Tunlai hian Mizoram a opposition party lian bera ngaih theih MNF Party chuan Mizoram ah sum leh pai a harsat avang leh kawng tinrengah kan ramin harsatna kan tawh avangin Aizawl khawpui chhungah ‘bandh’ neih an tum tih media hrang hrang chanchinbu, radio leh TV atangin kan hre thin a, kum 2013 MLA General Election kan hmachhawn hunt e a hnaih tawh avangin party tin ten tan pawh an la nasa tawha hetiang huaihawt an tum pawh hi an thiamawm viau e.
Amaherawhchu mihring kan nih chhung chuan heng pawisa leh nitin mamawh thil hi engtiklai pawha kan duh leh mamawh reng, neih belh kan duhna pawhin tawpin tai a neih theih loh thil an ni a chuvangin heng ka rawn sawi tak te khi enge kan dinhmun dik tak tih hriatna tur chuan tehfung dik hman ngai a ni a chutianga kan tih loh chuan inhnialna atthlak tawp hlei thei lo, awmze nei lova a tawngkam thiam zawk zawk dingchan na mai mai min thlenpui thin.
Sum leh pai bikah hian Mizoram dinhmun dik tak, mithiam te pawhin ram sum dinhmun an zirin tehfung a an hman ber atangin i bihchiang ang u. Hetianga kan tih dawn chuan hun hma lam leh tuna kan dinhmun hi a khaikhin loh theih loh avangin bandh huaihawt tum tu party MNF sawrkar lai nen ka han khaikhin teh ang.
Sawrkar hmasa, MNF sorkar lai aiin tun sawrkar hun chhung hian Mizoram economy pawh a thang nasa em em a MNF sorkar hun chhung 10th Plan (2002-2007) ah khan ram sum dinhmun tehna atana an hman ber Mizoram GDP Growth Rate kha 5.7% chauhin a than laiin Congress sorkar lai 11th Plan (2007-2012) ah chuan Mizoram GDP chu 11%in a thang . Mizoram GDP hi kum 2006-2007, 2007-2008 & 2008-2009 khan Rs. 328998, Rs. 381551 & Rs. 457711 Lakhs niin sawrkar tharah chuan kum 2010-2011, 2011-2012 & 2012-2013 ah khan Rs. 605770, Rs. 699140(A) & Rs 809186(Pr) Lakhs ah a chho ta dawr a ni. Mi mal in kum khata kan sum thawhchhuah sawi nan a an hman Per Capita Income pawh Rs. 38,582 (2008-2009) atangin Rs. 61732 (2012-2013) ah a kai chho ta dawr reng a ni.
Human Development Index hi hmasawnna hrang hrang zirna, hriselna, mipa leh hmeichhia te intluktlanna leh eizawnna kawnga an inthlauhna dan te tehfunga hmanga siam a ni a, Mizoram Human Development Index-a (Central lam Ministry of Human Resource Development in anmahni a an rawn conduct) kan score 0.651 hi India ram HDI 0.467 aiin a sang daih zawk a ni. He hi a chhan chu Socia l& Serivce Sector hrang hrang i.e., Education Dept., Health&Medical Dept., LAD, UD&PA, Cooperation, Agriculture & Allied Sector leh Sports&Youth Affairs Dept. a Pu Lal Thanhawla kaihhruai Congress sawrkar in thlei bik nei lova Mizoram hmasawnna tura nasa taka hma a lak a hlawhtlinna kan hmuh chhoh mek te avangin a ni.
Kum 2008 Mizoram MLA General Election ah khan mipui rilru ah sorkar dinglai thlak a tul tawh tak zet a ni tih a len em avangin kha inthlanna ah khan Congress party chuan MLA 32 lai neiin hneh takin kan chak ta a. Amaherawhchu Congress party in sawrkarna kan han chelh tan tirh khan Mizoram leiba tam lutuk mai kan state GDP (Ei-suma hmasawnna tehfung pawimawh ber leh hman lar ber pakhat chu ei leh bar, sum leh pai dehchhuah pun zelna/than zelna hi a ni.
