‘KAN NU’ TIH A CHHAL TUR KA NEI VE LO

July 8th, 2013 5:27 pm by BigDaddy Hmahmatea

I bialnu/ I bialpa kha in nu/in pa a ni meuh em…???

Tuk khat chu ka thiannu, ka ngainat leh ka ngaihhlut em em, Mizo tawng hmang duhtui tak thin hi zing chibai va bukin zan lama a muttui leh muttui loh te ka va zawt a, fiamthu hian “…kan pa nen kan inhmuthiamlo a ka mumang pawh a chhe vek…” hi a rawn ti a. Kei chuan chimawm chhuah in, “Pasal i nei tawh em ni?” ka va ti hram a. Ani chuan mahni ‘chas’ te hi ‘kan nu, kan pa’ tih a an sawi mai thin thu in min rawn chhang a. Ni e, tunlaiah chuan mahni ngaihzawng te hi ‘kan nu, kan pa’ an ti mai thin tawh tih chu ka hre ve tehmeuh mai, mahse hemi chungchang hi ka ngaihtuah zui a sawi duh ka nei ve tlat mai…

Tunhma hun atang tawhin ngaihzawng te sawina hi chi hrang hrang hman a lo ni tawh thin a. Kan pi leh pute hunlai kha chuan inngaizawng te hi lo lamah te an inlawm thin avangin ‘lawm nu, lawm pa’ tih ten an lo sawi thin a, hla thu lamah erawh chuan ‘ka di’ tih te’n sawi thin a ni. Heihi tun thleng hian hla thu lamah chuan hman a ni nghe nghe. Hun a lo kal zel a, tawngkam thar leh tawng ler(h) a lo piang ve zel a ngaihzawng sawina pawh chi hrang hrang lo piangin ‘bialnu, bialpa’ tih te, ‘tawih’ tih te leh a dang dang rawn piangin a tunlai deuh berah chuan ‘chas’ tih hi thalai te’n kan hman uar tak deuh ber chu a ni awm e.

Hetih lai hian mi thenkhat, mahni ngaihzawng te ‘kan nu, kan pa’ tih a sawi ching hi an awm ta tlat mai a, heihi Mizo tawnga ‘kan nu, kan pa’ tih hmanna tur hriat fuh loh vang a nih theih bakah a hmang tute tisa thila an inkungkaihna thleng a kum upa lam deuh tan phei chuan a tarlang ni a alan avangin he tawngkam hi hman fimkhur a tha hle a ni.

‘Kan nu, kan pa’ tih hi Mizo tawngah hian engtik lai atanga mahni nupui-pasal te sawi nana hmang tan chiah hi nge kan nih hre chiah lo mah ila mahni kawppui mahni nupui-pasal te sawi nana kan hman thin a ni a. Tunhma deuh kha chuan tlangval ten an bialnu mipat-hmeichhiatna an hman pui tawh an huamhauh deuh te leh hmeichhia pawh in mipa an chetsual pui tawh te sawi nan an lo hmang thin ve bawk a ni. A awmziaah chuan mipat-hmeichhiatna pawh an hmanpui tawh in nupui-pasal ang mai in an en tawh tihna a ni.

Hetiang anih laia tunlaia naupang te te rawn tleirawl/rawlthar chhuak awrh in emaw a nihloh leh nula tlangval te’n mahni ngaihzawng te sawi nan ‘kan nu, kan pa’ tih an hmang hi thil dik ber a ni in thil mawi ber a ni chiah dawn emi tih hi ngaihtuah tham fe a awm tlat a ni. Hetiang tawngkam kan hman hian tlema rual u deuh te ngaihah phei chuan a hmang tute khan mipat-hmeichhiatna te lo hmang tawh in nupa ang hial in an in en tawh angin an ngai ve thei tlat mai a ni.

Tawngkam thar te hi chu khawvel ania a la piang zel dawn a, chutih laiin kan tawngkam hman te hi kan fimkhur loh chuan mahni hnam tawng tidal tu kan nih theih bakah kan thil sawi dan atangin mi min en dan pawh a danglam daih thei a ni tih hi hre thar leh ila a duhawm khawp ang le. ‘In nu, in pa’ tur chu Pastor in a confirm thlap hunah chaw bel khat intawmin rizai pakhat in la pawt sawi dun anga tuktin zantin in la inzui duan duan mai ang. Hetiang hi a nih avang hian ngaihzawng te chu nei kur ve dep dup mah ila ka tun dinhmunah hi chuan ‘Kan nu’ tih a han chhal tur hi ka nei ve rih lo a ni e.

BigDaddy Hmahmatea

(R.Lalhmangaiha)

Kulikawn

14 Responses to “‘KAN NU’ TIH A CHHAL TUR KA NEI VE LO”

1
Pakak Says:
July 8th, 2013 at 5:47 pm
kei chu ka nei
chhiar chhiah ila

Report this comment
2
Goihkhama Says:
July 8th, 2013 at 5:51 pm
Post hi ka lutuk e, tawng ti dazat tu ni lovin ti hlu tu nih hi thalaite hian tum theuh ila a lawmawm khawp ang

Report this comment
3
maawma Says:
July 8th, 2013 at 6:02 pm
a va tha ve, Mizo tawng kan hman dan hi dik lo chu a tam tawh khawp ang, hetiang lam hi tial leh zeuh thin hi a pawi miah lo a nia. “Rapthlak” kan hmanna te hi a dik lo nasa lutuk tawh, kan tawng hi kan ti chingpen zo vek dawn

