Setana’n Evi A Thlêm Dân {Sunday Pual}

August 25th, 2013 7:39 am by Dr John

A Style Ala Ngai Reng…
Thlêmnaa a tlûk avangin Evi kha dêm ngawt suh! Setana khan kan thlahtute kha awmze nei takin a lo thlêm a, Evi kha hmeichhia zawk mah nise, Setana thlêmna Îtawm tak te kha an nupa tan awmzia nei dawn êm-a a hriat avangin hnar phal lovin a zawm ta mai ni zawkin a lang. Thlêmna satliah-a tlu mai a ni lo tih hre hmasa ila. Setana hian kan Lalpa Isua ngei pawh kha Evi a thlêm dân ang style tho khan a thlêm ve a nih kha (cf. Matt.4:1-11). Keini pawh hi, kha a Style Pangngai Ûn tak mai hmang bawkin Setana hian min thlêm leh mêk a ni, fimkhurin thlêmnaa kan luh lohna turin i ţang sauh sauh teh ang u.

1. Taksa Mamawh Thil Hmangin…
Setanan min thlêmthlûk awlsamna ber pakhat chu taksa mamawh, ei tur leh silh leh fen hmangin a ni (Gen.3:1f). Taksa mamawh, ei leh in, silh leh fen-te hi min titlutu tam ber te an ni chawk. Ţhalaite min titlutu ber a ni hial awm e. Ei ngai loh ei te, hâk ngai loh hâk te, mi neih loh ang neih te hi mihring kan nih chhunga kan châk ber te an ni. Tunlai khawvel hri hlauhawm tak Corruption (sum leh pai eirukna, etc.) lama sawi neuh neuh kai-te hi an rilru leh dinhmun tur awm chu kan hre thei nghal mai awm e. Lal Isua ngei pawh a ril a ţâm khan ei tur hmang bawkin Setanan a rawn thlêm a nih kha (Mt.4:3). Taksa tana mamawh leh ţul hmanga Setana thlêmna kan tawh ţhin-te hi Lal Isua leh Evi lo tawn tawh hnu a ni. Chuvangin, Lal Isuan ‘Silh leh fen aiin nunna a hlu zawk’ a lo tih hialna chhan kha hei hi a ni (Mt.6:24-34).

2. Mimal Hamţhatna Tur Hmangin…
Setana thlêmna pahnihna chu mimal tisa leh thlarauva ţhatna tur leh hlawkna tur lam aţangin a ni thung. Evi khan ‘thi thei lo (immortal)’ nih a châk hle a nih kha (Gen.3:3-5). An nupaa chatuana an nun theih kha a thlahlel ngawih ngawih a ni. Lal Isua pawhin hetiang chiah thlêmna hi a lo tawk veleh bawk a. Biak In chhip aţanga a tlâk a ‘tihnât-a a awm loh tur’ thu kha Setana tawk-tarh a ni (Mt.4:6). Kan mimal sahimna tur te, hlawkna tur leh ţhatna tur kan ngaihtuah luat avangin thlarauvah malsawmna kan dawng thei lova, kan ţhang thei ţhin lo. Mahni in-hmangaihna leh hmasialna-in kan khat a, midangte ţhatna tur kan ngaihtuah chang lova, he nun hian nasa takin rinna kawngah min tichhia-in min tiţhuanawp ţhin a ni. Thlarau lam thilah pawh mahni hma kan sial lutuk chuan Pathian a ropui thei ngai lo. Thufingin, “Mihring hmelma chu mahni a ni” a tih hi a dik ngawt mai. Chuvangin, Bible chuan, “Mahni ta ta mai en lovin, midang ta pawh en ţheuh zawk rawh u”(Phil.2:4) a ti a ni.

