comment

  16. 16
    https://Www.Ninjavouchers.co.uk/ Says:

    https://Www.Ninjavouchers.co.uk/

    Thuhretu nih | mi(sual).com

    Report this comment

  17. 17
    how to configure best best motorola wireless modem for Says:

    how to configure best best motorola wireless modem for

    Thuhretu nih | mi(sual).com

    Report this comment

Leave a Reply

You must be logged in to post a comment.