Report this comment
4
H.Vangchhia Says:
July 8th, 2013 at 6:37 pm
Khawvel a evolve zel ang hian tawng/tawngkau chheh pawh a evolve ve zel a ni. Nilo sela chuan English-ah pawh “thou art” ang chi emaw, chu aia hlui emaw kan la hmang ngeiin a rinawm. Mizo tawngah pawh chutiang chu a ni ve zel a ni. Thumal dik awmsa hman dik loh emaw, hming awmsa thlak tumna ang erawh hi chu a fuh lo thei khawpin ka hre thung (ie., Hmeichhia ni na reng a minu tih tum ang te etc.) hairehai

Report this comment
5
hlatekhua Says:
July 8th, 2013 at 7:56 pm
Nupui/pasal te kan nu/kan pa tih pawh hi dik ka ti chuang lo. Inneihna thuchhamah pawh ‘ka nupui/pasal tak ni turin…’ kan ti thlap a, a hnu lawka kan nu/kan pa tih leh daih si hi a dik lo a ni. Ka nupui/ka pasal kan ti lang lang ngam tur niin ka ngai.

Report this comment
6
Dr John Says:
July 8th, 2013 at 8:53 pm
“Ka Nu” tia ka’n chhiar char char chu le!

Gud Post

Report this comment
7
Joel Lrsa Says:
July 8th, 2013 at 9:56 pm
Excellent Post. Hetianga mizotawng vei mi kan la nei hi a vanneihthlak thin ngawt mai.

Tunlaia tleirawl te te, he tawngkam hmang ho hi chuan mipat hmeichhiatna lamah pawh an dai thui fu tawh hlawmin ka ring bawk e.

Report this comment
8
chhana Says:
July 9th, 2013 at 5:32 am
Kannu tia chhal tur ka nei ve ta.

Report this comment
9
Awmtea Leo Khiangte Says:
July 9th, 2013 at 7:13 am
Kan nu tia chhal tur kei pek hian ka la nei hauh lo! Post tha tak a ni e.

Report this comment
10
Charice_mizo Says:
July 9th, 2013 at 7:42 pm
Ka ngaihdan chiah. Chuan hei hi khawvel changkang zel vanga tawgkam/thumal lo evolve a ni ve lem lo. Hman atang tawhin kan nu, kan pa tih chu kan hre tawh thin. Kum 20 pawh la tling lo la nau ve tak tak ten an han hmang hi chu a zahthlak tlat. ka bialpa pawhin kan nu tia min sawi ka duh hek lo.

Tawngkam thar anga kan hmang duh a nih rau rau leh tunlai changkanna in a hrinchhuah ‘live-in’ a inngaizawngte hian an long-term ‘chhas’ te sawi nan hian hmang se a tha ang. zahpuiawm hlawm hian

Report this comment
11
Joyce dady Says:
July 9th, 2013 at 11:25 pm
Pu,HV a ve teh hlawl chu..!! I hairehai lai hriat a khat ta raih raih e..
He post chu tha hle mai..he tawngkam lo pian na chhan ber chu tu emaw tawngkam thlahdah tak,.mahni bialnu/bialpa te In ti ta tu lutuk in a sawi chhuah lo darh ta zel a ni..kei pawh he tawngkam a hmanglo tawp tur in an hman hian ka lo ip chawih chawih zel..

Report this comment
12
H.Vangchhia Says:
July 10th, 2013 at 9:39 am
Mizo tawng damlam riauna pakhat chu, hnam hming pangai awm reng mahse, tawngkam a sawi dan kan nei tel thei zel ang te, mi nihna kan sawina a ziak a thu awm nen a danglam theihna, awmze hrang miah si lova kan nei hi a ni awm e. EX: ka hnam hming hi Vangchhia a ni a, sawinaah chuan Vangchhe hnam ka ni mai. Nupui/pasal inkohnaah pawh “ka pasal” ti a sawi deuh bawl lovin, “kan pa/kan nu” tiin, Mizote chuan tawngkam hawihhawmah kan hmang thin.

Nupui a nu leh pa te hi “ka pu/ka pi” an nih laiin, sawinaah chuan, “Ka puzawn/ka pizawn” kan ti leh mai a. A dik hlel deuh ti kan awm anih pawhin ram pum a hman lar tak a ni a, Mizo tawng evolve-naah ngaih mai hi rilru hahdamna a nih zawk hmel. Hairehai

“Bialnu leh bialpa” erawh chu “kan nu/kan pa” a ni tawp lo,a daw duai a ni ang! Hairehai

Report this comment
13
century child Says:
July 10th, 2013 at 4:29 pm
Ka bialnu/bialpa tih ai chuan ‘kan nu/kan pa’ han tih hnap hian a fan ril deuh bik pawh ni mah na.
Entirnan : Charice_ka duat nen hian lo inngaizawng ta ila, ‘kan pa’ min han ti hnap se chuan a dawngtu tan pawh hian a nuam dawn veng2 em asin, weinch.
Post ka oppose hran lo ania

Report this comment
14
Dr Mahminga Sailo Says:
July 13th, 2013 at 10:43 pm
Ka pawm zawng tak a ni. Tawngkam thar piang zel hi a lawmawm, chutih laiin kan tawng tidazat zawng hi chu a tha lo reng a ni..

‘Kan nu’ tih tur hi zawng ve tan ila a tha ang e..

Ka lut khat bawk a, comment char char mai te’ng..

Report this comment