mi(sual).com

Introduction
Kan thu khel tur hi thu awlai lo tak a ni a. A original-a fiah fai kel tura kan ngaih laiin, Hebrai ţawngah pawh hian a fiah lutuk lova, Greek ţawngah a fiah deuh hlekin alang. Mizo-ţawngah phei chuan hmun tam takah chuan a fiah lo lehzual em aw ka ti hial!? Engpawhnise, Paula thuziak aţang hian ţan phawt mai ila, “Remna Pathian ngei chuan in pumin tithianghlim che u rawh se; Tin, in thlarau (pneumatos/spirit) leh, in rilru (psyche/soul) leh, in taksa (soma/body) chu kan Lalpa Isua Krista lo kal hunah chuan sawiselbovin apuma humhimin awm rawh se… Pathian thu hi a nung a, thil a ti thei a, khandaih hriam tawn eng ang ai pawhin a hriam a, nunna (psyche/soul) leh thlarau (pneumatos/spirit), ruhtuah leh thling (joints and marrow) phel hrang khawp hialin a chhun thei a, thinlunga ngaihtuah leh tum-te) hi a hre nghal thei (judges the thoughts and attitudes of the heart) a ni” (1Thes.5:23, Heb.4:12).

Achunga Bible thu aţang khian Bible Scholar-ten Mihring hi Thuah-thum-a siam (three concentric circles) niin an ngai a:-  (1). A pawnlang (outer) ber hi kan Taksa (Grk.soma/body) a ni a. He kan taksa hian kan hriatna 5-te (five senses) leh pawnlam thil hmuh theih leh khawih theih (contact all the things of the physical, material realm) te nen-a inlaichin-te a huam a. (2). A dawttu (middle) hi Rilru (Grk.psyche/soul) kan tih hi a ni a. Hei hian kan rilru (mind), emotion, intellectual, rational leh kan duhna/châkna (will/desire) zawng zawng (psychological realm) a huam thung. (3). A chhungril ber (inner circle) hi Thlarau (Grk.pneumatos/spirit) tia hriat a ni a. He kan thlarau chauh hian Pathian Thlarau a bepawp thei a, inzawmna a nei thei a, thlarau lam thil kaihhnawih zawng zawng (all the things of the spiritual realm)-ah chakna min pe thei a ni. {Dichotomy or Trichotomy? tih hi chu a ţul viau chuan a hrana sawi leh turah dah ta ila }

Engnge An Danglamna Chiah Le?
OT–ah chuan Nunna sawina atan thumal pahnih Hayah leh Nephesh hman a ni a. Hayah  chuan “nung” emaw “nunna nei” tihna a kawk thei a. Nephesh hian thinlung ngaihtuahna-te, châkna-te leh thil chi hrang hrang, mi nung nih tirtute kha a huam a. Nephesh awmzia diktak chu “Thaw chhuak” tihna a ni a. Mihring hi a thaw a tawp a nih chuan, a taksaa thil dang zawng zawng pawh a tawp nghal vek a, mitthi a ni mai ţhin (Deu.6:5,  Mk.1:30).

Mihring nunna (soul/rational) chuan Pathian rilru a hre thei lova, a tum hek lo! Pathianin min pek kan Thlarau (human spirit) chauh hian Pathian Thlarau chenna in a nih avangin, Thlarau Thianghlim mizia, chetzia, duhzawng te a hre thei a, a hnathawh-te a hrethiam a, a pawm thei ţhin (embrace/ discern/ manifest the pneumatic movements of the Holy Spirit).

Kan ngaihtuahna leh hriatna (feelings), emotions leh finna (intellect) te hi kan nunna (soul) nen hian a inzawm nghet êm êm a. Hengte hi Setana bumna leh tihderna leh tih-âtna lakah a tlu awl êm êm a (souls are open to the attack and deception of the Satan). Hei vang hian Pathian Tharau chu kan nunna (soul)-ah chuan ngampa taka a chen ngaihna a awm ta lo a ni. Kan thlarau hian mihringa Thlarau Thanghlim che vel leh remruatna te chu a ngaichang reng ţhin a. Kan rilru leh hriatna (hearts & consciences), theihna leh finna (abilities & intellect) te chu Pathian Thlarau duhzawngin a chettir ţhin a ni.