Chumi dinhmun tehna chu sorkarin hmun hrang hrang atanga sum a lak luh tehfung atana an hman chu GDP tiin sawi a ni.) atanga chhut pawhin 103.5% lai mai a rochun anih kha, mahse sawrkar thar inrenchem thiamna leh sum hailuh thiamna avangin kum 5 dawn a sorkar hnu chuan kan leiba chu kan state GDP atanga chhutin 65.9% chauh ah a tlahniam thei ta a, Kum 2013-14 ah hian a tla hniam zel a 49.81% ah tla thla turin mithiam te’n an chhut a ni, hei hi 13th Finance Commission-in kan leiba zat tur a tuk zat aiin nasa takin kan leiba a tlem tial tial avangin a lawmawm hle a ni. Kum 2005-2008 inkar khan Mizoram leiba hi kan thawh chhuah atanga chhutin 113.8% niin leiba kan neih hnem luat avangin kan ram hi hnam dang hnenah sum leh pai a kan tluk chhiat avangin kan lo hralh hman lek lek tawh a ni.
Mizoram hi Kristian ram kan nih avang hian kan khawsak dan, nun dan leh rilrem zawng hi kan Kristianna hian a kaihruai nasa em em a, kan sakhaw puithuna te phei chu ngai pawimawh em em hnam kan ni. Kan puithuna a kan ngaihpawimawh ber pakhat leh kan inzirtir nasat em em chu ‘Sawma Pakhat’ kan thawhchhuah atanga Pathian hnena pek ve hi a ni. He kan in zirtirna hi Kohhran mipuite pawh hian kan zawm that tak leh tih mak mawha kan ngaih anih avang hian a kum telin kan thawhlawm pawh a pung in a pung thur thur thin reng a ni. Hemi anih avang hian Mizo chhungkaw sum thawhchhuah teh nan a tha ber chu kan thawhlawm/kan sawm a pakhat Pathian hnena kan hlan atang hian a ni.
Tun Congress sorkar chhung hian mipuiin Kohhran hnena an chhun luh an thawh lawm pawh MNF sorkar kum tawp Kum 2008-2009 aiin tun kum liamta Kum 2012-2013 khan a let aia tam in emaw a let dawnin a pung tih Synod, BCM, UPC, etc., record en atangin a hriat theih a ni. Entirnan Mizoram Kohhran lian ber ber te pahnih thawhlawm punchhoh dan hi han la ila, Synod thawhlawm belhkhawm hi Kum 2008-2009 khan Rs 504,154,901/- a ni a mahse Kum 2012-2013 ah erawh chuan Rs. 1,154,720,510/- ah a han pung chho ta dawr a, a punna hi a let aia tam Za ah Za Sawmhnih leh Pakua (129%) daih a ni. Hetiang bawk hian Baptist Church of Mizoram thilpek than chhoh dan hi a chhinchhiah tlak awm hle a ni, Kum 2008-2009 an thawhlawm belhkhawm chu Rs. 118,202,228 /- a ni a, lawmawm tak maiin Kum 2012-2013 ah chuan a let aia tam Rs. 248,405,479 /- ah a han pung chho ta dawr a ni, he a punna hi Za ah Za leh sawm (110%) a tling chho ta hial a ni.
Tuna kan sawi tak atang khian Mizoram mipui sum hailuh hi tun sorkar ah hian term hmasa MNF sawrkar lai aiin a letin a pung kan ti lo thei lo bakah, tun sawrkarah chuan Mizoram ah hian a letin pawisa a tam a ni. Hei hian Congress sorkar chu mirethei tan a ding leh mipui tana nghen tlak sawrkar anih piahlamah nasa takin Lalpa ram rawngbawlna mal a sawm tih tichiang tu a ni. Congress sawrkar hi huapzo sawrkar a va ni chiang tak em!
Hetiang taka Mizoram Economy than chakna chhan hi Pu Lal thanhawla kaihhruai Congress sawrkar inrenchem thiamna leh NLUP in hlawhtlinna a hmuh chhoh mek avang leh Congress sawrkar in a rual khai thei ang bera hmasawnna mipui hnena a thlen theihna turin hma a lak vang liau liau a ni. Hetiang hi thil anih avang hian MNF hovin bandh in huaihawt khan mipui tan harsatna insiam rual khan mahni mawng hlim mai mai in nih zia nangmahni in enchianna chang in hriat chuan in inhre chhuak anga in zak ngawt ang.