3. Ropui Duhna…
Thlêmna kawng thumna chu, thiltihtheihna neih duhna hi a ni. Thitithei ber, hausa ber, ropui ber, lâr ber nih duhna kan neih hi Evi pawhin a dang zo ngang lo a ni (Gen.3:5). Pathian anga thiltihtheihna leh ropuina neih ve kha a châk a ni. Lalna te, thuneihna te, ropuina te, hausakna te hi khawvel miten an awh ber leh an zawn ber chu a ni. Lal Isuan Setana thlêmna a tawhna ah pawh khan ‘khawvel ram zawng zawng chunga thuneihna’ kha Setanan pek a tiam a nih kha. Do zawh a hâr dan tur hi kan chhut-thiam mai awm e. Lal Isuan khawvel ram zawng zawng a neih vek chuan Kros-a a thih a ngai dawn lova, awlsam takin a ta an ni vek mai dawn a ni!! Mahse, lei leh van Lal khan, Pa Pathian thiltum leh ruahman, leilung piantirh ata buatsaih tawh kha pensan a tum lo, a hnawl hmiah mai a nih kha!!

Bible Scholar pakhat chuan, “Setanan Kristian-te a hnehna hmanraw ropui ber ber pathum te chu Sum, Thiltihtheihna leh Hmeichhia (Money, Power and Woman) te hi an ni,”a ti thlawt mai! He thu hi ava dik tehlûl êm! A chunga Setana hmanraw hmang khian Pathian mi, duhawm tak tak leh thuhriltu ropui leh lâr tak tak-te pawh tihchhiatin an lo awm tawh a! Ţhenkhat chu sum (love of money)-in a tihchhiat an awm a, ţhenkhat hmeichhia (sexual immorality)-in a tihchhiat an awm a, ţhenkhat chu lârna duhna leh ropui duhna (power, status & popularity)-in a tihchhiat an awm bawk. Setana hmanrua hi a chimawmin, ava huatthlalaawm tehlul êm!!

Ngaihtuah Zui Atan…
Tunlai Aizawla Setana betuten ‘Setana an biakna chhan’ pawh kha thil pathum a awm a, “hausak, lâr leh exam-naa pass ţhat” an duh a nih kha! Ngaihtuahna seng thui deuh ta ila, Engah nge Chhungkuaa pafa leh unau-te hial Court-ah an inkhin a, Hmangaih taka innei Nupa te meuh nâ taka an intihbuai a, thin ţhawng dawt khawp tualthahna hial a thlen? A chunga kan sawi tak-te khi a chhan zingah a tel ngei ang tih a chiang a ni. Taksa mamawh thil ngaih pawimawh luat vang emaw, mahni mimal hamţhatna tur chauh ngaihtuah vang emaw, thitithei ber (nihna duh vang emaw), hausa ber (sum, ram in leh lo duh vang emaw), midang aia ropui ber, lâr ber nih duhna vang emaw tal chu a ni ngei ang. Kan thlahtu bul Evi te a thlêmna style kha Setana hian ala thlak lo tih a lang chiang hle a ni. Chuvangin, Setana min thlêmna lakah hian i inveng fimkhur ţheuh ang u.

5 Responses to “Setana’n Evi A Thlêm Dân {Sunday Pual}”

1
Pakak Says:
August 25th, 2013 at 9:40 am
dik khawp mai

Report this comment
2
mzvision Says:
August 25th, 2013 at 2:13 pm
Tunlaia Setana hman rim ber chu Materialism hi anih ka ring. Materialism hi milem biakna chikhat chu ani phawt mai.

Chutih rual chuan Setana hian Pathian thu duhtak maite hi Pathian thu hmangin a thlem keuh duh. Chutiangin mi duham lutuk te pawh an duhaman lam hmangin a thlem thin. Ropui duh te thunwihna duh lutuk te pawh chuti tho.

Setana hnehna tha ber chu Bible chhiar tam leh Pathian hnaih renga awm leh Tawngtai tam hian hnehna min pe thin.

Lalpa lawm zawng nih leh tih tum talh talh hi a pawimawh khawp mai.

Report this comment
3
chhana Says:
August 25th, 2013 at 9:07 pm
A bengvarthlakin a lawmawm e.

Report this comment
4
PKfanai Says:
August 26th, 2013 at 3:45 pm
A tha thin hle mai. Hmelmapa hriatchian leh a tactic hriatchian hian nasa takin lo inven dan tur leh beihlet dan tur min hriatthiam tir thei dawn a ni. Pu MZ-a Comment pawh

Report this comment
5
Sihtea Says:
August 26th, 2013 at 8:19 pm
I va han sawi fiah thiam em em ve maw le. Sawi belh tur reng rengka hre love.

Report this comment