Kan nunna (soul) chuan, kan rilru & duhna (mind & will), emotions & intellect te hmangin Pathian Thlarau duhzawng kalh zelin hna a thawk thung a. Kan taksa leh thlarau inkarah a ţha lo zawngin nasa takin hna a thawk ţhin a. Hei vang hian, Thlarau Thianghlim aw leh hruaina aiin, khawvel rilru (carnal/flesh mind), siamthar loh rilru (un-renewed minds), leh Setana bum-âtna (trickeries of Satan) chuan a hneh zawk ta ţhin a ni.

Bible Hian A Thliar Hrang Chiah Em?
Bible chuan mihring hi thuah-thum-a siam a nih thu a sawi a (1Thes.5:23). Hmun engemaw zatah a ţhen-hranna chungchang chiang takin a sawi bawk (cf. Hebrews 4:12). Chuvangin, Taksa hi sawi ngai lova lumah dah ta ila. Bible-in Nunna leh Thlarau chiang taka a then-hran dan leh Thlarau lama kan Nitin nun-a a pawimawhzia hre reng chungin lo chhuizui ta lawk ila:-

Nunna (the soul)
Nunna tih ţawngkam hi Heb.nephesh or hayah aţanga lak a ni a, OT-ah vawi 780 chuang zet a chuang. A sawina dinhmun a zira awmze hrang (contextual meanings) a neih theih avangin Nunna tih ringawt hi chuan a fiah mawh deuh. KJV chuan Nephesh hi awmze hrang hrang 28 laiin a tarlang. NT-ah chuan Nunna (Grk.psyche/soul) tih hi vawi 103 chuang lai tarlan a ni. Tunlaia kan hman lâr tak “psychology” tih hi he Greek ţawng aţanga lak-chhawn a ni.

A chang chuan Nunna hi “minung” (mihring pumpui/soul/living person) sawi nan hman a ni (Ezek.18:20, 1Pet.3:20, Ex.1:5). Tin, ‘Nunna bik chauh’ (breathing/biological life in both humans & animals) sawina atan hman a ni bawk (cf. Gen.1:30, Mt.2:20, Rev.8:9, 12:11). Hei bakah hian, sawi tawh angin, “Rilru” (intellectual and emotional) pawh a huam tel ţhin bawk (Gen.1:26, 27:25, Job 30:16, Mt.10:28, Rev.6:9). He rilru hian Pathian rinlohna mai bakah, rilru hah leh buai, rilru dik lo leh bawlhlawhna etc., te a tih-chhuah ţhin avang leh Pathian duhzawng a do ţhin avangin kan Thlarau chu Lal Isua duhzawng a tihtir thei ţhin lo a ni.

Thlarau (the spirit)
Thlarau tih hi Heb.ruach (Spirit of God/Holy Spirit/spirit of man) aţanga lak a ni a. OT-ah hian vawi 378 chuang lai a chuang. Hebrai ţawnga a awmze dik tak chu “thaw” (breath), or “thli” (wind) tihna a ni.  NT-ah Grk.pneuma (spirit/soul/the word) hi vawi 379 chuang lai kan hmu. English Bible-a a hmanna hrang hrang khi a sawina dinhmun (contextual setting) en chunga hman a ni.

Thlarau (Holy Spirit or Human spirit) chu khawih theih leh hmuh theih loh (non-physical/ material being) a nih thu kan hmu a. Pathian chu Thlarau a ni a, Thlarau Thianghlim pawh Thlarau a ni a, Vantirhkohte pawh Thlarau an ni a, mihring pawhin thlarau hi kan nei (Gen.1:26-27, Lk.24:39, Mt.16:17, John 4:24, 2Kor.4:16, Heb.1:14, 1John 4:1). Thlarau hi nei vek mahila, Vantirhkohte leh Mihringte chuan Pathianna (deity) kan nei tel ve lo thung.

He Thlarau (human spirit), mihringa awm hi Pathian anpuia siam kan nihna tichiangtu leh nemnghettu pawimawh tak, Nunna nei ve tho Ramsa (animals)-te nen-a kan danglamna ber a ni a, Pathian nena inzawmna thuk tak min neih-tir thei tu a ni bawk. Solomona chuan, “Mihring rilru (ruach/human spirit) chu LALPA khawnvar a ni a, Pumpui chhungril lam zawng zawng pawh a en chhuak ţhin” (Thuf.20:27).