Source: BCM Hqrs, SYNOD Report compiled, Economic Survey, Mizoram 2012-13 Mizoram & Meeting of the Adviser (SP-NE), Planning Commission of India and Member Sectretary, State Planning Board: Report, Reserve Bank of India.
Similar Posts:
- MNF, BJP & RSS
- Election Day: Tu ber nge tling ta ang le?
- Congress hi ka vote tawh ngai dawn lo a ni.
- Cong. Minister hluiin MNF a zawm
- Mizoram sorkar leiba – “Vaibelchhe 3,611”
September 25th, 2013 at 10:01 am
central sum ringawta innghah hi chuan ziaawm a har khawp ang, tu pawh sorkar se.Sorkar hnathawkho hlawhah kan seng tam si, an niho lah lungawi chuang silo….
Report this comment
September 25th, 2013 at 12:30 pm
“Mizoram hi Kristian ram kan nih avang hian”
A lo ni maw? Ka lo notice lo ve.
Report this comment
September 25th, 2013 at 12:43 pm
GDP hi ram hmasawnna atana a teh na tha ber a ni lem lo. GDP sawiselna pakhat lo tar lang ila:
natural calamities ah GDP a sang. Hei hi chhiat tawhna a lo awm in a siam that lehna a pawisa leng vel avangin GDP hi nasa takin a sang thei. kawng chhia repair leh leimin avang a in sak that te, tui lian avang rehabilitation te hian GDP a tih san theih avangin GDP hi a han tlak em em lem lo. Per capita incomeah hian NLUP/ MIP scheme te leh scheme dang te pawh a tel ve thin bawk.
HDI erawh hi chu a hman tlak zawk mai thei.
A pawimawh berah chuan financial year closing ah hian sales tax leh VAT zat atang hian a chiang khawp ang. Kum kalta a Mizoram sawrkarin tax hrang hrang a lak khawm atang hian mipuiin pawisa kan neih leh neih loh chu a hriat theih ber ang, tin, kan state atang a chhuak pawh ahriat theih bawk ang a, chu chuan kan income dik tak a sawi thei bawk ang.
Mizoram khawpui ber pawhin seweage treatment a la neih loh lai hian HDI a san dan hi hriat a har khawp mai. A mi mal te te in an va zawt chhuak a nih dawn hi!
Report this comment
September 25th, 2013 at 1:46 pm
Ka hrethiam ve vak lova, mahse pawisa hi chu a tam chho telh telh, chutih rualin thil man pawh a sang zel a, 2006-a thingzai (4”x3”) cheng 105-a kan lei kha tunah chuan cheng 400 a tling der tawh…
Report this comment
September 25th, 2013 at 8:49 pm
A thu hmahruai tehduah atang khian a Congress nghal ruih mai a, chhiar chhuak lo mai ang, a sawi tur awmang chu a hriat mai.
Report this comment
September 26th, 2013 at 12:26 am
Pu Hawla hi term hmasa khan kum 15 a CM tawh a, tunah kum 5 a CM leh a, tunakan ram dinhmun chu heti hi a ni. Fak vak tur a awm lo va sawisel em em tur pawh a awm hran lo va. Tu pawh nise tum ren rawn chuan kum 20 chhung khan ram chu siam fe theih ang.
Term khatah hi chuan tumah hian tha takin an siam lo pawh a ni thei mahse system an duang hman tura ngaih a ni.
Pa sual a nih ka ring lo va, mahse ram a hruai thiam dan chin ramri a thleng tawhin ka hre deuh. Kan ram en hian GDP leh P lo hre lem lo pawh hian beisei chu an phak lo deuh chu a nih hmel, pawisate hi sawi tam chi pawh a ni chiah lo va, a tamna muala khawsaten ‘a tam’ in tih chuan hnial chiah ka ngai lem lo. Tam lohna chu a awm deuh a nih hmel a, Finance ministry lam pawh hian an zep lem lo chu a nih hi.
