KHAWKHERH
************
Kan naupan lai hian kan veng damah hian khawkherh kung hi a awm thin a, a rah tla hi kan zawng a, tuboh hian kan chhu keh a, chhung ami hi kan ei thin a, a hang in a hmui tui hle mai a mahse chhut keh chu har ve tak a ni. Tin, a kher chhuah pawh kha a har phian mai a, hriau lian te perek te hian kan kher chhuak thin a, ei tam chu a har ve khawp mai. Mak ve deuh mai chu he khawkherh kung bul deuh lawkah hian sava rahtlan hi kan chang thin a. Vawikhat chu sava ka chan lai hian thehlei hian khawkherh rah tla chu a chhar a, a ke hmalam hian a keng a, a kalsawn pui lai hi ka hmu a. A rah chu chhut keh a har ropui si a eng tin tak chuan ei dawn chu ni maw ka ti a, ka en reng a, tichuan chu thehlei chuan khawkherh rah chu a piah deuhah chuan a chawi phei le le a lei a lung pakhat lo pawng chhuakah chuan a va sawh a, a keh phek a, a chhung ami chua ei ta malh malh mai a. Mak ka ti khawp mai a. A ei zawh chuan a rah tla dang chu a rawn chhar leh a, a sawhna lung pangngaiah bawk chuan a va sawh leh keuh a, a sawh nat awmloh tehreng nen chuan a sawh keh leh phek a, a chung ami chu a ei leh ta a. Chutiang chuan vawi thum- vawi li lai a ti chu ka en reng a. Mak ka tih em em mai chu chu khawkherh rah tho chu a tla kan chhar a kan ei ve thin tho a, mahse tuboh a theihpatawp a kan chhut pawhin a chang chuan vawikhatnaah kan chhu keh zo lova, vawihnih-vawithum te chhut nawn a ngai thin kha a ni si a, thehlei te chuan an sawh nat dawn loh tehreng nen a sawh phel phek phek mai kha mak ve tak chu a ni. A sawhkehna lung chu ka va en a lung pangngai ve mai ni in ka hre bawk si a, Pathian hian a thilsiamte chaw atana a lo ruat ah hi chuan a engamah hian harsatna hi an tawk lo a nih dawn hi maw ka ti ta deuh a.
Kan naupan ve lai kha chuan Mizo khawkherh leh Vai khawkher a awm hran pawh kan lo hre ve ngai lo a, khawkherh han tih kha chuan a kawr sak tak mai, a chhunga eitur tlemte awm tui tak si kha a ni tawp mai a. Rawh hmui khan a tui phian lehnghal a, a hnu deuh khan Vai khawkherh kan tih ang hi a rawn chhuak ta a, a ei a lo awlsam in a tak a lo tam zawk bawk si a kan tetlai a kan khawkherh hriat kha chu a rawn luahlan hneh ta hle mai a. Kan ramah ngei pawh kawngsirah Vai hovin an thut pui ta fer fur mai.
Khawkherh, Sap sendang hovin a Walnut an tih hi hrelo kan awm kher awm love. A botanical name chu ‘Juglans’ tih a ni a chi hrang hrang a awm ve teuh mai a, Persian/English walnut an tih ho hi ‘Juglans regia’ an ti a heng ang chi hi Vai khawkherh kan tih ang chi, a kawr chhut keh pawh har vak lo, a chhung ami pawh kher chhuah ngai lemlova lakchhuah mai theih ang chi hi an ni a, heng bakah hian ei atan a hman chi tho ‘Eastern Black Walnut’ Juglans nigra an tih te leh ‘Juglans cinerea’ an tih ang chi te pawh a awm bawk a, kan rama awm ang chi khawkherh hi chu ramdangah chuan ei chi vaka an ngaih mangloh chi zu han ni tlat pek a mawle. Kan ram khawkherh leh mi ram khawkherh te hi chu ei a in awlsam hleih in a in tui hleih viau a ni.
Khawkherh hi single-seeded stone fruits an tih ang chi zing ami ni a, a rah hi a kawr chang tak nen nian a rah thuah thuah reng reng lo a, theirah pangngai ang tho hian a rah a, chumi chhungah chuan a mu angin a kawr sak tak a hi a awm leh chauh a ni a, a kawr hring kheh phei hi chuankut hi a dum vek a, silfai a harsa duh khawp mai. Amah ah hian proteins leh essential fatty acids te a awm tam hle a, 100 grams zel hian protein 15.2 grams leh fats 65.2 grams leh dietary fiber 6.7 grams a keng tel thei a, amah a protein awm te hian essential amino acids an keng tel bawk a ni. Heng hi taksa tan a that rual in a rah hi dahthat uluk loh chuan rannung teleh a hmuar te a lo awm ve thei a, chung chuan ‘aflatoxin’ siam in cancer siamtu te pawh an ni thei a ni. Khawkherh chi a lar zual deuh chu Persian/English Walnut an tih leh Black Walnut te hi an ni a. Persian walnut an tih ho hi Persia ram atanga rawn chhuak ni in Black Walnut antih ho thung hi chu North America lam atanga rawn chhuak an n thung a. Balck Walnut bik hi chu a kawr a sak a a tak a tlem a chuvangin hralh atan ang chuan an ching vak ngai lo a, mahse a chhung ami erawh hi chu a hmui tui zawk thung. Mizoram a kan khawkherh neih tunhnu a Mizo khawkherh kan tih tak ho pawh hi Black Walnut ang chi zing ami hi a ni ve a, heng ho bakah pawh hian Chinese Walnut te pawh a awm ve bawk.
