Doctor hna hi service (rawngbawlna) a ni a, business (sumdawnna) a ni lo. Mi duhâm leh mahni ṭânghma hai mi tân doctor hna thawh ve ngawt chi a ni bawk hek lo. Miin sum leh pai neih ṭeuh a duh a, hlâwkna a beisei chuan commerce zir sela, sumdawng mai rawh se.
Mizoram doctor tam tak te hi chuan service rilru pu lovin business rilru an pu tlat. Businessman aiin doctor, sumdawng rilru pute hi an hlauhawm zâwk. Businessman chuan a customer-te tihlâwm a tum a, hlâwkna tam tak a hmuh theih nân tlâwm takin a insiam ṭhin. Doctor, sumdawng rilru pu te erawh mipuiten kan mamawh a, kan pan lo thei lo tih an inhriat chian êm avangin anmahni pantute rilru an hliam fo ṭhin.
Doctor, sumdawnna rilru pu te hian kan sum leh pai chauh min chhuh a ni lo va, kan rilru thlengin min rawk a ni. Anmahni aṭangin damna leh hahdamna kan beisei a; mahse, rilru na deuha min chhuah châng a tam mai. Sum tam tak sêng chungin ṭawngka vîn leh ngaihnobei lo zet zet kan dawng a, kan rilru min tihhnual châng a va tam êm! Min induh khumtute hi sum tam tham tak kan la pe ta deuh deuh zui!
6th Pay Commission Report (March, 2008)-a doctor-te NPA pêk an nih chhan chu – an zir hun chhûng a rei bîk vang leh hna an thawh hun chhûng (service) a tawi bîk vang te, office hun chhûng mai bâkah emergency thilah an thawh chhuah fo a ngaih vang te leh adt. Finance Department, Govt. of Mizoram-in 2010-a notification a tihchhuahah chuan sawrkar doctor-te basic pay + NPA hi Rs.85,000 p.m. aia sâng lo tûr a ni tih a chuang. NPA la lo ngam doctor chuan thla tin chêng sing chuang chu a hloh zêl dâwn niawm tak a ni. Chutih laiin private practice-na lamah thla tin chêng nuai dâwn emaw nuai chuang an la lût ziah thung. Thla tina NPA an lâk pawh hi mi tam tak thla khat hlawh aia tam a ni a, private practice-a an lâk luh ngat phei hi chu mi tam zâwk thla khat lâkluh aiin a sâng fe a ni.
Sawrkar doctor duat lai, private clinic neia non-practicing allowance la bawk si te hian mipui leh sawrkar min rawk a ni. Heti ang tih chîng doctor-te hi sawrkar hian chhui chhuak vat sela, a ṭûl a nih chuan an phu tâwk hremna pawh pe ngei bawk rawh se. An thil tihsual avang mai pawh ni lovin mipuite min rawkna avang pawhin hrem an phu a ni. Kum 2010 khân private clinic-a inentîr man Rs.100 aṭangin Rs.200-ah an tisâng a, mipui lam tân chuan na ṭalh ṭalh tak a ni. “Ka pu, hei ka result chu” tiin lehkha pan thlir thler kan hmuh a, an lo thlêk vung vung a, hawrawp chhe fahranin damdawi ei tûr tlêma zâwng an lo ziak a, Rs.200 chu kan chawi a ni dêr!
Doctor thiam tak tak an ther fup te hian kan thla a muang a, natna khirh tak pawh vei ila, dam leh ngei kan inbeisei ṭhin. An tel loa awm thei lo kan ni a, an kutah kan tlu lût a ni ber mai. Chu hun remchâng chu laa kan mamawh ngawih ngawihna chu mahni inhaivûr nâna an hman chuan kan chuti hlauh thung.
Hei erawh kan hriat atân a ṭha âwm e. Kan inentîr dâwn rêng rêngin serious lutuka kan tlûk thal tawp hma ngei hian civil hospital-ah ngei inentîr ṭhin ila. Test hrang hrang pawh civil hospital-ah ngei ni thei se. Mipuite mamawhna a sân avangin doctor-te hian clinic an hawng ṭhin. Chu ‘mamawhna’ chu remchângah lain ṭhenkhatin sumdawn nân an lo hmang a, a pawi hle. Sum leh pai ît vang maia NPA la chung renga private clinic hawngtute hi ram leh hnam hmêlma, mipui leh sawrkar rawktute an ni.
Full article chhiar duh tan vawiin (27.09.2013) Vanglaini-ah a rawn chhuak e.
Similar Posts:
- Doctor te hi an duham ta lutuk a ni em?
- Doctor rawn man hi a to lo e!
- Doctor hmeichhia aiin doctor mipa
- Doctor te u, in eng a thawl e!
- MHIP Sub-Hqrs. in Doctor Chetdan Duh Loh Vangin Thuchhuah Siam
September 28th, 2013 at 2:35 pm
A full chuan rawn paste law law awm. Man pek loh chuan article chu a chhiar theih si loh a.
Report this comment
September 28th, 2013 at 3:35 pm
Kei chuan total reform neih ka duh. Sorkar hian damdawiin enkawl tum lo law lawl se, doctor pawh pakhat mah ruai lo se. Chu aiah medical insurance nan mipuite tanpui ta zawk sela. Hetiang thil (felfai lo taka patient te dawr) a bo hmak mai ang.