Engpawhnise, ram siam tum tak tak leh CM tha tak takte hi media hmangin kan lo hre ve bawk si a, chutih karah chuan kan CM hi han fakpui viau tur chein a thatna hrilh heuh heuh kan ni ve lo hi a buaithlak lai chu a ni. CM tha chu fak turin party mi leh sa nih a ngai lo, state dang daih a mi pawh kan fak mai chu nia, kan duh loh kan hnawl tawh ho hi chu hnampui zia deuhin lum 30 vel zel higap awm zel tawh se a tha khawp ang.
Report this comment
September 26th, 2013 at 10:36 am
Sumdawnna lama thawk ve e ti lo hian, sum leh pai lam ka buaipui lem loh avangin sum dinhmun i sawi khi ka hrethiam teh chiam lo va. Mahse, ka hma ami te’n an sawi ang khi ka pawm.
Ka sawi ve duh chu. Eng ang paw’n ramin hmasawnin, GDP leh per capita income pawh sang mah se, ni tin mamawh leh khawsakna atana pawimawh hlamchhiah a nih si chuan, HMASAWNNA KAWRAWNG niin ka hre tlat. Mizoram kawngpui zauh leh mam lam aia a awmsa pawh chhia leh bumboh tak mai te, eirawngbawlna gas cylinder pakhat to em em te, Lengpui airport kan chhuan ve em em, terminal chhung a/c that loh vanga lum uap churh te, sawi sen a ni lo. Ka phunchiar pawh a ni mahna.
Hetih rual hian, congress sawrkar hmalakna leh ram tana an thawhna erawh fakawm ka ti; mahse beisei san vangin ka’n tlak ve duah a nih khi..
Report this comment
September 26th, 2013 at 10:55 am
Kan sum dinhmun hian hma a sawn ka ti thei rih lo tlat.
Report this comment
September 26th, 2013 at 2:34 pm
Mizorama sum lo lut tam satliah ringawta lawm hi a fuh lem lo thei. Pawisa hlutna hi a kum telin a tlahniam reng bawk nen.
Chu ai chuan keimahni ngeiin sum kan thawhchhuah zat (dil chhuah zat ni lo-in) leh thawhchhuah dan te, kan sum hmuh kan hman danah te hian hmasawnna awm zawk se Mizo mipuite kan changkangin kawng tinrengah hma kan sawn zawk ngei ang.
Report this comment
September 26th, 2013 at 3:25 pm
Zotalk-a sorkar inrenchem dan a sawia a sawi hmasak ber kha tui bur lian an chhawp thin chu bur te-in an thlaktir tih kha a nia…nuih loh chu a har fu. Rilrua lang hmasa a sawi a ni maithei, thil dang pawh a hnuah chuan a sawi leh nual tho a.
Report this comment
September 27th, 2013 at 4:44 pm
Post tupa i hriat hmaih pakhat chu “Growth” tih leh :”Development” hi thil hrang daih a ni. Development mumal awm miah lo hian ram economy hi a thang ruak ruak thei tlat. Gujarat state hi example pakhat chu a ni. Human Development Index-a hniam em em si hian Investment, technology, infrastructure etc ah chuan an sang em em. Mahse an ram thingtlang mi retheite chuan an sawrkar hmalakna hi an chhawr ve miah lo. Khawpuia cheng, party mi leh sa, urban middle class, upper castes etc bakah corporate industry, business sector lamin an chhawr ber. Mizoram khawpui ber dawttu Lungleia Gas bur khat rS 2000 pawha lei tur awmlo khawpa mipuite rilru chavaia siamtu sawrkar, which happens to be Pu hawla kaihhruai hi a hma aiin corrupt nep deuh mahse chaklovin beisei a phak lo em em a ni tih hi zep thu a cheng lova. State pakhat nih ve mana ngaihpawimawh awm ber Infrastructure lamah ni se heti khawp hian kan hniama.Kan biakin neih len leh ropui hian kan State hmasawnna a hril lo tih kha sawi tel lawk ila.