He Thlarau (human spirit) chauh hian Pathian rilru leh duhzawng-te a hre thei a, “Mihring thute chu mihring rilru, a chhunga awm vek lo chuan mihring zingah tuin nge hria ang? Chutiang bawkin Pathian thute chu Pathian Thlarau (Holy Spirit) vek lo chuan tuman an hre lo… Thlarau (Holy Spirit) ngei chuan keimahni thlarau (Pneuma/human spirit) nen Pathian fate kan ni tih min hriattir thin; Chutiang bawkin Thlarau (Holy Spirit) chuan kan chak lohnate a pui thin a; engtia ţawngţai tur nge tih kan hre si lo va; nimahsela Thlarau (Holy Spirit) chuan rum sawi hleih theih lovin min ţawngţaisak thin. Tin, Pathian duhzawng ang zelin mi thianghlimte chu a ţawngţaisak ţhin avangin rilrute Entu chuan Thlarau duhzawng chu a hre ţhin a ni” (Rom 8:16, 26-27, 1Kor.2:11).

He Thlarau (human spirit) ngei mai hi Chhandamna thu-ah pawh Lal Isua rawn target ber a ni a. He Thlarau hi Lalpa ni-a boral tura Hremhmun-a a kal lohna tura chhanchhuah/chhandam chu Kohhran pawhin hnapui berah a nei reng a ni (1Kor.5:5, 16:18, 2Kor.7:1, Jak.2:26).

Conclusion
Nunna sawina atana Hebrai ţawnga nephesh or hayah chuan a huam zau hle a, mihring leh ramsa nunna (human life & animal life) a huam tel thei ve ve a (Gen 1:20-24). Thlarau sawina atana hman ruach pawhin Pathian Thlarau leh Mihring Thlarau a huam thei ve ve a. Chuvangin, a sawina dinhmun aţang chauhvin a hriat hran theih. Greek ţawngah chuan a rawn chiang deuhva, a danglamna a rawn sawifiah nghal a. Paula sawidan aţang hian, Mihringa awm Nunna (Grk.psyche) leh Thlarau (Grk.pneuma) hi thil hrang ni mah sela, mihring thiamna leh hriatna aţang chuan ţhenhran leh sawihran a harsa hle. Mihring mihrinna chuan a thei lova, Pathian erawhchuan fel tak leh chiang takin a thliar-hrang thei a ni tih thu hi a sawi tum ber chu a ni (Heb.4:12).

Thlarau chu mihringah a awm a, mihring chuan thlarau a nei a, mahse mihring chu thlarau a ni lo thung! Nunna chu mihring min ti-nung a, kan rilru leh taksa min ti-chetu a ni. Kan nunna leh taksa hmangin mahni leh mihring-puite kan hria a, kan zawm a. Kan Thlarau erawhchuan, Pathian kan hria a, kan zawm a, thlarau lam thila siamthatna leh dintharlehnaah mawh a phur vek thung.

Lala chu a che vel i hmuh avang leh a thaw ri i hriat avangin minung, nunna nei a ni tih i chiang nghal a. Mahse, Lala chuan thlarau a nei a, a thlarau erawh i hmu thei si lo. Ramsate hian taksa leh nunna an nei a, thlarau erawh an nei lo. Lala chu a thih chuan a thlarau leh nunna chu amah-ah hmuh tur a awm tawh lovang. Mahse, ringtute chu taksa thara thuam kan ni ang a, hriat theih (recognizable) kan la ni bawk ang a (cf.Mt.17:3, 1Kor 15:51-55), keimahni erawhchu kan la ni reng dawn a ni (but you will be you).

Similar Posts:

• Thlarau thi theilo kan nei em?
• Immortality of soul
• Resurrection
• Mihringin thlarau a neilo !!
• Nunna thing vs a chhia leh a tha hriatna thing

Recent Posts:

• Tun Hun Hi
• BELH CHIAN HI KAN VA DAWLO EM
• Flight 370
• UNAU KAN NI
• MIZORAM CAPTAIN ZICO HI TUNGE?

This entry was posted on Sunday, August 4th, 2013 at 1:43 pm and is filed under Religion. You can follow any responses to this entry through the RSS 2.0 feed. You can leave a response, or trackback from your own site.