Chutiang bawkin sorkar school hi khar vek se, school fee leh private school sakna tur ram tum zawk sela. Thinglang lamah 100 percent, khawpui ah 20-50 %
Report this comment
September 29th, 2013 at 7:39 am
Report this comment
September 30th, 2013 at 9:28 am
Ka hman lo char char a, post ka vil hman lo a, min lo hrethiam dawn nia.
Report this comment
September 30th, 2013 at 2:39 pm
Post tha tak a nih hi le.. Chutih rualin, ram kalphung hi a dik loh laklawh chuan khalh ngil tura beih fe a ngai thin si a. A diklo tih hretu awm mah se, dan keng kawngtu’n dan an lek kawh si loh a, mamawhtu leh pan duhtu an awm tlat si chuan, insumtheih te pawh a lo harsa ve a ni ang e. Kan officer tam zawkte pawisa hman dan te en a, kan ram dinhmun hetiang kan la ni lawi si te hian a nia ngaihtuahna tithui thin. Khawvel tak hi chu aww…
Report this comment
October 1st, 2013 at 9:34 am
Dr. Mahminga chu i pawi ka sawi em lo ang chu maw
Report this comment
October 1st, 2013 at 12:22 pm
Kei pawn Dr kan nei tih ka lo theihhlilh pek a, ka ziak zual ta awm mange ka lo ti ve chiah.
Report this comment
October 2nd, 2013 at 12:55 pm
A nithei khawp mai, thil reng reng hi kawngkhat chauh atang a chhut hi chuan a awmang thluam zel a. Mahse, kei chu Doctor nih hi ka tlin dawn lo chiang sa, min ngei fe fe an tam ngawt ang.
tren tren
Report this comment
October 2nd, 2013 at 4:07 pm
Doctor nih hi ka thiamna hian tlin mah se, ka mizia erawh chuan a tlin lo chiang sa.
Report this comment
October 4th, 2013 at 1:24 pm
Rawk tih takah chuan tun atanga darkar 3 (4.30 pm) hian state panga (Mizoram, Delhi, Rajasthan, Madhya Pradesh & Chattisgargh) ah assembly election neih hun tur an puang dawn an ti.
Mizoram ah pawh mipui sum chanai rawk tu tur thar an thlang dawn ani. Mipuite laka lal hrawt tur. A huphurhawm lawk asin.
Report this comment
October 4th, 2013 at 4:11 pm
Tlai khaw hnuah… Kei chu Ran Daktawr, chutah pawh sawrkar hna hmu zo lo..
Post khi ka thlawp khawp mai.., ka’n sawi zau ve deuh mai mai a. Sawi leh sawi hnu, kan politician leh thuneitute hi mipui vantlang buaina-ah hian an buai ve si lo va a buaithlak a ni…
Hmanni ka rawn haw khan MZU ka tlawh ve teh tlat a. Chumi tuma Maisek hnena ka sawi chu: MZU kawng a chhiat em em lai khan engatinge CM emaw eng minister emaw ber hi MZU programme pui tham tak huaihawt a khuallian in sawm loh ka’n tih hram kha. Vawi hnih vawi thum tal Minister motor han tang zauh zauh se, hmalakna chu a kal chak zawkin ka ring tlat..
(Ka OT lutuk lo’ng chu maw..)
Report this comment
October 4th, 2013 at 4:17 pm
Mihring pawh ran chi khat kan ni lawm ni? Homo sapien species. Kan nih chuan ran doctor vek innih mai chu.
Report this comment
October 4th, 2013 at 5:01 pm
Breaking News: December 4 ah Pu Zoramthanga Vs. Pu Lal Thanhawla an in boxing dawn. Midang chu sawi lo mai ang.
Report this comment
October 5th, 2013 at 2:32 pm
Doctor sawi takah chuan kan Doc_lib hian kar leh hian nupui a nei dawn a,
sawmna hi a la dah lo em ni? chutiang bawkin kan Vaiva pawh…tinge misualho hi inneih sawmna min pek loh chu le…. 
Report this comment
October 7th, 2013 at 12:44 pm
MZU kan luh ve lai khan India President khan convocation min rawn hmanpui dawn a, kawng chu an siam rang mai mai asin. Mahse, a daih rei lo ngang mai
Report this comment
October 9th, 2013 at 10:43 am
I sawi dik khawp mai. Doctor te hian dik lohna tam tak chu an nei mawlh ang. Amaherawhchu thil reng reng hian thlir dan side 2 tal a nei thin a, doctorte a zawng zawnga thiam loh chantir vek chu a fuh bik lo mai thei. A bul berah chuan ram rorelna fel lo leh dan kenkawh ngam lohna hian mi tin tan harsatna a thlen a nih hi. Sawrkar hian Medical Practice chungchangah pawh dan ang thlapin thil kalpui ngam se la chuan doctor yam tak pawh hian thawventhlak an ti ve thoin ka ring.
Report this comment
October 9th, 2013 at 10:05 pm
Ni e, ka thianpa doctor ve tho phei chuan “heti anga NPA la hi an awm lo ang” a ti. Mahse, Vanglaini research-ah a lang tlat si a, chuvangin a ti dik lotute kha ka rawn sawi chhan ta a ni.
Report this comment