Inthlan dawn tak tak hun tepter tawhah pawh vote duh vang tal pawhin heng mipui mamawh zualpui tak tak (gas leh electricity) te tal hi chu tlema to deuh hlek pawhin khaihlak nasa lutuk lova provide ve tuma tanlakna hi a awmlo reng renga, Aizawla anmahni Bangla a en kulha ei leh in tur hnianghnara an neih chhung chuan heeeeetah chhim tawp khua te chu a khaw tamin lo tamin thim hnuaiah thu kun reng mahse an pawiti therte lo tihna a ni a. Mihring mimal taka sual si lo hian policy dik lo lutuk leh mahni party affairs ringawt atchilhna thinlung atang hi chuan politician tha nih hi thil theih a ni lo.
A pawimawh berah chuan ramin hma a sawn em? tih tehna tha tak pakhat chu- a chhunga cheng mipuite an hlim em? an lungawi em ? tih hi a ni. Thil technical tak taka sawia, sawrkar mualphona leh a hlawhchhamna khuhbo tuma economic, financial terms, indicators etc hmanga kan sawi hi a tha e, thil rational taka approach-na chi khat a ni. Mhse kan thenawm lawkah chaw ngheilo chauh, rethei bakberh beisei tur neilo tih hriat ngawih ngawihten gas chu sawiloh khawnvartui hman tur takngial pawh phanga an awm laia, ram hruaitu lu, a chenna “Mizoram khawpui em em Aizawl”a tawm sen kuk reng mai, leh a kaihhruai sawrkar phuailuai tak faka, langsar leh huapzau (nge nghawng nei tham) taka (tun dinhmunah chuan) sawisel theitu awmchhun, opposition lam thiltih dem ringawta ramtanga engmah ti theilo mipuite rumna hmuh kan fo mai hi khua leh tui tha tihtur niin a lang lem love.
Report this comment
September 28th, 2013 at 3:34 am
Mizoram hian sum engtin nge a thawhchhuah ve theih zel dan tur ngaihtuahna lam hi ngaihtuahna awm thin sela aw…. ti daih teh ang!
Report this comment
September 28th, 2013 at 12:04 pm
Kan ram GDP-Total Outstanding Liabilities hi kum 2004, 2005, 2006, 2007, 2008 khan 112.1%, 108.9%, 106.2%, 101.9%, 103.5% a ni thin a mahse tunah chuan 49.81% ah tla thla in 13th Finance Commission in kan leiba neih tur atana a him chin 65% aiin a hniam daih tawh zawk a ni. Kan Human Development Index score pawh .651 niin National Average .467 aiin a sang daih zawk bawk. Ram economy tha leh tha lo tehfung atana an hman pawimawh ber ber thin GDP, HDI, GDP-Outstanding Liabilities en atangin kan ram hian hma kan sawn hle a ni tih a sawi loh theih loh. Mipui hnenah pawisa a sem dai zai zawk bawka a thleng hnem zawk bawk tih hriatna chu keini Mizoram Theocracy angah hi chuan kan thawhlawm tla atang hian en ila a dik deuh ber.
Report this comment
September 29th, 2013 at 3:41 pm
Bengvar thlak hle mai.
Report this comment
September 29th, 2013 at 10:46 pm
Congress lam hian in hmuh thelh thin, nangmahni tih emaw in tih thin chu 6th pay vanga sorkar hnathawk sum lak luh tam ta leh plan atanga in sem NLUP avanga sorkar hnathawk lovin sum an rotate tamtir hi a ni. Hei hian kan thawh chhuah a titam a ni lo va, sorkar chak tak hluai vanga hmasawnna a ni hek lo. MNF/MPCC lam ni lovin hmasawnna kawng hi kan zawh chho ve hret hret zel ang a, kan plan fund pawh a lian ve telh telh zel ang.
A pawimawh lai ber chu Mizoram-in engzat nge a thawh chhuah ve? tih hi a ni. Tun dinhmunah chuan Congress hi an che chhia ka ti chuang lo va, sum harsatna an tawk nasa deuh ni berin ka hria; chu chu anmahni thangah an awh vang nge an manage thiam loh vang nge a central lam atanga kan hmuh tur kan hmuh thuai loh vang erawh kei ve ngial hi chuan ka hre pha lo.