Khawkherh hian ei atan bakah tangkaina a nei ve teuh mai a. Henglai a kan khawkherh ang chi pawh hi a hnah den sawm hi sangha vuak nan tepawh a hman ve theih a, thenkhat chuan a kawr leh a zung den sawp sawk sawk te pawh hi sangha vuak nan chuan an hmang thin bawk. A thing hi furniture siam nan a mawi duh em em mai bawk a, tin, thawmhnaw rawng dumna te pawh khawkherh atang hian an siam ve thin. Eitur atanah hi chuan a hlang a ei bakah hian eitur chi hrang hrang cake atanga ice-cream lam chi siam nan thlengin an hmang bawk. Black Walnut an tih ang chi hian cancer siamtu hrik a thah theih avangin cancer damdawi atan a tha a sawi a ni a, mahse hei erawh hi chu American Cancer Society in an sawi dan in scientific tak a finfiahna erawha awm lo thung an ti. Tin, heng bakah hian khawkherh hi ‘Bach Flower Remedies’ an tih mai hnim atanga damdawi an siam thin siam nan a an hnim hnah hman chi 38 te zingah pawh a tel ve a mahse heng ang chi hnim damdawi te hian natna an ti dam tak tak em tih finfiahna erawh a awm lo thung tih Cancer Research UK chuan an sawi ve bawk.
A enga pawh chu ni se khawkherh hrim hrim hi a tui a, tangkaina hrang hrang te a lo nei bawk a mihringte leh nungchate pawh hian tui kan ti tlang aniang tlan tu pawh hi kan tam em mai. Heng Vai khawkherh kan tih te hi chu kheh a awlsam a a chhung ami a tak pawh a tam rual rual in Mizo Khawkherh kan tih te lakah hi chuan a hang lo bik a, tin, a hmui pawh a hmui lo deuh zawk a. A kawr pawh hi phoro a khi deuh phak khawp a dah loh chuan sak ve tak mai tho a ni a, khawkherh hrim hrim hi thei kawr sak kan tih chi zing ami an ni miau mai a Mizo khawkherh a ni emaw Vai khawkher a ni emaw a chhung ami eitur chuan chhutkeh a beih ve fe a ngai ve tlat. Sap ho te phei chuan khawkherh chhut kehna bik tuboh anga siam te leh a cheh kehna bik te pawh an nei hial thin a ni. Khawkherh hi a pawnlam kawr a sak a, en mai chuan eitheih hmel pawh a pu lo zawk hial a, chhut keh loh chuan a chhung ami hi a ei mai theih loh a hmuam ral mai chi a ni ve reng reng lo a, ei tur chuan beih ve fe angai a, mahse han chhut keh chiah hian a chhungah eitur tui tak a lo awm ang chiah hian Pathianthu pawh hi a pawnlam atanga han en mai chuan a itawm loh a, a sak talh mai a, a luhchilh tak tak tu tan lo chuan a landan ringawtah chuan thatna leh duhawmna nei awm pawhin a lang lova, mahse han luhchilh a han belhchian tak tak chuan khawkherh a kawr sak tak chhungah eitutr tui tak a lo awm thin ang hian a taka luhchilh a nunpui tute tan chuan a chhungah rah duhawm tak mai a lo awm reng mai a chu chu kan dam lai ngei a Pathian malsawmna leh kan thih hnu a kan thlarau tan a CHATUAN A NUNNA hi a ni….
November 9th, 2013 at 10:55 pm
Bengvarthlak hle mai. Tehkhin thiam bawk si. Kei, ka ei peih mang tlat lo. A buaithlak emai. Ei tur chuan vir chilh a ngai in ka hria.
Report this comment
November 10th, 2013 at 7:50 am
Bengvarthlak hle mai.
Report this comment
November 11th, 2013 at 10:03 pm
A ngaihnawm hle mai. BigDaddy hian nitin thu ngaihnawm tak tak rawn ziak thin se ka ti khawp mai.
Report this comment
November 12th, 2013 at 11:45 am
Ngaihnawm hle mai
Report this comment
November 12th, 2013 at 1:43 pm
Kheh fel thiau hian salad ah te an telh thin a. Engtin kheh chu ni maw ka lo ti rilru thin. A khehna chu nei ve ta ila Mizo khawkherh hi a kheh ve theih angem aw?
Report this comment
November 12th, 2013 at 5:05 pm
A nia sin Pathian thilrel dan hi ngaihnawm leh hmuhnawm tham ania. Khawkherh kan lei chuan tuboh nen chemte nen veranda ah thutthleng hniam nen ka inchhawp a, ka ri bur bur zel. Puar khawp ei chu har tak ani…lol
Report this comment
November 13th, 2013 at 2:11 pm
Profile Picture ka la dahthiam ve lo engtinge in dah min lo hrilh teh u, thlalak chu ka dah tel thiam tawh a
Report this comment
November 19th, 2013 at 12:26 pm
Ngaihnawm hle mai….
Report this comment