Report this comment
September 30th, 2013 at 3:37 am
Thianpa Muantea tawng chhuah chhun hi chu thlawp loh a har thin khawp mai.
Report this comment
September 30th, 2013 at 9:24 pm
Nimin thlan thutna a ka kalna ah chuan an chhungte thingtlang a mi chhiat tawhna avanga rawn zin te titi kan thutkhawm pah a ka ngaihthlak chu a nuam hle mai. NLUP in an khua leh a chhehvel a hna a tha lampang zawnga hna a thawh nasat zia ka ngaithla a, an khaw chhunga mi thatchhia ber pawh hnathawh avanga beiseina a neih avangin NLUP atanga tanpuina a dawn atangin bul an han tan leh tak tak a, a lo thatchhe awzawng lo mai beiseina a lo neih tawh loh vang mai mai a thatchhe awmin a lo awm zawk mai mai a ni a thla hmasa a Pathian ram atana a pek kan en sak a Cheng 2900/- lai mai a nih avang khan mak ti deuhin i thawhchhuah atanga sawma pakhat a ni tak tak a mi ka ti ngat an chhan chuan a lo ni tak tak reng bawk sia a ti. An khua leh a chhehvel ah hian sumo leh bus an neia nitin mai hian thlaithar hian a khat tan reng mai thu a sawi. Thingtlang atangin khawpui hamthat zawkna zawngin kan pem tlem ta khawp mai a leh a lingin khawpui atangin thingtlangah an rawn pem tawh zawk, thingtlangah hian kan awmhmunah ei awlsam takin kan hmu thei ve tawh tlat a ni tiin a sawi.
NLUP hi sawrkar hnathawk hlawh nen a intibuai zawngin an sawi thin a, sawrkar hnathawk hlawh pawh hek chu sawi loh NLUP pawisa la hman hman loh te hi sawrkar hnathawk hlawh pek nan an hmang hawh tih sawi tur a awm fo zawk. NLUP chungchang hi a chipchiar deuhin nakinah sawiho turin la rawn post zawk ila.
Nia, 6th pay Mizoram in kan hman avang hian Mizoram a pawisa ti tam tu lian ber zinga mi pakhat chu a ni teh meuh mai amaherawhchu 6th Pay implement tur hian sawrkar chak tak neih a ngai. Tun sawrkar ah chuan sawrkar hnathawk pawh an hlawh ah an buai tawh lo, hlawha buai ber te pawh mi hlawh ah ani an buai tawh zawk.
Report this comment
October 1st, 2013 at 8:56 am
mizoram chu mual hring neihah hma kan sawn nasa khawp mai,
khawdangte pawh …. “(L)”
kan misual tan tirh te kha chuan Aizawl lammual tih hrin dan tur te kha kan sawi ve laih laih thin a, tunah chuan a hring ta dup mai….
NLUP vanga sum la lut an tam ta hi a lawmawm hle bawk, mahse lo ti leh khauh thin ila….. dinchhuahpuilo tur tih hmuh ve reng hi chu aw….. engtia hmalakpui tur nge maw ni hlawm…ka lo vei ve det thin….huihaaa
Report this comment
October 1st, 2013 at 12:53 pm
Hmasawnna sustainable lo hi hmasawnna tak a tling lova, tih tak emah chuan 6th pay avanga sawrkar hnathawk hlawh tihsan a nih khan enge thleng? price rise leh inflation, chawhmeh man atanga silhfen engkim man to lutuk kha a ni lawm ni kan buaipui? mi rethei unorganised sector emaw agri or allied sector-a eizawng ve tawk tawk te tan ni khata chaw pangai (decent meal) pahnih puar leh khamkhawpa ei tur neih pawh a harsa hial a ni lawm ni? chutah eirawngbawlna gas ah takngial pawh kan thenawm State buai leh ralti Manipur ang maiin kan phang em em renga.
Congress flagship programme NLUP pawh hi party mi leh sa leh Congress tlawn thiam apiangin an hmang tangkai tih chu tlanghriat a ni a, ram thanlenna/hmasawnna duh tak takna thinlung atanga initiative la chu ni se, NLUP bakah emaw a aiah hrim hrim pawh khan sawrkar kha scheme dang tam tak a duang ang chu mawle. Social sector-a hma kan sawnna hi chu kan society kalphungin a zir vang (plus kristian kan nih vang) a ni. Vai society kulmuk leh kherkhiap lutuk pawhin hma an sawn nasa lutuk. Electricity, tui leh gas ah tal Mizoram hi kan intodelh hma chuan hma sawn kan inti thei ngai lovang. Mipui riltama siamtu sawrkar hi sawrkar tha a ni ngai bawk lovang.
Report this comment
October 2nd, 2013 at 1:47 am
Pakhatnaah chuan NLUP a ni emaw SEDP a ni emaw ‘sum sem’ policy hi tha ka ti lo em em a ni.
SEDP chu hman a la ni lo va, tuna kal lai mek NLUP chauh hi sawi theih kan nei rih. NLUP hian eng ang chiahin nge Mizoram sum dinhmunah nghawng a neih hi ngaihtuah chian a ngai. Kan plan size a tihlen phah em? Nge a titawt zawk? Kan budget a tel sa ni lo, sum bawm dang – DONER, NEC, PM special package, economic package, ldt. atanga lo lut a ni em? tih hi ngaihtuah tel a ngai.
NLUP hi sum bawm hran, thil danga khawih ve thiang lo, khawih hek a hneka sorkar hnathawk hlawh hai then hial zawk a ni em? Ngaihtuah tel a ngai. A nih chuan kan plan & budget-a mi ni lo, a hrana lo kal a nih ngei a ngai. Deptt. thenkhat hian anmahni budget chhungah hlawh tur 12 months an dah leng lo fo, chuta an phaina chu plan atangin an pawt thin. Plan tuikhur chu no lianpuiin lo thal ve ta se a kang rawk rawk ang a, sorkar hnathawkte hlawh tur indaih lohna pawh a kangpui ngei ang. Thil mak ve tak chu NLUP sem apianga sorkar hnathawk tam zawkten thla 3 dawn/a aia tam pawh hlawh an lo la ve thei lo ringawt te hi a nia. Mahse, rina lova ui buk sa, kumin sorkar kum tharah hian hlawh lak theih loh a la awm mang tlat lo, NLUP an sem tho sia! Inthlan a hnaih vang ni maw?
Engpawhnise, miin NLUP an lo hlawkpui a nih chuan a tha e, mahse kutdawh hnena sangha man dan zirtir lo va sangha pek chungchang an sawi thin hi ka hre chhuak thin. NOI
Report this comment
October 2nd, 2013 at 1:55 am
Correction (ka edit thei lo):-
*sorkar hnathawk hlawh atan hai then hial zawk a ni em?
Report this comment
October 9th, 2013 at 6:32 pm
NLUP hi source hran atanga lo kal a ni lo tih hi kan hre vek tawh emaw ka lo ti deuh mai a. Kan annual plan chhung atangin NLUP tur dahhran a, NLUP atana hman an dil anga central in an phal sak mai a ni a, hei vang hian Mizoram Sorkar Department hrang hrang te hnena budget semsawmna, sectoral allocation ah pawh khan Department 46 te kha chuan kum hmasa lama an hmuh ang an hmuh phak loh phah a nih kha. Hlawh pek theih loh vanga mualpho leh kha an hlauh em avang ni maw hlawh tur hrim hrim kha an budget hmuh atanga ruahman hmasa ber vek turin department tin an hriattir a nih bawk awm kha maw le.
Report this comment
October 12th, 2013 at 8:20 am
NLUP chungchang hi chu Laltanpuia Tpa te ang an party hruaitu te bawl kual vel mai mai theihin min rawn hrilhchian ve i tum a, post dang NLUP chungchanga Rajya Sabha chhungah Prime minister in in MP Lalhmingliana Unstarred question 4529 a chhanna kha i la chhiar loh chuan a hranin ka rawn post ang e.
Report this comment